28 C
Phnom Penh

សម្រាប់​ក្រុមសកម្មជន​ជា​យុវជន ​ក្ដី​ស្រមៃ​នា​ថ្ងៃ​អនាគត​ស្ថិត​ក្រោម​គណបក្ស​ប្រជា​ជន​កម្ពុជា​

ដោយ ឌឹ ខេមបូឌា ដេលី

បទវិភាគ

បទ​ចម្រៀង​ដែល​ឮ​សូរ​យ៉ាង​កង​រំពង​​ចេញ​​​ពី​ធុង​បាស​ នៅ​សួន​មុខ​វត្ត​បទុម​ក្នុង​រាជ​ធានី​ភ្នំពេញ​កាល​ពី​ម្សិលមិញ​ ដែល​យុវជន​របស់​គណបក្ស​ប្រជា​ជន​កម្ពុជា​ជា​ច្រើន​បាន​នាំ​គ្នា​ច្រៀង​នោះ​​​មាន​ន័យ​ថា ប្រសិន​បើ​​បងប្អូន​​ស្រឡាញ់​ អាណិត​ ពេញ​ចិត្ត​ ជឿ​ទុក​ចិត្ត​​សម្ដេច​ ​ហ៊ុន សែន សូម​បោះ​ឆ្នោត​ឲ្យ​គណបក្ស​ប្រជា​ជន​កម្ពុជា​។

បទ​ចម្រៀង​នេះ​ បាន​បន្ត​​លាន់​​ចេញ​​ពី​​ ធុង​បាស​​ថា មាន​សម្ដេច ហ៊ុន សែន មាន​ការ​អភិវឌ្ឍ​មាន​ភាព​ចម្រុង​ចម្រើន​ពិត​ប្រាកដ​ និង​​មាន​ការ​រីក​ចម្រើន​រាល់​ថ្ងៃ​។ អ្នក​រាំ​ជា​ច្រើន​បាន​នាំ​គ្នា​ស្រែក​ច្រៀង​​ព្រម​ៗ​​គ្នា​​អំពី​​លេខ​រៀង​របស់​គណបក្ស​ប្រជា​ជន​កម្ពុជា​នៅ​​លើ​សន្លឹក​ឆ្នោត​សម្រាប់​​ការ​បោះ​ឆ្នោត​នៅ​ថ្ងៃ​ទី​២៨ ខែ​កក្កដា ថា “ លេខ​​៤!” ហើយ​មាន​អ្នក​ខ្លះ​ទៀត​បាន​គ្រវី​ទង់​បក្ស​ពាស​ពេញ​ទីនោះ​ ដោយ​មាន​មេ​ដឹក​នាំ​ក្រុម​យុវជន​បាន​និយាយ​តាម​ឧគ្ឃោសនស័ព្ទ​។

ក្រុម​យុវជន​ដែល​​ជា​អ្នក​រាំ​ស្លៀក​ពាក់​ស្អាត​បាត​ទាំង​នេះ​​បាន​នាំ​គ្នា​ស្រែក​ច្រៀង​ក្រោម​កម្ដៅ​ថ្ងៃ​ពាក់​កណ្ដាល​ព្រឹក​ថា “ ​យើង​ស្រឡាញ់​គណបក្ស​ប្រជា​ជន​កម្ពុជា​! យើង​ស្រឡាញ់ សម្ដេច​ ហ៊ុន សែន!”។ ក្បួន​ឃោសនា​​ដ៏​ធំ​របស់​គណបក្ស​ប្រជា​ជន​​កម្ពុជា​​ក្នុង​រាជ​ធានី​ភ្នំពេញ​ កាល​ពី​ថ្ងៃ​ព្រហស្បតិ៍​​​ ​បាន​ធ្វើ​អ្វីៗ​យ៉ាង​ច្រើន​ ដោយ​បាន​​រំឭក​អ្នក​បោះ​​ឆ្នោត​​អំពី​ការ​ចំណាយ​ទៅ​លើ​យុទ្ធនា​ការ​​ឃោសនា​បោះ​ឆ្នោត​យ៉ាង​ច្រើន​លើស​លប់​របស់​គណបក្ស​កាន់​អំណាច ប្រជា​​ប្រិយភាព​របស់​ខ្លួន​ និង​ការ​ពេញ​ចិត្ត​​របស់​ថ្នាក់​​ដឹក​នាំ​​គណ​បក្ស​ប្រជា​ជន​ចំពោះ​ក្បួន​រថយន្ត​របស់​ខ្លួន​​។​

កាល​ពី​ថ្ងៃ​សុក្រ​​ គឺ​ជា​វេន​របស់​សកម្មជន​​ដែល​ជា​យុវជន​របស់​គណបក្ស​កាន់​អំណាច ដោយ​ពួក​គេ​រាប់​រយ​នាក់​​ត្រូវ​បាន​ដឹក​តាម​រថយន្ត​ពី​សាកល​វិទ្យាល័យ​នីមួយ​ៗ​​ក្នុង​រាជ​ធានី​​​ដើម្បី​ទៅ​ចូល​រួម​យុទ្ធនាការ​ឃោសនា​បោះ​ឆ្នោត​។

ពេល​​ឈប់​សម្រាក​ពី​ការ​រាំ​ និស្សិត​ឈ្មោះ​ ស៊ាន ជីវិន​ អាយុ​២០​ឆ្នាំ​​ ជា​និស្សិត​ឆ្នាំ​ទី២ ផ្នែក​​សង្គម​វិទ្យា​នៅ​សាកល​វិទ្យាល័យ​ភូមិន្ទ​ភ្នំពេញ​​ បាន​អង្គុយ​នៅ​ក្រោម​ម្លប់​រោង​ដ៏​ធំ ដែល​គេ​សាង​សង់​ឡើង​សម្រាប់​យុវជន​ទាំង​នេះ​។ និស្សិត ​ជីវិន បាន​និយាយ​ថា “ ប្រសិន​បើ​គណបក្ស​ប្រជា​ជន​កម្ពុជា​ឈ្នះ​ឆ្នោត​​ វា​នឹង​ផ្ដល់​​ផល​ប្រយោជន៍​ឲ្យ​យើង​ទាំង​អស់​គ្នា​ ពីព្រោះ​ប្រសិន​បើ​គណបក្ស​ប្រជា​ជន​កម្ពុជា​​ឈ្នះ​ ប្រទេស​កម្ពុជា​នឹង​មាន​ស្ថិរភាព​។ វិនិយោគិន​នឹង​មក​ប្រទេស​កម្ពុជា​ ហើយ​វា​នឹង​ផ្ដល់​ភាព​ល្អ​ប្រសើរ​ដល់​ការ​ធ្វើ​ជំនួញ​របស់​ខ្ញុំ​នៅ​ថ្ងៃ​អនាគត​។ ខ្ញុំ​ចង់​ក្លាយ​ទៅ​ជា​អ្នក​ជំនួញ​”។

និស្សិត​រូប​នេះ​បាន​បន្ត​ថា “ ​ខ្ញុំ​ចង់​បើក​ក្រុម​ហ៊ុន​អាកាសចរណ៍​ ឬក៏​ក្រុមហ៊ុន​ដឹក​ជញ្ជូន​តាម​​ផ្លូវ​អាកាស​។ ពន្ធ​នឹង​ចូល​រដ្ឋាភិបាល​ ហើយ​វា​នឹង​ជួយ​បង្កើត​ការ​ងារ​ជា​ច្រើន​ដល់​ប្រជា​ពល​រដ្ឋ​ខ្មែរ​”។

និស្សិត​រូប​នេះ​បាន​បន្ថែមថា ការ​ចាញ់​ឆ្នោត​វា​មិន​មែន​ជា​ជម្រើស​សម្រាប់​គណ​បក្ស​​ប្រជា​ជន​កម្ពុជា​ ឬក៏​សាធារណ​ជន​ឡើយ​។ និស្សិត ជីវិន ​លើក​ឡើង​ទៀត​ថា “ ​ផ្អែ​ក​លើ​ការ​សន្និដ្ឋាន​របស់​ខ្ញុំ​ ប្រសិន​បើ​គណបក្ស​ប្រជា​ជន​កម្ពុជា​ចាញ់​ឆ្នោត​ នឹង​មាន​ភាព​ចលា​ចល​។ ហេតុ​អ្វី​? ពីព្រោះ​៩០​ភាគរយ​នៃ​​ប្រជា​​ពល​រដ្ឋ​ខ្មែរ​គាំ​ទ្រ​គណបក្ស​ប្រជា​ជន​កម្ពុជា​។ ពួក​គេ​នឹង​មិន​ព្រម​ទទួល​យក​ [ការ​ចាញ់​] នេះ​ឡើយ​ ហើយ​ពួក​គេ​នឹង​តវ៉ា​ ពី​ព្រោះ​គណ​បក្ស​ប្រជា​ជន​កម្ពុជា​បាន​អភិវឌ្ឍ​ និង​សង្គ្រោះ​​ជាតិ
​ពី​សង្គ្រាម​​ និង​ភាព​ក្រីក្រ”។

