កាលពីថ្ងៃសៅរ៍ លោកនាយករដ្ឋមន្ត្រី ហ៊ុន សែន បានប្រើសុន្ទរកថាលើកចុងក្រោយរបស់លោកមុនពេលយុទ្ធនាការឃោសនាបោះឆ្នោតចាប់ផ្ដើមជាផ្លូវការ នៅថ្ងៃព្រហស្បតិ៍ដើម្បីរំឭកឡើងវិញអំពីពេលវេលាលំបាកបំផុតដែលរដ្ឋាភិបាលរបស់លោកបានប្រឈមគិតចាប់តាំងពីថ្ងៃលោកឈ្នះឆ្នោតក្នុងឆ្នាំ២០០៨មក។ ថ្លែងអំឡុងពិធីបញ្ចុះសីមាវត្តថ្មីមួយនៅក្នុងស្រុកអង្គរជ័យ ខេត្តកំពត លោក ហ៊ុន សែន បានរំឭកឡើងវិញថា បញ្ហាលំបាកបំផុតទាំងបីដែលរដ្ឋាភិបាលបានប្រឈមអំឡុងរយៈពេលប្រាំឆ្នាំចុងក្រោយនេះ គឺអតិផរណាខ្ពស់អំឡុងវិបត្តិហិរញ្ញវត្ថុពិភពលោកក្នុងឆ្នាំ២០០៨ ភាពតានតឹងនៅតាមបណ្ដោយព្រំដែនថៃក្នុងឆ្នាំតែមួយ និងការបំផ្លិចបំផ្លាញដោយសារព្យុះទីហ្វុង កេតសាណា (Ketsana) ក្នុងឆ្នាំ២០០៩ ដែលពេលនោះ ប្រជាពលរដ្ឋជាង៦០.០០០នាក់បានបង្ខំចិត្តចាកចោលផ្ទះសំបែងរបស់ខ្លួន។
ខណៈនៅសល់តែជាងមួយខែទៀតដល់ថ្ងៃបោះឆ្នោតនោះ លោក ហ៊ុន សែន បានប្រាប់អ្នកចូលរួមស្ដាប់យ៉ាងច្រើនកុះករថា លោកសង្ឃឹមថា ការឆ្លើយតបចំពោះវិបត្តិធំៗទាំងនោះនឹងជួយបញ្ចុះបញ្ចូលឲ្យអ្នកបោះឆ្នោតដែលមិនបានគាំទ្រគណបក្សរបស់លោកក្នុងការបោះឆ្នោតឃុំ-សង្កាត់កាលពីឆ្នាំមុន ឲ្យបោះឆ្នោតឲ្យលោកធ្វើជានាយករដ្ឋមន្ត្រី ក្នុងខែកក្កដាខាងមុខនេះ។
លោកមានប្រសាសន៍ថា “ សូមអនុញ្ញាតឲ្យខ្ញុំពន្យល់អំពីការសម្រេចចិត្តដ៏លំបាកដែលបានធ្វើឡើងក្រោមការដឹកនាំរបស់ខ្ញុំ។ ថ្ងៃនេះ ខ្ញុំសូមបកស្រាយប្រាប់សាធារណជន មន្ត្រីរាជការ និងប្រជាពលរដ្ឋទាំងអស់ឲ្យបានដឹងថា តើតួនាទីរបស់នាយករដ្ឋមន្ត្រីនិងតួនាទីរបស់អភិបាលខេត្ត អភិបាលស្រុក រដ្ឋមន្ត្រី និងមេឃុំ ឬចៅសង្កាត់ដែលលោកតាលោកយាយបានបោះឆ្នោតឲ្យកាលពីឆ្នាំមុនខុសគ្នាយ៉ាងម៉េច”។
លោក ហ៊ុន សែន បានបន្ដថា នៅក្នុងខេត្តកំពត មានអ្នកបោះឆ្នោតតែ៦៣ភាគរយប៉ុណ្ណោះដែលបានបោះឆ្នោតឲ្យគណបក្សប្រជាជនកម្ពុជាក្នុងការបោះឆ្នោតឃុំសង្កាត់កាលពីឆ្នាំមុន ហើយលោកបានស្នើសុំឲ្យអ្នកចូលរួមស្តាប់កាលពីម្សិលមិញ ដែលភាគច្រើនជាមនុស្សមានវ័យចំណាស់ ពិចារណាឲ្យបានម៉ត់ចត់ថា តើគួរបោះឆ្នោតឲ្យគណបក្សមួយណាអំឡុងការបោះឆ្នោតដែលនឹងមកដល់ក្នុងពេលឆាប់ៗខាងមុខនេះ។
លោក ហ៊ុន សែន បានធ្វើការសង្កត់ធ្ងន់ថា“ ការសម្រេចចិត្តខុសនឹងបង្កជាគ្រោះមហន្តរាយ” ដោយលោកបានឆ្លៀតលើកឡើងវិញនូវការអះអាងដែលលោកបានធ្វើក្នុងរយៈពេលពីរខែចុងក្រោយនេះថា ប្រសិនបើគណបក្សប្រជាជនកម្ពុជាចាញ់ការបោះឆ្នោតលើកនេះ ប្រទេសកម្ពុជានឹងធ្លាក់ក្នុងសង្គ្រាមស៊ីវិល។
