កាលពីម្សិលមិញ សភាពាណិជ្ជកម្មអឺរ៉ុប (European Chamber of Commerce) ហៅកាត់ថា EuroCham បានបើកសាមាជប្រចាំឆ្នាំលើកដំបូងរបស់ខ្លួន នៅសណ្ឋាគារ សូហ្វីតែល (Sofitel Hotel) ក្នុងរាជធានីភ្នំពេញ។ នៅក្នុងសាមាជនេះ មានការបោះឆ្នោតជ្រើសតាំងក្រុមប្រឹក្សាភិបាល ហើយសភាពាណិជ្ជកម្មបារាំង និងអាល្លឺម៉ង់ បានបញ្ចូលខ្លួនទៅ ក្នុងសភាពាណិជ្ជកម្មអឺរ៉ុបផង ដើម្បីបន្តបង្កើនផលប្រយោជន៍របស់ក្រុមហ៊ុនអឺរ៉ុបនៅប្រទេសកម្ពុជា។
សភាពាណិជ្ជកម្មអឺរ៉ុបនៅកម្ពុជា ត្រូវបានសម្ពោធដាក់ឲ្យដំណើរការ កាលពីខែមិថុនាឆ្នាំ២០១១ ដោយមានការគាំទ្រពីស្ថាប័នស្ថាបនិកបីគឺ ក្រុមហ៊ុន Chambre de Commerce Franco-Cambodgiene សមាគមអាជីវកម្មអង់គ្លេសនៅកម្ពុជា (British Bu siness Association in Cambodia) និងអង្គការ Arbeitskreis Deutche Wirtchaft។ទោះបីជាយ៉ាង ដោយចក្រភពអង់គ្លេស មានទំនាក់ទំនងកាន់តែដាច់ឆ្ងាយ ពីសហភាពអឺរ៉ុប សភាពាណិជ្ជកម្មចក្រភពអង់គ្លេស មិនបានបោះឆ្នោតគាំទ្រការច្របាច់បញ្ចូលគ្នាទៅក្នុងសភាពាណិជ្ជកម្មអឺរ៉ុបទេ ក៏ប៉ុន្តែសមាជិករបស់សភាពាណិជ្ជកម្មនេះ នៅតែមានសេរីភាព ក្នុងការបោះឆ្នោតតាមរបៀបឯកត្តបុគ្គលដដែល។
លោក ដូមីនិក ខាតទ្រី (Dominic Catry) ដែលស្ថិតក្នុងចំណោមសមាជិកស្ថាបនិកទាំងប្រាំពីរនាក់ នៅក្នុងសភាពាណិជ្ជកម្មបារាំង កាលពីឆ្នាំ១៩៩៩ និងជាអ្នករៀបចំសមាជកាលពីម្សិលមិញនេះ បានមានប្រសាសន៍ថា “ អង់គ្លេសមិនគាំទ្រគំនិតច្របាច់បញ្ចូលគ្នានេះទេ ដើម្បីរក្សាឯករាជភាពរបស់ខ្លួន”។ លោក ខាតទ្រី បានមានប្រសាសន៍បន្ថែមទៀតថា សភាពាណិជ្ជកម្មហូឡង់ និងបែលហ្ស៉ីក ក៏ទំនងជាត្រូវបានច្របាច់បញ្ចូលទៅក្នុងសភាពាណិជ្ជកម្មអឺរ៉ុប ក្នុងពេលអនាគតដ៏ខ្លីផងដែរ។ គោលបំណងសំខាន់របស់សភាពាណិជ្ជកម្មអឺរ៉ុបគឺ ដើម្បីពង្រឹងទំនាក់ទំនងរវាងរដ្ឋាភិបាល និងក្រុមហ៊ុនអឺរ៉ុប។ លោក ខាតទ្រី បានលើកឡើងបន្ថែមទៀតថា ក្នុងគោលបំណង នេះ សភាពាណិជ្ជកម្មនេះប្រហែលជាអាចធ្វើការងារបានល្អជាងមុនច្រើន។
លោកបានមានប្រសាសន៍បន្ថែមទៀតថា “ ក្នុងពេលអនាគត យើងគួរតែអាចរៀបចំឲ្យសមាជិករបស់យើង ធ្វើការមានប្រសិទ្ធភាពជាងមុន និងធ្វើការងារបានច្រើនជាងមុន”។ លោក ខាតទ្រី បានលើកឡើងបន្ថែមទៀតថា គណៈកម្មាធិការផ្ទៃក្នុងជាច្រើននឹងផ្តល់អនុសាសន៍ ដើម្បីឲ្យមានភាពល្អប្រសើរជាងមុន និងខិតខំធ្វើការសំដៅទៅរកការបង្កើតសៀវភៅស (ឯកសារផ្លូវការ) របស់សភាពាណិជ្ជកកម្មអឺរ៉ុប។នៅក្នុងសៀវភៅនេះ មានសេចក្តីសង្ខេបជូនរដ្ឋាភិបាលកម្ពុជា អំពីបញ្ហាចម្បងៗដែលប៉ះពាល់បរិយាកាសអាជីវកម្ម សម្រាប់ក្រុមហ៊ុនអឺរ៉ុបនៅកម្ពុជា។
លោក ដេវីដ ហាស្គែល (David Haskel) ទីប្រឹក្សាផ្នែកច្បាប់នៅក្រុមហ៊ុនច្បាប់ ប៊ីអិនជី (BNG) ដែលមានមូលដ្ឋាននៅទីក្រុងភ្នំពេញ និងជាបេក្ខជនមួយរូបក្នុងចំណោមបេក្ខជនសម្រាប់ការបោះឆ្នោតជ្រើសតាំងកាលពីម្សិលមិញ បានថ្លែងថា “ តស៊ូមតិគឺជាមុខងារសំខាន់បំផុតរបស់សភាពាណិជ្ជកម្មអឺរ៉ុប”។
លោក ដារ៉េន ហារីស (Darren Harris) នាយកប្រតិបត្តិការក្រុមហ៊ុន Innov8 ជាក្រុមហ៊ុនសេវាកម្មបណ្តុះបណ្តាល និងពិគ្រោះយោបល់បានថ្លែងថា គុណប្រយោជន៏ធំមួយ ដែលសភាពាណិជ្ជកម្មអឺរ៉ុបអាចផ្តល់ឲ្យក្រុមហ៊ុន ដែលធ្វើប្រតិបត្តិការអាជីវកម្ម ក្នុងប្រទេសកម្ពុជា គឺសិទ្ធិអាទិភាពចំពោះឱកាសពាណិជ្ជកម្ម ដែលខ្លួនអាចផ្តល់ឲ្យសមាជិករបស់ខ្លួន។
លោកបានមានប្រសាសន៍ថា “វាមិនមែនជាគំនិតបក្ខពួកនិយមទេ ប៉ុន្តែ អាជីវកម្មបរទេសនៅប្រទេសកម្ពុជា ប្រៀបដូចជាសហ គមន៍ជនបរទេស ហើយសភាពាណិជ្ជកម្មអឺរ៉ុប ធ្វើប្រតិបត្តិការតាមរបៀប “ អ្នកកេះខ្នងរបស់ខ្ញុំ ខ្ញុំនឹងកេះខ្នងរបស់អ្នកវិញ”។ ក្នុងសាមាជប្រចាំឆ្នាំកាលពីម្សិលមិញ សមាជិក១១៤រូបបានបោះឆ្នោតជ្រើសតាំងអ្នកស្រី ប៉ុក ម៉ារីណា សហគ្រិន និងជាអតីតអនុរដ្ឋលេខាធិការក្រសួងការបរទេស និងលោក ប៊ុន យូឌី នាយកគ្រប់ហ៊ុន ច្បាប់ Bun & Association។
ជនបរទេសដែលត្រូវបានបោះឆ្នោតជ្រើសតាំងជាសមាជិកក្រុមប្រឹក្សាភិបាលក្នុងសភាពាណិជ្ជកម្មអឺរ៉ុប រួមមាន លោក ខាតទ្រី ដែលទទួលបាន៨៨សំឡេង តាមពីក្រោយដោយមិត្តរួមជាតិរបស់លោក គឺលោក អេម៉ានូអែល ម៉េណាតូ (Emmanuel) ប្រធាននាយកប្រតិបត្តិក្រុមហ៊ុនអាកាសចរណ៍កម្ពុជា(Cambodia Airports) លោក ដេវីដ ផារ៉ុត (David Parrot) មកពីធនាគារ អេអិនហ្សិត រ៉ូយ៉ាល់ (ANZ Royal) លោក អាឡិចសានដ្រា ហឺបែល (Alexandra Herbal) មកពីក្រុមហ៊ុន ទូវ រីណេឡេន (Tuv Rhineland) និងលោក ម៉ាទីន ដេសូតេល (Martin Desautels) មកពីក្រុមហ៊ុនផ្តល់សេវាកម្មច្បាប់ និងពន្ធដារ DFDL៕
ប្រែសម្រួលដោយ កង សុធា