សវនាការសាក្សីត្រូវបានបន្តធ្វើនៅឯសាលាក្តីខ្មែរក្រហមកាលពីម្សិលមិញ ដោយមានសក្ខីកម្មពីសំណាក់លោក ពេជ្រ ចឺម អតីតអនុប្រធានតំបន់១០៥ ដែលបាននិយាយរៀបរាប់អំពីការអប់រំកែប្រែ និងការកម្ទេចរបស់កម្មាភិបាលនៅអំឡុងរបបខ្មែរក្រហម។
បុរសអាយុ៧១ឆ្នាំរូបនេះ បាននិយាយប្រាប់តុលាការថា រូបគាត់បានចូលរួមជាមួយខ្មែរក្រហមកាលពីខែឧសភា ឆ្នាំ១៩៧០នៅមុនការធ្វើរដ្ឋប្រហាររបស់លោក លន់ នល់ ទម្លាក់ព្រះបាទ នរោត្តម សីហនុ។
លោក ចឺម បានឲ្យដឹងថា យើងអាចមើលឃើញឥទ្ធិពល និងផលប៉ះពាល់នៅតាមតំបន់ជនបទ។ យើងត្រូវតែចូលរួមជាមួយប្រជាពលរដ្ឋដ៏ទៃទៀត តាមការអំពាវនាវរបស់ព្រះបាទ នរោត្តម សីហនុ។ លោកបាននិយាយបន្តទៀតថា ការចូលរួមក្នុងបដិវត្តន៍នេះ គឺដើម្បីប្រយុទ្ធតស៊ូធ្វើយ៉ាងណានាំយកព្រះបាទ នរោត្តម សីហនុ មកកាន់អំណាចវិញ។
នៅក្នុងរបបនេះ លោក ចឺម បានធ្វើការភាគច្រើនខាងឃោសនាការ និងការអប់រំ នៅតំបន់១០៥ ក្នុងខេត្តតាកែវ។ តំបន់នេះ ក៏ជាមណ្ឌលសន្តិសុខក្រងតាចាន់ ដែរ ប៉ុន្តែសាក្សីរូបនេះបាននិយាយម្តងហើយ ម្តងទៀតថា ការខិតខំប្រឹងប្រែងកម្ទេច និងការកែប្រែ ត្រូវបានធ្វើឡើងតាមតែបញ្ជាពីថ្នាក់លើប៉ុណ្ណោះ។
នៅពេលគេស្នើឲ្យគាត់បញ្ជាក់ចំពោះយោបល់អំពីប្រព័ន្ធបញ្ជារវាងមន្ត្រីផ្នែក និងមន្ត្រីតំបន់ លោក ចឺម បាននិយាយថា យើងបានធ្វើរបាយការណ៍ទៅឲ្យផ្នែក ហើយអ្វីដែលពួកគេសម្រេច គឺយើងធ្វើតាមតែការសម្រេចនោះប៉ុណ្ណោះ។ គាត់បាននិយាយប្រាប់តុលាការថា មនុស្សនៅក្នុងសង្គមដែលគេមិនពេញចិត្ត នឹងត្រូវបញ្ជូនទៅពន្ធនាគារ ដើម្បីកែប្រែឲ្យក្លាយទៅជាមនុស្សនៅក្នុងសង្គមប្រកបរបរកសិកម្ម ដែលគេត្រូវការ។
គាត់បាននិយាយថា ប្រសិនបើគេមិនអាចកែប្រែអ្នកទាំងនោះបានទេ ពួកគេត្រូវអប់រំ កែប្រែម្តងទៀត រហូតទាល់តែអាចកែប្រែបាន។ ប្រសិនបើគេអាចកែប្រែមនុស្សណាម្នាក់បាន អ្នកនោះនឹងត្រូវបញ្ចូលទៅក្នុងសង្គមដែលពួកគេនឹងត្រូវផ្តល់ភារកិច្ចធម្មតាមួយចំនួន។ ប៉ុន្តែ នៅពេលសាក្សីរូបនេះ និយាយប្រាប់តុលាការថា ការងាររបស់គាត់គឺត្រួតពិនិត្យសកម្មភាពខ្មាំង គាត់បានព្យាយាមបញ្ចៀសខ្លួនគាត់ឲ្យផុតពីការងារអាក្រក់ៗបំផុតនៅតាមពន្ធនាគារ។
គាត់បាននិយាយថា ការកម្ទេចចោលត្រូវបានធ្វើឡើងតាមការណែនាំពីថ្នាក់លើ ក្រោយមកបានបន្ថែមទៀតថា រូបគាត់បានស្គាល់អត្តសញ្ញាណរបស់ ប៉ុល ពត និង នួន ជា នៅពេលបើកវគ្គសិក្សារៀនសូត្រនៅបុរីកីឡា កាលពីឆ្នាំ១៩៧៥។
ក្រោយមកគាត់បានប្រាប់តុលាការថា “ ដើម្បីនិយាយថា បុគ្គលណាម្នាក់ដែលខ្ញុំបានកម្ទេច ខ្ញុំមិនអាចនិយាយបានទេ។ ខ្ញុំមិនដែលទទួលបទបញ្ជាឲ្យកម្ទេច ឬក៏សម្លាប់នរណាម្នាក់នោះទេ។ តាមពិត ខ្ញុំបានទទួលផែនការមួយចំនួនអំពីសកម្មភាពឃោសនាការ ប៉ុន្តែ ខ្ញុំមិនដែលជាប់ពាក់ព័ន្ធក្នុងការសម្លាប់នរណាម្នាក់នោះទេ”៕
ប្រែសម្រួលដោយ ហួង កុកទៀន