លោក ហ៊ុន សែន បានមានប្រសាសន៍ថា “ ពេលនោះ មានបញ្ហាបីដែលយើងត្រូវដោះស្រាយ ទី១ គឺវិបត្តិហិរញ្ញវត្ថុពិភពលោក។ វិបត្តិនេះមិនមែនមានផលប៉ះពាល់តិចតួចមកលើយើងទេ។ រដ្ឋាភិបាលត្រូវឆ្លើយតបទៅនឹងការលំបាកទាំងនេះ ដើម្បីធានាឲ្យមានស្ថិរភាពម៉ាក្រូសេដ្ឋកិច្ច និងដើម្បីការពារអតិផរណា”។
លោក ហ៊ុន សែន បានបន្ដថា តាមរយៈការផ្ដល់ការឧបត្ថម្ភធនដល់ក្រុមហ៊ុនឯកជនដែលផ្គត់ផ្គង់សេវាកម្មមូលដ្ឋាន ដូចជាអគ្គិសនីនិងទឹកស្អាតនោះ រដ្ឋាភិបាលរបស់លោកបានទប់ស្កាត់អតិផរណាមិនឲ្យកើនឡើងដោយជោគជ័យ។លោកមានប្រសាសន៍ថា “ យើងបានឆ្លងកាត់ការលំបាកទាំងនេះតាមរយៈការគ្រប់គ្រងសេដ្ឋកិច្ចយ៉ាងប្រុងប្រយ័ត្នជាទីបំផុត”។
បន្ទាប់មក លោក ហ៊ុន សែន បានលើកឡើងថា ជោគជ័យធំបំផុតទី២ក្រោមការដឹកនាំរបស់លោក គឺការទប់ស្កាត់នូវអ្វីដែលលោកហៅថា “ ការឈ្លានពាន” របស់ថៃមកលើប្រទេសកម្ពុជាក្នុងឆ្នាំ២០០៨ មិនឲ្យក្លាយទៅជាសង្គ្រាមពេញបន្ទុក។ លោក ហ៊ុន សែន បានបញ្ជាក់ថា បន្ទាប់ពីកងទ័ពថៃបានទន្ទ្រានចូលក្នុងទឹកដីមានវិវាទជាមួយកម្ពុជា កាលពីថ្ងៃទី១៥ ខែកក្កដា ឆ្នាំនោះលោកបានកោះហៅមន្ត្រីរដ្ឋាភិបាលជាន់ខ្ពស់របស់លោកមកជួបជុំគ្នា ដើម្បីពិភាក្សាអំពីជម្រើសដែលអាចទៅរួច ក្នុងនោះរួមមានទាំងការវាយបកជាបន្ទាន់លើកងទ័ពថៃនៅព្រំដែនផងដែរ។
លោក ហ៊ុន សែន មានប្រសាសន៍ថា “ ក្នុងនាមជាអតីតទាហានដែលមានបទពិសោធក្នុងសមរភូមិចំនួន១០៥លើក រងរបួសប្រាំលើក និងពិការភ្នែកមួយចំហៀង ឈាមបានច្រាលចូលក្នុងបេះដូងរបស់ខ្ញុំ នៅពេលខ្ញុំបានឮថា ពួកគេបានរំលោភអធិបតេយ្យភាពរបស់យើង”។
ប៉ុន្តែ លោក ហ៊ុន សែន បានលើកឡើងថា ដោយសារការគិតដល់ហានិភ័យនៃការផ្ទុះសង្គ្រាមជាមួយថៃរយៈពេលពីរសប្ដាហ៍មុនថ្ងៃបោះឆ្នោតជាតិក្នុងប្រទេសកម្ពុជា លោកត្រូវតែរក្សាភាពអត់ធ្មត់។
លោកមានប្រសាសន៍ថា “ ការសម្រេចចិត្តនេះគឺជាការសម្រេចចិត្តមួយដើម្បីបញ្ចៀសសង្គ្រាម។ ប្រសិនបើមិនមែនដោយសារនាយករដ្ឋមន្ត្រី ហ៊ុន សែន ទេ យើងប្រាកដជាជួបស្ថានភាពផ្ទុយពីនេះ”។ លោកបានបន្ថែមថា លោកបានសម្រេចចិត្តដោះស្រាយជម្លោះពាក់ព័ន្ធនឹងប្រាសាទព្រះវិហារដោយប្រើមធ្យោបាយការទូតតាមរយៈក្រុមប្រឹក្សាសន្ដិសុខអង្គការសហប្រជាជាតិ សមាគមអាស៊ាន និងតុលាការយុត្តិធម៌អន្ដរជាតិវិញ ។
ចាប់តាំងពីខែកក្កដា ឆ្នាំ២០០៨មក លោក ហ៊ុន សែន មិនសូវជោគជ័យក្នុងការកាត់បន្ថយចំនួនអ្នកស្លាប់និងរបួសនៅតាមព្រំដែនឡើយ។ កម្ពុជាបានប៉ះទង្គិចជាមួយថៃបណ្តាលឲ្យមានមនុស្សស្លាប់ជាច្រើនលើកនៅតាមព្រំដែន ពេលលោក អាប់ភីសុីត វីចាជីវ៉ា (Abhisit Vejjajiva) ធ្វើជានាយករដ្ឋមន្ត្រីពីឆ្នាំ២០០៨ដល់ឆ្នាំ២០១១។
នាក់ទំនងរវាងប្រទេសទាំងពីរមានភាពកក់ក្ដៅឡើងវិញ ចាប់តាំងពីលោកស្រី យីងឡាក់ ស៊ីណាវ៉ាត្រា (Yingluck Shinawatra) បានចូលកាន់អំណាចក្នុងឆ្នាំ២០១១មក។ ជាចុងក្រោយ លោក ហ៊ុន សែន បានកោតសរសើរការងារយ៉ាងរហ័សរបស់គណបក្សលោកក្នុងការស្ដារតំបន់មួយចំនួននៅភាគកណ្ដាលនៃប្រទេសកម្ពុជា ដែលបានរងការប៉ះពាល់ដោយសារព្យុះទីហ្វុងកេតសាណា ក្នុងខែកញ្ញា ឆ្នាំ២០០៩ ពេលមនុស្សជាង៤០នាក់បាត់បង់ជីវិត។
លោកបន្ថែមថា“ យើងបានសង្គ្រោះប្រជាពលរដ្ឋដែលរងគ្រោះដោយសារទឹកជំនន់ ស្ដារប្រព័ន្ធធារាសាស្ត្រ ផ្លូវផ្នល់ និងស្ពានដែលត្រូវបានបំផ្លាញដោយគ្រោះទឹកជំនន់”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានយល់ស្របថា លោក ហ៊ុន សែន ពិតជាជោគជ័យក្នុងការរក្សាកំណើនសេដ្ឋកិច្ច អំឡុងពេលមានវិបត្តិហិរញ្ញវត្ថុពិភពលោកមែន ប៉ុន្តែលោកបានបញ្ជាក់ថា ទ្រព្យសម្បត្តិមិនត្រូវបានបែងចែកដោយស្មើភាពទេ ហើយលោកនាយករដ្ឋមន្ត្រីបានបរាជ័យក្នុងការដោះស្រាយបញ្ហាធំជាងនេះ ដូចជាការចាប់យកដី និងការបំផ្លិចបំផ្លាញធនធានធម្មជាតិជាដើម។
លោកបានមានប្រសាសន៍ថា “ ដូចអ្នកបានឃើញស្រាប់ហើយថា គម្លាតរវាងអ្នកមាន និងអ្នកក្រកាន់តែរីកធំឡើងពីមួយឆ្នាំទៅមួយឆ្នាំ… អ្នកអាចឃើញការរំលោភសិទ្ធិមនុស្ស ការចាប់យកដី និងការបំផ្លិចបំផ្លាញធនធានធម្មជាតិ។ បញ្ហាទាំងនេះកាន់តែធំឡើងៗ។ យើងយល់ស្របរឿងកំណើនសេដ្ឋកិច្ច ប៉ុន្តែប្រជាពលរដ្ឋចំនួន៧លាននាក់កំពុងរស់នៅក្រោមបន្ទាត់នៃភាពក្រីក្រ ដោយរកប្រាក់ចំណូលបានតិចជាងពីរដុល្លារក្នុងមួយថ្ងៃ”។
ពាក់ព័ន្ធនឹងជម្លោះតាមព្រំដែនថៃវិញ លោក យឹម សុវណ្ណ បានអះអាងថា លោក ហ៊ុន សែន នៅទីបំផុតបានធ្វើតាមអនុសាសន៍របស់តំណាងរាស្ត្រគណបក្សប្រឆាំង ប៉ុន្តែថាលោក ហ៊ុន សែន អាចបញ្ចៀសការខាតបង់ប្រាក់រាប់លានដុល្លារ និងការបាត់បង់អាយុជីវិតច្រើនក្នុងការប៉ះទង្គិចគ្នា ប្រសិនបើលោកទុកជម្លោះនេះឲ្យអាជ្ញាកណ្ដាលអន្តរជាតិដោះស្រាយបានឆាប់ជាងនោះ៕
ប្រែសម្រួលដោយ ហម សុផាណ្ណា