និស្សិត​ ជីវិន បាន​បន្ត​ទៀត​ថា “ ​វា​គឺ​ដូច​ប្រទេស​ថៃ​អ៊ីចឹង​។ នៅ​ពេល​ប្រជា​ពល​រដ្ឋ​ស្រឡាញ់​គណបក្ស​មួយ​ ហើយ​គណបក្ស​នោះ​​ចាញ់​ឆ្នោត​​វា​នឹង​មាន​ការ​តវ៉ា​។ អ្វី​ដែល​យើង​​ស្រឡាញ់​ យើង​មិន​ចង់​បាត់​បង់​នោះ​ទេ”។ និស្សិត​ ជីវិន ​និយាយ​ទៀត​ថា ខ្លួន​គឺ​ជា​និស្សិត​​ម្នាក់​ក្នុង​ចំណោម​និស្សិត​ប្រហែល​៣៥០​នាក់​មក​ពី​សាកល​វិទ្យាល័យ​ភូមិន្ទ​ភ្នំពេញ ដែល​មក​គាំទ្រ និង​ចែក​រំលែក​សារ​របស់​គណ​បក្ស​កាន់​អំណាច​ អំពី​ការ​ងារ​ជា​ច្រើន​​​ដែល​មាន​​​សព្វ​ថ្ងៃ​ និង​អំពី​គោល​នយោបាយ​សេដ្ឋកិច្ច​​ដ៏​រឹង​មាំ​របស់​រដ្ឋាភិបាល​។ និស្សិត ជីវិន ​បដិសេធ​មិន​និយាយ​ថា ឪពុក​​ម្ដាយ​របស់​ខ្លួន​ធ្វើ​ការ​អ្វី​ឡើយ។

រីឯ​​​​​ ភួន សុផាន អាយុ​២២​ឆ្នាំ និស្សិត​ឆ្នាំ​ទី២ ផ្នែក​វិទ្យា​សាស្ត្រ​ស​ត្វ​នៅ​សាកល​​វិទ្យា​​​ល័យ​ភូមិន្ទ​កសិកម្ម​ មាន​ក្ដី​ស្រមៃ​​ច្រើន​សម្រាប់​អនាគត​របស់​ខ្លួន​។ និស្សិត​រូប​នេះ​បាន​និយាយ​ថា “ ​ខ្ញុំ​ចង់​បើក​កសិដ្ឋាន​ចិញ្ចឹម​សត្វ​​​ផ្ទាល់​
ខ្លួន​ ដើម្បី​ចិញ្ចឹម​គោ​”។ និស្សិត​រូប​នេះបាន​​​បន្ថែម​ថា “ ខ្ញុំមក​ចូល​រួម​នៅ​ក្នុង​យុទ្ធនាការ​ឃោ​ស​​នា​​កាល​ពី​ម្សិលមិញ ដោយសារ​មិត្ត​ភក្ដិ​ហៅមក​”។ គាត់​បាន​បន្ថែម​ថា “ អាហារ​ថ្ងៃ​ត្រង់​ ការ​ធ្វើ​ដំណើរ​ និង​អ្វី​ៗ​សុទ្ធ​តែ​គេ​ចេញ​ឲ្យ​ ប្រហែល​ជា​ នៅ​ពេល​យើង​ត្រឡប់​ទៅ​សា​​​កល​វិទ្យាល័យ​វិញ​ យើង​នឹង​ទទួល​បាន​លុយ​ខ្លះ​ៗ​”។

​​​ឃ្លោក ម៉ានីតា និស្សិត​ឆ្នាំ​ទី១ ផ្នែក​ធនា​​​គារ នៅ​សាកល​វិទ្យាល័យ​​​ភូមិន្ទ​នីតិ​​​សាស្ត្រ​ និង​វិទ្យាសាស្ត្រ​សេដ្ឋកិច្ច​ ​និយាយ​ថា នាង​មាន​ក្ដី​ស្រមៃ​ចង់​​ធ្វើ​ការ​នៅ​ធនាគារ​​​នៅ​ពេល​បញ្ចប់​​​​ការ​សិក្សា ហើយ​ការ​មក​ចូល​រួម​គាំទ្រ​យុទ្ធ​​​នាការ​ឃោសនា​នេះ គឺ​ជា​ផ្នែក​មួយ​​ ដើម្បី​បំពេញ​ក្ដី​ស្រមៃ​នៅ​ថ្ងៃ​អនាគត​។

កញ្ញា ម៉ានីតា បាន​និយាយ​មុន​ពេល​​​ប្រធាន​​​ក្រុម​យុវជន​ម្នាក់​ក្នុង​ចំណោម​​ប្រធាន​​ក្រុម​យុវ​ជន​ផ្សេង​ៗ​ទៀត​បាន​មក​កាត់​​សម្តី​របស់​ខ្លួន​​​ថា “ ខ្ញុំ​មក​ពី​រាជធានី​ភ្នំពេញ ខ្ញុំ​មក​ទី​នេះ​​នៅ​ថ្ងៃ​នេះ​​ពី​ព្រោះ​ខ្ញុំ​ស្រឡាញ់​គណ​បក្ស​​ប្រជា​ជន​កម្ពុជា”។
​ប្រធាន​ក្រុម​យុវជន​ដែល​មិន​បញ្ជាក់​ពី​អត្ត​សញ្ញាណ​របស់​ខ្លួន​​ បាន​ប្រាប់​កញ្ញា​ ម៉ានីតា ​ឲ្យ​​ធ្វើ​តាម​តួនាទី​​របស់​ខ្លួន​ថា “ ដោយ​សារ​តែ​ពេល​នេះ​ជា​ពេល​ធ្វើ​យុទ្ធនាការ​ឃោស​នា​​ ហេតុ​ដូច្នេះ​វា​មិន​ស័ក្ដិសម​​ទេ​សម្រាប់​កញ្ញា​​ក្នុង​ការ​ផ្ដល់​បទ​សម្ភាស​”។

និស្សិត​នៅ​សាកល​វិទ្យាល័យ​ភូមិន្ទ​ភ្នំពេញ​​ម្នាក់​ទៀត​ ក៏​បាន​បដិសេធ​មិន​និយាយ​ជា​មួយ​អ្នក​យក​ព័ត៌មាន​ដែរ​ បន្ទាប់​ពី​​ប្រធាន​ក្រុម​ម្នាក់​មិន​ផ្ដល់​ការ​អនុញ្ញាត​នោះ​។ បន្ទាប់​ពី​អាហារ​ថ្ងៃ​ត្រង់​​ ក្រុម​សកម្មជន​យុវជន​របស់​គណបក្ស​ប្រជា​ជន​កម្ពុជា​បាន​នាំ​គ្នា​បន្ត​យុទ្ធនាការ​របស់​​ខ្លួន​ ដោយ​នាំ​គ្នា​ពាក់​មួក​ និង​អាវ​គណបក្ស​​រួច​ឡើង​ជិះ​រថយន្ត​ ហើយ​នាំ​គ្នា​ទៅ​ប្រមូល​ផ្ដុំ​នៅ​​ខាង​មុខ​សួន​ច្បារ​​នោះ​។ ទង់​​គណបក្ស​ប្រជា​ជន​កម្ពុជា​ដែល​ចង​ភ្ជាប់​នឹង​ដង​ដែក​ដែល​មាន​ការ​តុប​តែង​យ៉ាង​ស្រស់​ស្អាត​ ត្រូវ​បាន​​គ្រវី​​រវិច​ៗ​ សំឡេង និង​តន្ត្រី​បាន​បន្លឺ​ឡើង​យ៉ាង​​ខ្លាំង ហើយ​បើ​ក្រឡេក​មើល​ទៅ​មុខ​ក្រុម​យុវ​​ជន​​​​​នោះ​វិញ​ ការ​សន្យា​របស់​គណបក្ស​ប្រជា​ជន​កម្ពុជា ​និង​លទ្ធភាព​នានា​នោះ​ហាក់​ដូច​ជា​គ្មាន​ទី​បញ្ចប់​ឡើយ​​”៕

ប្រែ​សម្រួល​ដោយ  ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស