29 C
Phnom Penh

សមាគមពាណិជ្ជកម្ម​​ស្ករ​ស​អង់គ្លេស​នឹង​ពិចារណា​លើ​ពាក្យ​បណ្ដឹង​ប្តឹងក្រុមហ៊ុន​ Tate & Lyle

ដោយ ឌឹ ខេមបូឌា ដេលី

បទវិភាគ

សមាគម​ពាណិជ្ជ​កម្ម​ស្ករ​សមួយ​​មាន​មូល​ដ្ឋាន​នៅ​ក្នុង​ទីក្រុង​ឡុងដ៍​ ដែល​មាន​គោល​ដៅ​​ជំរុញឧស្សាហកម្ម​មួយ​ឲ្យ​មាន​ក្រម​សីល​ធម៌​​ និង​ប្រកប​ដោយចីរភាពជាង​មុន​​​ នឹង​ជួប​ប្រជុំ​នៅ​ដើម​ខែ​ក្រោយ​ ដើម្បី​​ពិចារណា​​សំណើ​មួយរបស់​កសិករ​កម្ពុជា​​ ឲ្យ​ខ្លួនដក​ក្រុមហ៊ុន​ស្ករ​ស​ថេត & ​លីល (Tate & Lyle) ដែល​មាន​មូល​ដ្ឋាន​នៅ​ប្រទេស​អង់គ្លេស ចេញ​​​ពី​សមា​គម​​​​នេះ​ ប្រសិន​បើ​ក្រុមហ៊ុន​នេះ​មិន​ប្រគល់​ដី​ឲ្យ​ទៅ​កសិករ​ខ្មែរ​វិញទេ​នោះ​។

ប្រជាពលរដ្ឋ​ខ្មែរ​ប្រមាណ​២០០​គ្រួសារ​បាន​ចោទ​ប្រកាន់​​ក្រុមហ៊ុន​ស្ករ​សពីរ​របស់​ថៃ ​នៅ​ក្នុង​ខេត្ត​កោះ​កុង​ថា បាន​​បង្ខំ​ពួក​គាត់​ឲ្យ​ចាក​ចេញ​ពី​ផ្ទះ​សំបែង​ និង​ដី​ធ្លី​របស់​ខ្លួន​ចាប់​តាំង​ពី​ឆ្នាំ​២០០៦​មក​ ហើយ​ជួន​កាល​ថែម​ទាំង​​មាន​ប្រើ​អំពើ​ហិង្សា​ទៀត​ផង​ ហើយ​ពួក​គាត់​ទាម​ទារឲ្យ​ក្រុមហ៊ុន​ស្ករ​ស​ Tate & Lyle ​ទទួល​ខុស​ត្រូវ​ ពី​ព្រោះ​​ក្រុមហ៊ុន​​នេះ​​ទិញ​ស្ករ​សពី​ក្រុម​ហ៊ុន​ទាំង​នេះ។

កាល​ពី​ពីរ​ឆ្នាំ​មុន អង្គការ​សមធម៌​កម្ពុជា​ ដែល​ជា​អង្គ​ការ​​ក្រៅ​រដ្ឋាភិបាល​ក្នុង​ស្រុក​ បាន​​ដាក់​ពាក្យ​បណ្ដឹង​ប្ដឹង​ក្រុមហ៊ុន Tate & Lyle ​ជួស​​មុខ​ឲ្យ​គ្រួសារ​ទាំង​នេះ​ទៅ​​សមាគម​ពាណិជ្ជ​កម្ម​​ស្ករ​ស​បុន​ស៊ូក្រូ (Bonsucro) ដែល​សមាជិក​របស់​ខ្លួន​រួម​មាន​ទាំង​ក្រុម​​ហ៊ុន​​កូកាកូឡា និង​ក្រុមហ៊ុន​ប៊ីភី (BP) ​​ផង។ តំណាង​អង្គការ​ក្រៅ​​រដ្ឋាភិបាលនេះ​​ និង​គ្រួសារ​ទាំង​​​នេះ​​​បាន​ចូល​រួម​ក្នុង​កិច្ច​ប្រជុំ​ប្រចាំ​ឆ្នាំ​លើក​ចុង​ក្រោយ​របស់​​សមាគម​នេះ​កាល​ពី​​ខែ​ធ្នូ​ នៅ​ទី​ក្រុង​ឡុងដ៍​ដោយ​នៅ​ទី​នោះ សមាគមបុន​ស៊ូក្រូ ​បាន​ឯក​ភាព​បង្កើត​ក្រុម​ការ​ងារ​មួយ ដើម្បី​ស៊ើប​អង្កេត​​​ពាក្យ​បណ្ដឹង​នេះ​។

លោក​ អ៊ាង វុឌ្ឍី នាយកប្រតិបត្តិ​អង្គការ​សមធម៌​កម្ពុជា​ បាន​លើក​ឡើង​កាល​ពី​ម្សិល​មិញ​ថា លោក​ទទួល​បាន​ព័ត៌មាន​​ពី​សមាគម​បុន​​ស៊ូក្រូ ថា ក្រុម​ប្រឹក្សា​នាយក​របស់​ខ្លួន​នឹង​ពិចារណា​អនុសាសន៍​របស់​​​​ក្រុម​ការ​ងារ​នេះ​ទាក់​ទិន​នឹង​ក្រុមហ៊ុន​ស្ករ​ស​ Tate & Lyle នៅ​ដើម​ខែ​កក្កដា។​ លោក វុឌ្ឍី ​មាន​ប្រសាសន៍​ថា “ ប្រសិន​​បើ​ក្រុមហ៊ុន​ Tate & Lyle នៅ​តែ​​​មិន​ព្រម​ធ្វើ​តាម​ យើង​សង្ឃឹម​ថា ក្រុមហ៊ុន​នេះ​​នឹងត្រូវ​​ដក​ចេញ​​ពី​សមាគម​​។​អ្វី​ដែល​យើង​ចង់​បាន​ ​គឺ​ឲ្យ​ក្រុម​ហ៊ុន​ Tate & Lyle ប្រគល់​ដី​​ឲ្យ​ប្រជាពលរដ្ឋ​ទាំង​​នោះ​វិញ ហើយ​សង​ជំងឺ​ចិត្ត​ពួក​គាត់​សម្រាប់​អ្វី​ដែល​ពួកគាត់​បាន​បាត់​បង់”។​

លោក នីក ហ្គូដល (Nick Goodall) នាយក​ប្រតិបត្តិ​​សមាគម​បុន​ស៊ូក្រូ​ បាន​អះអាង​ថា ក្រុម​ប្រឹក្សា​នាយក​របស់សមា​គមនេះ​នឹង​ជួប​ប្រជុំ​នៅ​ថ្ងៃ​ទី​៨ ខែកក្កដា ដើម្បី​ពិចារណា​អំពី​​អនុសាសន៍​របស់​ក្រុម​ការ​ងារ​នេះ។ លោក​បាន​​មាន​ប្រសាសន៍​ថា អនុសាសន៍​នេះ​នឹង​​ផ្អែក​លើ​ទាំង​បណ្ដឹង​របស់​គ្រួសារ​ទាំង​នេះ​និង​​ការ​ឆ្លើយ​តប​ពី​ក្រុមហ៊ុន​ Tate & Lyle។ ភ្លាមៗ ក្រុមហ៊ុន Tate & Lyle ​មិន​អាច​ទាក់​ទង​​សុំ​ការ​បំភ្លឺ​​បានទេ​។

យោង​តាម​គេហទំព័រ​របស់​ខ្លួន​ សមាគម​បុន​ស៊ូក្រូ​ “ មាន​គោល​ដៅ​ចង់​ធ្វើ​ឲ្យ​និរន្តរ​ភាព​​សង្គម​ បរិស្ថាន​ និង​ដំណាំ​​អំពៅ​មាន​ភាព​​ប្រសើរ​​ឡើង​​តាម​រយៈ​ការ​ប្រើ​ប្រាស់​បទដ្ឋាន​​​ដែល​អាច​វាស់ស្ទង់​បាន​។ បទដ្ឋាន​ទាំង​នោះ​រួម​មាន​ ​ការ​គោរព​សិទ្ធិ​មនុស្ស​ និង​ការគោរព​តាម​​ច្បាប់​​ក្នុង​ប្រទេសនីមួយៗ​ផងដែរ”។
ទោះ​បី​ជា​ខ្លួន​ជា​សមាជិក​ក៏​ដោយ ក៏​ការ​អនុវត្ត​​ការ​ងារ​របស់​ក្រុមហ៊ុន​ Tate & Lyle នៅ​​មិន​ទាន់​​មាន​ការ​បញ្ជាក់​ពី​សមាគម​បុន​ស៊ូក្រូ​ នៅ​ឡើយ​​ដែរ។

ប្រជា​ពល​រដ្ឋ​​ជា​ច្រើន​គ្រួសារ​នៅ​ខេត្ត​កោះ​កុង​ ក៏​កំពុង​ប្ដឹង​ក្រុមហ៊ុន​ Tate & Lyle ទៅ​តុលាការ​​ជាន់​ខ្ពស់​នៅ​ក្នុង​ទីក្រុងឡុងដ៍​ ផងដែរ​ដើម្បី​ទាម​ទារ​សំណង​ខូច​ខាត​ចំពោះ​ការ​បាត់​បង់​ចំណូល​ពី​ការ​ធ្វើ​ចម្ការ​ដែល​មាន​ទឹក​ប្រាក់​ប្រមាណជិត​២,៣​លាន​ដុល្លារ​​។ នៅ​ក្នុង​បណ្ដឹង​ការ​ពារ​ខ្លួន​ដាក់​ប្ដឹង​ទៅ​តុលាការ​ ក្រុមហ៊ុន​ Tate & Lyle បាន​អះអាង​ថា មិន​បានដឹង​អំពី​ការ​រំ​លោភ​បំពានដូចការ​ចោទ​ប្រកាន់​នោះ​ទេ​ ​ហើយ​បាន​អះអាង​ថា គ្រួសារ​ទាំង​នេះ​គ្មាន​សិទ្ធិ​ទាម​ទារ​ប្រាក់​សំណង​ឡើយ៕

ប្រែសម្រួលដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស