មន្ត្រីបានឲ្យដឹងថា កាលពីម្សិលមិញសាលាដំបូងខេត្តសៀមរាប បានចោទប្រកាន់់ស្ត្រីជនជាតិឥណ្ឌាអាយុ៣០ឆ្នាំម្នាក់ពីបទរត់ពន្ធគ្រឿងញៀន បន្ទាប់ពីគាត់ត្រូវបានចាប់ខ្លួនកាលពីថ្ងៃព្រហស្បតិ៍នៅអាកាសយានដ្ឋានអន្តរជាតិខេត្តសៀមរាបជាមួយនឹងថ្នាំញៀនមេតំហ្វេតាមីនទឹកកកទម្ងន់ជាង៣គីឡូក្រាមលាក់ទុកក្នុងវ៉ាលីសរបស់គាត់។
លោក អ៊ំ អមរា ស្នងការរងនគរបាលខេត្តសៀមរាប និងជាប្រធានអង្គភាពប្រឆាំងគ្រឿងញៀន ខេត្តបានមានប្រសាសន៍ថា ស្ត្រីនេះឈ្មោះ ជូឌីត ពុយដាអុីត (Judith Pudaite) មកពីប្រទេសឥណ្ឌាភាគឦសាន បានធ្វើដំណើរតាមយន្ដហោះមួយគ្រឿងកាត់តាមអាកាសយានដ្ឋានសិង្ហបុរីឆ្ពោះមកខេត្តសៀមរាប។
លោកបានមានប្រសាសន៍ថា “ យើងបានឆែកឆេរវ៉ាលីសរបស់គាត់ និងរឹបអូសបានថ្នាំញៀនមេតំហ្វេតាមីនទឹកកកទម្ងន់ជាងបីគីឡូក្រាមដាក់ក្នុងកញ្ចប់ជាច្រើន ដែលលាក់ទុកក្នុងវ៉ាលីល”។
លោក អុិន សុង អនុប្រធានអង្គភាពប្រឆាំងគ្រឿងញៀននៃក្រសួងមហាផ្ទៃ បានមានប្រសាសន៍ថា នគរបាលបានសង្ស័យស្ត្រីនោះថា មានដៃគូផ្សេងទៀត ប៉ុន្តែ ការស្រាវជ្រាវរយៈពេលពីរថ្ងៃកន្លងមក មិនបានទទួលលទ្ធផលឡើយ ។
យោងតាមព្រះរាជអាជ្ញារអមសាលាដំបូងខេត្ត លោក ទី សុវិនថាល់ បានឲ្យដឹងថា ជនសង្ស័យដែលត្រូវបានបញ្ជូនទៅឃុំខ្លួនបណ្ដោះអាសន្នក្នុងពន្ធនាគារខេត្ត អាចប្រឈមទោសជាប់ពន្ធនាគាររហូតដល់៣០ឆ្នាំ ប្រសិនបើរកឃើញថាមានពិរុទ្ធភាព។ កាលពីឆ្នាំមុន នគរបាលបានរឹបអូសគ្រឿងញៀនប្រភេទណាកូទីកមួយចំនួននៅក្នុងយុទ្ធនាការឆ្មក់ចាប់នៅអាកាសយានដ្ឋានអន្តរជាតិទាំងនៅភ្នំពេញ និងនៅខេត្តសៀមរាប៕
ប្រែសម្រួលដោយ ស៊ុំ សុខភុំ