28 C
Phnom Penh

បុគ្គលិក​កាស៊ីណូ​ ណាហ្គាវើល ​ប៉ះទង្គិច​ជាមួយ​សន្តិសុខ​អំឡុងពេល​តវ៉ា​

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ​ បុគ្គលិក​កាស៊ីណូ​ណ្គា​​ហ្គា​​វើល​ពី​រ​នាក់​​បាន​និយាយ​ថា ខ្លួន​បាន​រង​របួស​ពេល​ប៉ះទង្គិច​ជាមួយ​​សន្តិសុខ​នៅ​ច្រក​ចូល​កាស៊ីណូ​ក្នុង​រាជ​ធានី​ភ្នំពេញ​អំឡុង​ការ​តវ៉ា​សុំ​ដំឡើង​ប្រាក់​ខែ។

បុគ្គលិក​កាស៊ីណូ ​ណាហ្គាវើល ​​បាន​ប៉ះ​ទង្គិច​ជាមួយ​កម្លាំង​សន្តិ​សុខ​ក្រុមហ៊ុន ​​នៅ​ខាង​ក្រៅ​កាស៊ីណូ​នេះ​កាលពី​ម្សិលមិញ​ក្នុង​ទីក្រុង​ភ្នំពេញ អំឡុង​ពេល​តវ៉ា​ដើម្បី​ទាមទារ​ដំឡើង​ប្រាក់ខែ​និង​ទាមទារ​ថៅកែ​ឲ្យ​ទទួល​យក​បុគ្គលិក ដែល​ត្រូវ​បាន​បញ្ឈប់​ពី​ការងារ​កាល​ពី​ខែ​មុន​​។ (John Vink)
បុគ្គលិក​កាស៊ីណូ ​ណាហ្គាវើល ​​បាន​ប៉ះ​ទង្គិច​ជាមួយ​កម្លាំង​សន្តិ​សុខ​ក្រុមហ៊ុន ​​នៅ​ខាង​ក្រៅ​កាស៊ីណូ​នេះ​កាលពី​ម្សិលមិញ​ក្នុង​ទីក្រុង​ភ្នំពេញ អំឡុង​ពេល​តវ៉ា​ដើម្បី​ទាមទារ​ដំឡើង​ប្រាក់ខែ​និង​ទាមទារ​ថៅកែ​ឲ្យ​ទទួល​យក​បុគ្គលិក ដែល​ត្រូវ​បាន​បញ្ឈប់​ពី​ការងារ​កាល​ពី​ខែ​មុន​​។ (John Vink)

នាង​ ពេជ្រ ចាន់ណា ស្ថិត​ក្នុង​ចំណោម​បុគ្គ​​លិក​ប្រហែល​៤០០​នាក់​ដែល​ធ្វើការ​តវ៉ា​នៅ​មុខ​កាស៊ីណូ​កាលពី​ព្រឹក​ម្សិលមិញ ​ដោយ​គាត់​បាននិយាយថា នៅ​ពេល​នោះ​ស្រាប់​តែ​កម្លាំង​សន្តិសុខ​បាន​ចាប់​ផ្តើម​​រុញ​ច្រាន​ពួកគេ​ចេញ​ពី​ច្រក​ចូល​ ហើយ​ក្រុម​អ្នក​តវ៉ា​បាន​រុញ​ច្រាន​វិញ។​

អំឡុង​ពេល​ប៉ះ​ទង្គិច​គ្នា​នោះ ចាន់ណា បាន​និយាយថា នាង​ត្រូវ​បាន​​រង​របួស​ត្រង់​ក្បាល​នឹង​ដំបង​ដែក​​វែង​មួយ​ដែល​សន្តិសុខ​ប្រើ​ដើម្បី​រារាំង​យើង​។​ នាង​ ចាន់ណា បាន​និយាយ​ពី​មន្ទី​រ​ពេទ្យ​កាល់​ម៉ែត​ ​ដែល​នាង​​​ធូរ​ស្រាល​ពី​មុខរបួស​ថា “ ពួកគេ​បាន​ចាប់​ផ្តើម​វាយ​មក​លើ​ពួក​យើង​ ហើយ​ដំបង​​ដែក​នោះ​បាន​ត្រូវ​ក្បាល​របស់​ខ្ញុំ​តែ​​ម្តង។ ខ្ញុំ​ភ័យខ្លាច​ណាស់។ វា​ឈឺ​ចាប់​ណាស់​ដែល​ពួកគេ​ប្រើ​អំពើ​ហិង្សា​មក​លើ​​ពួក​យើង​ដូច​នេះ។

នាង​ ពេជ្រ ចាន់ណា បាន​និយាយ​បន្ថែម​ថា “ ខ្ញុំ​បាន​បម្រើ​ការ​នៅ​ទី​នេះ​រយៈពេល​ជិត​ប្រាំមួយ​ឆ្នាំ​ហើយ ​ហើយ​ប្រាក់​ខែ​របស់​ខ្ញុំ​គឺ​៩០​ដុល្លារ។ខ្ញុំ​តស៊ូ​ដើម្បី​ឆ្នាំ​ង​បាយ​របស់​ខ្ញុំ​តែប៉ុណ្ណោះ”។ បុគ្គលិក​កាស៊ីណូ​បាន​ធ្វើការ​តវ៉ា​នៅ​មុខ​ច្រក​ចូល​ដ៏​ធំ​នេះ​ចាប់​តាំង​ពី​ថ្ងៃ​ទី​១៣ ខែ​មិថុនា​​ មក​ម៉្លេះ​ ដោយ​ទាម​ទារ​សុំ​ដំឡើង​ប្រាក់​ខែ​ ដែល​ចាប់​ផ្តើម​​ពី​៨០​ដុល្លារ​ក្នុង​មួយ​ខែ​​នោះ ​យ៉ាង​ហោច​ណាស់​​ត្រូវ​ដំឡើង​ដល់​១៥០​ដុល្លារ​ ​ហើយ​ស្នើសុំ​ឲ្យ​យក​បុគ្គលិក​ដែល​ត្រូវ​បាន​​បណ្តេញ​​ចេញ​មួយ​ចំនួន​​ចូល​ធ្វើការ​វិញ។

លោក យី ឌា អ្នក​តវ៉ា​ម្នាក់​ទៀត​បាន​ដើរ​​​កាត់​ផ្លូវ​កាស៊ីណូ​នេះ​ដោយ​មាន​ឈាម​ជោក​ថ្ងាស​ និង​បបូរ​មាត់​ក្រោម​ក្រោយ​ពី​មាន​ការ​ប៉ះ​ទង្គិច​គ្នា​។ លោកបាន​មានប្រសាសន៍ថា “ ​ខ្ញុំ​បាន​ព្យាយាម​ការ​ពារ​ស្ត្រី​ទាំង​នេះ​ពី​ព្រោះ​សន្តិ​សុខ​បាន​វាយ​ស្ត្រី​ទាំង​នេះ​ ហើយ​ក្រោយ​មក​ពួក​គេ​បាន​​វាយ​ខ្ញុំ​ត្រូវ​មុខ​និង​ខ្នង​”។

លោក សុខ ណារិទ្ធ អនុប្រធាន​សហ​ព័ន្ធ​​និយោ​ជិត​ ទេសចរណ៍ និង​សេវាកម្ម​កម្ពុជា​ ជា​សហជីព​ដែល​តំណាង​និ​យោ​ជិត​ទាំង​នេះ​​​មានប្រសាសន៍ថា លោក​ត្រូវ​បាន​អញ្ជើញ​ឲ្យ​ទៅ​ចូលរួម​កិច្ច​ប្រជុំ​នៅ​សាលា​រាជ​ធានី​កាល​ពី​ម្សិលមិញ​ជាមួយ​​លោក​អភិបាល​រង ឃួង​ ស្រេង ដើម្បី​ដោះ​ស្រាយ​ជម្លោះ​នេះ។

លោក​បាន​មាន​ប្រសាសន៍​បន្ថែម​ថា “ ប៉ុន្តែ​សាលា​រាជ​ធានី​បាន​សុំ​ឲ្យ​យើង​ផ្អាក​កូដកម្ម​នេះ​រយៈពេល​ពីរ​បី​ថ្ងៃ​សិន​ ដើម្បី​រង់​ចាំ​ដំណោះ​ស្រាយ​របស់​ខ្លួន​។ ក្រុមហ៊ុន​មិន​បាន​ចូល​រួម​ក្នុង​កិច្ច​ប្រជុំ​នោះ​ទេ ហើយ​យើង​មិន​មាន​ជំនឿ​ចិត្ត​ឡើយ”។

លោក ឃួង ស្រេង​ បាន​បញ្ជាក់​អះ​អាង​ពី​កិច្ច​ប្រជុំ​នេះ​ ប៉ុន្តែ​បាន​បង្វែរ​សំណួរ​ទៅ​លោក ឡុង ឌីម៉ង់ អ្នក​នាំ​ពាក្យ​សាលា​រាជ​ធានី​ ដែល​បាន​មាន​ប្រសាសន៍​ថា លោក​មិន​បាន​ដឹង​​ថា មាន​អ្វី​កើតឡើង​ឡើយ។
អ្នកស្រី​ ហែម សុភក្ត្រ ជា​មន្ត្រី​​ជាន​់ខ្ពស់​ផ្នែក​ទំនាក់​ទំនង​សាធារណៈ​និងគ្រប់គ្រង​ស្លាក​សញ្ញា​នៅ​កាស៊ីណូ​ ណាហ្គាវើល​​បាន​មាន​ប្រសាសន៍​​ថា អ្នកស្រី​មិន​ដឹង​ពី​ការ​ប៉ះ​ទង្គិច​គ្នា​កាលពី​ព្រឹក​ម្សិល​មិញ​រវាង​អ្នក​តវ៉ា​ និង​សន្តិ​សុខ​ឡើយ។

អ្នក​ស្រី​បាន​មាន​ប្រសាសន៍​​បន្ថែម​ទៀត​ថា “ ខ្ញុំ​មិន​ដឹង​ពី​ការ​ប៉ះ​ទង្គិច​គ្នា​នេះ​ទេ ហើយ​​ខ្ញុំ​មិន​អាច​ធ្វើ​អត្ថា​ធិប្បាយ​បាន​ទេ”។ បុគ្គលិក​កាស៊ីណូ​បាន​អះ​អាង​ថា សហ​សេវិក​របស់​ខ្លួន​ចំនួន​៤០០​នាក់​ត្រូវ​បាន​បណ្តេញ​​ចេញ​ពី​ការ​ងារ​​ចំពោះ​ការ​​ចូល​រួម​ក្នុង​ការ​តវ៉ា​កាលពី​​សប្តាហ៍​មុន​ ប៉ុន្តែ​កាស៊ីណូ​មិន​បាន​បញ្ជាក់​ពី​បញ្ហា​នេះ​ទេ៕

ប្រែ​សម្រួល​ដោយ សោម សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស