ដោយមិនអាចចូលរួមក្នុងការធ្វើយុទ្ធនាការឃោសនាបោះឆ្នោតក្នុងប្រទេសបាននោះ លោក សម រង្ស៊ី មេដឹកនាំគណបក្សប្រឆាំងដែលនិរទេសខ្លួន ត្រូវងាកទៅធ្វើយុទ្ធនាការឃោសនាបោះឆ្នោតនៅកន្លែងផ្សេងវិញ។
លោក សម រង្ស៊ី ដែលរស់នៅក្នុងទីក្រុងប៉ារីស និងប្រឈមនឹងទោសជាប់ពន្ធនាគាររយៈពេល១១ឆ្នាំ ប្រសិនបើលោកត្រឡប់មកកម្ពុជាវិញ បន្ទាប់ពីត្រូវបានរកឃើញពិរុទ្ធភាពពីបទផ្សព្វផ្សាយព័ត៌មានមិនពិត និងបំផ្លាញទ្រព្យសម្បត្តិសាធារណៈនោះ បានប្រឹងប្រែងបញ្ចុះបញ្ចូលពលរដ្ឋកម្ពុជាកាន់តែច្រើនឡើងតាមរយៈប្រព័ន្ធផ្សព្វផ្សាយសង្គម។
ក្នុងរយៈពេលប៉ុន្មានខែថ្មីៗនេះ លោកបានស្ថិតនៅក្នុងក្រុងវ៉ាស៊ីនតោន ដោយមានប្រសាសន៍ជាមួយឥស្សរជនមានអំណាចក្នុងនយោបាយអាមេរិក ដែលកាលពីដើមឆ្នាំនេះបានស្នើឲ្យអាមេរិកដកជំនួយបរទេសរបស់ខ្លួន ដោយសារកំណត់ត្រារំលោភសិទ្ធិមនុស្សនៅក្នុងប្រទេសកម្ពុជា។
ដោយពេលនេះការបោះឆ្នោតជ្រើសតាំងតំណាងរាស្ត្រនៅមិនដល់មួយខែទៀតនោះ លោក សម រង្ស៊ី ក៏បានងាកទៅរកលោក ជែមី ម៉ាក់ហ្វាឡិន (Jamie Macfarlane) នៅក្រុមហ៊ុន WPP ទទួលបន្ទុកទំនាក់ទំនងសាធារណៈក្នុងទីក្រុងឡុងដ៍ ដើម្បីទទួលយកតួនាទីជានាយកផ្នែកឌីជីថលសម្រាប់យុទ្ធនាការរបស់លោក។
បច្ចុប្បន្ននេះ លោក ជែមី ម៉ាក់ហ្វាឡិន មានតួនាទីក្នុងប្រទេសភូមា ប្រចាំសាខាក្រុមហ៊ុនអន្តរជាតិមួយក្នុងចំណោមសាខារាប់រយរបស់ក្រុមហ៊ុននេះ គឺ Mango Marketing។ យោងតាមអង្គការសង្កេតការណ៍ opensecrets បានឲ្យដឹងថា ក្រុមហ៊ុន WPP បានបង្កើនជំនួយផ្នែកនយោបាយមានទឹកប្រាក់សរុប៦៤០.០០០ដុល្លារនៅក្នុងសហរដ្ឋអាមេរិកក្នុងឆ្នាំ២០១២។
ជំនួយទាំងនេះ រាប់ទាំងទឹកប្រាក់ចំនួនជាង៣២.០០០ដុល្លារដល់លោក ម៉ាកូ រូបីយោ (Marco Rubio) សមាជិកព្រឹទ្ធសភាសាធារណរដ្ឋនៅក្នុងរដ្ឋផ្លរីដា ដែលជាអ្នកគាំទ្ររួមគ្នាលើសេចក្តីសម្រេចមួយក្នុងព្រឹទ្ធសភា ដែលព្រាងឡើងកាលពីថ្ងៃទី៦ ខែមិថុនា ស្តីពីការបោះឆ្នោតជ្រើសតាំងតំណាងរាស្ត្ររបស់កម្ពុជានៅពេលខាងមុខនេះផងដែរ។
ក្នុងចំណោមបញ្ហាផ្សេងទៀត សេចក្តីសម្រេចដែលបានអំពាវនាវឲ្យលោក សម រង្ស៊ី ដែលត្រូវបានលុបចេញពីបញ្ជីបោះឆ្នោត ដោយសារមានទោស ដែលគេចាត់ទុកជាទូទៅថាជារឿងនយោបាយនោះ ត្រូវបានអនុញ្ញាតឲ្យចូលរួមក្នុងការបោះឆ្នោត។ ទាំងលោក សម រង្ស៊ី និងលោក ម៉ាក់ហ្វាឡិន បានបញ្ជាក់នៅសប្តាហ៍នេះថា លោក ម៉ាក់ហ្វាឡិន កំពុងធ្វើការសម្រាប់ការធ្វើយុទ្ធនាការនេះ ក្នុងនាមជាអ្នកស្ម័គ្រចិត្ត។
លោក ម៉ាក់ហ្វាឡិន ដែលប្រកាសពីតួនាទីរបស់ខ្លួន ជាសមាជិក WPP និងតួនាទីរបស់លោកក្នុងយុទ្ធនាការរបស់លោក សម រង្ស៊ី នៅលើគេទំព័ររបស់លោក លើកឡើងក្នុងអ៊ីម៉េលមួយថា “ ខ្ញុំមិនគិតពីការងារដែលខ្ញុំធ្វើនោះទេ ហើយគ្មាននរណាម្នាក់នៅក្រុមហ៊ុនរបស់ខ្ញុំមានអ្វីធ្វើជាមួយយុទ្ធនាការនោះទេ”។ “ ខ្ញុំមានការពាក់ព័ន្ធជាធម្មតា ព្រោះខ្ញុំស្គាល់លោក សម រង្ស៊ី ហើយខ្ញុំពិតជាជឿជាក់លើគាត់ និងអ្វីដែលគាត់អាចធ្វើបានសម្រាប់កម្ពុជា”។
លោក សម រង្ស៊ី បានមានប្រសាសន៍ថា ក្មួយស្រីរបស់លោក ដែលបានស្គាល់អ្នកឯកទេសផ្នែកផ្សព្វផ្សាយពាណិជ្ជកម្មដោយផ្ទាល់ បានទាក់ទងជាមួយលោក ម៉ាក់ហ្វាឡិន។ លោកបានបន្ថែមថា “ ខ្ញុំមានមនុស្សច្រើនណាស់ដែលធ្វើការដោយស្ម័គ្រចិត្តសម្រាប់ខ្ញុំ ពីព្រោះពួកគេពេញចិត្តហេតុផលរបស់ខ្ញុំ”។
បើទោះជាលោក ម៉ាក់ហ្វាឡិន លើកឡើងថា គាត់កំពុងធ្វើការឲ្យលោក សម រង្ស៊ីទៅតាមពេលរបស់គាត់ក៏ដោយ ក៏និយោជកផ្សេងទៀត គឺ WPP គឺជាក្រុមហ៊ុនដ៏ធំមួយក្នុងពិភពលោកដែលមានឥទ្ធិពលក្នុងការទាក់ទាញនិងឥទ្ធិពលនយោបាយ។
លោក សម រង្ស៊ី លើកឡើងថា ចុងក្រោយនេះលោកបានស្ថិតនៅក្នុងក្រុងវ៉ាស៊ីនតោនកាលពីក្នុងខែឧសភា និងបានជួបជាមួយសមាជិកព្រឹទ្ធសភា ដែលគាំទ្រសេចក្តីសម្រេចនេះ ដោយស្នើឲ្យលោកអាចចូលរួមក្នុងការបោះឆ្នោតជាតិ។ លោកបានបន្ថែមថា“ ខ្ញុំជាប្រភពមួយនៃព័ត៌មានក្នុងចំណោមប្រភពជាច្រើនទៀត”។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីមានប្រសាសន៍ថា គណបក្សប្រជាជនកម្ពុជាកាន់អំណាចមិនបានជួលជំនួយការពីក្រៅសម្រាប់យុទ្ធនាការបោះឆ្នោតទេព្រោះគណបក្សមិនត្រូវការឡើយ។ សំដៅដល់ការទាក់ទងរបស់លោក សម រង្ស៊ី ទៅនឹងអ្នកជំនាញទំនាក់ទំនងសាធារណៈ លោកបានលើកឡើងថា “ យើងមានជំនឿទុកចិត្តលើប្រជាពលរដ្ឋរបស់យើង។ ការបោះឆ្នោតនេះមិនមែនអំពីគ្រឿងសម្អាងនោះទេ វាជារឿងនយោបាយ”។
ទោះយ៉ាងណា ជានិច្ចកាល នេះមិនមែនជាជំហររបស់គណបក្សកាន់អំណាចទេ។
នៅមុនការបោះឆ្នោតឆ្នាំ១៩៩៨ គណបក្សប្រជាជនកម្ពុជា បានជួលក្រុមហ៊ុនទាក់ទាញនយោបាយ David Morey Group Inc. ដែលទំនងជាមានឥទ្ធិពលលើទស្សនរបស់អាមេរិកអំពីការបោះឆ្នោតនេះ។
យោងតាមការចុះបញ្ជីធ្វើឡើងជាមួយក្រសួងយុត្តិធម៌អាមេរិកក្រោមច្បាប់ចុះឈ្មោះទីភ្នាក់ងារបរទេស ដែលតម្រូវឲ្យអ្នកធ្វើជាតំណាងផលប្រយោជន៍រដ្ឋបរទេសមួយបង្ហាញពីទំនាក់ទំនងបែបនេះ ក្រុមហ៊ុន David Morey Group បានបញ្ចប់ទំនាក់ទំនងរបស់ខ្លួនជាមួយគណបក្សប្រជាជនកម្ពុជាក្នុងខែមីនាឆ្នាំ២០០០៕
ប្រែសម្រួលដោយ ចេវ ប៊ុននី