31 C
Phnom Penh

រដ្ឋា​ភិបាល​ហាម​ឃាត់​មិនឲ្យផ្សព្វ​ផ្សាយ​បន្ត​ពី​វិទ្យុ​បរទេស​ទាំង​អស់​រហូត​ដល់​ចប់​ថ្ងៃ​បោះ​ឆ្នោត

ដោយ ឌឹ ខេមបូឌា ដេលី

បទវិភាគ

ក្រសួង​ព័ត៌មាន​បាន​ចេញ​បម្រាម​មិន​ឲ្យ​ផ្សព្វផ្សាយ​រាល់​កម្ម​វិធី​ជា​ខេ​ម​រ​ភាសា​​ទាំង​អស់​ពី​ស្ថានីយ​វិទ្យុ​បរទេស​​សម្រាប់​អំឡុង​ពេល​យុទ្ធនា​ការ​ឃោស​នា​បោះ​ឆ្នោត​​ទាំង​​៣១​ថ្ងៃ​ និង​នៅ​ថ្ងៃ​បោះ​ឆ្នោត​ គឺ​ថ្ងៃ​ទី​​២៨ ខែ​កក្កដា ដោយ​ព្រមាន​ថា នឹង​ចាត់​វិធាន​ការ​ផ្លូវ​ច្បាប់​ប្រសិន​បើ​ស្ថានីយ​វិទ្យុ​ណា​មិន​អនុវត្ត​តាម​នោះ។

ដោយ​បាន​ប្រកាស​កាលពី​ថ្ងៃ សុក្រ បម្រាម​នេះ​បាន​បិទ​ភ្លាមៗ​នូវ​ការ​ផ្សាយ​សំឡេង​តាម​វិទ្យុ​ជា​ខេ​ម​រ​ភាសា​ពី​វិទ្យុ​សំឡេង​សហរដ្ឋ​អាមេរិក វិទ្យុ​សំឡេង​អាស៊ី​សេរី និង​វិទ្យុ​សំឡេង​បារាំង​អន្តរ​ជាតិ​ ដែល​ត្រូវ​បាន​ផ្សាយ​បន្ត​នៅ ក្នុង​ប្រទេស​កម្ពុជា​តាមរយៈ​ស្ថានីយ​​មួយ​ចំនួន​ដូច​ជា​ វិទ្យុ​សម្បុក​​ឃ្មុំ​ អេហ្វ​​​​​​​​​​អឹម​​​​១០៥​និង​វិទ្យុ​របស់​មជ្ឈ​មណ្ឌល​ព័ត៌មាន​ស្ត្រី​កម្ពុជា​ អេហ្វ​អឹម ១០២។

អ្នក​ស្រី ស្រី ណៅ បុគ្គលិក​វិទ្យុ​សម្បុក​ឃ្មុំ​បាន​មាន​ប្រសា​សន៍​ថា “ បុរស​ម្នាក់​មក​ពី​ក្រសួង​ព័ត៌មាន​បាន​ទូរស័ព្ទ​មក​ខ្ញុំ ហើយ​…បាន​និយាយ​ថា យើង​ត្រូវ​តែ​ផ្អាក​ [ការ​ផ្សាយ​]”។ អ្នក​ស្រី​បាន​បន្ថែម​ថា មាន​ការ​ហៅ​ទូរស័ព្ទ​មក​នោះ​នៅ​ម៉ោង​ប្រហែល​៩យប់​ថ្ងៃ​សុក្រ។

អ្នក​ស្រី​​មានប្រសាសន៍ថា “ គាត់​មិន​បាន​ប្រាប់​ខ្ញុំ​ពី​ឈ្មោះ​របស់​គាត់​ទេ គាត់​គ្រាន់​តែ​ទូរស័ព្ទ​មក​ខ្ញុំ​ ហើយ​សួរ​ខ្ញុំ​ថា ហេតុ​អ្វី​បាន​ជា​យើង​មិន​បាន​ផ្អាក​ការ​ផ្សាយ​ ដូច​ជា​វិទ្យុ​អាស៊ី​សេរី ជាដើម នេះ ពីព្រោះ​ក្រសួង​ព័ត៌មាន​បាន​​ប្រកាស​ថា ការ​ផ្សាយ​នេះ [ត្រូវ​បាន​ហាម​ឃាត់] ហើយ”។

អ្នកស្រី ជា ស៊ុនវ៉ានេត នាយិកា​វិទ្យុ​ព័ត៌មាន​​ស្ត្រី​កម្ពុជា​ អេហ្វអឹម ១០២ បាន​អះ​អាង​ថា ស្ថានីយ​របស់​អ្នកស្រី​ត្រូវ​តែ​ផ្អាក​ការ​ផ្សាយ​កម្ម​វិធី​ពី​វិទ្យុ​បរទេស​ចាប់​ពី​ល្ងាច​ថ្ងៃសុក្រ​ទៅ បន្ទាប់ពី​ទទួល​បាន​លិខិត​របស់​ក្រសួង​មក។ អ្នកស្រី ស៊ុនវ៉ាន់នេត បាន​មាន​ប្រសា​សន៍​ថា “ ចាស យើង​បាន​ផ្អាក​ការ​ផ្សាយ​ចាប់​ពី​ម៉ោង​ ៨​និង​​៣០​​នាទី​យប់​ទៅ។ គេ​បាន​ផ្ញើ​លិខិត​មួយ​ច្បាប់​មក​ខ្ញុំ​​ពី​ក្រសួង​​ព័ត៌​មាន​ឲ្យ​ផ្អាក​ការ​ផ្សព្វផ្សាយ​ពី​​វិទ្យុ​នៅ​ក្រៅ​ [ប្រទេស]​ ចាប់​ពី​ឥឡូវ​នេះ​ទៅ រហូត​ដល់​ចប់​ការ​បោះ​ឆ្នោត​”​។

បម្រាម​នេះ​ដែល​ចុះ​ហត្ថ​លេខា​កាល​ពី​ថ្ងៃ អង្គារ​ដោយ លោក អ៊ុក ប្រាថ្នា រដ្ឋ​លេខា​ធិការ​ និង​​ជា​ “ រដ្ឋ​មន្ត្រី​ក្រសួង​ព័ត៌​មាន​ស្តី​ទី​” ប៉ុន្តែ​ទើ​ប​តែ​បាន​ប្រកាស​ជា​សាធា​រ​ណៈ​កាល​​ពី​ថ្ងៃ​សុក្រប៉ុណ្ណោះ ដែលបម្រាមនោះ​មាន​ខ្លឹម​សារ​ថា “ រាល់ស្ថានីយវិទ្យុ​អេហ្វ​អឹម​ទាំង​អស់​ត្រូវ​ផ្អាក​ការ​ផ្សាយ​បន្ត​ និង​ផ្សាយ​កម្ម​វិធី​ជា​ខេមរ​ភាសា​ពី​វិទ្យុ​បរទេស​ទាំង​អស់​អំឡុង​ពេល​យុទ្ធ​នា​ការ​ឃោសនា​បោះ​ឆ្នោត​រយៈពេល​៣១ថ្ងៃ​​ និង​នៅ​ថ្ងៃ​បោះ​ឆ្នោត”។

សេច​ក្តី​ថ្លែង​ការ​ណ៍​នេះ​បាន​បន្ថែម​ថា“ ក្នុង​ករណី​ដែល​ស្ថានីយវិទ្យុ​អេហ្វអឹម​ណា​មិន​គោរពតាម​សារាចរ​ណែនាំ​នេះ ក្រសួង​ព័ត៌មាន​នឹង​ចាត់​វិធានការ​តាម​ផ្លូវ​ច្បាប់”។

យោង​តាម​ក្រសួងនេះ​បាន​ឲ្យ​ដឹង​ថា បម្រាម​​នេះ​គឺ​ដើម្បី​ធានាឲ្យ​មាន​អព្យា​ក្រឹត​ភាព​នៅ​តាម​ប្រព័ន្ធ​ផ្សព្វ​ផ្សាយ​ អំឡុង​យុទ្ធនា​ការ​ឃោសនា​បោះ​ឆ្នោត។ សេចក្តី​ថ្លែង​ការណ៍​នេះ បាន​លើក​ឡើង​ថា “ ទាំង​ស្ថានីយវិទ្យុ​រដ្ឋ​ និង​ឯក​ជន​ត្រូវ​តែ​អព្យា​ក្រឹត​ នៅ​ពេល​រាយ​ការណ៍​ព័ត៌​មាន​ទាក់​ទង​នឹង​ការ​បោះ​ឆ្នោត និង​អ្នក​បោះ​ឆ្នោត​ ហើយ​ត្រូវ​តែ​យក​ចិត្ត​ទុក​ដាក់​ ជា​ពិសេស​ចំពោះ​ករណី​ដែល​ហាម​ឃាត់​កម្ម​វិធី​វិទ្យុ​បរទេស​ទាំង​អស់​ មិនឲ្យ​ផ្សព្វ​ផ្សា​យ​នៅ​ក្នុង​ព្រះ​រាជា​ណា​ចក្រ​កម្ពុជា” ដោយ​លើក​ឡើង​ថា “ នីតិ​វិធី​នៅ​ពេល​បោះ​ឆ្នោត​ជ្រើស​រើស​តំណាង​រាស្ត្រ​អាណត្តិ​ទី​៥​នេះ ហាម​ឃាត់​ជន​​បរទេស មិន​ឲ្យ​ធ្វើ​យុទ្ធនា​ការ​គាំ​ទ្រ​ ឬ​ប្រឆាំង​ចំពោះ​គណ​បក្ស​ន​យោ​​បាយ​ ឬ​បុគ្គល​ឡើយ​។

លោក អ៊ុក ប្រាថ្នា ដែល​បាន​ចុះ​ហត្ថ​លេខា​​លើ​សារាចរ​ណែ​នាំ​មិន​អាច​ទាក់​ទង​សុំ​អត្ថា​​ធិប្បាយ​បាន​ទេ​ ហើយ​លោក ​ខៀវ កាញារីទ្ធ រដ្ឋ​មន្ត្រី​ក្រសួង​ព័ត៌​មាន​មិន​បាន​ធ្វើ​ការ​អត្ថា​ធិប្បាយ​ទេ។ គេ​នៅ​មិន​ទាន់​ច្បាស់​ដដែល​កាល​ពី​ថ្ងៃ​សុក្រ ថា តើ​ហេតុ​អ្វី​បាន​ជា​លោក អ៊ុក ប្រាថ្នា ​ចុះ​ហត្ថ​លេ​ខា​លើ​បម្រាម​នេះ ​ក្នុង​នាម​ជា​រដ្ឋ​មន្ត្រី ក្រសួង​ព័ត៌​​មាន​ “ ស្តីទី​”​ ​ទៅ​វិញ។

លោក ផៃ ស៊ីផាន អ្នក​នាំ​ពាក្យ​ទី​ស្តី​ការ​គណៈ​រដ្ឋ​មន្ត្រី​បាន​មាន​ប្រសាសន៍​ថា “ ​វា​ជា​បញ្ហា​រសើប​បំផុត​” ហើយ​បាន​បដិ​សេធ​មិន​ធ្វើ​អត្ថា​ធិប្បាយ​បន្ថែម​ឡើយ។

លោក ថាច់ ផែន និង​លោក ម៉ៅ អាយុទ្ធ រដ្ឋ​លេខា​ធិការ​ក្រសួង​ព័ត៌​មាន​ ក៏​បាន​បដិសេធ​មិន​ធ្វើ​អត្ថា​ធិប្បាយ​ដែរ។ លោក​ ម៉ៅ អាយុទ្ធ បាន​ពន្យល់​​ពី​ការ​នៅ​ស្ងៀម​របស់​លោក ដោយ​លើក​ឡើង​ថា “ ខ្ញុំ​ខ្លាច​ថា ខ្ញុំ​នឹងនិយាយ​ខុស​”​។

លោក ផស្ស សុវណ្ណ អគ្គ​នាយក​រង​នៃ​អគ្គ​នាយក​ដ្ឋាន​ព័ត៌​មាន​ និង​ផ្សព្វ​ផ្សាយ​នៅ​ក្រសួង​ព័ត៌​មាន​បាន​ពន្យល់​ពី​បម្រាម​នេះ​ ដោយ​លើក​ឡើង​ថា បទបញ្ជា​របស់​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោ​ត​ហាម​ឃាត់​ជន​បរទេស​មិន​ឲ្យ​ធ្វើ​យុទ្ធនាកា​រ​ គាំទ្រឬ​ប្រឆាំង​គណ​បក្ស​នយោ​បាយ​ណា​មួយ អំឡុង​ពេល​បោះ​ឆ្នោត​ឡើយ។

ដោយ​បដិសេធ​មិន​ផ្តល់​ព័ត៌​មាន​លម្អិ​ត​បន្ថែម​ លោក​បាន​មាន​ប្រសាសន៍​ថា “ ខ្ញុំ​យល់​ថា នេះ​គឺ​ជា​មូល​េហតុ​ដែល​ត្រូវ​ផ្អាក​កម្ម​វិធី​ផ្សាយ​របស់វិទ្យុ​បរទេស​ទាំង​នេះ ដែល​ផ្សព្វ​ផ្សាយ​នៅ​ក្នុង​ប្រទេស​កម្ពុជា”។

លោក ទេព នីថា អគ្គ​លេខា​ធិការ​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោត​ (គ.ជ.ប.) បាន​ប្រតិក​ម្ម​ទៅ​នឹង​បម្រាម​រយៈ​ពេល​៣១​ថ្ងៃ​នេះ ដោយ​មាន​ប្រសា​សន៍​ថា “ វា​មិន​មែន​ជា​រយៈ​ពេល​យូរ​ទេ”  ហើយ​ថា ការ​ចាប់​ពិរុទ្ធ​​បែប​នេះ គឺ​ជា​ការ​ចាំ​បាច់​ដើម្បី​ទប់​ស្កាត់​មិន​ឲ្យ​​មាន “ អតុល្យ​ភាព” ខាង​ប្រព័ន្ធ​ផ្សព្វ​ផ្សាយ​។

លោក ទេព​ នីថា បាន​មាន​ប្រសាសន៍​ថា “ ​ពួក​គេ​ផ្សព្វ​ផ្សាយ​អំពី​ចំណុច​អវិជ្ជ​មាន​របស់​រដ្ឋា​ភិបាល​តែ​ប៉ុណ្ណោះ ហើយ​នេះ​គឺ​ជា​មូល​ហេតុ​​ដែល​ក្រសួង​ព័ត៌​មាន​បាន​ផ្អាក​ការ​ផ្សព្វ​ផ្សាយ​ទាំង​នេះ”។

អំឡុង​ការ​បោះ​ឆ្នោត​ឃុំសង្កាត់​ កាល​ពី​ខែ​មិថុនា​ ឆ្នាំមុន ក្រសួង​ព័ត៌មាន​បាន​ចេ​ញ​បម្រាមនៅ​ថ្ងៃ​បោះ​ឆ្នោត​ចុង​សប្តាហ៍​​មិន​ឲ្យ​ផ្សព្វ​ផ្សាយ​កម្ម​វិ​ធី​តាម​វិទ្យុ​អាស៊ី​សេរី ជា​ស្ថានីយ​​វិទ្យុ​មួយ​ដែល​ផ្តល់​មូល​និ​ធិមួយ​ផ្នែក​​ដោយ​រដ្ឋា​ភិ​បាល​អាមេរិក និង​វិទ្យុ​ផ្សាយ​សំឡេង​​អាមេរិក ដែល​ជា​វិទ្យុ​ផ្សាយ​សំឡេង​ផ្លូវ​ការ​របស់​រដ្ឋា​ភិបាល​អាមេរិក​ក្រៅ​ប្រទេស​។

លោក គល់ បញ្ញា នាយក​ប្រតិបត្តិ​គ​ណៈ​កម្មា​ធិការ​សម្រាប់​ការ​បោះ​ឆ្នោត​ដោយ​សេរី​ និង​យុត្តិធម៌​នៅ​កម្ពុជា (ខុម​ហ្វ្រែល) បាន​មាន​ប្រសាសន៍​ថា លោក​ភ្ញាក់​ផ្អើល​ពេល​ឮ​បទ​បញ្ជា​នេះ ហើយ​បាន​មាន​ប្រសាសន៍​ថា លោក​មិន​យល់​ពី​មូល​ដ្ឋាន​ច្បាប់​ណា​មួយ​ពី​ការ​ធ្វើ​បែបនេះ​ឡើយ​។

លោក​បាន​មាន​ប្រសាសន៍​ថា “ វា​ពិត​ជា​កង្វល់​ដ៏​ធំ​ ដែល​ប៉ះពាល់​ដល់​ការ​ទទួល​បាន​ព័ត៌​មាន​ដោយសេរី​អំឡុង​យុទ្ធនា​ការ​ឃោស​នា​បោះ​ឆ្នោត។ នេះ​គឺ​ជា​ស្ថាន​ការ​ណ៍​ដ៏​អា​ក្រក់​បំផុត​ ដោយ​មាន​ការ​ហាម​ឃាត់​បែប​នេះ​។ តើ​ប្រជា​ពល​រដ្ឋ​អាច​ទទួល​យក​ការ​ហាម​ឃាត់​បែប​នេះ​បាន​ទេ​ ខ្ញុំ​ពិត​ជា​មិន​យល់​ឡើយ​”។

លោក សឺន ស៊ូប៊ែរ្តិ៍  ប្រធាន​គណ​បក្ស​សិទ្ធិ​​មនុស្ស​ និង​ជា​អតីត​សមា​ជិក​ក្រុម​ប្រឹ​ក្សា​​ធម្មនុញ្ញ​កម្ពុជា​ បាន​មាន​ប្រសាសន៍​ថា ការ​ចាប់​ពិរុទ្ធ​នេះ​ មិន​ធ្លាប់​មាន​ពី​មុន​មក​ទេ​នៅ​ក្នុង​ប្រវត្តិ​សាស្ត្រ​កម្ពុជា​បច្ចុប្បន្ន ហើយ​រំលោភ​​យ៉ាង​ច្បាស់​ក្រឡែត​ដល់​សេរី​ភាព​នៃ​ការ​បញ្ចេញ​មតិ ដែល​បាន​ចែង​នៅ​ក្នុង​រដ្ឋ​ធម្មនុញ្ញ​ និង​អនុសញ្ញា​អង្គការ​សហ​ប្រ​ជា​ជាតិ​ស្តី​ពី​សិទ្ធិ​មនុស្ស​ ដែល​ក្នុង​នោះ​ប្រទេស​កម្ពុជា​ហត្ថលេខី​ដែរ។​​ “ ខ្ញុំ​គិត​ថា [សារាចរ​ណែ​នាំ​នេះ] មិន​ស្រប​តាម​រដ្ឋ​ធម្មនុញ្ញ​ឡើយ ពី​ព្រោះ​អនុ​សញ្ញា​ទាំង​អស់​ស្តី​ពី​សិទ្ធិ​មនុស្ស​មាន​ចែង​ក្នុង​រដ្ឋ​ធម្ម​នុញ្ញ ដូច្នេះ​ហើយគេ​ត្រូវ​តែ​គោរ​ព”។

មាត្រា៤១ នៃ​រដ្ឋ​ធម្មនុញ្ញ​ចែង​ថា​ “ ​ពលរដ្ឋ​ខ្មែរ​មាន​សេរី​ភាព​ក្នុង​ការ​បញ្ចេញ​មតិ​ សេរី​ភាព​សារ​ព័ត៌​​មាន ការ​ផ្សព្វ​ផ្សាយ និង​ការ​ជួប​ជុំគ្នា។ គ្មាន​នរណា​ម្នាក់​អាច​ប្រើ​សិទ្ធិ​នេះ​ដើម្បី​រារាំង​​សិទ្ធិ​អ្នក​ដទៃ​​ ធ្វើ​ឲ្យ​ប៉ះ​ពាល់​ដល់​ទំនាក់​ទំនង​ល្អ​ក្នុង​សង្គម រំលោភ​ច្បាប់​ និង​សណ្តាប់​ធ្នាប់​សាធារណៈ និង​សន្តិ​សុខ​ជាតិ​បាន​ឡើយ”។

លោក សឺន ស៊ូប៊ែរ្តិ៍ បាន​មាន​ប្រសាស​ន៍​ថា តាមធម្មតា​ការ​ចាប់​ពិរុទ្ធ​បែប​នេះ គេ​ឃើញ​មាន​តែ​នៅ​ក្នុង​ប្រទេស​កុម្មុយនីស្ត​ប៉ុណ្ណោះ​។ លោក​មាន​ប្រសាសន៍​ថា “ មាន​តែ​ប្រទេស​​​កុម្មុយនីស្ត​ទេ [ធ្វើ​រឿង​បែប​នេះ]”​។ គ្មាន​ហេតុ​ផល​ណា​ ដែល​គេ​​ធ្វើ​រឿង​អ៊ីចឹង​ទេ។ ពួក​​គេ​មិន​បាន​ញុះ​ញង់​ប្រជា​ពលរដ្ឋ​ឲ្យ​ធ្វើ​បដិ​វត្តន៍​ ឬ​បាតុកម្ម​ ឬ​រឿងអ្វី​ផ្សេង​ដូច​នេះ​ឡើយ​។

“ នៅ​ក្នុង​ប្រទេស​ចិន គេ​គ្រប់​គ្រង​ការ​​ផ្សព្វ​ផ្សាយ​ពី​ក្រៅ​ប្រទេស ហើយ​នៅ​ក្នុង​ប្រទេស​កូរ៉េ​ខាង​ជើង​វិញ មិន​មាន​ការ​ឲ្យ​ស្តាប់​វិទ្យុ​បរទេស​ឡើយ។ នេះ​គឺ​ជា​វិធាន​ការ​មួយ​ដូច​ក្នុង​ប្រទេស​រុស្ស៊ី អ៊ីចឹង ដែល​គេ​រឹត​ត្បិត​លើ​ប្រព័ន្ធ​ផ្សព្វ​ផ្សាយ​​យូរៗ​ម្តង”។

លោក មឿន ឈានណារិទ្ធ នាយក​វិទ្យា​ស្ថាន​កម្ពុជា ដើម្បី​សិក្សា​ប្រព័ន្ធ​ផ្សព្វ​ផ្សាយ​បាន​មាន​ប្រសាសន៍​ថា បម្រាម​នេះ “ ជា​រឿង​មិន​ល្អ​ទាល់​តែ​សោះ” ពី​ព្រោះ​ប្រជា​ពលរដ្ឋ​នៅ​ទូ​ទាំង​ប្រទេស​ នឹង​ត្រូវ​ហាម​ឃាត់​មិន​ឲ្យ​ទទួល​បាន​ព័ត៌​មាន​សំខាន់ៗ​ នៅ​ក្នុង​ដំណើរ​ការឆ្ពោះទៅរក​ការ​​បោះ​ឆ្នោត​នៅ​ថ្ងៃ​ទី​២៨ ខែ​កក្កដា។ លោក​ មឿន ឈាន​ណារិទ្ធ បាន​មាន​ប្រសាសន៍ថា “ ការ​ហាម​ឃាត់​ប្រព័ន្ធ​ផ្សព្វ​ផ្សាយ​ណា​មួយ មិន​ឲ្យ​ផ្សព្វ​ផ្សាយ​ព័ត៌​មាន​អំឡុង​ពេល​នេះ គឺ​ជា​រឿងមិន​ល្អឡើយ ហើយ​ជា​ឧបសគ្គ​ដល់​ដំណើរ​ការ​ប្រជា​ធិប​តេយ្យ​នៅ​កម្ពុជា ព្រម​ទាំង​សេរី​ភា​ព​សារព័ត៌​មាន​ទាំង​មូល”។

“ ខ្ញុំ​គិត​ថា នៅ​ពេល​នេះ​ ដោយ​សារ​មាន​ការ​ច្របាច់​បញ្ចូល​គ្នា​ពី​គណ​បក្ស​ប្រ​ឆាំង​ពីរ​ វា​ជា​សញ្ញា​ថា រដ្ឋា​ភិ​បាល​បាន​គិត​ដល់​ការ​ច្របាច់​បញ្ចូល​គ្នា​នៃ​គណ​បក្ស​ទាំង​ពីរ​នេះ​ថា ជា​ការ​គំរាម​កំហែង”។ “ ខ្ញុំ​គិតថា លុះ​ណា​តែ​សហ​គមន៍​អន្តរ​ជាតិ​ធ្វើ​អ្វី​មួយ​ប្រកប​ដោយ​សេចក្តី​ក្លា​ហាន​ដើម្បី​ដោះ​ស្រាយ​ស្ថាន​ភាព​បច្ចុ​ប្បន្ន​នេះ ខ្ញុំ​គិត​ថា សេរី​ភាព​សារព័ត៌​មាននឹង​វិវត្ត​ពី​អាក្រក់​ទៅ​អាក្រក់​ជាង​នេះ ពី​ព្រោះ​សហ​គមន៍​អន្តរ​ជាតិ​ហាក់​ដូច​ជា​បាត់​បង់​ឥទ្ធិ​ពល​ក្នុង​ការ​ប្រើ​អំណាច​របស់​ខ្លួន ដែលក្នុង​នោះ​ត្រូវ​គេ​​ភ្ជាប់​ទៅ​នឹង​ជំនួយ​ហិរញ្ញ​វត្ថុ​ដល់​ប្រទេស​កម្ពុជា”។

លោក យឹម សុវណ្ណ ​អ្នក​នាំ​ពាក្យ​គណ​បក្ស​សង្គ្រោះ​ជាតិ ក៏​បាន​អំពាវ​នាវ​ឲ្យ​ប្រទេស​ផ្តល់​ជំនួយ “ ប្រតិកម្ម​ ហើយ​ធ្វើ​អ្វី​មួយ​ដើម្បី​សង្គ្រោះ​លទ្ធិ​ប្រ​ជា​ធិបតេយ្យ​​ក្នុង​ប្រ​ទេស​កម្ពុជា បើ​មិន​ដូ​ច្នោះ​ទេ ការ​បោះ​ឆ្នោត​ដោយ​​​សេរី​ និង​យុត្តិធម៌​នឹង​ជួប​គ្រោះ​ថ្នាក់”។

នៅ​ក្នុង​សេចក្តី​ថ្លែង​ការណ៍មួយ លោក​ ព្រាប កុល នាយក​ប្រតិ​បត្តិ​អង្គការ​តម្លា​ភាព​អន្តរ​ជាតិ​បាន​មាន​ប្រសាសន៍​ថា បម្រាម​នេះ​គឺ​ជា “ ការ​ដើរ​ថយ​ក្រោយ​នៃ​លទ្ធិ​ប្រជា​ធិប​តេយ្យ​ និង​សេរី​ភាព​សារ​ព័ត៌​មាន​នៅ​ក្នុង​ប្រទេស​កម្ពុជា”។ “ ទង្វើ​នេះ​ កាត់​បន្ថយ​ការ​ទទួល​បាន​ព័ត៌​មាន​ដែល​ប្រជា​ពល​រដ្ឋ​ចាត់​ទុក​ថា​ អព្យា​ក្រឹត​ ឯក​រាជ្យ និង​មាន​តុល្យ​ភាព ដែល​អាច​ជួយ​ឲ្យ​ពួក​គាត់​ធ្វើការ​សម្រេច​ចិត្ត​ឲ្យ​បាន​ត្រឹម​ត្រូវ​នៅ​ថ្ងៃ​បោះ​ឆ្នោត”៕

    ប្រែ​សម្រួល​ដោយ សោម សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស