កាលពីម្សិលមិញ លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប.) បានការពារបទបញ្ជាមួយហាមឃាត់អង្គការក្រៅរដ្ឋាភិបាលមិនឲ្យបើកការប្រជុំជាមួយនឹងអ្នកភូមិនៅខេត្តរតនគិរីនៅអំឡុងពេលឃោសនាបោះឆ្នោតដោយនិយាយថា ការប្រជុំបែបនេះនឹងធ្វើឲ្យប្រជាពលរដ្ឋមិនទទួលបានសារសំខាន់ៗអំឡុងពេលឃោសនាបោះឆ្នោត។
បទបញ្ជានេះត្រូវបានលោក ប៉ាវ ហំផាន អភិបាលខេត្តរតនគិរីផ្ញើជូនមន្ត្រីខេត្តគ្រប់ជាន់ថ្នាក់កាលពីថ្ងៃទី១៣ខែមិថុនា និងបានហាម “ អាជ្ញាធរមូលដ្ឋានថ្នាក់ក្រុង ខណ្ឌសង្កាត់និងថ្នាក់ភូមិ ព្រមទាំងប្រជាពលរដ្ឋមិនឲ្យចូលរួមរាល់សិក្ខាសាលា កិច្ចប្រជុំនានានិងការធ្វើដំណើរទៅបំពេញការងារតាមមូលដ្ឋាន ដែលរៀបចំឡើងដោយអង្គការក្រៅរដ្ឋាភិបាល”។
ថ្លែងនៅក្នុងសន្និសីទសារព័ត៌មានមួយនៅការិយាល័យកណ្តាលរបស់គ.ជ.ប.នៅថ្ងៃដំបូងនៃការធ្វើយុទ្ធនាការឃោសនាបោះឆ្នោតជាផ្លូវការកាលពីម្សិលមិញនោះ លោក ទេព នីថា បានមានប្រសាសន៍ថា លោកបានទំនាក់ទំនងជាមួយនឹងគណៈកម្មាធិការរៀបចំការបោះឆ្នោតខេត្តរតនគិរីដើម្បីពិភាក្សាអំពីបញ្ហានេះ ហើយថា នៅទីបញ្ចប់លោកបានព្រមព្រៀងជាគោលការណ៍តាមការសម្រេចនេះ។
លោកបានមានប្រសាសន៍ទៅកាន់អ្នកយកព័ត៌មាននិងអ្នកសង្កេតការណ៍ថា “ សូមមើលស្ថានភាពជាក់ស្តែង។ មិនមានមនុស្សច្រើនទេនៅទីនោះ”។
ប្រសិនបើអង្គការក្រៅរដ្ឋាភិបាលប្រជែងយកប្រជាពលរដ្ឋទៅចូលរួមកិច្ចប្រជុំរបស់ខ្លួន ឧទាហរណ៍ដូចជា ប្រជាពលរដ្ឋ៥០នាក់មកពីឃុំមួយចូលរួមការប្រជុំមួយនោះ ដូច្នេះគ្មាននរណាម្នាក់ស្តាប់យុទ្ធនាការឃោសនាបោះឆ្នោតនិងគោលនយោបាយរបស់គណបក្សនយោបាយនានានោះទេ”។
លោកមានប្រសាសន៍បន្ថែមថា “ រហូតមកទល់និងពេលនេះមិនមានការប្រជុំរបស់អង្គការក្រៅរដ្ឋាភិបាលណាមួយដែលត្រូវបានរារាំងនោះទេ”។
លោក ប៉ែន ប៊ុណ្ណារ៍ អ្នកសង្កេតការណ៍របស់អង្គការសិទ្ធិមនុស្សអាដហុកប្រចាំខេត្តនេះបានមានប្រសាសន៍ថា លោកមានជំនឿថា មានបញ្ហាច្រើនពាក់ព័ន្ធនឹងបម្រាមនេះ ហើយថា លោកនិងអង្គការសិទ្ធិមនុស្សផ្សេងទៀតគិតថា មានភាពតានតឹងយ៉ាងខ្លាំងកាលពីពេលថ្មីៗនេះរវាងអាជ្ញាធរនិងអង្គការសិទ្ធិមនុស្សនៅក្នុងតំបន់នេះ ដែលជាហេតុបង្កឲ្យមានវិវាទដីធ្លីមួយចំនួនអូសបន្លាយពេលយូរនៅប្រទេសកម្ពុជា។
លោក ប៉ែន ប៊ុណ្ណារ៍ បានមានប្រសាសន៍ថា “ យើងមិនបើកការប្រជុំឬធ្វើការងារជារៀងរាល់ថ្ងៃនោះទេក្នុងរយៈពេល៣០ថ្ងៃ ហើយខ្ញុំជឿជាក់ថា គណបក្សនយោបាយទាំងនេះក៏មិនធ្វើយុទ្ធនាការឃោសនាបោះឆ្នោតរៀងរាល់ថ្ងៃក្នុងរយៈពេល៣០ថ្ងៃនោះដែរ”។
“ សម្ពាធបែបនេះមិនមែនមានតែអំឡុងពេលធ្វើការឃោសនាបោះឆ្នោតនេះទេ។វាធ្លាប់មានសម្ពាធបែបនេះជាហូរហែពីពេលមុនមកហើយ។ វាបង្ហាញឲ្យឃើញថា អាជ្ញាធរមានការភ័យខ្លាច ពីព្រោះអាជ្ញាធរមិនបានដោះស្រាយវិវាទដីធ្លីរបស់ប្រជាពលរដ្ឋ។ ពេលប្រជាពលរដ្ឋដាក់ពាក្យបណ្តឹង អាជ្ញាធរមិនបានដោះស្រាយបញ្ហារបស់ពួកគាត់។ ដូច្នេះអាជ្ញាធរមានការភ័យខ្លាចចំពោះប្រតិកម្មរបស់ប្រជាពលរដ្ឋទាំងនេះផងដែរ”៕
ប្រែសម្រួលដោយ ស៊ុំ សុខភុំ