សាលាដំបូងរាជធានីភ្នំពេញ បានកោះហៅលោក សួង សុភ័ណ បេក្ខជនតំណាងរាស្ត្ររបស់គណបក្សសង្គ្រោះជាតិដើម្បីសាកសួរនៅថ្ងៃនេះ ចំពោះពាក្យបណ្តឹងមួយរបស់លោក ដែលចោទប្រកាន់លោក ហ៊ុន សែន ពីបទជួយជនអន្តោប្រវេសន៍វៀតណាមខុសច្បាប់ឲ្យចុះឈ្មោះបោះឆ្នោតនៅក្នុងការបោះឆ្នោតជាតិក្នុងខែនេះ។
យោងតាមដីកាកោះហៅរបស់តុលាការដែលទទួលបានកាលពីម្សិលមិញ និងចុះថ្ងៃទី២៥ ខែមិថុនា លោក សុភ័ណ ដែលអះអាងថា លោក ហ៊ុន សែន បានក្លែងបន្លំឯកសារដើម្បីជួយជនអន្តោប្រវេសន៍វៀតណាមឲ្យទទួលបានអត្តសញ្ញាណប័ណ្ណ ហើយបោះឆ្នោតគាំទ្រគណបក្សប្រជាជនកម្ពុជានោះ ត្រូវលោក សឿ វ៉ាន់នី ព្រះរាជអាជ្ញារងស្នើឲ្យមកឆ្លើយបំភ្លឺ។
លោក សុភ័ណ បេក្ខជនតំណាងរាស្ត្រគណបក្សប្រឆាំងនៅខេត្តប៉ៃលិន លើកឡើងថា លោកនឹងបង្ហាញខ្លួនក្នុងតុលាការនៅថ្ងៃនេះ នៅម៉ោង៨និង៣០នាទីព្រឹកតាមការស្នើ។ លោកបានមានប្រសាសន៍ថា “ ហេតុផលចម្បងដែលខ្ញុំប្តឹងលោក ហ៊ុន សែន គឺដោយសារគាត់បានអនុញ្ញាតឲ្យជនអន្តោប្រវេសន៍វៀតណាមចូលមកទឹកដីកម្ពុជាដោយខុសច្បាប់ ហើយខ្ញុំព្រួយបារម្ភថា ប្រទេសកម្ពុជានឹងបាត់បង់ទឹកដីរបស់ខ្លួនបន្ថែមទៀត”។ វាមិនមែនជាលើកទី១ទេ ដែលលោក សុភ័ណ ប្តឹងនាយករដ្ឋមន្ត្រី។ កាលពីឆ្នាំមុនលោកបានដាក់ពាក្យបណ្តឹងមួយទៅកាន់សាលាដំបូងរាជធានីភ្នំពេញ ប្តឹងចោទប្រកាន់លោក ហ៊ុន សែន ថា ជាអ្នកត្រូវទទួលខុសត្រូវចំពោះហេតុការណ៍រត់ជាន់គ្នាកាលពីឆ្នាំ២០១០នៅកោះពេជ្រ ដែលមានមនុស្ស៣៥៣នាក់បានស្លាប់អំឡុងពិធីបុណ្យអុំទូកដែលធ្វើឡើងប្រចាំឆ្នាំ៕
ប្រែសម្រួលដោយ ស៊ា ស៊ុយឈាង