កាលពីថ្ងៃពុធ លោកនាយករដ្ឋមន្ត្រី ហ៊ុន សែន បានណែនាំឲ្យមន្ត្រីជាន់ខ្ពស់ក្នុងគណបក្សប្រជាជនកម្ពុជា ចាប់ផ្ដើមដាក់ពាក្យបណ្ដឹងប្ដឹងលោក កឹម សុខា មេដឹកនាំគណបក្សសង្គ្រោះជាតិ ជុំវិញការចោទប្រកាន់របស់លោកថា គណបក្សកាន់អំណាចបានចូលរួមក្នុងយុទ្ធនាការបន្ទុចបង្អាក់ការព្យាយាមចូលរួមបោះឆ្នោតរបស់គណបក្សប្រឆាំង។
ពាក្យបណ្ដឹងប្ដឹងលោក កឹម សុខា នេះគឺជាពាក្យបណ្ដឹងទី៤ហើយ នៅមុនការបោះឆ្នោតជាតិដែលនឹងប្រព្រឹត្តទៅនៅថ្ងៃទី២៨ ខែកក្កដា ហើយនឹងបន្ថែមទៅលើការអះអាងរបស់គណបក្សប្រឆាំងថា តុលាការដែលស្ថិតក្រោមឥទ្ធិពលនយោបាយក្នុងប្រទេសកម្ពុជា កំពុងត្រូវបានប្រើប្រាស់ដើម្បីយាយីពួកគេនៅមុនការបោះឆ្នោត។
នៅក្នុងអ្វីដែលលោកមានប្រសាសន៍ថា ទំនងជាសុន្ទរកថាឥតព្រាងទុកលើកចុងក្រោយរបស់លោកនៅមុនពេលធ្វើយុទ្ធនាការឃោសនាបោះឆ្នោតដែលមានរយៈពេលមួយខែនោះ លោក ហ៊ុន សែន ក៏បានព្យាយាមបញ្ចុះបញ្ចូលគណបក្សសង្គ្រោះជាតិឲ្យធ្វើពហិការការបោះឆ្នោតនេះផងដែរ ហើយបានព្រមានថា សមាជិកធម្មតារបស់ពួកគេក៏នឹងត្រូវប្រឈមមុខនឹងតុលាការដែរ ប្រសិនបើពួកគេអះអាងថា គណបក្សប្រជាជនកាន់អំណាចកំពុងព្យាយាមបន្ទច់បង្អាក់ការចូលរួមបោះឆ្នោតរបស់ពួកគេ។
នៅពេលថ្លែងសុន្ទរកថានៅខេត្តកណ្ដាលកាលពីម្សិលមិញ លោក ហ៊ុន សែន បានបញ្ចេញឈ្មោះមន្ត្រីជាន់ខ្ពស់ពីររូបក្នុងគណបក្សប្រជាជនកម្ពុជាថា “សូម [ឃួន] សុដារី និងលោក សាយ ឈុំ ចាត់វិធានការតាមផ្លូវច្បាប់ និងដាក់ពាក្យប្ដឹងគាត់ [លោក សុខា] ឲ្យបានមុនការបោះឆ្នោត”។
លោក សាយ ឈុំ គឺជាអនុប្រធានព្រឹទ្ធសភាមកពីគណបក្សប្រជាជនកម្ពុជា ហើយលោកស្រី ឃួន សុដារី គឺជាអនុប្រធានរដ្ឋសភាមកពីគណបក្សប្រជាជនកម្ពុជា។
សំដៅដល់ការអះអាងរបស់គណបក្សប្រឆាំងដែលថា កិច្ចប្រជុំរបស់ពួកគេត្រូវបានអ្នកគាំទ្រគណបក្សប្រជាជនកម្ពុជារំខាននោះ លោក ហ៊ុន សែន បានមានប្រសាសន៍ថា “ លោកឯងនៅតែនិយាយថា គណបក្សប្រជាជនកម្ពុជាជាអ្នកបង្កើតរឿងនេះ ហើយលោកបានមានប្រសាសន៍ថា ជាស្នាដៃរបស់គណបក្សប្រជាជនកម្ពុជា អាចមានក្នុងពាក្យបណ្ដឹងបីផ្សេងទៀតប្ដឹងលោក កឹម សុខា”។
លោក ហ៊ុន សែន បានមានប្រសាសន៍ថា “យើងនឹងដាក់ពាក្យបណ្ដឹងទៅតុលាការឲ្យបានមុនការបោះឆ្នោត”។ លោកបានមានប្រសាសន៍បន្ថែមទៀតថា សមាជិកគណបក្សសង្គ្រោះជាតិផ្សេងៗទៀតដែលហ៊ានធ្វើការអះអាងដូចគ្នានេះ នឹងប្រឈមជោគវាសនាដូចគ្នា។
លោក ហ៊ុន សែន បានមានប្រសាសន៍ថា “ អ្នកណាក៏ដោយដែលស្ថិតនៅក្នុងគណបក្សនោះ ប្រសិនបើអ្នកឯងនិយាយថា គណបក្សប្រជាជនកម្ពុជាជាអ្នកបង្ក [ឧបទ្ទវហេតុទាំងនេះ] យើងនឹងដាក់ពាក្យបណ្ដឹង ប្រមូលពាក្យបណ្ដឹងទាំងអស់ រួមទាំងពាក្យបណ្ដឹងរបស់លោកតា ជុំ ម៉ី និងពាក្យបណ្ដឹងរបស់ម្ដាយប្រពន្ធចុងនោះផង”។ ប៉ុន្តែលោកមិនពន្យល់ថា ពាក្យបណ្ដឹងចំនួនពីរកាលពីលើកមុនដាក់ប្ដឹងលោក កឹម សុខា អាចរួមបញ្ចូលគ្នានៅក្នុងតុលាការមួយបានដោយរបៀបណានោះឡើយ។
លោក ហ៊ុន សែន ក៏បានមានប្រសាសន៍ដែរថា ទង្វើរបស់លោក កឹម សុខា មិនខុសគ្នាពីទង្វើរបស់លោក ប៊ីល គ្លីនតុន អតីតប្រធានាធិបតីអាមេរិក ដែលត្រូវបានជំនុំជម្រះរឿងលោកមានស្នេហាលួចលាក់ជាមួយស្ត្រីអ្នកហាត់ការម្នាក់នៅសេតវិមាននោះឡើយ។
លោកក៏បានវាយបកទៅអង្គការក្រៅរដ្ឋាភិបាលមិនបញ្ចេញឈ្មោះមួយចំនួនដែលបានរិះគន់ចំពោះការវាយប្រហារផ្ទាល់ខ្លួនរបស់លោកទៅលើលោក កឹម សុខា។ កាលពីសប្ដាហ៍កន្លងទៅ លោកនាយករដ្ឋមន្ត្រី ក៏បានចោទប្រកាន់លោក កឹម សុខា ពីបទផិតក្បត់ និងទិញព្រហ្មចារីយ៍ក្មេងស្រីអាយុ១៥ឆ្នាំម្នាក់ផងដែរ។
លោក ហ៊ុន សែន បានមានប្រសាសន៍ថា សូមបណ្ដាអង្គការក្រៅរដ្ឋាភិបាលដែលតែងតែនិយាយពីសហរដ្ឋអាមេរិក ប៉ុន្តែពេលនេះនិយាយថា ហ៊ុន សែន និងគណបក្សប្រជាជនកម្ពុជាកំពុងនិយាយពីបញ្ហាផ្ទាល់ខ្លួន…។ តើអ្នកឯងមានចងចាំរឿងអាស្រូវផ្លូវភេទរបស់លោក ប៊ីល គ្លីនតុន អតីតប្រធានាធិបតីអាមេរិកទេ? ដោយសារតែទឹកសមួយតំណក់នៅលើសំពត់របស់ស្ត្រីម្នាក់ លោក ប៊ីល គ្លីនតុន ត្រូវបានកោះហៅចូលសភាដើម្បីឆ្លើយបំភ្លឺ”។
លោក ហ៊ុន សែន បានសួរថា ហេតុអ្វីបានជាអ្នកឯងមិននិយាយផង [នៅពេលនោះ] ម៉េចក៏អ្នកឯងមិនយករឿងផ្ទាល់ខ្លួនប្រឆាំងនឹងលោក គ្លីនតុន ផង?”។
ថ្វីបើលោកចោទប្រកាន់ធ្ងន់ៗក្ដី ក៏លោកហ៊ុន សែន មិនបានផ្ដល់ភ័ស្តុតាងគាំទ្រការអះអាងរបស់លោកប្រឆាំងនឹងលោក កឹម សុខា ពាក់ព័ន្ធនឹងរឿងផិតក្បត់ ឬរឿងទិញព្រហ្មចារីយ៍ក្មេងស្រីជាអនីតិជនម្នាក់ឡើយ។
លោក ហ៊ុន សែន ក៏បានចំអកឲ្យគណបក្សសង្គ្រោះជាតិផងដែរចំពោះការគំរាមដកខ្លួនចេញពីការបោះឆ្នោតនៅពេលខាងមុខនេះដែរ ហើយបានអំពាវនាវទៅដល់អ្នកបោះឆ្នោតដែលគ្មានគម្រោងបោះឆ្នោតគាំទ្រគណបក្សប្រជាជនកម្ពុជា ឲ្យបោះឆ្នោតគាំទ្រគណបក្សណាក៏បាន លើកលែងតែគណបក្សសង្គ្រោះជាតិ។
លោក ហ៊ុន សែន បានមានប្រសាសន៍សំដៅដល់សន្និសីទសារព័ត៌មានតាមការគ្រោងទុកមួយនៅថ្ងៃនេះ ដែលក្នុងនោះគណបក្សសង្គ្រោះជាតិនឹងប្រកាសថា តើខ្លួននឹងចូលរួមប្រកួតប្រជែងក្នុងការបោះឆ្នោតជាតិដែលនឹងប្រព្រឹត្តទៅនៅខែកក្កដាឬក៏អត់នោះថា “ពួកគេនឹងរៀបចំសន្និសីទសារព័ត៌មានមួយនៅថ្ងៃស្អែក”។
លោកមានប្រសាសន៍ថា “ ខ្ញុំសូមអំពាវនាវឲ្យលោកឯងទាំងអស់គ្នាធ្វើពហិការការបោះឆ្នោតនេះ ប្រសិនបើលោកឯងហ៊ាន”។
លោក ហ៊ុន សែន បានមានប្រសាសន៍សំដៅដល់គណបក្សតូចៗផ្សេងទៀតដែលចុះឈ្មោះបោះឆ្នោតនៅថ្ងៃទី២៨ ខែកក្កដា ថា “ បើគ្មានគណបក្សលោកឯងទេ យើងនឹងនៅតែបោះឆ្នោតដដែល។ យើងនៅមានគណបក្សនយោបាយប្រាំមួយទៀត”។
លោកបានមានប្រសាសន៍ថា “ដូច្នេះសូមប្រជាពលរដ្ឋទាំងអស់ដែលគាំទ្រគណបក្សប្រឆាំង កុំបោះឆ្នោតគាំទ្រគណបក្សប្រឆាំងអី បោះឆ្នោតគាំទ្រគណបក្សប្រជាជនកម្ពុជាវិញ។ ប្រសិនបើបងប្អូនមិនចូលចិត្តគណបក្សប្រជាជនកម្ពុជាទេ បោះឆ្នោតគាំទ្រគណបក្សណាមួយក៏បានក្នុងចំណោមគណបក្សចំនួនប្រាំមួយផ្សេងទៀត”។
សមាជិកសភាគណបក្សប្រឆាំងចំនួន២៧រូបមកពីគណបក្ស សម រង្ស៊ី និងគណបក្សសិទ្ធិមនុស្ស ដែលកំពុងឈរឈ្មោះជាបេក្ខជនតំណាងរាស្ត្ររបស់គណបក្សសង្គ្រោះជាតិត្រូវបានដកចេញ ពីមុខតំណែងសមាជិកសភារបស់ខ្លួននៅក្នុងការបោះឆ្នោតរបស់រដ្ឋសភាដឹកនាំដោយគណបក្សប្រជាជនកម្ពុជា កាលពីថ្ងៃទី៦ ខែមិថុនា។
សមាជិកសភាមកពីគណបក្សប្រជាជនកម្ពុជា បាននិយាយការពារការបណ្ដេញសមាជិកសភាយ៉ាងច្រើននេះ ដោយលើកឡើងថា ច្បាប់បោះឆ្នោត និងបទបញ្ជាផ្ទៃក្នុងហាមសមាជិកសភាមិនឲ្យចូលរួមក្នុងគណបក្សនយោបាយពីរក្នុងពេលតែមួយ។ បច្ចុប្បន្ន គណបក្សប្រជាជនកម្ពុជា មានអាសនៈចំនួនន៩០នៅក្នុងរដ្ឋសភាដែលមាន១២៣អាសនៈ រីឯគណបក្សហ៊្វុនស៊ិនប៉ិច ដែលជាដៃគូក្នុងរដ្ឋាភិបាលចម្រុះរបស់គណបក្សកាន់អំណាច មានពីរអាសនៈ។
កាលពីម្សិលមិញ លោក ហ៊ុន សែន បាននិយាយពីលោក សម រង្ស៊ី មេដឹកនាំគណបក្សប្រឆាំងនិរទេសខ្លួនឯង ដែលបានគៀងគរអ្នកគាំទ្ររបស់លោកកាលពីសប្ដាហ៍មុនឲ្យចុចលើពាក្យ “like” នៅលើទំព័រហ្វេសប៊ុករបស់លោកក្នុងយុទ្ធនាការមួយដើម្បីដណ្ដើមប្រជាប្រិយភាពជាមួយលោក ហ៊ុន សែន តាមប្រព័ន្ធអ៊ីនធើណិត។ លោក ហ៊ុន សែនមានប្រសាសន៍ថា លោកមិនដែលប្រើហ្វេសប៊ុកទេ ហើយបានចំអកឲ្យលោក សម រង្ស៊ី ចំពោះការឈ្នះការប្រជែងតែម្នាក់ឯង។ លោក ហ៊ុន សែន បានមានប្រសាសន៍ថា “លោកឯងឈ្នះដោយការឈរឈ្មោះតែម្នាក់ឯង ខ្ញុំមិនទាំងមានហ្វេសប៊ុកផងទេ”។ លោកបានមានប្រសាសន៍ទៀតថា លោកបានបញ្ជាក់ជាមួយគណៈរដ្ឋមន្ត្រីរបស់លោកកុំឲ្យពួកគេដាក់ព័ត៌មានផ្ទាល់ខ្លួនណាមួយ ឬទំព័រហ្វេសប៊ុកដែលអះអាងថា តំណាងឲ្យនាយករដ្ឋមន្ត្រីឡើយ។
លោក ហ៊ុន សែន បានមានប្រសាសន៍ថា “ខ្ញុំសូមបញ្ជូនសារមួយទៅដល់យុវវ័យទាំងអស់ដែលចូលរួមនៅក្នុងវេទិកាហ្វេសប៊ុកទាំងអស់ថា គាត់ [លោក សម រង្ស៊ី] កំពុងបោកប្រាស់ ដើម្បីទទួលបានការចូលចិត្តពីក្មួយៗ… ខ្ញុំគ្មានហ្វេសប៊ុកដើម្បីប្រកួតប្រជែងជាមួយនរណាឡើយ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានមានប្រសាសន៍កាលពីម្សិលមិញថា ពេលនេះគណបក្សប្រជាជនកម្ពុជាកំពុងងាកទៅរកតុលាការ ដើម្បីបំភិតបំភ័យគូប្រកួតប្រជែងរបស់ខ្លួនដោយសារតែមានការគាំទ្រខ្លាំងសម្រាប់គណបក្សប្រឆាំង។
លោក យឹម សុវណ្ណ មានប្រសាសន៍ថា “ខ្ញុំសូមអំពាវនាវទៅប្រជាពលរដ្ឋទូទាំងប្រទេសឲ្យចាត់វិធានការ។ ពួកគេ [គណបក្សប្រជាជនកម្ពុជា] បានបង្កបញ្ហាដល់គណបក្សសង្គ្រោះជាតិអំឡុងវេទិកាសាធារណៈ បំផ្លាញស្លាកសញ្ញាគណបក្ស បណ្ដេញសមាជិកសភារបស់យើងចេញពីរដ្ឋសភា ហើយពេលនេះពួកគេកំពុងតែព្យាយាមប្រើប្រាស់ប្រព័ន្ធតុលាការ ដើម្បីបង្កបញ្ហាថែមទៀតចំពោះគណបក្សសង្គ្រោះជាតិ”។ លោកបានមានប្រសាសន៍បន្ថែមទៀតថា “គណបក្សប្រជាជនកម្ពុជាត្រូវតែទទួលខុសត្រូវចំពោះទង្វើទាំងអស់នេះ”៕
ប្រែសម្រួលដោយ តែម សុខុម