ឃុំជើងព្រៃ, ខេត្តកំពង់ចាម-កាលពីម្សិលមិញ លោកនាយករដ្ឋមន្ត្រី ហ៊ុន សែន ទាមទារឲ្យអ្នកដែលទទួលខុសត្រូវចំពោះការបំផ្លាញស្លាកសញ្ញាគណបក្សសង្គ្រោះជាតិប្រហែល១០នៅក្នុងខេត្តព្រៃវែង និងខេត្តស្វាយរៀង ចេញមុខ ដើម្បីសុវត្ថិភាពខ្លួនឯងផ្ទាល់។
លោកនាយករដ្ឋមន្ត្រីបានថ្លែងអំឡុងពិធីមួយក្នុងស្រុកបាធាយ ខេត្តកំពង់ចាមថា អ្នកដែលបានបំផ្លាញស្លាកសញ្ញាគណបក្សទាំងនោះគួរតែចេញមកសារភាព មុនពេលអ្នកដែលប្រហែលជាចង់លាក់បាំងបទល្មើសនេះសម្លាប់ពួកគេបំបិទមាត់។ លោក ហ៊ុន សែន ក៏បានសន្យាផងដែរថា អ្នកដែលចេញមកសារភាពនឹងទទួលបានរង្វាន់ជាថ្នូរនឹងការសហការរបស់ខ្លួន។
លោកបានថ្លែងថា“ ខ្ញុំសូមអំពាវនាវដល់អ្នកដែលបានធ្វើដូច្នេះ សូមឲ្យចេញមកសារភាពដើម្បីទទួលរង្វាន់។ ប៉ុន្តែសូមចេញមុខឲ្យបានឆាប់រហ័ស ព្រោះមានឃាតករដែលប្រហែលជាចង់សម្លាប់មនុស្សបំបាត់ភ័ស្តុតាង”។ លោកបានបដិសេធមិនពន្យល់ថា តើនរណាដែលអាចសម្លាប់អ្នកទទួលខុសត្រូវចំពោះការបំផ្លាញស្លាកសញ្ញាគណបក្សសង្គ្រោះជាតិដើម្បីបំបាត់ភ័ស្តុតាងឡើយ។
លោក ហ៊ុន សែន បានមានប្រសាសន៍ថា “ រឿងនេះមិនអាចរក្សាជាការណ៍សម្ងាត់បានទេ។សូមចេញមកសារភាពទៅ។ ខ្ញុំនឹងទទួលខុសត្រូវចំពោះសុវត្ថិភាពរបស់អ្នក ប៉ុន្តែអ្នកត្រូវចង្អុលប្រាប់ថា តើនរណាជាអ្នកនៅពីក្រោយរឿងនេះ”។
ក្នុងករណីជនល្មើសមិនចេញមុខសារភាព លោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកបានស្នើឲ្យលោក ស ខេង រដ្ឋមន្ត្រីក្រសួងមហាផ្ទៃ ធ្វើការស៊ើបអង្កេតអំពីការបំផ្លាញស្លាកសញ្ញាគណបក្សនេះ ដើម្បីលុបលាងកេរ្តិ៍ឈ្មោះរបស់គណបក្សប្រជាជនកម្ពុជា ដែលបានកាន់អំណាចជាយូរមកហើយនោះ។
លោកនាយករដ្ឋមន្ត្រីបានមានប្រសាសន៍បន្ថែមទៀតថា “ ខ្ញុំបានពិភាក្សារឿងនេះជាមួយឯកឧត្តម ស ខេង ហើយខ្ញុំបានប្រាប់គាត់ឲ្យបន្តស៊ើបអង្កេត បើទោះជាការបោះឆ្នោតចប់សព្វគ្រប់ហើយក៏ដោយ ព្រោះវាបំផ្លាញកិត្តិយសរបស់អាជ្ញាធរយើង ហើយពួកគេព្យាយាមទម្លាក់កំហុសលើគណបក្សប្រជាជនកម្ពុជា”។
កាលពីថ្ងៃពុធ ក្រសួងមហាផ្ទៃបានចេញសេចក្តីថ្លែងការណ៍មួយតាមគេហទំព័ររបស់ខ្លួនដោយចោទគណបក្សសង្គ្រោះជាតិថាបានបំផ្លាញស្លាកសញ្ញាគណបក្សរបស់ខ្លួនដោយខ្លួនឯង។ សេចក្តីប្រកាសនេះមានខ្លឹមសារថា ការបំផ្លាញនេះគឺ“ ជាទង្វើដ៏ថោកទាបដែលមានការរៀបចំផែនការជាប្រព័ន្ធដើម្បីបំផ្លាញបរិយាកាសល្អមុនការបោះឆ្នោត” និងជួយដល់អ្នកដែលស្វះស្វែងលាបពណ៌លើការបោះឆ្នោតជាតិថា មានភាពខ្វះចន្លោះ។
សេចក្តីប្រកាសនេះមានខ្លឹមសារបន្តថា ការបំផ្លាញស្លាកសញ្ញាគណបក្សនេះ គឺដើម្បី “ បម្រើគោលបំណងអវិជ្ជមានក្នុងការបដិសេធលទ្ធផលនៃការបោះឆ្នោត ដូចដែលគណបក្សសង្គ្រោះជាតិធ្លាប់បានធ្វើក្នុងពេលកន្លងមក”។
ជាការឆ្លើយតបចំពោះសេចក្តីប្រកាសកាលពីសប្តាហ៍មុននេះ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានចោទថា ការបំផ្លាញស្លាកសញ្ញាគណបក្សនេះគឺជាស្នាដៃរបស់គណបក្សកាន់អំណាច ដោយបានលើកហេតុផលថា ការកើនឡើងនូវប្រជាប្រិយភាពរបស់គណបក្សប្រឆាំងបានធ្វើឲ្យគណបក្សប្រជាជនកម្ពុជាមានការព្រួយបារម្ភ ហើយក៏ឈានដល់ការបំផ្លាញស្លាកសញ្ញាគណបក្សនេះប្រហែល១០នៅទូទាំងប្រទេស។
លោក ហ៊ុន សែន បានអះអាងថា ការស៊ើបអង្កេតរបស់រដ្ឋាភិបាលនឹងបញ្ចប់ការប៉ាន់ស្មានអំពីអ្នកដែលទទួលខុសត្រូវពិតប្រាកដ។ បន្ទាប់មក លោកនាយករដ្ឋមន្ត្រីបាននិយាយសំដៅមិនចំៗលើការប្រើថ្នាំបាញ់ “ ផលិតនៅអាមេរិក” ដែលលោកអះអាងថា ត្រូវបានប្រើប្រាស់ក្នុងការបំផ្លាញស្លាកសញ្ញាគណបក្សនេះ។
លោកបានមានប្រសាសន៍ថា “ អ្នកដែលបានធ្វើបែបនេះត្រូវតែទទួលខុសត្រូវ ទោះបីជននោះជាសមាជិករបស់គណបក្សប្រជាជនកម្ពុជាក៏ដោយ។ ប្រសិនបើសមាជិកគណបក្សប្រជាជនកម្ពុជាណាម្នាក់គឺជាអ្នកធ្វើមែន សមាជិករូបនោះនឹងមានពិរុទ្ធភាព”។
លោកបានបន្ថែមថា ករណីផ្សេងទៀតពាក់ព័ន្ធនឹងស្លាកសញ្ញាគណបក្សនយោបាយដែលត្រូវគេធ្វើឲ្យខូចដោយសារការបាញ់ថ្នាំពីលើ ក៏នឹងរាប់បញ្ចូលក្នុងការស៊ើបអង្កេតនេះដែរ។ លោក ហ៊ុន សែន បានមានប្រសាសន៍បន្តទៀតថា “ ពេលនេះ ខ្ញុំចង់ផ្ញើសារទៅអ្នកដែលបានទិញថ្នាំបាញ់នេះ រួចបាញ់វាលើមុខមនុស្ស [លើស្លាកសញ្ញាគណបក្សនយោបាយ]។ថ្នាំបាញ់នេះត្រូវស្ត្រីពីរនាក់ម្តាយនិងកូនស្រី នាំចូលពីអាមេរិកមកកម្ពុជា។ ហើយកុំនិយាយថា ខ្លួនឯងមិនដឹងថា ខ្លួនឯងជានរណាឲ្យសោះ”។ លោកបន្ថែមថា “ នៅពោធិ៍ចិនតុង [អាកាសយានដ្ឋានអន្តរជាតិភ្នំពេញ] ពួកគេត្រូវប្រាប់ថា ខ្លួនគ្រោងយកថ្នាំបាញ់នេះទៅធ្វើអ្វី។ហើយសូម សហរដ្ឋអាមេរិក ស៊ីបើរឿងថ្នាំបាញ់នេះផង”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានលើកឡើងកាលពីម្សិលមិញថា លោកយល់ស្របថា ការស៊ើបអង្កេតដោយឯករាជ្យអំពីការបំផ្លាញស្លាកសញ្ញាគណបក្សគឺជារឿងចាំបាច់ ប៉ុន្តែបានសម្តែងមន្ទិលថា ការស៊ើបអង្កេតរឿងនេះអាចធ្វើឡើងដោយក្រសួងមហាផ្ទៃនិងគណៈកម្មាធិការជាតិរៀបចំការបោះឆ្នោតដែលគ្រប់គ្រងដោយគណបក្សប្រជាជនកម្ពុជា។
លោកបានមានប្រសាសន៍ថា “ ចំណុចសំខាន់គឺនៅត្រង់ថា ការស៊ើបអង្កេតត្រូវធ្វើឡើងដោយឯករាជ្យនិងមានលក្ខណៈអព្យាក្រឹត្យ ដើម្បីរកឲ្យឃើញអ្នកដែលប្រព្រឹត្តទង្វើបែបនេះ។ ខ្ញុំគ្មានសុទិដ្ឋិនិយមថា នឹងមានការស៊ីបអង្កេតបែបនេះឡើយ។ខ្ញុំគ្មានជំនឿលើគណៈកម្មាធិការជាតិរៀបចំការបោះឆ្នោតទៀតទេ។ ពួកគេ[គណបក្សប្រជាជនកម្ពុជា] គ្រប់គ្រងអ្វីៗទាំងអស់”៕
ប្រែសម្រួលដោយ ចេវ ប៊ុននី