ក្រសួងមហាផ្ទៃបានចេញសេចក្តីប្រកាសមួយកាលពីថ្ងៃពុធ ចោទគណបក្សសង្គ្រោះជាតិ ដែលជាគណបក្សប្រឆាំងថាបានបំផ្លាញស្លាកសញ្ញាគណបក្សរបស់ខ្លួនចំនួន១៦នៅក្នុងស្រុកចំនួនប្រាំនៅខេត្តព្រៃវែង និងនៅខេត្តស្វាយរៀងនៅសប្តាហ៍នេះ ប៉ុន្តែមិនបញ្ចេញឈ្មោះអ្នកបំផ្លាញទេ។
យោងតាមសេចក្តីប្រកាសរបស់ក្រសួងបានឲ្យដឹងថា ស្លាកសញ្ញាគណបក្សសង្គ្រោះជាតិចំនួន១៦ ត្រូវបានគេធ្វើឲ្យខូច ឬទម្លាក់ចោលកាលពីយប់ថ្ងៃអង្គារនៅក្នុងស្រុកព្រះស្តេច និងស្រុកកំពង់ត្របែក ខេត្តព្រៃវែង ព្រមទាំងក្នុងក្រុងស្វាយរៀង និងនៅស្រុកស្វាយទាប និងស្រុកកំពង់រោទ៍ ក្នុងខេត្តនេះ។
បើទោះជាមិនបានផ្តល់ភ័ស្តុតាងក៏ដោយ ក៏ក្រសួងលើកឡើងថា ការបំផ្លាញនេះ គឺជាសកម្មភាពដ៏ថោកទាប ដែលមានផែនការធ្វើឲ្យខូចបរិយាកាស មុនការបោះឆ្នោត និងដើម្បីគាំទ្រអ្នកដែលព្យាយាមច្រានចោលលទ្ធផលនៃការបោះឆ្នោត។
ក្រសួងបានលើកឡើងនៅក្នុងសេចក្តីប្រកាសចុះហត្ថលេខាដោយលោកឧត្តមសេនីយ៏ឯក ខៀវ សុភ័គ ថា ការបំផ្លាញស្លាកសញ្ញាគណបក្សចោលនេះ គឺដើម្បីបម្រើគោលបំណងអវិជ្ជមានណាមួយ ដែលអាចនាំទៅរកការបដិសេធលទ្ធផលនៃការបោះឆ្នោត ដែលគណបក្សសង្គ្រោះជាតិធ្លាប់លើកឡើងកន្លងមក”។
លោក ច័ន្ទ រ៉ាន់ អភិបាលស្រុកកំពង់ត្របែកបានអះអាងថា ស្លាកសញ្ញាគណបក្សសង្គ្រោះជាតិចំនួនពីរត្រូវបានបំផ្លាញចោលទាំងស្រុង ដោយស្លាកមួយត្រូវបានបាញ់ថ្នាំពណ៌ទឹកប្រាក់ពីលើ និងស្លាកផ្សេងទៀតត្រូវបានរុះរើទម្លាក់ចោលតែម្តង។
លោក រ៉ាន់ មានប្រសាសន៍ថា “ នគរបាលកំពុងស៊ើបអង្កេតរឿងនេះ។ ខ្ញុំគិតថា វាជាមនុស្សតែមួយ ដែលបានធ្វើរឿងនេះ ពីព្រោះស្លាកទាំងនោះត្រូវបានបាញ់ថ្នាំពណ៌ទឹកប្រាក់ដូចនៅក្នុងស្រុកឯទៀតដែរ”។
លោក ច័ន្ទ រ៉ាន់ បានបដិសេធមិនព្រមមានប្រសាសន៍ថា តើលោកជឿថា គណបក្សសង្គ្រោះជាតិទទួលខុសត្រូវចំពោះការបំផ្លាញ
ស្លាកសញ្ញាគណបក្សរបស់ខ្លួនឯងដែរឬអត់នោះទេ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានបដិសេធថា គណបក្សរបស់លោកមិនបាននៅពីក្រោយការបំផ្លាញស្លាកសញ្ញាទាំងនេះទេ ហើយលោកបានទម្លាក់កំហុសទៅលើគណបក្សប្រជាជនកម្ពុជាដែលកំពុងកាន់អំណាចវិញ។
លោក សុវណ្ណ មានប្រសាសន៍ថា “ យើងមានស្លាកសញ្ញាជិត១០០ដែលត្រូវបានបំផ្លាញចោលនៅទូទាំងប្រទេស ដូចជានៅខេត្តកំពត កែប និងខេត្តកំពង់ធំ។ គណបក្សកាន់អំណាចដឹងថា ប្រជាប្រិយភាពរបស់យើង បានកើនឡើង ដូច្នេះពួកគេចង់បំផ្លាញយើង”។ លោកបន្តថា “ នេះគ្រាន់តែជាឧទាហរណ៍មួយទៀតបង្ហាញថា នេះមិនមែនជាការបោះឆ្នោតដោយសេរី និងយុត្តិធម៌ទេ”។
ពេលទាក់ទងតាមទូរស័ព្ទ លោកឧត្តមសេនីយ៍ឯក ខៀវ សុភ័គ មិនបានចោទប្រកាន់ដោយផ្ទាល់ចំឈ្មោះគណបក្សសង្គ្រោះជាតិថាបានបំផ្លាញស្លាកគណបក្សខ្លួនឯងទេ ប៉ុន្តែធានាថាមិនមែនជាកំហុសរបស់គណបក្សប្រជាជនកម្ពុជារបស់លោក និងគណបក្សចំនួនប្រាំមួយទៀត ដែលចូលរួមប្រកួតប្រជែងការបោះឆ្នោតនេះទេ។
លោកបានបន្តថា “ គណបក្សប្រជាជនកម្ពុជាដឹងថា ពួកគេនឹងឈ្នះទៀត ដូច្នេះនឹងមិនធ្វើអំពើថោកទាបនោះទេ”។ “ ហើយគណបក្សចំនួនប្រាំមួយទៀតក៏សប្បាយរីករាយដែរដោយឮថា គណបក្សសង្គ្រោះជាតិនឹងបដិសេធលទ្ធផលនៃការបោះឆ្នោត ព្រោះថា គណបក្សសង្គ្រោះជាតិទទួលបានអាសនៈប៉ុន្មានក៏ដោយ ក៏អាសនៈទាំងនោះត្រូវបែងចែកឲ្យពួកគេដែរ”។
គណៈកម្មាធិការជាតិរៀបចំការបោះឆ្នោតបានអះអាងកាលពីម្សិលមិញថា ខ្លួននឹងបែងចែកអាសនៈដែលគណបក្សសង្គ្រោះជាតិទទួលបាន ប្រសិនបើពួកគេបដិសេធមិនទទួលយកអាសនះ នៅក្នុងសភា បន្ទាប់ពីការបោះឆ្នោត។
លោក សម រង្ស៊ី ប្រធានគណបក្សប្រឆាំង ដែលកំពុងរស់នៅបែបនិរទេសខ្លួន បានមានប្រសាសន៍កាលពីថ្ងៃសៅរ៍ថា គណបក្សសង្គ្រោះជាតិនឹងមិនទទួលស្គាល់លទ្ធផលបោះឆ្នោតថ្ងៃទី២៨ ខែកក្កដាទេ ប្រសិនបើគ្មានការកែទម្រង់ដំណើរការបោះឆ្នោតនោះ ហើយថា គណបក្សប្រឆាំងនឹងទាមទារឲ្យមានការបោះឆ្នោតឡើងវិញ៕
ប្រែសម្រួលដោយ ចេវ ប៊ុននី