32 C
Phnom Penh

អ្នកធ្វើ​​​អត្ថាធិប្បាយ​​​ខ្មែរ គាំទ្រ​​​សកម្មភាព​​​បង្ក្រាប​​​របស់ចិន​​​ចំពោះ​​​កុបកម្ម​​​របស់ជន​​​ជាតិ​​​ភាគ​​​តិចវីហ្គួរ

ដោយ ឌឹ ខេមបូឌា ដេលី

បទវិភាគ

ទីភ្នាក់ងារ​​​ព័ត៌មាន​​​រដ្ឋចិន​​​បាន​​​ដក​​​ស្រង់​​សម្ដី​​​របស់​​​មន្ត្រី​​​រដ្ឋាភិបាល​​​ខ្មែរ​​​មួយ​​​រូប និង​​​អ្នកវិភាគ​​​ក្នុងស្រុក​​​មួយរូប​​​នៅក្នុងការការ​ពារ​​​សកម្មភាព​​​របស់​​​ប្រ​​​ទេស​​​ចិន​​​នៅក្នុង​​​តំបន់ភាគ​​​ពាយព្យ ដែល​​​ក្រុមជន​​​ជាតិ​​​ភាគ​តិច​​​វីហ្គួរ​​​រស់​​​នៅ​​​។​​​​​​

ប្រទេស​​​ចិន​​​បាន​​​លើក​​​ឡើងថា “ អ្នក​​​កាន់​សាសនា​​​អ៊ីស្លាមជ្រុលនិយម​ទាំង​នេះ” គឺ​ជា​អ្នកទទួល​​​ខុសត្រូវ​​​ចំពោះ​​​កុបកម្ម​​​​​​នៅក្នុង​​​ខេត្ត​ស៊ីន​​​ជាំង ដែល​​នៅ​ទី​នោះ​​​ប៉ុស្តិ៍នគរ​បាល ​​​អគារ​​​រដ្ឋាភិបាល​​​មូលដ្ឋាន​​​និង​​​ទ្រព្យសម្បត្តិ​​​ផ្សេង​​​ៗទៀតត្រូវបា​​​នវាយ​​​ប្រហារ​​​កាល​​​ពី​​​សប្តាហ៍​​​មុន​​​នៅក្នុង​​​តំបន់មួយ ​​​ជា​​​កន្លែង​ដែល​​​​ប្រជាពលរដ្ឋ​​​​វីហ្គួរកាន់សាសនា​​​អ៊ីស្លាម​​ភាគ​​​ច្រើនចង់​​​បាន​​​ឯករាជ្យ​​​ពី​​​ប្រទេស​​​ចិន​​​។

ទីភ្នាក់ងារ​​ព័ត៌មាន​របស់​​​រដ្ឋស៊ីនហួ បាន​​​​រាយ​ការណ៍​​​​កាល​​​ពី​​​ម្សិលមិញថា អ្នក​​​ធ្វើ​​​កុបកម្ម​​​បាន​​​សម្លាប់​​​មនុស្ស​​​​​​អស់​​​២៤នាក់​​​ហើយ​​​នគរបាល​​​បាន​​​បាញ់សម្លាប់​​​អ្នក​​​ធ្វើ​កុប​កម្ម​ចំនួន​​​១១នាក់​​​វិញ​​​។

របាយ​​​ការណ៍នេះ​​​បានលើក​​​ឡើង​​​ថា​   “ នគរបាល​​​បានបាញ់​​​សម្លាប់​​​អ្នក​​​ធ្វើកុបកម្ម​​​ចំនួន១១នាក់​​​ និងចាប់​​​បានមនុស្ស​​​បួន​​​នាក់​​​ផ្សេង​​​ទៀត”។
របាយការណ៍​​​របស់​​​ទីភ្នាក់ងារ​​​ព័ត៌មាន​​​ស៊ីនហួបានដកស្រង់​​​សម្ដី​​​របស់ “ ក្រុម​​​អ្នក​​​ជំនាញ” ដែលនិយាយថា អាជ្ញាធរចិន​​​ជា​​​អ្នក​​​ “ទទួលខុសត្រូវ​​​” ចំពោះ​​​ការ​​​បង្ក្រាប​​​ការ​​​វាយ​​​ប្រហារ​​​កាលពី​ពេលថ្មីៗ​​​នេះ​​​នៅតំបន់​​​ស៊ីនជាំង​​​ ហើយ​​​សហគម​​​ន៍​​​អន្តរ​​​ជាតិ​​​គួរតែ​​​ពង្រឹង​​​​កិច្ចសហប្រតិ​​​បត្តិការ​​​ប្រឆាំងនឹង​​​អំពើ​​​ភេរ​​​វកម្ម​​​​​​។

ក្នុងចំណោម​​​អ្នកធ្វើអត្ថាធិប្បាយ​​​អន្តរ​ជាតិ​​​ផ្សេង​​​ទៀតនៅក្នុង​​​​អត្ថបទ​​នេះ​​​លោក​​​ផៃ ស៊ីផាន ​​​អ្នកនាំពាក្យ​​​ទីស្តីការ​​​គណៈ​រដ្ឋ​មន្ត្រី​ខ្មែរ​​​​ ត្រូវ​​​បាន​​​ទី​​​ភ្នាក់ងារ​​​ព័ត៌មាន​​​ស៊ីនហួ ដក​ស្រង់​សម្តី​យក​មក​បកស្រាយ​ថា លោក​​​ចង់​​​ឲ្យ​មាន​​​ដំណោះស្រាយ​​​មួយ​​​ដោយ​​​សន្តិវិធី​​​។​ ប៉ុន្តែ​​​នៅក្នុង​​​​សម្រង់​សម្ដីដើម​មួយ​ លោក ​ផៃ ស៊ីផាន ​​​ទំនង​​​ជាគាំទ្រ​​​ការ​​​ធ្វើ​​​អន្តរាគមន៍​​​របស់​​​រដ្ឋាភិបាល​​​ចិន​​​ដើម្បី​​​រក្សា​​​សណ្តាប់​ធ្នាប់។

លោក ផៃ ស៊ីផាន​​​ ត្រូវ​​​បាន​​​ដកស្រង់​​​សម្ដី ​​​ដែលនិយាយថា “ សកម្មភាព​​​ហិង្សា​ណាមួយ​​​គួរ​​​តែត្រូវ​​​បញ្ចប់​​​។ ការ​​​ពង្រឹង​​​ច្បាប់​​​ដ៏ម៉ឺង​ម៉ាត់​​មួយ​​​ត្រូវ​​​តែ​​​អនុវត្ត​​​”។ លោក ផៃ ស៊ីផាន​​​ ​​​មាន​​​ប្រសាស​​​ន៍​​​កាល​​​​ពី​ម្សិលមិញ​​​ថា តាម​រដ្ឋធម្មនុញ្ញ​​​របស់​​កម្ពុជា​​​ ប្រទេសនេះ​​​មិន​​​ជ្រៀតជ្រែក​​​​​ចូល​​​កិច្ច​ការ​​​​ផ្ទៃ​​​ក្នុង​​​​របស់​​រដ្ឋ​​​អធិបតេយ្យ​​​​​ណា​មួយ​នោះ​​​ទេ។

លោកបាន​​​មាន​​​ប្រសាសន៍ថា​​​ “ រដ្ឋាភិ​​​បាល​​​យើង​​​មិនដែលលើក​​​ទឹកចិត្ត​​​ឲ្យ​​រដ្ឋាភិបាល​​​ណា​​មួយ​​ប្រព្រឹ​​​ត្ត​​​អំពើ​​​ហិង្សា​នោះ​​​ទេ។ ​យើង​​​​ចង់​ឲ្យមាន​​​​ដំណោះ​​​ស្រាយ​​​មួយ​​​ដោយ​​​សន្តិវិធី​​​​​​ ​​”។

​សេចក្តី​រាយការណ៍​​​របស់​​​ទីភ្នាក់​​​ងារ​​​ព័ត៌​មាន​​​​ស៊ីនហួនេះ​​​ក៏បាន​​​ដកស្រង់​​​សម្ដី​​​របស់​​​លោក សុខ ទូច​​​ អនុ​​​ប្រធាន​​​វិទ្យាស្ថាន​​​ទំនាក់​​​ទំនង​​​អន្តរជាតិ​​​ ជា​វិទ្យាស្ថាន​​មួយ​ដែល​រដ្ឋា​ភិបាល​​​​បាន​ង្កើត​ឡើង ប៉ុន្តែ​មាន​ការ​អះអាង​​​ថា ​​​ជា​​​វិទ្យាស្ថាន​​​​​​ឯករាជ្យ​​​។

យោងតាម​​​​ទី​ភ្នាក់ងារ​​​ព័ត៌មាន​​​ស៊ីនហួបាន​​​ឲ្យដឹងថា លោក សុខ ទូច​​​ បាន​​​មាន​​​ប្រសាសន៍​ថា ក្រុម​​​ជ្រុល​​​និយម​​​អ៊ីស្លាម​​​ប៉ុនប៉ង​​​បំបែក​​​តំបន់ស៊ីនជាំង​​​ ចេញពី​​​ប្រទេស​​​ចិន​​​តាម​រយៈ​សាសនា​​​”។

លោក សុខ ទូច​​​ បាន​​​បំភ្លឺ​​​កាលពី​​​ម្សិល​មិញ​ថា ទស្សនរបស់លោក គឺថា ជនជាតិ​​​ភាគតិច​​​វីហ្គួរ​នៅតំបន់ស៊ីនជាំង​​​គួរតែមាន​​​សេរីភាព​​​ក្នុង​​​ជំនឿ​​​សាសនា​​​របស់​​​ពួកគេ​​​ហើយ​​​មិន​​​មែន​​​​ជាគោល​​​ដៅ​​​ដើម្បី​​​ធ្វើការ​​​រើស​​​អើង​​​​​​ទេ​​​។ លោក​​​ សុខ ទូច​​​ បាន​​​មាន​​​ប្រសាសន៍​​​ថា ​ជាទូទៅ​​​ វា​​​មិនមែនជា​​​គំនិតល្អ​​​សម្រាប់​​​រដ្ឋា​ភិបាល​​​​​​ធ្វើការ​​​បង្ក្រាប​​​កុបកម្មនេះ​​​តាម​​​រយៈ​​​ការ​​​ប្រើ​​​កម្លាំង​​​នោះទេ​​​។

លោកបាន​​​មាន​​​ប្រសាសន៍ថា “ រដ្ឋាភិ​​​បាល​​​របស់​​​ [ប្រទេស​​​ណាមួយ​​​] ក៏ដោយ​​​ ក៏មាន​​​សិទ្ធិ​ប្រើកម្លាំង​​​ដើម្បី​​​ការពារ​​​សន្តិសុខ​ដែរ ​​​ហើយ​​​ខ្ញុំ​​​យល់ថា វា​​​មិនមែនជា​ការល្អ​ដើម្បី​​​ធ្វើការ​​​បង្ក្រាប​​​នោះទេ​​​”។​លោក​​​​ពន្យល់ថា ​ប៉ុន្តែ​ការ​​​ប្រើ​​​កម្លាំង​​​អាច​​​ធ្វើ​​​ឲ្យមាន​​​សណ្តាប់​​​ធ្នាប់​​​បាន​​​តែ​​​មួយ​​​រយៈ​ពេល​​​​ប៉ុណ្ណោះ​​​ ។ ការប្រើ​​​កម្លាំង​​មិន​អាច​​​ធានា​​​ឲ្យមាន​​​សន្តិភាព​​​រយៈពេលយូរ​​​នៅក្នុង​​​តំបន់​ចលាចល​ណា​មួយ​នោះ​ទេ​។

ទំនាក់​​​ទំនងសេដ្ឋកិច្ច​​​ និង​​​យោធា​​​របស់​​​ប្រទេស​​​កម្ពុជា​​​ជាមួយ​​​​​​ប្រទេស​​​ចិន​​​មាន​​​ភាព​​​រឹងមាំ​​​កាន់​​​តែ​​​ខ្លាំង​ឡើង​​​​ក្នុង​រយៈ​ពេល​ប៉ុន្មាន​​​ឆ្នាំ​​​ថ្មីៗនេះ​​​ ដែល​​​បណ្តាល​​​ឲ្យមាន​​​ការ​​​ព្រួយ​បារម្មណ៍ថា ទំនាក់ទំនង​​​ការទូត​​​របស់​​​ប្រទេស​​​កម្ពុជា ស្ថិត​​​នៅក្រោម​ឥទ្ធិពល​​​​របស់​​​ចិន​​។

កាលពី​​​ឆ្នាំ២០០៩​​​ប្រទេស​​​កម្ពុជា​​​បាន​​​ទទួលរង​​​ការ​​​រិៈគន់យ៉ាង​​​ខ្លាំងក្លា ​​​បន្ទាប់ពី​​​ប្រទេស​​​កម្ពុជា​​​បាន​​​ចាប់ខ្លួន​​​និងបាន​​​និរទេស​​​ជនជាតិ​​​ភាគតិច​​​វីហ្គួរ​​​ចំនួន​​​២០​​​នាក់​​​ដែល​​​ស្វែងរក​​​សិទ្ធិជ្រកកោន​​​នយោ​​​បាយ​​​ ទៅ​​​ប្រទេស​​​ចិនវិញ​​​ ទោះបីជា​​​មាន​​​ការ​​​ព្រួយ​បារម្ភថា ពួកគេ​​​នឹងទទួល​​​​​​រង​​​ការ​​​ធ្វើបាប ​​នៅ​​​ពេល​​​ត្រឡប់​​​ទៅប្រទេស​​​ចិន​​​វិញក៏ដោយ៕​​​​​​​​​

 ​​​​​​​​​​​​​​​​​​​​​​​​​​​​ប្រែសម្រួលដោយ ស៊ុំ សុខភុំ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស