28 C
Phnom Penh

សាលាឧទ្ធរណ៍បើកសវនាការ​រឿងក្តីអ្នក​ចងការ​ជនជាតិវៀតណាម​ជា​ប់ពន្ធ​នាគារ​ពីបទ​ធ្វើទារុណកម្ម​

ដោយ ឌឹ ខេមបូឌា ដេលី

បទវិភាគ

មន្ត្រីសាលាឧទ្ធរណ៍​បានឲ្យដឹងថា សា​លា ឧទ្ធរណ៍​កាលពីម្សិលមិញ​ បានបើក​សវ​នាការ​រឿងក្តី​អ្នកចងការ​ប្រាក់​ជនជាតិ​វៀត​ណាម​ម្នាក់​អាយុ៤៤ឆ្នាំ​ ដែលត្រូវបាន​ផ្តន្ទា​ទោស​ឲ្យជាប់​ពន្ធនាគារ​​រយៈពេល​ប្រាំឆ្នាំ​ កាលពី ខែធ្នូ​ឆ្នាំមុន​​ ពីបទ​​បង្ខាំង​ និងធ្វើទារុ​ណកម្ម​​បុរស​អាយុ​១​៩​ឆ្នាំ​​ម្នាក់​ដោយ​ខុស​ច្បាប់​​នៅ​កាស៊ីណូមួយ​ក្នុង​ខេត្ត​ស្វាយរៀង​។

កាលពី​ខែ​មករា​ ឆ្នាំ​២០១២​ សាច់ញា​តិ​រ​បស់​​​ជនជាតិ​វៀតណាម​ឈ្មោះ​ ង្វៀន​ ហ៊ូ​ទីន (Ngu​yen ​​​​Huu​ Tin​) បាន​ជូនដំណឹង​ដល់​នគរ​បាល​ក្រុង​បាវិត​ បន្ទាប់ពី​​កូន​ដៃ​ឆ្វេង​​របស់​ជន​ជាតិ​វៀត​ណាម​​រូប​នេះ​ត្រូវបាន​ផ្ញើឲ្យ​ពួកគេ​ ដោយដាក់​នៅ​ក្នុង​កញ្ចប់មួយភ្ជាប់​ជាមួយ​​ព័ត៌​​មាន​​ទាមទារ​ប្រាក់លោះ​ចំនួន​២.០០០​ដុល្លារ​ ​ដែល​ឈ្មោះ ហ៊ូទីន បាន​ខ្ចី​គេ​អំឡុង​ពេល​​​លេងល្បែង​នៅ​កាស៊ីណូ​ ឡាស​វ៉េហ្គាស​ សាន់​។

​អ្នក​ចង​ការ​ប្រាក់ឈ្មោះ​ ថាយ វ៉ា​ន់​ណេន (Thay​ Van ​Nen​) ​បាន​សា​រភាព​កាលពី​ម្សិល​មិញ​​ថា ខ្លួនបាន​ឲ្យជនរ​ង​គ្រោះ​ខ្ចី​ប្រា​ក់​ចំនួន​២.០០០ដុល្លារ​ ក៏ប៉ុ​ន្តែ​ ជនជាប់ចោទ​រូប​នេះ​បាន​បដិសេធ​ថាខ្លួ​ន​មិនបាន​ដឹង ​ពីការ​ឃុំខ្លួន​ជនរងគ្រោះ​ឈ្មោះ ហ៊ូទីន រយៈពេល​ប្រាំថ្ងៃ​ទេ ដោយ​បាន​អះអាងថា​ នៅពេល​សកម្ម​ភាព​​ឃុំខ្លួន​នេះ​ត្រូវបាន​ប្រព្រឹត្តដោយ​ឈ្មួញ​​កណ្តាល​​ពីរនាក់​ ដែលមាន​ឈ្មោះ​ សៅ​ និ​ង​ឈ្មោះ យៀក ដែល​នគរបាល​មិនដែល​រ​ក​ឃើញ​នោះ​​ ជនជាប់ចោទ​មិនដែល​សូម្បី​តែ​បា​នជួប​ឈ្មោះ ហ៊ូទីន​។

តាមការពិត ចុង​ចោ​ទ​​បានអះអាង​​កាល​ពីម្សិល​មិញថា ​ជន​រង​គ្រោះ​រូប​នេះ​ទំនង​ជា​បាន​កាត់​ម្រាមដៃខ្លួនឯង​ ក្នុងបំណង​​អា​ក្រក់​ចង់បាន​ប្រាក់​ដើម្បីប៉ះ​ប៉ូវ​ចំនួនទឹកប្រា​ក់​ដែលខ្លួន​បានចាញ់ក្នុង​ពេលលេងល្បែង​។ លោក​ វ៉ាន់ ​ណេន បា​ននិយា​យថា “ ខ្ញុំមិ​ន​បាន​ដឹងថាតើ​គាត់ត្រូវបាន​គេឃុំខ្លួន ​ឬ​យ៉ាង​ណា​ទេ​​ ឬក៏ថាតើ​ម្រាមដៃរបស់គាត់​បានដាច់​ដោយសារអ្វីទេ​ ក៏ប៉ុន្តែ​ខ្ញុំគិតថា​ ជ​នរង​គ្រោះ​បានកាត់ម្រាមដៃ​របស់​ខ្លួន​ដោ​យខ្លួ​នឯង​ ដើម្បី​ជា​ល្បិច​បោកប្រាស់​គ្រួសា​រ​​របស់គាត់​ ឲ្យទូទាត់​បំណុលរបស់គាត់​”។

លោក ​នាង ហៃ ​មេធាវី​ការពារចុង​ចោ​ទ​ បានមាន​ប្រសាសន៍ថា កូនក្តីរបស់​លោក​មិន​បាន​ជាប់​​ពាក់ព័ន្ធ​ក្នុង​សកម្មភាព​ឃុំខ្លួន​ និង​ធ្វើ​ទារុណកម្ម​ខុសច្បាប់​នេះទេ​ ដោយសារ​តែ​កូន​ក្តីរបស់លោក​​មិនបាន​ជួ​​ប​ជនរងគ្រោះទេ​ ហើយលោកបានស្នើឲ្យ​លោក​ចៅក្រម​ ប៉ុល សំអឿន លើកលែង​ការចោ​ទប្រកាន់​ចំពោះ​កូនក្តី​របស់លោក​។

ក៏ប៉ុន្តែ​ លោក អឹុម សុផាន ​ព្រះរាជ​អា​ជ្ញា​សាលាឧទ្ធរណ៍បានអះអាងថា មិន​ទា​ន់​មាន​ការ​បង្ហាញ​ភ័ស្តុតាង​ថ្មីៗទេ​។លោ​ក​បាន​មាន​ប្រសាសន៍ថា “ ការផ្តន្ទាទោស​​ដោយ​សាលា​ដំបូងខេត្ត​​ស្រាល​ពេក​ ក៏ប៉ុន្តែ​ ព្រះរាជ​អាជ្ញា​សាលាដំបូង​ខេត្ត​មិនបាន​ប្តឹងឧទ្ធ​រណ៍ជំទាស់​សេចក្តីសម្រេច​នេះទេ​…ដូ​ច្នេះ​បើ​គ្មាន​ភ័ស្តុ​តាង​​ថ្មីៗ​​បង្ហាញ​​ថា គាត់ពិតជាមិនបាន​ប្រព្រឹត្ត​បទ​ល្មើ​ស​នេះ​​មែន​នោះ​ យើង​នឹង​ស្នើឲ្យ​ចៅក្រម​​តម្កល់​សា​លក្រម​ដើម​”។

ម្ចាស់កាស៊ីណូ ឡាស​វ៉េហ្គាស សាន់​ បា​ន​បដិសេធថា ខ្លួនមិនបាន​ធ្វើអ្វីខុសទេ​ ហើ​យ​បានលើកឡើងថា ខ្លួនមិនបាន​ដឹង​ទេ​ថា លោ​ក ​វ៉ាន់ ណេន​ កំពុង​​​ចងការ​ប្រា​ក់​នៅក្នុង​កាស៊ី​ណូ​​របស់ខ្លួនទេ​។ ក៏ប៉ុន្តែ​ មា​ន​កា​ររាយការណ៍​ជា​ញឹក​ញាប់​ អំពី​ករណី​ចា​ប់​ជំរិត​​ន​ិងធ្វើទារុណ​កម្ម​ ដោយ​អ្នករក​ស៊ី​ចងការ​ដែល​គ្មានចិត្ត​មេត្តា​ នៅ​តាម​កា​ស៊ី​ណូ​នានា​ក្នុង​ក្រុងបាវិត​។

កាលពីពេលថ្មីៗនេះ​ ប្រព័ន្ធផ្សព្វផ្សា​យ​វៀត​ណាម​បានរាយការណ៍ថា ជនរង​គ្រោះ​អាយុប្រហែល​១៣ឆ្នាំ​ កំពុង​ត្រូវបា​ន​ឈ្មួញ​កណ្តាល​បោកបញ្ឆោត​​​នៅ​តាម​ព្រំ​ដែន​នេះ​ថា នឹង​ផ្តល់​ប័ណ្ណលេ​ងល្បែង​ឥតគិតថ្លៃ​ អាហារ​ ​និងកន្លែងស្នា​ក់​នៅ​ នៅកាស៊ីណូនានា។ នៅ​ទីនោះ ពួក​គេ​បាន​ធ្លាក់​ខ្លួន​ជាប់​បំណុ​ល​អ្នក​ចងការ​ ដែ​ល​ឃុំខ្លួនពួកគេ​ ដើម្បី​ទារប្រាក់​លោះខ្លួន​ រ​ហូត​ដល់សាច់ញាតិរបស់​ក្មេងៗ​សង​បំណុល​​នោះ​វិញ​។ លោក ចៅ​ក្រម សំ​អឿន ​បានមានប្រសាសន៍ថា សា​ល​ដីកា​​បណ្តឹង​ឧទ្ធរណ៍របស់លោក វ៉ាន់ ណេន​ នឹងត្រូវ​ប្រកាស​នៅ​ថ្ងៃ​ទី​១​៥​ខែកក្កដា​ខាងមុខ​៕

ប្រែ​សម្រួល​ដោយ កង ​សុធា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស