កាលពីម្សិលមិញ តុលាការកំពូលបានសម្រេចតម្កល់សាលក្រមផ្តន្ទាទោសជនជាតិនូវែលសេឡង់ម្នាក់ ដែលសាលាដំបូងខេត្តសៀមរាបផ្តន្ទាទោសឲ្យជាប់ពន្ធនាគាររយៈ ពេល២០ឆ្នាំកាលពីឆ្នាំ២០០៤ ពីបទរំលោភផ្លូវភេទក្មេងស្រីប្រាំនាក់ ក៏ប៉ុន្តែ បានបង្គាប់ឲ្យសាលាឧទ្ធរណ៍ពិចារណាការផ្តន្ទាទោសនេះឡើងវិញតាមក្រមព្រហ្មទណ្ឌឆ្នាំ២០០៩។
ព្រះរាជអាជ្ញា វេង ប៊ុនធឿន បានមានប្រសាសន៍ថា តុលាការកំពូលបានសម្រេចតម្កល់សាលដីការបស់សាលាឧទ្ធរណ៍ ក៏ប៉ុន្តែ បានបញ្ជូនសំណុំរឿងនេះឲ្យសាលាឧទ្ធរណ៍ពិចារណាឡើងវិញតាមក្រមព្រហ្មទណ្ឌថ្មី។
តាមក្រមព្រហ្មទណ្ឌឆ្នាំ២០០៩ ទោសរបស់បុរសវ័យ៦៦ឆ្នាំឈ្មោះ ហ្គ្រាហាំ រ៉ូបឺត គ្លេហន (Graham Robert Cleghorn) អាចកាត់បន្ថយបាន។
អំឡុងសវនាការជំនុំជម្រះ កាលពីឆ្នាំ២០០៤ ក្មេងស្រីទាំងប្រាំនាក់ដែលមានអាយុចាប់ពី១៥ឆ្នាំដល់១៩ឆ្នាំ បាននិយាយថា កាលពួកគេធ្វើជាអ្នកបម្រើការងារតាមផ្ទះឲ្យឈ្មោះ ហ្គ្រាហាំ រ៉ូបឺត គ្លេហន បុរសចំណាស់រូបនេះក៏បានចាប់រំលោភពួកគេ។
នៅក្នុងសវនាការជំនុំជម្រះ បុរសជាតិនូវែលសេឡង់រូបនេះ នៅតែអះអាងថា ខ្លួនគ្មានទោស។ នៅក្នុងសំណុំរឿងដាច់ដោយឡែកមួួយផ្សេងទៀត សាលាឧទ្ធរណ៍បានបើកសវនាការជំនុំជម្រះសំណុំរឿងជនជាតិបារាំងម្នាក់ឈ្មោះ ហ្សួន អ័រដុងណេ កាម៉ាចូ (Juan Ordonez Camcho) ដែលសាលាដំបូងខេត្តព្រះសីហនុ បានផ្តន្ទាទោសឲ្យជាប់ពន្ធនាគាររយៈពេលប្រាំពីរឆ្នាំ កាលពីឆ្នាំ២០១១ ពីបទរួមភេទជាមួយកុមារីអាយុ១៣ឆ្នាំម្នាក់។ ចៅក្រម ប៉ុល សំអឿន នៅក្រុមប្រធានក្រុមប្រឹក្សាជំនុំជម្រះបានថ្លែងថា សាលដីកានឹងប្រកាសនៅខែទី១៥ ខែកក្កដា៕
ប្រែសម្រួលដោយ ហួង កុកទៀន