អង្គការសុវត្ថិភាពផ្លូវគោក ដែលបារម្ភអំពីកំណើនអ្នកស្លាប់កាន់តែកើនឡើងដោយសារគ្រោះថ្នាក់ចរាចរណ៍ បានអំពាវនាវឲ្យរដ្ឋាភិបាលចាត់វិធានការជាបន្ទាន់ដើម្បីកែប្រែនិន្នាការនេះតាមរយៈការបង្កើតច្បាប់ដើម្បីជួយធ្វើឲ្យសុត្ថិភាពផ្លូវគោកប្រសើរឡើង។ កាលពីថ្ងៃសុក្រសប្តាហ៍មុន វិស័យឯកជន អង្គការសង្គមស៊ីវិល និងអង្គការអន្តរជាតិជាង១០០ បានចេញសេចក្តីប្រកាសមួយឲ្យរដ្ឋាភិបាលបង្កើនការខិតខំប្រឹងប្រែងដើម្បីដោះស្រាយ“ ស្ថានភាពប្រកបដោយគ្រោះថ្នាក់នេះ” ដោយជំរុញឲ្យមានច្បាប់ តម្រូវឲ្យអ្នកធ្វើដំណើរតាមម៉ូតូទាំងអស់ពាក់មួកសុវត្ថិភាព។
លោក គឹម បញ្ញា ប្រធានមូលនិធិទប់ស្កាត់ការរងរបួសនៅអាស៊ី ប្រចាំប្រទេសនេះ បានលើកឡើងថា “ មួកការពារសុវត្ថិភាព អាចកាត់បន្ថយមិនឲ្យរបួសធ្ងន់បាន៦៩ភាគរយ និងការស្លាប់បាន៤២ភាគរយក្នុងគ្រោះថ្នាក់ចរាចរណ៍ ប៉ុន្តែអ្នកធ្វើដំណើរមិនដល់១០ភាគរយផងពាក់មួកសុវត្ថិភាព”។
មនុស្សជិត៧០០នាក់បានស្លាប់ក្នុងរយៈពេលប្រាំខែដំបូងនៃឆ្នាំនេះនៅតាមផ្លូវក្នុងប្រទេសនេះ ខណៈដែលការស្លាប់តាមផ្លូវប្រចាំឆ្នាំមានជាមធ្យមជិត២.០០០នាក់ ដោយមានមនុស្សចំនួន១៥.០០០នាក់ទៀតរងរបួស។អ្នកជិះម៉ូតូ អ្នកជិះកង់និងអ្នកថ្មើជើង សុទ្ធតែងាយរងគ្រោះបំផុតដោយសារគ្រោះថ្នាក់ចរាចរណ៍ដោយមានមនុស្សជាង៨០ភាគរយរងគ្រោះដល់ស្លាប់។ លោកបាននិយាយថា “ ការពិតគឺថាការស្លាប់អាចទប់ស្កាត់បាន”។
ផលប្រយោជន៍មួយក្នុងការកាត់បន្ថយគ្រោះថ្នាក់តាមផ្លូវគោកគឺដើម្បីកុំឲ្យរដ្ឋាភិបាលចំណាយប្រាក់ច្រើនទៅលើបញ្ហានេះសម្រាប់ការព្យាបាលជនរងគ្រោះនិងការបាត់បង់ធនធានមនុស្ស។ យោងតាមការសិក្សាមួយនាពេលថ្មីៗនេះ ដោយអង្គការជនពិការអន្តរជាតិ និងសាកលវិទ្យាល័យ Hasselt នៅក្នុងប្រទេសបែលហ្ស៊ិក បានឲ្យដឹងថា កម្ពុជាសន្សំប្រាក់បាន១.២៣០លានដុល្លារ ប្រសិនបើរដ្ឋាភិបាលសម្រេចបានគោលដៅរបស់ខ្លួនក្នុងការកាត់បន្ថយការស្លាប់់ដោយសារគ្រោះថ្នាក់ចរាចរណ៍ឲ្យបាន៥០ភាគរយត្រឹមឆ្នាំ២០២០។
លោក អៀ ចរិយា ប្រធានកម្មវិធីរបស់អង្គការជនពិការអន្តរជាតិបានលើកឡើងថា ”ត្រូវចំណាយប្រមាណ១០ភាគរយនៃចំនួននោះ ដើម្បីឈានដល់គោលដៅនោះ ប៉ុន្តែការវិភាគអំពីការខាតបង់និងផលចំណេញនេះ បង្ហាញពីសារៈសំខាន់ក្នុងសេដ្ឋកិច្ចនិងសង្គមចំពោះការបន្តធ្វើការងារនេះ ដើម្បីកាត់បន្ថយចំនួនគ្រោះថ្នាក់ចរាចរណ៍ ការរងរបួស និងការស្លាប់ក្នុងគ្រោះថ្នាក់ចរាចរណ៍ក្នុងប្រទេសនេះ។
កង្វល់មួយទៀតគឺថា បើគ្មានការពិគ្រោះយោបល់សមស្របទេ បញ្ហាសុត្ថិភាពផ្លូវគោកកាន់តែធ្ងន់ធ្ងរឡើងដោយសារគម្រោងស្ថាបនាផ្លូវថ្មី ជាពិសេសនៅតាមតំបន់ជនបទ ដែលនៅទីនោះផ្លូវល្អជាងមុន អាចឲ្យអ្នកបើកបរកាន់តែបើកលឿន។ លោក ចរិយា បានបន្តថា “ផ្លូវដែលកំពុងជួសជុល ឬស្ថាបនា ដែលជារឿយៗប្រើថវិកាជំនួយ នឹងមានគ្រោះថ្នាក់ចរាចរណ៍ច្រើនជាង ប្រសិនបើសុវត្ថិភាពផ្លូវគោក ត្រូវបានពិចារណាក្នុងដំណាក់កាលធ្វើផែនការ”៕
ប្រែសម្រួលដោយ ចេវ ប៊ុននី