28 C
Phnom Penh

គណបក្ស​​តូច​ៗមួយចំនួន​មិន​​ផ្តោត​លើ​លទ្ធផល​នៃការ​បោះ​ឆ្នោត​​​

ដោយ ឌឹ ខេមបូឌា ដេលី

បទវិភាគ

នៅ​ពេល​រថយន្ត​​ធ្វើ​យុទ្ធនាការ​ឃោសនា​បោះ​ឆ្នោត​របស់​គណបក្ស​កាន់​អំណាច​បាន​បន្ត​កន្ទុយ​គ្នា​យ៉ាង​វែង​ នៅ​តាម​ផ្លូវ​មួយ​ចំនួន​​ក្នុង​រាជ​ធានី​ភ្នំពេញ​កាល​ពី​ម្សិលមិញ​ ដោយ​មាន​ការ​ចូល​រួម​ពី​រថយន្ត​ទំនើប​ៗ​ និង​អ្នក​គាំ​ទ្រ​​ជា​ច្រើន​ ស្រប​ពេល​នោះ​គណបក្ស​សម្ព័ន្ធ​ដើម្បី​ប្រជាធិបតេយ្យ​ដែល​គេ​មិន​សូវ​ស្គាល់​បាន​ចាប់​ផ្ដើម​យុទ្ធនាការ​ឃោសនា​បោះ​ឆ្នោត​​​ដោយ​មាន​​ក្ដី​សង្ឃឹម​តិច​តួច​ណាស់​​។

អារម្មណ៍​សប្បាយ​រីក​រាយ​បាន​កើត​ឡើង​ នៅ​ពេល​អ្នក​គាំ​ទ្រ​ប្រមាណ​១.០០០​នាក់ ​ដែល​​មាន​អាយុ​ខុស​ៗ​គ្នា​ ​បាន​នាំ​គ្នា​ជិះ​រថយន្ត​ រ៉ឺម៉ក​ម៉ូតូ និង​ម៉ូតូ​ នៅ​ខាង​ក្រៅ​ទី​ស្នាក់​ការ​កណ្ដាល​របស់​គណបក្ស​សម្ព័ន្ធ​ដើម្បី​ប្រជា​ធិប​តេយ្យ​ នៅ​ខណ្ឌ​ទួល​គោក​ រាជ​ធានី​ភ្នំពេញ​។

លោក​ ខឹម វាសនា ប្រធាន​គណបក្ស​សម្ព័ន្ធ​​គោល​ដៅ​របស់​ខ្លួន​ គឺ​នៅ​ក្រុង​តាខ្មៅ​។ លោក​​បាន​ពន្យល់​ពី​សារ​នៅ​មុន​ថ្ងៃ​បោះ​ឆ្នោត​ដែល​​មាន​លក្ខណៈ​មិន​ធម្មតា​​​របស់​គណបក្ស​លោក​ថា ការ​ទទួល​បាន​អាសនៈ​រដ្ឋ​សភា​ដែល​មាន​សមាជិក​ចំនួន​១២៣រូប គឺ​មិន​​ពាក់​ព័ន្ធ​ឡើយ​។

លោក ខឹម វាសនា​ បាន​លើក​ឡើង​ថា “ ថ្ងៃ​​នេះ​ យើង​គ្រាន់​តែ​ចង់​បង្ហាញ​ប្រជា​ពល​រដ្ឋ​ថា គណបក្ស​របស់​យើង​​បាន​ចុះឈ្មោះ​នៅ​ក្នុង​​បញ្ជី​បោះ​ឆ្នោត​រួច​ហើយ​ ប៉ុន្តែ​មិន​មែន​ដើម្បី​​ចង់​ទទួល​បាន​សន្លឹក​ឆ្នោត​ពី​យុទ្ធនាការ​ឃោសនា​រយៈ​ពេល​មួយ​ខែ​នេះ​ទេ​។

លោក​ អ៊ុក វ៉េត អគ្គលេខាធិការ​គណបក្ស​សម្ព័ន្ធ​ដើម្បី​ប្រជាធិបតេយ្យ​ ក៏​គ្មាន​ចំណាប់​អារម្មណ៍​លើ​ការ​ឈ្នះ​ឆ្នោត​​ នៅ​ក្នុង​ការ​បោះ​​ឆ្នោត​ជាតិ​ដែល​គណបក្ស​សម្ព័ន្ធ​ដើម្បី​ប្រជា​ធិបតេយ្យ​ ក៏​ជា​គណបក្ស​មួយ​ក្នុង​ចំណោម​គណបក្ស​ទាំង​ប្រាំបី​ផង​ដែរ​។

លោក អ៊ុក វ៉េត​​ បាន​មាន​ប្រសាសន៍​ថា “ យើង​មិន​ខ្វល់​អំពី​លទ្ធផល​នោះ​ទេ​”។ លោក​​បាន​បន្ថែម​ថា​​ “ យើង​ខ្វល់​តែ​អំពី​ការ​យល់​ដឹង​របស់​ប្រជា​ពល​រដ្ឋ​ប៉ុណ្ណោះ។ រីឯ​លទ្ធ​ផល​​នៃ​ការ​បោះ​ឆ្នោត​គឺ​ជា​រឿង​បន្ទាប់​”។ ដោយ​ពន្យល់​រៀប​រាប់​​ពី​ការ​មិន​ចាប់​អារម្មណ៍​​ពី​ជ័យ​ជម្នះ​នៅ​ក្នុង​ការ​បោះ​ឆ្នោត​របស់​​គណបក្ស​សម្ព័ន្ធ​ដើម្បី​ប្រជាធិបតេយ្យ​ លោក​ ខឹម វាសនា និង​លោក អ៊ុក វ៉េត បាន​លើក​​ឡើង​ថា គណបក្ស​របស់​ខ្លួន​នឹង​ធ្វើ​យុទ្ធនាការ​​ឃោសនា​​បោះ​ឆ្នោត​តែ​នៅ​ក្នុង​រាជធានី​ភ្នំពេញ​តែ​ពីរ​ដង​​ប៉ុណ្ណោះ ​កាល​ពី​​ម្សិលមិញ​ ហើយ​នឹង​ធ្វើ​យុទ្ធនាការ​ម្ដង​ទៀត​នៅ​ថ្ងៃ​ចុង​ក្រោយ​នៃ​យុទ្ធនាការ​ឃោសនា​បោះ​ឆ្នោត​ដែល​មាន​រយៈ​ពេល​មួយ​ខែ​ គឺ​នៅ​ថ្ងៃ​ទី​២៦​ ខែ​កក្កដា។

លោក ខឹម វាសនា និង​លោក អ៊ុក វ៉េត ជឿ​ជាក់​ថា យុទ្ធសាស្ត្រ​នយោបាយ​បែប​នេះ​របស់​គណបក្ស​សម្ព័ន្ធ​ដើម្បី​ប្រជាធិបតេយ្យ​ នឹង​ធ្វើ​ឲ្យ​អ្នក​បោះ​ឆ្នោត​យល់​ដឹង​អំពី​គោល​ដៅ​របស់​ខ្លួន​កាន់​តែ​ច្បាស់​។ លោក​ ខឹម វាសនា បាន​លើក​ឡើង​ថា  “ ប្រសិន​បើ​ប្រជា​ពល​រដ្ឋ​ចូល​ចិត្ត​គណបក្ស​មួយ​ដែល​ប្រើ​ធន​ធាន​រដ្ឋ​ ថវិកា​ និង​វិធីមិន​ត្រឹម​​ត្រូវ​​ អ៊ីចឹង​មាន​តែ​ទុក​ឲ្យ​ពួក​គេ​កាន់​ [អំណាច] ​​តទៅទៀត​”។ លោក​បន្ថែម​ថា គណ​បក្ស​របស់​​លោកធ្វើ​ការ​ដើម្បី​ផល​ប្រយោជន៍​ប្រជា​ពល​​រដ្ឋ​គ្រប់​ៗរូប​” ដោយ​មិន​ចាប់​អារម្មណ៍​លើ​សំឡេង​ឆ្នោត​ ឬក៏​អាសនៈ​ក្នុង​រដ្ឋ​សភា​ឡើយ​។

នៅ​ពេល​ការ​​ជួប​ជុំ​គ្នា​​​​របស់​គណបក្ស​សម្ព័ន្ធ​​ដើម្បី​ប្រជាធិបតេយ្យ​មិន​សូវ​ជា​មាន​អ្នក​គាំ​ទ្រ​​ច្រើន បាន​ធ្វើ​ដំណើរ​​តាម​មហាវិថី​កម្ពុជា​ក្រោម​​កាល​ពី​ម្សិលមិញ នៅ​ពេល​នោះ​អ្នក​គាំ​ទ្រ​របស់​ខ្លួន​ ដែល​មាន​​ពាក់​មួក​​ពណ៌​ស​​មាន​​​រូប​​សញ្ញា​​រូប​ជួង​របស់​គណបក្ស​នេះ​ បាន​នាំ​គ្នា​គ្រវី​ទង់​ជាតិ​កម្ពុជា និង​ទង់​បក្ស​របស់​ខ្លួន​។

យុវជន​ ឯម ស៊ីណុត អាយុ​១៨​ឆ្នាំ ជា​អ្នក​គាំទ្រ​​ម្នាក់​ក្នុង​ចំណោម​អ្នក​គាំ​ទ្រ​ទាំង​អស់​បាន​​និយាយ​ថា ខ្លួន​បាន​ចំណាយ​លុយ​ប្រហែល​បួន​ដុល្លារ​សម្រាប់​មួក​ និង​អាវ​យឺត​បក្ស​របស់​ខ្លួន​។ ហើយ​ខ្លួន​ក៏​បាន​ចំណាយ​ប្រាក់​សម្រាប់​អាហារ​ថ្ងៃ​ត្រង់​​​ ដោយ​ផ្ទាល់​ផង​ដែរ​។ ហើយ​គណបក្ស និង​ប្រធាន​គណបក្ស​​​របស់​ខ្លួន​មិន​បាន​​ចំណាយ​អ្វី​មក​ឲ្យ​ខ្លួន​ឡើយ​។

យុវជន​ ស៊ីណុត បាន​និយាយ​ថា “ ​យើង​បាន​ចំណាយ​ប្រាក់​សម្រាប់​ប្រេង​សាំង​ និង​អាហារ​ថ្ងៃ​ត្រង់​ព្រម​ទាំង​អ្វី​ៗ​ទាំង​អស់។​ ​យើង​​​ចូល​រួម​​ពី​ព្រោះ​យើង​បាន​យល់​ដឹង​អំពី​គោល​​នយោបាយ​បក្ស​”។ យុវជន ស៊ីណុត មិន​បាន​ពន្យល់​ពី​ការ​យល់​ដឹង​ដែល​ខ្លួន​ទទួល​បាន​នោះ​ឡើយ​។

នៅ​ពេល​​ការ​បោះ​ឆ្នោត​​ជិត​ចូល​មក​ដល់​ យុវជន​ ស៊ីណុត ហាក់​ដូច​ជា​មិន​សូវ​មាន​​​ចំណាប់​អារម្មណ៍​អំពី​វាសនា​របស់​គណបក្ស​ខ្លួន​ឡើយ​ ហើយ​ក៏​ដូច​ជា​មិន​សូវ​ជា​ខ្វាយ​ខ្វល់​ពី​លទ្ធផល​នៃ​ការ​បោះ​ឆ្នោត​នេះ​​ដែរ​។

យុវជន​រូប​នេះ​​បាន​និយាយ​​ថា “ ការ​ឈ្នះ​ឆ្នោត​ខ្ញុំ​មិន​សូវ​ជា​មាន​សង្ឃឹម​នោះ​ទេ ពី​ព្រោះ​​ការ​យល់​ដឹង​របស់​ប្រជា​ពល​រដ្ឋ​នៅ​មាន​កម្រិត​​នៅ​ឡើយ​”។

គណបក្ស​សម្ព័ន្ធ​ដើម្បី​ប្រជាធិបតេយ្យ​​មិន​មែន​ជា​គណបក្ស​មួយ​លេច​ធ្លោ​​ក្នុង​យុទ្ធនា​ការ​​ឃោសនា​បោះ​ឆ្នោត​កាល​ពី​ម្សិលមិញ​ឡើយ​ ហើយ​ក៏​ជា​គណបក្ស​មួយ​​មិន​សូវ​ជា​ផ្ដោត​លើ​​ជ័យ​ជម្នះ​​ក្នុង​ការ​បោះ​ឆ្នោត​​នេះ​ផង​ដែរ។

លោក ក្រវ៉ាញ ដារ៉ន ប្រធាន​គណបក្ស​ខ្មែរ​ឈប់​ក្រ​បាន​លើក​ឡើង​ថា លោក​មិន​បាន​​​ធ្វើ​យុទ្ធនាការ​ឃោសនា​បោះ​ឆ្នោត​ទេ ពី​ព្រោះ​​លោក​​​​រក​ជួល​រថយន្ត​មិន​បាន​។

លោក​បាន​មាន​ប្រសាសន៍​ថា “ ខ្ញុំ​មិន​បាន​រៀប​ចំ​ការ​ដើរ​ក្បួន ឬក៏​សកម្មភាព​យុទ្ធនាការ​ឃោសនា​បោះ​ឆ្នោត​ណាមួយ​ឡើយ​”។
លោក​បាន​ថ្លែង​ថា “ ហេតុអ្វី​? ពីព្រោះ​វា​​មិន​សូវ​ជា​មាន​សារៈសំខាន់​សម្រាប់​លោក​ឡើយ​ ដែល​ធ្វើ​យុទ្ធនាការ​ឃោសនា​បោះ​ឆ្នោត​នៅ​ថ្ងៃ​ទី១​នោះ ពីព្រោះ​គណបក្ស​ផ្សេងៗ​​ទៀត​បាន​ធ្វើ​យុទ្ធនាការ​ឃោសនា​របស់​ខ្លួន​នៅ​ថ្ងៃ​តែ​មួយ និង​ពេល​វេលា​តែ​មួយ​​ ហើយ​ចរាចរណ៍​វិញ​គឺ​កក​ស្ទះ​ណាស់”។

លោក ក្រវ៉ាញ ដារ៉ន ​លើក​ឡើង​ដែរ​​ថា លោក​ព្យាយាម​រក​ជួល​រថយន្ត​សម្រាប់​​រយៈ​ពេល​ឃោសនា​បោះ​ឆ្នោត​នេះ​ ហើយ​​លោក​​សង្ស័យ​ថា អ្នក​មាន​អំណាច​កំពុង​ព្យាយាម​​រារាំង​​លោក​មិន​ឲ្យ​ផ្សព្វ​ផ្សាយ​ពី​គោល​នយោ​បាយ​បក្ស​របស់​ខ្លួន​ ដែល​មាន​បំណង​បញ្ចប់​ភាព​ក្រីក្រ​នោះ​។

លោក​បាន​មាន​ប្រសាសន៍​ថា ក្បួន​ដង្ហែ​ដែល​មាន​មនុស្ស​រាប់​ពាន់​នាក់​ចូល​រួម​​របស់​គណបក្ស​ប្រជាជន​កម្ពុជា​កាល​ពី​ម្សិលមិញ​ គឺ​គ្រាន់​តែ​​​រារាំង​និង​ដាស់​តឿន​អ្នក​បោះ​ឆ្នោត​ឲ្យ​ដឹង​ថា នរណា​ជា​អ្នក​មាន​អំណាច​ និង​ទ្រព្យ​ សម្បត្តិ​ស្ដុកស្ដម្ភ​​នៅ​កម្ពុជា​ប៉ុណ្ណោះ​។
លោក​បាន​លើក​ឡើង​ថា “ ការ​រារាំង​បែប​​នេះ​មិន​អាច​បញ្ឈប់​លោក​បាន​ឡើយ​ វា​មាន​តែ​ធ្វើ​ឲ្យ​ខ្ញុំ​រុល​ទៅ​មុខ​បន្ថែម​ទៀត​។ ខ្ញុំ​នឹង​ស្វែង​​រក​វិធីសាស្ត្រ​មួយ​ដើម្បី​ធ្វើ​យុទ្ធនាការ​ឃោសនា​បោះ​ឆ្នោត​។ ប្រហែល​ជា​ត្រូវ​ជួល​​រ៉ឺម៉ក​ម៉ូតូ​ ឬក៏​កង់​ ស៊ីក្លូ ឬក៏​អ្វី​ក៏​បាន​ដែល​ខ្ញុំ​អាច​ធ្វើ​ទៅ​រួច​ដើម្បី​ធ្វើ​យុទ្ធនាការ​ឃោសនា​បោះ​ឆ្នោត​នេះ​”។

លោក សេង សុខហេង ប្រធាន​គណ​បក្ស​​ជាតិ​ខ្មែរ​បាន​លើកទៀត​ឡើង​ថា អ្នក​គាំ​ទ្រ​ប្រហែល​​១.០០០​នាក់​របស់​គណបក្ស​លោក​បាន​ចូល​រួម​នៅ​ក្នុង​យុទ្ធនាការ​ឃោស​នា​កាល​ពី​ម្សិល​មិញ​ នៅ​ក្នុងខេត្ត​កណ្ដាល និង​ខេត្ត​ព្រៃវែង​។ លោក​ សុខហេង បាន​មាន​ប្រសាសន៍​ថា មិន​ដូច​គណបក្ស​សម្ព័ន្ធ​ដើម្បី​ប្រជាធិបតេយ្យ និង​គណបក្ស​ខ្មែរ​ឈប់​ក្រ​នោះ​ គណបក្ស​ជាតិ​​ខ្មែរ​មាន​ចំណាប់​អារម្មណ៍​នៅ​ក្នុង​ការ​បោះ​ឆ្នោត​ និង​ការ​ឈ្នះ​ឆ្នោត។ លោក​បន្ថែម​ថា ប្រសិន​បើ​លោក​ឈ្នះ​ឆ្នោត​ គោល​ការណ៍​ដែល​ត្រូវ​ធ្វើ​ជា​ចម្បង​ គឺ​បិទ​​សាលាក្ដី​ឧក្រិដ្ឋ​កម្ម​ខ្មែរ​ក្រហម​។

លោក​បាន​ថ្លែង​ថា “ ប្រសិន​បើ​យើង​ឈ្នះ​យើង​នឹង​បិទ​សាលាក្ដី​ខ្មែរ​ក្រហម​។ ប្រសិន​បើ​យើង​ឈ្នះ​ យើង​នឹង​ស្នើ​ឲ្យ​អង្គការ​សហ​ប្រជាជាតិ​​ដក​ខ្លួន​ចេញ​។ សាលាក្ដី​ខ្មែរ​ក្រហម​ គឺ​ជា​មនោគមវិជ្ជា​បរទេស​។ វា​មិន​មែន​ជា​​ខ្មែរ​​នោះ​ទេ​។ ៩៥​ភាគរយ​នៃ​ប្រជា​ព​រដ្ឋ​ខ្មែរ​​គឺ​កាន​់​សាសនា​ព្រះពុទ្ធ​ ហើយ​សាលាក្ដី​ខ្មែរ​ក្រហម​​នេះ​មិន​បាន​ផ្ដល់​ផល​ប្រយោជន៍​អ្វី​មក​​ឲ្យ​ប្រជា​ពល​រដ្ឋ​ខ្មែរ​ឡើយ… ហើយ​ប្រសិន​​បើ​​យើង​រក្សា​ទុក​សាលា​ក្ដី​ខ្មែរ​ក្រហម​នេះ​ វា​នឹង​ធ្វើ​ឲ្យ​​ប៉ះពាល់​មនុស្ស​ជា​ច្រើន​។ យើង​មិន​ចង់​​ឲ្យ​មាន​ការ​សម្លាប់​រង្គាល​បន្ថែម​ទៀត​នោះ​ទេ”។

លោក គល់ បញ្ញា នាយក​ប្រតិបត្តិ​គណៈ​កម្មាធិការ​សម្រាប់​ការ​បោះ​ឆ្នោត​ដោយ​សេរី​ និង​យុត្តិធម៌​នៅ​កម្ពុជា (ខុម ហ្វ្រែល​) បាន​លើក​ឡើង​ថា ឥរិយាបថ​ចំពោះ​ការ​បោះ​ឆ្នោត​​ដូច​ជា​ការ​មិន​បា​ន​ធ្វើ​យុទ្ធនាការ​ឃោសនា​របស់​គណបក្ស​សម្ព័ន្ធ​ដើម្បី​ប្រជាធិបតេយ្យ​ គឺ​ជា​មធ្យោបាយ​ផ្សេង​​មួយ​ដើម្បី​ឈាន​ទៅ​រក​ការ​ឈ្នះ​ឆ្នោត​។ ជា​មធ្យោបាយ​ដែល​ផ្ដោត​លើ​ការ​យល់​ដឹង​ជាង​ការ​ទទួល​បាន​ការ​គាំទ្រ​​ ឬក៏​ការ​ឈ្នះ​ឆ្នោត​។

លោក​ គល់ បញ្ញា បាន​ថ្លែង​ថា “ ពួក​គេ​ព្យាយាម​ពន្យល់​ប្រាប់​ប្រជា​ពល​រដ្ឋ​ថា ពួក​គេ​មិន​សូវ​ជា​ផ្ដោត​លើ​ការ​ប្រកួត​ប្រជែង​ ឬក៏​អាសនៈ​រដ្ឋ​សភា​ឡើយ​”។ លោក​បាន​បន្ថែម​ថា “ ពួក​គេ​ព្យាយាម​ធ្វើ​ឲ្យ​​អ្នក​បោះឆ្នោត​យល់​ដឹង​អំពី​គោល​ការណ៍​របស់​ខ្លួន​​ ហើយ​ប្រសិន​បើ​ប្រជា​ពល​រដ្ឋ​ទៅ​បោះ​ឆ្នោត​ ពួក​គេ​នឹង​​បោះ​ឆ្នោត​​ទៅ​​តាម​ការ​​យល់​ដឹង​របស់​ខ្លួន​”៕

ប្រែ​សម្រួល​ដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស