32 C
Phnom Penh

បញ្ជូនជនសង្ស័យ​​​បី​​​នាក់​​​ពីបទ​កាត់មេដៃ​ជន​រងគ្រោះ​​បោះឲ្យ​​​ឆ្មាស៊ីទៅពន្ធនាគារ​​​ខេត្ត​​​ព្រះសីហនុ

ដោយ ឌឹ ខេមបូឌា ដេលី

បទវិភាគ

មន្ត្រី​​​តុលាការ​​​​​​មួយ​​​រូប បាន​​​ឲ្យ​​​ដឹង​​​កាល​ពី​ថ្ងៃ​​​សុក្រ​​​ថា បុរស​​​ជន​​​ជាតិ​​​អ៊ុយ​​​ក្រែន​​​ពីរ​​​នាក់ ​និង​​​បុរស​​​ជន​​​ជាតិ​​​រុស្សុី​​​ម្នាក់ ដែល​​​ត្រូវ​​​បាន​​​ចោទ​​​ប្រកាន់​​​ថា​​​បាន​​​កាត់​​​មេ​ដៃ​​​របស់​​​បុរស​​​ខ្មែរ​​​​​ម្នាក់ ហើយ​បាន​បោះ​​​ឲ្យ​​​ឆ្មា​​​ស៊ី​​​កាលពី​​​ដើម​​​​​​សប្ដាហ៍​​​នេះ កំពុង​ត្រូវ​ឃុំខ្លួននៅ​​​ពន្ធនា​​​គារ​​​​​​ខេត្តព្រះសីហនុ​​​ដើម្បី​រង់ចាំ​​​ការ​ជំនុំជម្រះ។

លោក ម៉ុង មុនីចរិយា ប្រធាន​​​សាលា​​​ដំបូង​​​​ខេត្តព្រះសីហនុ បាន​​​មាន​​​ប្រសាស​​​ន៍​​​ថា ​បុរស​​​​​​ទាំង​​​បី​​​នាក់​​​នេះ ត្រូវ​​​បាន​​​បញ្ជូន​​​ទៅ​​​ពន្ធនាគារ​​កាល​​​ពី​​​ថ្ងៃ​​​ព្រហស្បតិ៍។

លោកចៅក្រម​​​ ម៉ុង មុនីចរិយា បាន​​​មាន​​​ប្រសាសន៍​​​ថា “ បុរស​​​ទាំង​​​បី​​​នាក់​​​នេះ ​​​ត្រូវ​​​បាន​​​​​បញ្ជូន​​​ទៅឃុំខ្លួននៅ​​​​​​ពន្ធនាគារ​​​ខេត្ត​​​នេះ​​​រួច​​​ហើយ “ ដោយ​​​បដិសេធ​​​មិន​​​ធ្វើ​​​អត្ថាធិ​​​ប្បាយ​​​បន្ថែម​​​ឡើយ។

ជន​​​សង្ស័យ​​​ជន​​​ជាតិ​​​អ៊ុយ​​​ក្រែន​​​ពីរ​​​នាក់​​​ឈ្មោះ វ៉ាឌីម សាន់ដាខូវ (Vadym Sundakov) អាយុ៣៣​​​ឆ្នាំ គ្រុយតាខូវ អា​​​ណាតូលី​(Krutakov Anatolii) អាយុ២៦​​​ឆ្នាំ ត្រូវ​​​ជាប់​​​ចោទ​​​ពី​​​បទ​​​សមគំនិត​​​ប្រព្រឹត្ត​​​អំពើ​​​ឧក្រិដ្ឋ​​​ ហើយ​​​ជន​​​សង្ស័យ​​​ជន​​​ជាតិ​​​រុស្ស៉ី ឈ្មោះ ​អាឡិច ​សាន់ឌ័រ ​គូលីខូវ (Alexander Kulikov) អាយុ២៥​​​ឆ្នាំ ​​ជាប់​​​​ចោទពី​​​បទ​​​បង្ខាំង​​​ និង​​​ធ្វើ​​​ទារុណកម្មឈ្មោះ ម៉ម រិទ្ធី​​​ អាយុ​​​២៨​​​ឆ្នាំ​​​ដោយ​​​ខុស​​​ច្បាប់។

ម៉ម រិទ្ធី ដែល​​​ត្រូវ​​​បាន​​​ចាប់​​​បង្ខាំង​​​អំឡុង​​​ពេល​​​ព្យាយាម ​​​​លួច​​​ទូរស័ព្ទ​​​ដៃ​​​មួយ​​​គ្រឿង​​​មានតម្លៃ​​​១០​​​ដុល្លារ ត្រូវ​​​បាន​​​ជន​​​សង្ស័យ​​​ទាំង​​​បី​​​នាក់​​​នេះវាយ​​​ដំ ​​​ចាប់​​​ចង​​​និង​​​យក​បំពង់​ជ័រ​មក​​ញុ៉ក​​មាត់ដោយ​​​ខុស​​​ច្បាប់ ។

ពួកគេ​បានយក​កន្ត្រៃ​កាត់​​​ដែក​កាត់​មេដៃ​​​ស្ដាំ​​​របស់ ម៉ម រិទ្ធី ​​​ហើយ​បោះ​​​​ឲ្យ​​​ឆ្មា​​​ស៊ី ​រួច​ហើយ​​​​​យក​កាវដែល​​​​​​ស្អិត​​​ខ្លាំងមក​ចាក់​លើ​ដៃរបស់​គាត់​ដើម្បីឲ្យ​​​ក្ដាប់​​​ជាប់​​។ ពួកគេ​បាន​យក​​​​ច្រវាក់​​​​​​​ចងគាត់​ភ្ជាប់​​​ទៅ​​​នឹងដងទង់ជាតិ​​​មួយ​​​ដោយ​​ស្ថិតក្នុង​​​​ស្ថាន​​​ភាពឈឺចាប់​ជាទី​បំផុត។

លោក សំ សុផល ប្រធាន​​​ពន្ធនាគារ ​​​មាន​​​ប្រសាស​​​ន៍​​​ថា “ ជន​​​សង្ស័យ​​​ទាំង​​​បី​​​នាក់​​​នេះ ​ត្រូវ​​​បាន​​​បញ្ជូន​​​ទៅ​​​ពន្ធនាគារ កាល​​​ពី​​​ពេល​​​​ល្ងាច [ថ្ងៃព្រហស្បតិ៍]”។

“ បុរសជនជាតិ​​​រុស្ស៉ី ត្រូវ​​​បាន​​​ចោទ​​​ប្រកាន់​​​​ពី​​​បទ​​​បង្ខាំង​​​មនុស្ស​​​​​​និង​​​ធ្វើ​​​ទារុណកម្ម​​​ដោយ​​​ខុស​​​ច្បាប់ ហើយ​​​ជន​​​ជាតិអ៊ុយ​​​ក្រែន​​​ពីរ​​​នាក់​​​​​ទៀត ត្រូវបាន​​​ចោទ​​​​​​ប្រកាន់​​​ពី​​​បទសម​​​គំនិត​​​ប្រព្រឹត្ត​​បទឧក្រិដ្ឋ”៕

  ប្រែសម្រួលដោយ ស៊ុំ សុខភុំ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស