29 C
Phnom Penh

​លោក ឈូក បណ្ឌិត ត្រូវ​​​​ផ្ដន្ទាទោស​ដាក់​​​​ពន្ធនាគារ​​​រយៈពេល​​​​១៨ខែ

ដោយ ឌឹ ខេមបូឌា ដេលី

បទវិភាគ

រយៈពេល​​​១៧ខែ​បន្ទាប់​ពី​​​​លោក ឈូក បណ្ឌិត បាន​​បាញ់​ប្រហារ​អ្នក​ត​វ៉ា​ ដែល​ពោរ​ពេញ​ដោយ​កំហឹង​មួយ​​​ក្រុម​​​ សាលាដំបូង​ខេត្ត​​​ស្វាយ​រៀង​ បាន​ផ្ដន្ទាទោស​អតីត​អភិ​បាល​​ក្រុង​បាវិត​​​​រូបនេះ​​​ដាក់​​​​ពន្ធនាគារ​​​​ត្រឹម​តែ​១៨​ខែ​​​​ប៉ុណ្ណោះ​កាល​ពី​ម្សិលមិញ​​​​ ពីបទ​បាញ់​ប្រហារ និង​​ធ្វើ​ឲ្យ​របួស​កម្មការិនី​កាត់​ដេរ​​​ចំនួន​បីនាក់​។

នៅ​ពេល​ប្រកាស​សាល​ក្រម​​ក្នុង​តុលា​ការ​ ​ចៅក្រម លាង សួរ​ បាន​​​ចេញ​​​សេចក្តី​​​​បង្គាប់​​​ឲ្យ​​​​​មានការ​​​ចាប់​ខ្លួន​​លោក ឈូក បណ្ឌិត​ ជា​បន្ទាន់​ ហើយ​បាន​បង្គាប់​ឲ្យ​លោក​បង់​ប្រាក់​សំណង​ជំងឺ​ចិត្ត​ប្រមាណ​៩.៥០០​ដុល្លារ​ទៅ​ឲ្យ​កម្មការិនី​ទាំង​បី​នាក់​ ដែល​ម្នាក់​​​​ក្នុង​​​ចំណោម​​​​នោះ​​​បាន​​​រង​​​​របួស​ធ្លាយ​សួត​​ដោយ​សារ​​ការ​បាញ់​ប្រហារ​នោះ​។

ជន​រង​គ្រោះ​ទាំង​បី​​​​ ទី១​​​ឈ្មោះ​​​ ប៊ុន ចិន្ដា ​​​នឹង​​​ទទួលបាន​​​ប្រាក់​សំណង​ជំងឺ​ចិត្ត​​​ចំនួន​​​​៥.០០០​ដុល្លារ​​​ ទី​​​២​​​ឈ្មោះ ​​​នុត សុខន ​ នឹង​ទទួល​​បាន​​ ២.៥០០​ដុល្លារ ចំណែក​​​ជនរងគ្រោះ​​​ទី​​​៣​​​​ឈ្មោះ​​​ កែវ នា​​​ នឹង​​​ទទួលបាន​​​​​២.០០០​​​ដុល្លារ​​​​។

ខណៈ​​​តុលាការ​រក​ឃើញ​ពិរុទ្ធភាព​​​របស់​លោក ឈូក បណ្ឌិត​ ​​​ពីបទ​​​​​​បាញ់​ប្រហារ​កម្មកា​រិនី​ទាំង​បី​នាក់​​​​នោះ​​​ តុលាការ​បាន​សម្រេច​ថា លោក​មាន​ចំណែក​​​ទទួលខុសត្រូវ​​​ត្រឹមតែ​​​​​​ការ​​​​បង្ក​របួស​ស្នាម​ដោយ “ អចេតនា​” ​លើ​កម្មការិនី​ទាំង​បី​នាក់​នោះ​​​​ប៉ុណ្ណោះ​។

​ចៅក្រម​ លាង សួរ បាន​ថ្លែង​​​ថា “ តុលា​ការ​​សម្រេច​ថា​​​ ​​​ឈូក បណ្ឌិត មាន​ពិរុទ្ធភាព​​​​ផ្អែក​លើ​សក្ខីកម្ម​របស់​សាក្សី​ និង​ភ័ស្ដុតាង​ដែល​បញ្ជាក់​ថា ជននេះ​​​ពិត​ជា​បាន​បាញ់​ប្រហារ​​ជន​រង​គ្រោះ​ទាំង​បី​នាក់​នោះ​ប្រាកដ​មែន​”។ លោក​បាន​បន្ថែម​ថា “ យើង​បាន​​បង្គាប់​​ឲ្យ​មាន​ការ​ចាប់​​​​និង​​​ឃុំ​​​ខ្លួន​ជននេះ​​​ជា​បន្ទាន់​”។

ទោះជា​​​បទ​​​ឧក្រិដ្ឋ​​​នេះ​​​មាន​​​ស្ថាន​​​ទម្ងន់​ទោស​​​​​ក៏​​​ដោយ​​​ ក៏​​​​​​លោក​​​ ឈូក បណ្ឌិត មិន​ដែល​ត្រូវ​បាន​​ឃុំ​ខ្លួន​​​​ទេ​ ហើយ​​​លោក​មិន​បាន​​ចូល​រួម​​​​ក្នុង​​​ការ​កាត់​ក្ដី​​ឡើយ​ សូម្បី​​​តែ​​​​​​​​​ព័ត៌មាន​​​អំពី​​​ទីសំចត​​​​សព្វ​ថ្ងៃ​​​​របស់​​​លោក​​​ក៏​​​គ្មាន​​​ដែរ​​​​។

ថ្វី​​​បើ​​​តុលាការ​បាន​បង្គាប់​ឲ្យ​មាន​ចាប់​ខ្លួន​លោក ឈូក បណ្ឌិត​ ជា​បន្ទាន់​​ក៏​ពិតមែន​​​ ប៉ុន្តែ​​​មន្ត្រី​នគរបាល​​ហាក់​ដូច​ជា​មិន​បាន​​​បង្ហាញ​​​ពី​​​ភាព​​​រួសរាន់​​​ក្នុងការ​​​ចាប់ខ្លួន​​​គាត់​​​​ឡើយ​។

​លោក កែវ គង់ អធិការ​​នគរបាល​ក្រុង​បាវិត​ បាន​មាន​​​ប្រសាសន៍​​​ថា “ ​យើង​នឹង​ចាប់​ខ្លួន​គាត់​​​​នៅ​ពេល​ទទួល​បាន​ដីកា​ចាប់​ខ្លួន​ពី​តុលាការ​ ប៉ុន្តែ​ពេល​នេះ​យើង​មិន​ទាន់​ទទួល​បាន​ដីកា​នេះ​​​នៅ​ឡើយ​ទេ​។ ខ្ញុំ​មិន​ដឹង​ថា គាត់​​​​នៅ​ទីណា​ឡើយ​​​​”។

លោក គៀត ច័ន្ទថារិទ្ធ អ្នក​នាំ​ពាក្យ​នគរ​​​បាល​ជាតិ​​ បាន​​​អះអាង​​​ថា​​​ អាជ្ញាធរ​នឹង​ចាប់​ខ្លួន​លោក​​​ ឈូក​​​ បណ្ឌិត​​​ ឲ្យ​​​បាន​​​​ឆាប់​​តាម​ដែល​​​​​​​អាច​ធ្វើ​ទៅ​បាន​”  ប៉ុន្តែ​​​​​​​​ថា ​ឥឡូវ​​​នេះ​​​​មិន​ដឹង​​​​ថា​​​ គាត់​​​កំពុង​​​ស្ថិត​​​នៅ​​​ទីណា​​​​​ទេ​។ ​លោក​បាន​មាន​​​ប្រសាសន៍​​​​ថា “ ​ខ្ញុំ​មិន​ដឹង​ថា [​គាត់​​​​នៅ​ទីណា​​ឡើយ​​​] ប៉ុន្តែ​យើង​នឹង​ចាត់​វិធានការ​តាម​​​ការ​បង្គាប់​របស់​តុលាការ​”។

មជ្ឈមណ្ឌល​អប់រំ​ច្បាប់​​សម្រាប់​សហគមន៍​ដែល​ជា​អង្គការ​ផ្ដល់​ជំនួយ​ផ្នែក​ច្បាប់​ និង​អង្គការ​សិទ្ធិមនុស្ស​លីកាដូ​ បាន​លើក​ឡើង​ក្នុង​សេចក្ដី​ថ្លែងការណ៍​រួម​គ្នា​​​​ថា ការ​ផ្ដន្ទាទោស​​​​នេះ​​​គឺ​​​ស្រាល​​ពេក​មិន​​​សម​​​នឹង​​​​បទ​ឧក្រិដ្ឋ​​​ដែល​​​​​ខ្លួន​​ហៅថា​​​ [​ការ​ប៉ុន​ប៉ង​ធ្វើ​​​ឃាត​​​មនុស្ស​​​​បី​នាក់​] ឡើយ​”។

អង្គការ​សិទ្ធិ​មនុស្ស​អាដហុក​បាន​លើក​​​ឡើង​​ក្នុង​សេចក្ដី​ថ្លែងការណ៍​​មួយ​ថា​​​ “ ​ពិរុទ្ធភាព​​​​​​​​​របស់​​​​គាត់​​​​​​​​​ និង​ការពិត​​​ដែល​​​ថា​​​ ​បច្ចុប្បន្ន​​​​ គាត់​​​នៅ​តែ​មិន​ទាន់​ជាប់​ពន្ធនាគារ​​​​នៅឡើយ​​​ ស្តែង​​​​​​​ឲ្យ​ឃើញ​ពី​​​​ភាព​បទ​បែន​របស់​​​​​​​​តុលាការ​កម្ពុជា​ ​​​តាម​​​ការ​​​ចង់បាន​​​របស់​អ្នក​មាន​ទ្រព្យ​ធន​​​និង​អ្នក​មាន​ខ្នងក្រាស់​​​​”។ អង្គការ​នេះ​បាន​​បន្ថែម​ថា លោក ឈូក បណ្ឌិត គួរ​តែ​ត្រូវ​បាន​ផ្ដន្ទាទោស​​ពី​បទ​ប៉ុន​ប៉ង​​​​មនុស្ស​ឃាត​។

សេចក្ដី​ថ្លែងការណ៍​នេះ​មាន​​​ខ្លឹមសារ​​​ថា  “ ការ​ផ្ដន្ទាទោស​​​នេះ​​​មិន​សម​នឹង​បទ​ឧក្រិដ្ឋ​​​​របស់​គាត់​​​ឡើយ​ ហើយ​ការ​ពិត​ដែល​ថា​​​ គាត់​​​នៅ​​​តែ​​​​​​ស្ថិត​​​​នៅ​​​​ក្រៅឃុំ​​​នៅ​​​ឡើយ ​​​មាន​ន័យ​ថា រឿង​​​ក្តី​​​នេះ​​​នៅ​​​មិន​​​ទាន់មាន​​​យុត្តិធម៌​​​ទេ​”​​​។

ភ័ស្ដុតាង​សម្រាប់​​​ដាក់​​​បន្ទុក​​​លើ​​​​លោក ឈូក បណ្ឌិត​​​​ គាគច្រើន​​​គឺ​​​បាន​​​មក​​​​ពី​លោក ឡុង ផន នាយ​រង​​​ប៉ុស្ត៍​​​​នគរបាល​​សង្កាត់​ប្រាសាទ​ ក្នុង​​​​ក្រុង​បាវិត​ ដែល​បាន​ផ្ដល់​សក្ខីកម្ម​ទាំង​​នៅ​សាលា​ឧទ្ធរណ៍​​ និង​​​នៅ​​​​សាលាដំបូង​ខេត្ត​ស្វាយរៀង​ថា លោក​បាន​ឃើញ​អតីត​អភិបាល​​​​ក្រុង​រូបនេះ​​​​បាញ់​សំដៅ​​​​លើ​កម្មករ កម្មការិនី​​​​មួយក្រុម​​​​ដោយ​ចេតនា​។

លោក មឿន តុលា ប្រធាន​កម្មវិធី​ការ​ងារ​របស់​មជ្ឈមណ្ឌល​អប់​រំ​ច្បាប់​សម្រាប់​សហ​​​គមន៍​ បាន​លើក​ឡើង​ក្នុង​សេចក្ដី ថ្លែងការណ៍​មួយ​ថា “ ​នេះ​​​គឺ​​​ជា​​​សារ​​​​មាន​​​ខ្លឹមសារ​​​ថា  អ្នក​ត្រូវ​គេ​ទម្លាក់​​​កំហុស​​​លើ​​​ និង​សកម្មជន​​​បែរជា​​​​ទទួល​ទោស​ធ្ងន់​ ថ្វី​បើ​ពួក​គេ​មិន​បាន​ប្រព្រឹត្ត​បទ​ល្មើស​​​​អ្វី​​​សោះ​​​​ ខណៈ​​​បុគ្គល​ដែល​មាន​ខ្នងក្រាស់​​​​​​​​​​បែរ​​​ជា​​​ទទួល​ទោស​​​ស្រាល​​​ មិន​ថា​បទ​ល្មើស​របស់​​​​ពួកគេ​​​​មាន​​​ស្ថាន​​​ទម្ងន់​​​ទោស​​​ខ្លាំង​​​ប៉ុណ្ណា​​​​​​​”។

ការ​ផ្ដន្ទាទោស​ស្រាល​លើ​លោក​ ឈូក បណ្ឌិត ​គឺ​​​ផ្ទុយ​ស្រឡះ​​​ពី​​​​បទ​​​ចោទ​ប្រកាន់​កាល​ពី​ខែ​ធ្នូ​​​​លើ​​​អ្នក​ស្រី យ៉ោម បុប្ផា ដែល​ត្រូវ​បាន​ផ្ដន្ទាទោស​ដាក់​​​​ពន្ធនាគារ​រយៈ​ពេល​បី​ឆ្នាំ​ ដោយ​​​​ទោស​មួយ​ឆ្នាំ​ត្រូវ​បាន​ព្យួរ​ដោយ​​សាលាឧទ្ធរណ៍​ពី​បទ​ញុះញង់​​ឲ្យ​មាន​ការ​បង្ក​​​របួស​​​ស្នាម​​​លើ​​​​​បុរស​តែ​​​ម្នាក់​​​​គត់​​​ ក្នុង​​​រឿង​​​ក្តី​​​មួយ​ដែល​​អង្គការ​​​​សិទ្ធិ​​​មនុស្ស​​​នានា​​​​​​អះអាង​​​​ថា មាន​​​ហេតុផល​​​​នយោបាយ​។

អង្គការ​សិទ្ធិ​មនុស្ស​បាន​លើក​ឡើង​ថា ​រឿងក្តី​​​របស់​​​​អតីត​អភិបាល​ក្រុង​បាវិត​​​​រូប​​​នេះ​​​ត្រូវ​បានញាំញី​​​ដោយ​ការ​ជ្រៀត​ជ្រែក​នយោបាយ​។ លោក ឈូក បណ្ឌិត​ ដែល​ដំបូង​ឡើយ​ត្រូវ​បាន​ចាត់​ទុក​​​ថា ​ជា​ជន​សង្ស័យ​សំខាន់​​​បំផុត​​​​​ក្នុង​​​ករណី​​​បាញ់​ប្រហារ​នេះ​ ត្រូវ​​សាលា​​​ដំបូង​ខេត្ត​ស្វាយរៀង​​លើក​លែង​ការ​ចោទ​ប្រកាន់​ទាំង​អស់​កាល​ពី​ខែ​ធ្នូ​ ដោយ​​​មាន​​​ការ​​​លើក​​​​​​ហេតុផល​​​ថា គ្មាន​ភ័ស្ដុតាង​គ្រប់​គ្រាន់​។​​​

ប៉ុន្តែ​ក្រោយមក​ក្រសួង​យុត្តិធម៌​បាន​ចេញ​បញ្ជា​ឲ្យ​សាលា​ឧទ្ធរណ៍​ស៊ើប​អង្កេត​សំណុំ​រឿង​នេះ​ឡើង​វិញ​ ហើយ​កាល​ពី​ខែ​មីនា ​​​​​​សាលា​ឧទ្ធរណ៍​បាន​​​តម្កល់​​​បទ​​​​​​ចោទ​ប្រកាន់​​​​​​ទាំងនោះ​​​​​​លើ​លោក ឈូក បណ្ឌិត សាជា​​​ថ្មី​​​​​​ហើយ​​​ក៏​​​​បាន​បញ្ជូន​សំណុំ​រឿង​របស់​លោក​ទៅ​​សាលាដំបូង​ខេត្ត​ស្វាយរៀង​វិញ​។

លោក​ អាល់ហ្វ​ សេនជឺ (Ulf Santjer) ប្រធាន​​​ផ្នែក​​​​ទំនាក់​ទំនង​សាជីវកម្ម​​​​របស់​​​​ក្រុមហ៊ុន​​​​សម្លៀក​បំពាក់​កីឡា​​​​យីហោ​​​ ​ពូម៉ា​ (Puma) នៅ​​​​​​​អាល្លឺម៉ង់ ដែល​​សម្លៀក​បំពាក់​របស់​ខ្លួន​ត្រូវ​បាន​ផលិត​ដោយ​រោង​ចក្រ​ដែល​​​​ជា​​​កន្លែង​​​ធ្វើការ​​​របស់​​​ជន​រង​គ្រោះ​ទាំង​បី​នោះ​ បាន​ថ្លែងថា លោក​រីករាយ​​​​ណាស់​ចំពោះ​​​​​ការ​ចេញ​សាល​ដីកា​​​​នៅ​​​ទីបំផុត​​​ ប៉ុន្តែ​មិន​បាន​ធ្វើ​អត្ថា​ធិប្បាយ​ពី​ភាព​យុត្តិធម៌​​​ក្នុង​​​​ការ​កាត់​ក្ដី​ឡើយ​។

​កាល​ពី​ម្សិលមិញ​​​ តុលាការ​ក៏​បាន​កែ​ប្រែ​បទ​​​ចោទ​ប្រកាន់​​​​លើ​​​លោក ស ចន្ថា មន្ត្រី​នគរ​បាល​ក្រុង​បាវិត​ ដែល​ត្រូវ​បាន​ចោទ​ប្រកាន់​ពី​បទ​បង្ក​របួស​ស្នាម​ដោយ​អចេតនា​ក្នុង​​រឿង​ក្តី​​​តែ​មួយ​​​​នេះ​​​​​​កាល​ពី​ខែ​សីហា​​​​​​ផង​​​ដែរ​​​។ តុលាការ​​​សម្រេច​ផ្ដន្ទាទោស​ជន​​​នេះ​​​ដាក់​​​​ពន្ធ​នាគារ​រយៈ​ពេល​ប្រាំមួយ​ខែ​ និង​ពិន័យ​ជា​ប្រាក់​១លាន​រៀល​ពី​បទ​ប្រើ​អាវុធ​​ខុស​ច្បាប់​។

ចៅក្រម លាង សួរ​ បាន​ថ្លែង​​​​ថា “ គាត់​​​មិន​ជាប់​ពាក់​ព័ន្ធ​​ក្នុង​ការ​បាញ់​ប្រហារ​នោះ​ទេ​ ប៉ុន្តែ​គាត់​​​​បាន​ប្រើ​អាវុធ​ដែល​មិន​បាន​ចុះ​បញ្ជី​។ យើង​មិន​បាន​ចេញ​ដីកា​ចាប់​ខ្លួន​គាត់​​​ឡើយ​ ដោយសារ​​​ទោស​​ជាប់​ពន្ធនាគារ​​​របស់​​​គាត់​​​​​​មាន​រយៈពេល​​​​តិច​ជាង​មួយ​ឆ្នាំ​”។

លោក ម៉ុន កែ​វ​ស៊ីវិន មេធាវី​របស់​លោក ស ចន្ថា បាន​រិះ​គន់​សាល​ក្រម​របស់​សាលា​ដំបូង​​​​​ខេត្ត​ស្វាយរៀង​ ដោយ​ពន្យល់​ថា កូន​ក្ដី​របស់​លោក​ពុំ​​​មាន​វត្តមាន​​អំឡុង​​​​ពេល​​​នៃ​​​ការ​បាញ់​ប្រហារ​​​​​​នោះ​​​ទេ​​​​ ហើយ​គាត់​​​​មិន​​​​ដែល​​​បាន​បាញ់​​​​​កាំភ្លើង​​​​របស់​​​​​​ខ្លួន​​​ឡើយ​។

លោក​បានថ្លែងថា “ នៅ​ពេល​យក​កាំ​ភ្លើង​ខ្លី​ដែល​ជា​កម្មសិទ្ធិ​របស់​កូន​ក្ដី​ខ្ញុំ​ទៅ​​​​ពិនិត្យ​​ តុលាការ​​​មិន​បាន​​យក​​​កាំ​ភ្លើង​ខ្លី​របស់​លោក​​​ ឈូក បណ្ឌិត​ ទៅ​​​​ពិនិត្យ​ទេ​​​​ ដោយ​​​សំអាង​​​​​ថា កាំភ្លើង​ខ្លី​របស់​លោក ឈូក បណ្ឌិត បាន​បាត់​ទៅ​ហើយ​”។ លោក​បាន​បន្ត​ថា លោក​​​​​​​​​នឹង​ប្ដឹង​ឧទ្ធរណ៍​ជំទាស់​​​នឹង​​​សាល​សាល​ក្រម​​​​​នេះ​។

ជន​រង​គ្រោះ​ នុត សុខន ដែល​បាន​​​​រង​របួស​​ខ្នង​ និង​ដៃ​ដោយ​សារ​លោក ឈូក បណ្ឌិត​នោះ​​​ បាន​និយាយ​ថា ការ​ផ្ដន្ទាទោស​លោក ឈូក បណ្ឌិត ​ គឺ​មិន​ទាន់​គ្រប់​គ្រាន់​ឡើយ​។​ នុត សុខន ​និយាយ​​ថា “ ​ខ្ញុំ​ចង់​ឲ្យ​​​គាត់​​ជាប់​​​ពន្ធនាគារ​​​អស់​មួយ​ជីវិត​ ព្រោះ​​​ទោ​ស​ដែល​​​គាត់​​​​​បាន​ទទួល​​គឺ​ស្រាល​​​ពេក​​​ហើយ​​​”។

លោកស្រី​​​ ជិន លីដា មេធាវី​របស់​ជន​រង​គ្រោះ​ទាំង​បី​​​​រូប​​​​លើក​ឡើង​​​​ថា “ តុលា​ការគួរ​​​​​តែ​បាន​ចោទ​​ប្រកាន់​គាត់​​​​​ពី​បទ​ប៉ុន​ប៉ង​មនុស្ស​ឃាត​។
លោក ម៉ៅ សំវុទ្ធារី មេធាវី​របស់​លោក ឈូក បណ្ឌិត ដែល​ពុំមាន​វត្ត​មា​ន​ទាំង​​​អំឡុង​​​ពេល​​​បើក​​​​​សវនាការ​ទាំង​​​​បី​ថ្ងៃ​និង​​​អំឡុង​ពេល​​​​ប្រកាស​សាល​ក្រម​​​នោះ​​​​ បាន​បដិសេធ​មិន​ធ្វើ​អត្ថាធិប្បាយ​ទេ​​​៕

(រាយការណ៍​បន្ថែម​ដោយ Dene-Hern Chen)
ប្រែសម្រួល​ដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស