34 C
Phnom Penh

តើការ​ព្រមាន​ពីការ​ផ្ទុះ​សង្គ្រាម​​របស់​លោក ហ៊ុន សែន អាច​នឹង​​ទាក់​​ទាញ​សន្លឹក​ឆ្នោតបាន​ឬទេ?

ដោយ ឌឹ ខេមបូឌា ដេលី

បទវិភាគ

នៅ​ក្នុង​រយៈពេល​មួយ​ខែ​ចុង​ក្រោយ​នេះលោក​នាយក​រដ្ឋមន្ត្រី​ ហ៊ុន សែន បាន​ព្រមាន​ម្ដង​ហើយ​ម្ដង​ទៀត​​អំពីការ​ផ្ទុះ​ឡើង​ជា​ថ្មី​នូវ​សង្គ្រាម​ស៊ីវិលប្រសិន​បើ​គណបក្ស​ប្រជា​ជន​កម្ពុជា​កំពុង​កាន់​អំណាច​របស់​លោក​​​​​ចាញ់​ការ​បោះ​ឆ្នោត​ជាតិ​នៅ​ថ្ងៃ​ទី​២៨ ​ខែ​កក្កដា​​ខាង​មុខ​នេះ។ ការ​ព្រមាន​ដែល​ថា ជ័យ​ជម្នះ​របស់​គណ​បក្ស​ប្រឆាំង​អាច​បង្ក​ឲ្យ​មាន​ជម្លោះ​ប្រដាប់​អាវុធ​ ការ​បំផ្លិច​បំផ្លាញ​ហេដ្ឋា​រចនា​សម្ព័ន្ធ​​​​​ដែល​​​មាន​ស្រាប់​​ ឬសូម្បី​តែ​ការ​វិល​ត្រឡប់​មក​វិញ​នូវ​របប​ខ្មែរ​ក្រហមនេះ​ ត្រូវលោក​ ហ៊ុន ​សែន​ ​​ធ្វើ​ឡើង​ម្ដង​ហើយ​ម្ដង​ទៀត​យ៉ាង​តិច​១២​លើក ចាប់តាំង​ពីលោកបានធ្វើការ​​ព្រមាន​ជា​លើក​ដំបូង​នៅ​ចុង​ខែ​មេសា​មក។

​ការ​ព្រមាន​នេះបាន​ក្លាយ​ជា​ចំណុច​​សំខាន់​នៃ​យុទ្ធនាការ​របស់​គណបក្ស​កំពុង​កាន់​អំណាច​​ ហើយ​បាន​ជ្រួត​ជ្រាប​ដល់​​អ្នក​បោះ​ឆ្នោត​​​​​រាប់​លាន​នាក់​តាម​រយៈ​ស្ថានីយ​វិទ្យុ​ និង​ទូរទស្សន៍​ដែល​ចាក់​ផ្សាយ​ទាំង​ស្រុង​នូវ​សុន្ទរកថា​របស់​លោក ហ៊ុន សែន រាល់​ពេល​ដែល​លោក​ថ្លែង​​ជា​សាធារណៈ​ឬធ្វើ​ជា​អធិបតី​ក្នុង​ពិធី​ផ្សេងៗ​​។

ក្រុម​អ្នក​វិភាគ​យល់​ឃើញ​ស្របគ្នា​​ថា ឱកាស​​នៃ​ការ​ផ្ទុះ​ឡើង​ជាថ្មី​នូវ​សង្គ្រាម​ស៊ីវិល​​​​​ គឺ​មាន​តិច​ណាស់​​ ភាគ​ច្រើន​គឺ​ដោយសារ​ការ​ពិត​ដែល​ថា ​គណបក្ស​ប្រជា​ជន​កម្ពុជា​​ប្រាកដ​ជា​នឹង​ទទួល​បាន​ជ័យ​ជម្នះ​នៅ​ថ្ងៃ​ទី​២៨ ខែ​កក្កដា​ ខាង​មុខ​នេះ​។ ​ដូច្នេះ​ ​សួរថា​តើ​ហេតុ​អ្វី​បាន​ជា​​លោក​​ ហ៊ុន សែន​ ចូល​ចិត្ត​លើក​ឡើង​ពីចំណុច​នេះម្ល៉ះ?​ តើ​​វា​មាន​ឥទ្ធិពល​លើការ​សម្រេច​​ចិត្ត​របស់​អ្នក​បោះឆ្នោត​​ នៅ​ពេលដែល​​ពួកគេ​ទៅ​បោះ​ឆ្នោត​ដែរ​ឬទេ?

លោក ចន ស៊ីយ៉ូស៊ីយ៉ារី (Jonh Ciorciari) អ្នក​ជំនាញផ្នែក​នយោបាយ​​កម្ពុជា​នៅ​មហា​វិទ្យា​ល័យ​គោល​នយោបាយ​សាធារណៈ​ជើរ៉ល អា​ ហ្វត (Gerald R. Ford School of Public Policy) នៃ​សាកល​វិទ្យាល័យ​មីឈីហ្គែន​​ (University of Michigan) បាន​លើក​ឡើង​ថា សម្រាប់​​ប្រជា​ជន​កម្ពុជា​ទាំង​ឡាយ​ណា​​ដែល​បាន​រង​ការ​ឈឺ​ចាប់​ខ្លោច​ផ្សា​ក្នុង​សម័យ​ខ្មែរ​ក្រហម​ និង​ការ​ប្រយុទ្ធ​​​គ្នា​ដណ្ដើម​អំណាច​​មិន​ចេះ​ចប់​នោះ ការ​នឹក​ឃើញ​អំពី​​ការ​ផ្ទុះឡើងនូវ​​សង្គ្រាម​ស៊ីវិល​ នឹង​ជំរុញ​ឲ្យ​ពួកគេ​បោះ​ឆ្នោត​ឲ្យ​គណ​បក្ស​កំពុង​​កាន់​អំណាច​​​។

លោក ស៊ីយ៉ូស៊ីយ៉ារី ​លើក​ឡើង​​តាម​​រយៈ​អ៊ីម៉េល​ថា “ ការ​ព្រមាន​នេះ​ធ្វើ​ឲ្យ​អ្នក​បោះ​​ឆ្នោត​ ជា​ពិសេស​គឺ​អ្នក​បោះ​ឆ្នោត​មាន​វ័យ​ចំណាស់​ នឹក​ឃើញ​ដល់​ក្ដី​រន្ធត់អំឡុង​​សម័យ​សង្គ្រាម​​ ហើយ​ជំរុញ​ឲ្យពួកគេ​សម្រេច​ចិត្ត​ជ្រើស​រើស​យក​រដ្ឋាភិបាល​ចាស់​​ដែល​មិន​សុក្រឹត​ ប៉ុន្តែ​អាច​ធានា​​ស្ថិរភាព​បាន​​។ លោក​បាន​បន្ថែម​ថា “ អ្នក​បោះ​ឆ្នោត​ក៏​ប្រហែល​ជា​អាច​ចាត់​ទុក​ថា ការ​ព្រមាន​នេះ​ជា​ការ​គំរាម​​ដោយ​ប្រយោល​ថា គណបក្ស​ប្រជា​ជន​កម្ពុជា​ខ្លួ​នឯង​ផ្ទាល់​នឹង​ធ្វើ​ឲ្យបាត់​បង់​សុខ​សន្តិ​ភាព​​​ប្រសិន​បើ​គណបក្ស​នេះ​ចាញ់​ការ​បោះ​​​​​​ឆ្នោត​​”។

លោក មឿន ឈានណារិទ្ធ ប្រធាន​វិទ្យាស្ថា​ន​កម្ពុជា​​សម្រាប់​ការ​សិក្សា​អំពី​ប្រព័ន្ធ​ផ្សព្វ​ផ្សាយ​​បាន​លើក​ឡើង​ថា ​​ការ​ព្រមាន​របស់​​លោក ហ៊ុន សែន អាច​ធ្វើ​ឡើង​ក្នុង​បំណង​បំភ័យ​អ្នក​​បោះ​ឆ្នោត​កុំ​ឲ្យ​គាំ​ទ្រ​គណបក្ស​សង្គ្រោះ​ជាតិ​​ ​ប៉ុន្តែ​ តាមពិត​អ្នក​បោះ​ឆ្នោត​មួយ​ចំនួន​​នៅ​ក្នុង​ប្រទេស​នេះ​ប្រហែល​ជា​បាន​សុំានឹង​ការ​ព្រមាន​របស់​​នាយក​រដ្ឋមន្ត្រី​រូប​នេះ​​អំពីការ​ផ្ទុះសង្គ្រាម​ ប្រសិន​បើ​គណបក្ស​ប្រជា​ជន​ចាញ់​ឆ្នោត​ទៅហើយ​។

លោក​មាន​ប្រសាសន៍​ថា ការ​ព្រមាន​របស់​គាត់​ [លោក ហ៊ុន សែន] ធ្វើ​ឡើង​ក្នុង​បំណង​គំរាម​ [ប្រជា​ជន] ពិសេស​គឺ​អ្នក​គាំទ្រ​គណ​បក្ស​ប្រឆាំង​​។ ប៉ុន្តែ​ក្រោយ​ការ​បោះ​ឆ្នោត​ជា​តិ​ចំនួន​៤លើក អ្នក​បោះ​ឆ្នោត​ចាប់​ផ្ដើម​ចេះ​មាន​មន្ទិល​សង្ស័យ​អំពី​អ្វ​ី​ដែល​ពួកគេ​គួរជឿ​​ និង​អ្វីដែល​ពួកគេ​គួរបារម្ភហើយ​”។

លោក មឿនឈានណារិទ្ធ ​បាន​បន្ថែម​​ថា ការ​រួម​ចំណែក​របស់​ម្ចាស់​ជំនួយ​ អង្គការ​ក្រៅ​​រដ្ឋា​ភិបាល​ និង​សង្គម​ស៊ីវិល​​​ក្នុងការ​អប់​រំ​អ្នក​បោះ​ឆ្នោត​អំពី​ដំណើរការ​ប្រជា​ធិបតេយ្យ​​នៅ​ក្នុង​រយៈពេល​ពីរ​ទសវត្សរ៍​នេះបាន​ជួយ​ពង្រឹង​សមត្ថភាពរបស់​​អ្នក​បោះ​ឆ្នោត​ក្នុងការ​ស្វែង​យល់​ពីគណបក្ស​នយោបាយ​​ និង​ការ​ពិចារណា​ពីការ​អះអាង​ និង​ការ​សន្យា​របស់​បេក្ខជន​ឈរឈ្មោះបោះ​ឆ្នោត​។

លោក ណារិទ្ធ ​មាន​ប្រសាសន៍​ថា “ គណ​បក្ស​ប្រជា​ជន​កម្ពុជា​​ ជា​ពិសេស​គឺ​លោក​នាយក​​រដ្ឋមន្ត្រី​​ខ្លួ​ន​ឯង​ផ្ទាល់​ បាន​ប្រើ​ភាសា​ដដែល​ៗ​នេះ​ប៉ុន្មាន​លើក​មក​ហើយ​ ហើយ​ប្រជា​ជន​ក៏ចាប់​ផ្ដើម​មាន​ការ​ធុញ​ទ្រាន់​នឹង​ការ​ប្រើ​ភាសា​ដដែល​ៗទាំង​នេះ​ ដូចជា​ថា គណបក្ស​ប្រជា​ជន​កម្ពុជា​ គឺ​ជា​អ្ន​ក​រំដោះ​ប្រជា​ជន​ពី​របប​ខ្មែរ​ក្រហម​ ដែរ​។ ដូច្នេះ​ខ្ញុំគិត​ថា ការ​ផ្ទុះ​សង្គ្រាម​មិន​មែន​ជា​ការ​គំរាម​ដែល​អាច​ធ្វើ​ឲ្យ​អ្នក​បោះឆ្នោត​មាន​ការ​ភ័យ​ខ្លា​ចទៀត​ទេ​”  ដោយ​លោក​​ធ្វើការ​កត់​សម្គាល់​ថា បច្ចុប្បន្ន​នេះ​ ការ​ភ័យ​ខ្លាច​សង្គ្រាម​គឺ​មិ​ន​ទូលំ​ទូលាយ​​ដូច​កាលពី​មួយ​ទសវត្សរ៍​មុនឡើយ​​​។

សម្រាប់​លោក គល់​ បញ្ញា ដែល​ជា​នាយក​​ប្រតិបត្តិ​នៃ​គណៈកម្មាធិការ​សម្រាប់​ការ​បោះ​ឆ្នោត​ដោយ​សេរី​និង​យុត្តិធម៌​វិញ ការ​ព្រមាន​ម្ដង​ហើយ​ម្ដង​ទៀតរបស់​លោក​នាយក​​រដ្ឋមន្ត្រី​​ដែល​ថា ភាព​ចលាចល​នឹង​កើត​មាន​ប្រសិន​បើ​ប្រជា​ពល​រដ្ឋ​​បោះ​ឆ្នោត​គាំ​ទ្រ​គណ​បក្ស​ប្រឆាំងនេះ​​​​ ទីបំផុត​ប្រហែល​ជា​អាច​បំបាក់​ទឹក​ចិត្ត​ប្រជា​ជន​មិន​ឲ្យ​ចូល​រួម​ក្នុង​ការ​បោះ​ឆ្នោត​តែ​ម្ដង​។

លោក គល់ បញ្ញា បានមាន​ប្រសាសន៍​ថា “ ខ្ញុំ​គិត​ថា វិធី​ធ្វើ​យុទ្ធនាការ​របស់​គណបក្ស​ប្រជា​ជន​កម្ពុជា​ គឺ​មិន​លើក​ទឹក​ចិត្ត​អ្នក​បោះ​ឆ្នោត​ទេ​ ព្រោះ​ប្រជា​ជន​មាន​អារម្មណ៍​ថា ការ​ផ្លាស់​ប្ដូរ​រដ្ឋាភិបាល​តាម​រយៈ​ការ​បោះ​ឆ្នោត​ មាន​ហានិភ័យ​ខ្ពស់​​។ ការ​ព្រមាន​អំពី​លទ្ធភាព​​នៃការ​ផ្ទុះ​សង្គ្រាម​​​ប្រសិន​បើ​គណបក្ស​ប្រឆាំង​​ឈ្នះឆ្នោត​ គឺមិនជំរុញ​​ទឹក​ចិត្ត​​ប្រជា​ជន​​ឲ្យ​​យល់​ឃើញ​ថា ការ​បោះ​ឆ្នោត​គឺ​ជា​មធ្យោបាយ​ក្នុង​ការ​ធ្វើ​ឲ្យ​ប្រទេស​ជាតិ​មា​ន​ស្ថិ​រភាព​ ​ធ្វើ​ឲ្យ​​លទ្ធិ​​ប្រជា​ធិបតេយ្យ​​​​កាន់​តែ​មាន​ភាព​ប្រសើរ​ឡើង និង​ធ្វើ​ឲ្យ​មាន​សិទ្ធិ​សេរី​ភាព​កាន់​តែ​ទូលំ​ទូលាយ​ទេ​​​”។

ទោះជា​​មានការ​យល់​ឃើញ​ថា ការ​ព្រមាន​​​​របស់​លោក ហ៊ុន សែន ​គ្រាន់​តែ​ជា​ការ​បំភ័យ​​​​គ្មាន​ការ​ពិត​ក៏ដោយ​ ​ក៏លោក​ ផៃ ស៊ីផាន អ្នក​នាំពាក្យ​ទីស្ដីការ​គណៈ​រដ្ឋមន្ត្រី​ នៅតែ​អះអាង​​ថា លទ្ធភាព​នៃការ​ផ្ទុះ​សង្គ្រាម​ប្រសិន​បើ​គណ​បក្ស​សង្គ្រោះ​ជាតិ​ឈ្នះ​ឆ្នោត​​​គឺ​ជា​រឿង​​ពិត​ណាស់​ មិន​មែន​គ្រាន់​តែ​ជា​ការ​ព្រមាន​ទេ​​។
លោក​បានមាន​ប្រសាសន៍​ថា “ គ្រប់​គ្នា​ [នៅ​ក្នុង​ប្រព័ន្ធ​ផ្សព្វផ្សាយ​ដែល​គ្មាន​ទំនាក់​ទំនង​ជា​មួយ​នឹង​គណបក្ស​កាន់​អំណាច​] បាន​ព្យាយាម​អស់​ពីលទ្ធភាព​ក្នុង​ការធ្វើ​សេចក្ដី​​​​​រាយ​ការណ៍​លម្អៀង​ពី​ប្រសាសន៍​​របស់​សម្ដេច​​នាយក​រដ្ឋមន្ត្រី​​”។

លោ​ក ផៃ ស៊ីផាន បាន​លើក​ឡើង​ថា ការ​ប្រើ​ប្រាស់ជា​ទូទៅ​​នូវ​ភាសា​រើស​អើង​ប្រទេស​វៀតណាម​ក្នុង​ចំណោម​បេក្ខជន​ឈរ​ឈ្មោះ​បោះ​ឆ្នោត​របស់​គណបក្ស​ប្រឆាំង​ និង​ការ​អះ​អាង​ដែល​ថា ថ្នាក់​ដឹក​នាំ​របស់​គណបក្ស​ប្រជាជន​កម្ពុជា​គឺជា​អាយ៉ង​របស់​វៀតណាម​​​​នឹង​ធ្វើ​ឲ្យ​គណបក្ស​សង្គ្រោះ​ជាតិ​ ជួបការ​លំបាក​​​​បំផុត​ក្នុង​ការ​​​រក្សា​ឯក​ភាព​ជាតិ​​ ប្រសិន​បើ​គណ​បក្ស​នេះ​ឈ្នះការ​បោះឆ្នោតនៅ​​ក្នុង​ខែកក្កដា​ខាង​​​មុខនេះ​។

លោក ផៃ ស៊ីផាន បាន​បន្ត​ថា លើស​ពី​នេះ​​ទៅ​ទៀត ការ​សន្យា​របស់​គណបក្ស​ប្រឆាំង​​ស្ដីពីការ​ពាំនាំ​ជម្លោះ​ព្រំដែន​ជា​មួយ​វៀតណាម​​ទៅ​តុលាការ​ក្រុង​ឡាអេ​ ដើម្បី​ដណ្ដើម​យក​មក​វិញ​នូវ​ដី​ដែល​កម្ពុជា​បាន​បាត់​បង់​​ នឹង​ធ្វើ​ឲ្យ​ប្រទេស​នេះ​ធ្លាក់​ទៅ​ក្នុង​ភ្លើង​សង្គ្រាម​ជា​មួយ​វៀតណា​ម ប្រសិន​បើ​បក្ស​សង្គ្រោះ​​​​ជាតិ​បាន​ឡើង​កាន់​អំណាច​។

លោក ផៃ ស៊ីផាន បាន​មាន​ប្រសាសន៍​ថា “ យុទ្ធនាការ​​របស់​គណបក្ស​សង្គ្រោះ​ជាតិមិន​គិត​ដល់​ឯក​ភាព​ជាតិ​ មិន​គិត​​ដល់​សន្តិ​សុខ​ជាតិ ​ទេ…​ដូច្នេះ​ ពួកគេ​មិន​គោរព​អំណាច​របស់​ប្រជា​ជន​ឡើយ​”។ លោក ផៃ ស៊ីផាន បាន​មាន​ប្រសាសន៍​ថា “ នៅ​ក្នុង​ឆ្នាំ​១៩៩៣ [ពេល​កិច្ច​ព្រម​ព្រៀង​សន្តិ​ភាព​ត្រូវ​បាន​ចុះ​ហត្ថលេខា​] យើងបាន​​ដឹង​តាម​រយៈ​បទ​ពិសោធថា យើង​ត្រូវ​តែ​ដើរ​ចេញ​ [ពី​សង្គ្រាម]  យើង​ត្រូវ​តែ​គោរព​គ្នា​ទៅវិញ​ទៅមក​ យើង​ត្រូវ​តែ​មាន​ការ​សាម​គ្គី​គ្នា​។ ប៉ុន្តែ​…​គណបក្ស​ប្រឆាំង​បែ​រជា​និយាយ​ថា គណបក្ស​ប្រជាជន​កម្ពុជា​ត្រូវ​បាន​បង្កើត​ឡើង​ដោយ​វៀតណាម ថារដ្ឋាភិបាល​នេះ​គឺ​ជារបស់​វៀតណាមទៅវិញ​។ ប្រជា​ពល​រដ្ឋ​គឺ​ជា​អ្នក​បោះ​ឆ្នោតឲ្យ​យើងឡើង​កាន់​អំណាច​​​មិន​មែន​វៀតណាម​ទេ​”។

តែ​ទោះ​បី​ជាយ៉ាង​ណា លោក សុន ឆ័យ បេក្ខ​ជន​​ឈរ​ឈ្មោះ​បោះ​ឆ្នោត​មកពី​គណ​បក្ស​​សង្គ្រោះ​ជាតិ​ ​លើក​ឡើង​ថា គណ​បក្ស​​ប្រឆាំ​ង​លែង​ប្រើ​ភាសា​រើស​អើង​ប្រទេស​វៀតណាម​ ដែលគណបក្ស​ សម រង្ស៊ី ធ្លាប់​បាន​​ប្រើ​ក្នុង​ការ​បោះ​ឆ្នោត​នាពេល​កន្លង​មក​ហើយ​​​ ផ្ទុយ​ទៅវិញ​គឺ​កំពុងតែ​​ផ្ដោត​លើ​គោល​នយោបាយ​ប្រាំពីរ​ចំណុច​របស់​ខ្លួន​ស្ដីពី​​ការ​ផ្ដល់​ប្រាក់​បៀវត្សរ៍​​ខ្ពស់ជាង​មុន​ តម្លៃ​ទំនិញ​ទាប​ជាង​មុន​ និង​ការ​ទទួល​បាន​ការ​អប់​រំ និង​សេវា​សុខ​ភាព​ដោយ​មិន​គិត​ថ្លៃ​។

លោក​មាន​ប្រសាសន៍​ថា “ លើក​នេះ​​យើង​​គ្មាន​គម្រោង​ប្រើ​ភាសារើស​អើង​វៀត​ណាម​​មក​ទាក់​ទាញ​សន្លឹក​ឆ្នោត​ទេ​។ យើង​បាន​តាក់​តែង​គោល​នយោបាយ​ស្ដីពីវិធី​ដោះស្រាយ​​បញ្ហា​ជាមួយ​ប្រទេស​ជិត​ខាង​របស់​យើង​តាម​​រយៈ​ការ​ចរចាដោយ​សន្តិវិធី​”។ លោក កឹម ឡី អ្ន​ក​ពិគ្រោះ​យោបល់​ផ្នែក​ស្រាវជ្រាវ​នៅ​មជ្ឈមណ្ឌល​សិទ្ធិ​មនុស្ស​កម្ពុជា​​បាន​លើក​ឡើង​ថា លទ្ធផល​នៃ​ការ​បោះ​ឆ្នោត​​​នៅ​ក្នុង​ឆ្នាំ​នេះ​​ទំនង​ជា​នឹង​អាស្រ័យ​លើការ​យល់​ឃើញ​របស់​ប្រជា​ពល​រដ្ឋ​​ចំពោះ​គោល​នយោបាយ​របស់គណបក្ស​ប្រជា​ជន​ក្នុង​រយៈ​ពេល​ពីរ​អាណត្តិ​ចុង​ក្រោយ​នេះ​ ជាង​លើ​ការ​បារម្ភ​អំពី​លទ្ធភាពនៃការ​កើត​មាន​សង្គ្រាម​។

លោក​បាន​បញ្ជាក់​ថា ​គោល​នយោបាយ​​ដែល​គណបក្ស​ប្រជា​ជន​កម្ពុជា​បាន​អនុវត្ត​ក្នុង​រយៈពេល​១០​ឆ្នាំ​ចុង​ក្រោយ​នេះ បាន​ជះ​ផល​ប៉ះពាល់​អវិជ្ជមាន​លើ​ជីវភាព​រស់​នៅ​របស់​ប្រជា​ជន​ក្រីក្រ​នៅ​តាម​តំបន់​ជន​បទ​​​​​។ លោក​បាន​មាន​ប្រសាសន៍​ថា “ ដោយ​​សារ​​​រយៈ​ពេល​ប្រាំ​ឆ្នាំ​ចុង​ក្រោយ​នេះ គណបក្ស​ប្រជា​​ជន​កម្ពុជា​​បាន​អនុវត្ត​គោល​នយោ​បាយ​ដែល​បាន​បង្ក​ផល​ប៉ះពាល់​អវិជ្ជមាន​ ជា​ពិសេស​​​​គឺ​គោល​នយោបាយ​ពាក់​ព័ន្ធ​នឹង​កំណែ​ទម្រង់​ដីធ្លី​ និង​កា​រកែ​ទម្រង់​ប្រព័ន្ធ​តុលាការ​ ពួកគេ​ [បេក្ខជន​គណបក្ស​ប្រជា​ជន​កម្ពុជា​]  ស្ទាក់ស្ទើរ​មិន​ហ៊ាន​ផ្សព្វ​ផ្សាយ​ប្រាប់​ប្រជា​ជន​អំពី​គោល​នយោបាយ​របស់​ខ្លួន​សម្រាប់​រយៈ​ពេល​ប្រាំ​ឆ្នាំ​បន្ទាប់​ឡើយ​”។

លោក កឹម ឡី ​បន្ត​ថា គោល​នយោ​បាយ​​មួយ​ចំនួន​ ដែល​តាម​ទ្រឹស្ដី​គឺ​សំដៅផ្ដល់​ផល​ប្រយោជន៍​ដល់​ប្រជា​ជន​ក្រីក្រ​​នោះ​​ បែរ​ជា​បាន​​​ផ្ដល់​ផល​ប្រយោជន៍​ដល់​អ្នក​មាន​ទ្រព្យ​សម្បត្តិ​​ស្ដុក​ស្ដម្ភ​ទៅវិញ​។លោក​បាន​លើក​ឧទាហរណ៍​ថា សម្បទានដី​​សេដ្ឋកិច្ច​​មិន​ត្រឹម​តែ​​បង្កើត​ឱកាស​ការងារ​ក្នុង​ចំនួន​មាន​កម្រិត​​ ទេ​ គឺ​ថែម​ទាំង​បណ្ដាល​ឲ្យ​មាន​ជម្លោះ​ដី​ធ្លី​ច្រើន​ទៅ​ទៀត​ ។

លោក កឹម ឡី ​បាន​បន្ថែម​ថា “ ដូច្នេះ​ពួក​គេ​​ព្យាយាម​លើក​ពីបញ្ហា​ផ្សេងវិញ​ក្នុង​យុទ្ធនា​ការ​​ផ្សព្វផ្សាយ​គោល​នយោបាយ​របស់​​​​ខ្លួន​ដើម្បី​បង្ក​ក្ដី​កង្វល់​ក្នុង​ចំណោម​ប្រជា​ជន​កម្ពុជា​ ដែល​​​នៅ​ចង​ចាំ​ច្បាស់​ពីក្ដីរន្ធត់​ក្នុង​សម័យ​សង្គ្រាម​”។ នៅ​ពេល​ត្រូវ​បាន​សួរ​​អំពី​ឱកាស​នៃ​ការ​ផ្ទុះ​សង្គ្រាម​ប្រសិន​បើ​គណបក្ស​សង្គ្រោះ​ជាតិ​​ចូល​កាន់​អំណាច​ និង​ថាតើ​យោធា​កម្ពុជា​កំពុង​​ត្រៀម​ខ្លួន​សម្រាប់​ការ​ផ្ទុះ​ជម្លោះ​ប្រដាប់​អាវុធ​ក្រោយ​ការ​បោះ​ឆ្នោត​ ឬយ៉ាង​ណា​នោះ​លោក​ ​ទៀ បាញ់ រដ្ឋមន្ត្រី​ក្រសួង​ការ​ពារ​​ជាតិ​​ បាន​ផ្ទុះ​សំណើច​កាលពីម្សិលមិញ​។ លោក​បានមាន​ប្រសាសន៍​ថា “ គ្មាន​អ្វី​កើត​​ឡើង​ទេ ហើយ​ [គណបក្ស​សង្គ្រោះ​ជាតិ​] នឹង​​មិន​ឈ្នះ​ឆ្នោត​ឡើយ​​”៕

ប្រែសម្រួល​ដោយ  ភួន ច័ន្ទសេរីវុធ​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស