29 C
Phnom Penh

លោក ហ៊ុន សែន ប្រាប់​អ្នក​បោះ​ឆ្នោត​នៅ​ខេត្តបន្ទាយមាន​ជ័យ​ថា ការ​ផ្លាស់​ប្តូរ​គឺ​ជា​ល្បែង​គ្រោះ​ថ្នាក់

ដោយ ឌឹ ខេមបូឌា ដេលី

បទវិភាគ

បងប្អូន​​ប្រហែល​ជា​ត្រូវ​រត់​ចេញ​ពី​លំនៅ​ដ្ឋាន​របស់​​បងប្អូន​។ នេះ​​គឺ​ជា​សារ​ព្រមាន​ចុង​ក្រោយមុន​ពេល​បោះ​ឆ្នោត​ពី​លោក​នាយក​រដ្ឋមន្ត្រី​ ហ៊ុន សែន ចំពោះ​ប្រជា​ពលរ​ដ្ឋ​នៅ​ក្នុង​ខេត្ត​បន្ទាយ​មាន​ជ័យ កាល​ពី​ថ្ងៃសុក្រ​​ ដែល​នៅ​ទីនោះ​លោក​ធ្លាប់​​បាន​គំរាម​ពី​​សេ​នារី​យោ​​ក្រឡាប់​ចាក់​​ដែល​​​​​អាច​នឹង​កើត​មាន​​ ប្រសិន​​បើ​លោក​មិន​បាន​ជាប់​ឆ្នោតនៅ​ថ្ងៃទី​២៨ ខែកក្កដា​ទេនោះ​។
​ពេល​​​ថ្លែង​​សុន្ទរកថា ជាសាធារណៈ​​ជា​មួយ​ការ​ព្រមាន​អំពី​សង្គ្រាម​ស៊ីវិល​ និង​ការ​ក្រឡាប់​ចាក់​​ក្នុង​សង្គម​ ​ប្រសិន​បើ​គណបក្ស​ប្រជាជន​កម្ពុជា​ ដែល​ជា​គណបក្ស​កាន់​អំណាច​របស់​លោក​បរាជ័យ​ក្នុង​ការ​បោះ​ឆ្នោត​នេះ​ លោក ហ៊ុន សែន ​លើក​​ឡើង​ពី​សារ​​​​សាម​ញ្ញ​មួយ​​សម្រាប់​សាធារណជន​គឺ “ ការ​ផ្លាស់​ប្តូរ​មិន​មែន​ជាល្បែង​ទេ”។

លោក ហ៊ុន សែន​ មាន​ប្រសាសន៍​បន្ថែម​​ថា “ ការ​បោះ​ឆ្នោត​ឲ្យ​គណ​បក្ស​ប្រជា​ជន​​កម្ពុជា​មាន​ន័យ​ថា បងប្អូន​កំពុង​បោះ​ឆ្នោត​ឲ្យ​ខ្លួន​ឯង” ​គឺ​ការ​បោះ​ឆ្នោត​ដើម្បី​សន្តិភាព​ ស្ថិរ​ភាព​នយោ​បាយ​ និង​ការ​អភិវឌ្ឍ​​​​​​​​តាម​​រយៈ​​​​​​​ការ​ស្ថាបនា​ផ្លូវ​ថ្នល់​ សាលា​រៀន មន្ទីរ​ពេទ្យ​ និង​វត្ត​អារាម​។

លោក​បាន​បន្ថែម​ថា បោះ​ឆ្នោត​ឲ្យ​អ្នក​ផ្សេង​គឺ​​អាច​បាត់​បង់​ឱកាស​ទទួល​បាន​​ ហេ​ដ្ឋា​រចនាសម្ព័ន្ធ​​បែប​នេះ​ ហើយ​ក៏​អាច​មាន​ន័យ​ថា ប្រជាពលរដ្ឋ​ “ ប្រឈម​នឹង​ការ​រត់​​ភៀស​ខ្លួន​ទៀត​ផង​”។

លោកនាយករដ្ឋ​មន្ត្រី​មិន​បាន​បញ្ជាក់​​​​ថា ប្រជាជន​អាច​រត់​​ភៀស​ខ្លួន​ដោយ​សារ​អ្វី​នោះ​​ទេ ប៉ុន្តែ បាន​បង្ហាញ​នូវ​មេរៀន​ប្រវត្តិសាស្ត្រ​អំពី​គ្រោះ​ថ្នាក់​​នៃ​ការ​ផ្លាស់​ប្តូរ​មេ​ដឹក​នាំ​នៅ​ក្នុង​ប្រទេស​កម្ពុជា​ គឺ​ជាមេ​រៀន​មួយ​ដែល​ផ្តោត​លើ​ការ​កើត​ឡើង​នៃ​របប​ខ្មែរ​ក្រហម និង​ការ​សម្លាប់​រង្គាល​នៅ​ក្នុង​ប្រទេស​នេះ។

លោក ហ៊ុន សែន ​មាន​ប្រសាសន៍​ថា “ ការ​ផ្លាស់​ប្តូរ​មិន​មែន​ជា​ល្បែង​​ទេ។ បន្ទាប់​ពី​​ ការ​ផ្លាស់​ប្តូរ​ពី​របប​លោក​សេនា​ប្រមុខ​ លន់ នល់ ទៅ​របប​ប៉ុល ពត របប​ប្រល័យ​ពូជ​សាសន៍​​ក៏​បាន​កើត​ឡើង​”។

លោកក៏​បាន​ព្រមាន​ផង​ដែរថា សាធា​រណ​​​ជន​គួរតែ​គិតថា ​ការ​បោះ​ឆ្នោត​ជាតិ​លើក​នេះ​មាន​សារៈ​សំខាន់​ជាង​ការ​បោះ​ឆ្នោត​ឃុំ​-សង្កាត់​ កាលពី​ឆ្នាំ​មុន ដែល​ពុំ​មាន​ផល​ប៉ះ​ពាល់អ្វី​​ដល់​គណបក្ស​នយោបាយនោះ​ទេ​ ​ក្រៅ​ពី​សេវា
​ក​ម្ម​ សាធារណៈ​នៅក្នុង​​ប្រទេស​។

លោក​បាន​មាន​ប្រសាសន៍​ថា “ ការ​បោះ​ឆ្នោត​ដែល​នឹង​មកដល់​ក្នុង​ពេល​ឆាប់ៗ​នេះ​ គឺ​បោះ​ឆ្នោត​សម្រាប់​គណបក្ស​នយោបាយ​ និង​ដើម្បី​តំណែង​នាយក​រដ្ឋមន្ត្រី ដែល​ពាក់​ព័ន្ធ​នឹង​ការ​ក្រ​ឡាប់​ចាក់​នៃ​គោល​នយោ​បាយ​ជាតិ​និង​អន្ដរ​ជាតិ​ ដែល​អាច​មាន​ន័យ​ថា ជា​ការ​បំផ្លិច​បំផ្លាញ​ក៏​ថាបាន​។​​ ថ្លែង​ទៅ​កាន់​អ្នក​ចូល​រួម​​រាប់​ពាន់នាក់​នៅ​ក្នុង​ក្រុង​ប៉ោយ​ប៉ែត ក្នុង​ពិ​ធី​សម្ពោធ​បើក​ឲ្យ​ប្រើ​ប្រាស់​ផ្លូវ​​ថ្មី​មួយខ្សែ​ លោក ហ៊ុន​ សែន​ បាន​សុំ​ឲ្យ​​ប្រជា​ជន​បោះ​ឆ្នោត​ឲ្យ​លោក​​បាន​កាន់​តំណែង​ទៀត​។

​លោក​បាន​មានប្រសាសន៍​​​ថា “ ក្នុង​ពេល​ខាង​មុខ​នេះ យើង​សង្ឃឹម​ថា ប្រជា​ពល​រដ្ឋ​នឹង​បោះ​ឆ្នោត​ឲ្យ​គណបក្ស​ប្រជា​ជន​កម្ពុជា​ទៀត​”។ លោកបាន​បញ្ជាក់ថា ៦៧,៧​ភាគ​រយ​នៃ​អ្នក​បោះ​ឆ្នោត​នៅ​ក្នុង​ខេត្ត​បន្ទាយ​មាន​ជ័យ​បាន​បោះ​ឆ្នោត​ឲ្យ​គណបក្ស​កាន់​អំណាច នៅ​ក្នុង​ការ​បោះ​ឆ្នោត​ឃុំ-សង្កាត់​ កាល​ពីឆ្នាំ​មុន​។

លោក​បាន​បន្ដ​ថា “ ដូច្នេះ ខ្ញុំ​សូម​អំពាវ​នាវ​ដល់​ប្រជា​ពល​រដ្ឋ​ទាំង​អស់ថា ប្រសិន​បើ​បង​ប្អូន​បាន​ឃើញ​គោល​នយោបាយ​ដឹក​នាំ​ដ៏​ត្រឹម​​របស់​ខ្ញុំ​ និង​​របស់​គណបក្ស​ប្រជា​ជន​កម្ពុជា …​ប្រសិន​​បងប្អូន​​ស្រឡាញ​់ ចូល​ចិត្ត និង​អាណិត… ព្រម​ទាំង​ទុក​ចិត្ត​ ហ៊ុន សែន សូម​បោះ​ឆ្នោត​ឲ្យ​គណបក្ស​ប្រជា​ជន​កម្ពុជា”។

លោក យែ៉ម បុញ្ញរិទ្ធ អ្នក​នាំ​ពាក្យ​គណ​បក្ស​សង្គ្រោះ​ជាតិ ដែល​ជា​គូ​ប្រជែង​ដ៏​​សំខាន់​របស់​គណបក្ស​ប្រជាជន​កម្ពុជា​​​បាន​មាន​ប្រសាសន៍​ថា ការ​ដែល​លោក​ ហ៊ុន សែន​ លើក​ឡើង​ជា​​ប្រចាំ​អំពី​សង្គ្រាម​ និង​អស្ថិរ​​​​​​ភាព​នោះ​អាច​មាន​ភាព​មិន​ប្រក្រ​តី​ក្នុង​ការ​បោះ​ឆ្នោត ដោយ​​សារ​តែ​​មាន​សម្ពាធ​នយោ​បាយ​លើ​អ្ន​កបោះ​ឆ្នោត។​

លោក យ៉ែម​ បុញ្ញរិទ្ធ​ មាន​ប្រសាសន៍ថា “ ការ​ផ្លាស់​ប្តូរ​មិន​មែន​មិនល្អទេ​។ ហេតុ​អី​បាន​ជា​ពួកគេ​មិន​មើល​ការ​ផ្លាស់​ប្តូរ​បន្ទាប់​ពី​ការ​បោះ​ឆ្នោត​នៅ​ក្នុង​ប្រទេស​ថៃ សហ​រដ្ឋ​អាមេរិក បារាំង សិង្ហបុរី និង​ប្រទេស​ផ្សេងៗទៀត​? វា​មិន​​នាំ​មក​នូវ​​​អស្ថិរ​ភាព និង​ភាព​វឹក​វរ​ ដល់​ប្រទេស​ទាំងនោះ​ទេ”។

លោក​បាន​បន្ថែមថា ការ​ផ្លាស់​ប្តូរ​មេដឹក​នាំ​គឺ​ដើម្បី​ធ្វើ​ឲ្យ​ការ​អភិវឌ្ឍ​នៅ​ក្នុង​ប្រទេស​​បាន​ប្រសើរ​ឡើង ប្រសិន​បើ​ធ្វើ​ឡើង​ដោយ​សេរី​ និង​យុត្តិធម៌​។​

លោក ហ៊ុន សែន ក៏​បាន​ថ្លែង​កាលពី​ថ្ងៃសុក្រ​ផង​ដែរថា លោករំពឹង​ថា នឹង​ទទួល​បាន​សំឡេងឆ្នោត​​គាំទ្រ​ថែម​ទៀត​នៅ​ក្នុង​ខេត្ត​​បន្ទាយ​មាន​ជ័យនេះ​​ តាម​រយៈ​កម្ម​វិធី​ចែក​ប័ណ្ណ​​កម្ម​សិទ្ធិ​ដី​ធ្លី​របស់​​និស្សិត​ស្ម័គ្រ​ចិត្ត​ ដែល​បាន​ចែក​ប័ណ្ណ​កម្ម​សិទ្ធិ​ដីធ្លី​ចំនួន​២៣.១៨៦ប័ណ្ណ​ដល់​ប្រជាពលរដ្ឋ​ចំនួន​១៣.៧១៨គ្រួសារ​ លើ​​ផ្ទៃដី​ជាង​៤៤.​០០០​ហិកតា។

ដោយ​សរសើរ​ខ្លួនឯង​​​ចំពោះ​ការ​​នាំ​មក​នូវ​សន្តិភាព​ និង​ការ​អភិវឌ្ឍ​​នៅ​តាម​​​តំបន់​ព្រំ​ដែន​ ដូច​ជា​​ខេត្ត​បន្ទាយ​មាន​ជ័យ​នេះ ដែល​រួមមាន​គម្រោង​​ស្ថាបនា​ផ្លូវ​​មាន​ទឹក​ប្រាក់​ចំនួន៧២​លាន​ដុល្លារ​តភ្ជាប់​ទៅក្រុង​ប៉ោយ​ប៉ែត​ បាត់​ដំបង​ និង​ប៉ៃលិន​នោះ​ លោក​ ហ៊ុន សែន បាន​មាន​ប្រសាសន៍ថា ជោគជ័យ​បែប​នេះ​អាស្រ័យ​លើ​ស្ថិរភាព​នយោបាយ​។“ ការ​អភិ​វឌ្ឍ​​មិន​អាច​​ធ្វើ​ទៅ​បាន​ទេ បើ​មាន​​អស្ថិ​រ​ភាព​ ឬសង្គ្រាម​។ [យើង] នឹង​ព្យាយាមការពារ​​សន្តិភាព​ និង​ស្ថិរភាព​នយោបាយ​ដែល​យើង​​បាន​តស៊ូ​យ៉ាង​លំបាក​​​ទើប​​បាន​​សម្រេច”៕

ប្រែសម្រួលដោយ ហម សុផាណ្ណា​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស