នគរបាលបាននិយាយកាលពីម្សិលមិញថា នគរបាលនៅក្នុងខេត្តបន្ទាយមានជ័យ បានចាប់ខ្លួនបុរសពីរនាក់កាលពីថ្ងៃច័ន្ទ ដែលត្រូវបានចោទប្រកាន់ថា បានដឹកអាវយឺតដែលសរសេរអក្សរជំរុញប្រជាពលរដ្ឋកុំឲ្យបោះឆ្នោតក្នុងការបោះឆ្នោតជ្រើសតាំងតំណាងរាស្ត្រនៅក្នុងខែនេះ។
លោក អ៊ុំ សុផល អធិការនគរបាលក្រុងប៉ោយប៉ែត និងលោក ច័ន្ទ កុសល ស្នងការរងនគរបាលខេត្តគ្រាន់តែមានប្រសាសន៍ថា បុរសទាំងពីរនាក់ត្រូវបានចាប់ខ្លួន ពេលកំពុងដឹកជញ្ជូនអាវយឺតឆ្លងដែនចូលក្នុងប្រទេសថៃ ប៉ុន្តែពួកគាត់បានបដិសេធមិនបញ្ជាក់ថាតើបទល្មើសអ្វីដែលបុរសទាំងពីរនាក់នេះត្រូវបានចោទប្រកាន់នោះទេ។
លោក កុសល មានប្រសាសន៍ថា “ បុរសទាំងពីរនាក់នេះត្រូវបានចាប់ខ្លួនដោយសារអាវយឺតប្រឆាំងការបោះឆ្នោត។ ខ្ញុំមិនដឹងច្រើនទេអំពីរឿងនេះ”។
អ្នកស្រី ហុង ច័ន្ទផា បាននិយាយថា អ្នកស្រីនិងប្តីអ្នកស្រីឈ្មោះ សែង សុខម៉េង ត្រូវបានឃាត់ខ្លួនកាលពីល្ងាចថ្ងៃច័ន្ទ ហើយត្រូវបានដឹកទៅអធិការដ្ឋាននគរបាលក្រុងប៉ោយប៉ែត ហើយមិនយូរប៉ុន្មានមន្ត្រីនគរបាលបានដោះលែងអ្នកស្រី ប៉ុន្តែបានឃុំខ្លួនប្តីរបស់អ្នកស្រី។
អ្នកស្រី ហុង ច័ន្ទផា បាននិយាយថា អ្នកស្រីនិងប្តីរបស់អ្នកស្រីត្រូវបានគេជួលឲ្យដឹកអាវយឺតជាង៥០ វិទ្យុចំនួន២៤ និងនាឡិកាដៃចំនួន២៥០គ្រឿងចូលក្នុងប្រទេសថៃ និងចែកសម្ភារទាំងនេះឲ្យកម្មករចំណាកស្រុកខ្មែរ។អ្នកស្រីបាននិយាយថា ប្តីរបស់អ្នកស្រីក្រោយមកបានជួលមនុស្សម្នាក់ឲ្យចែកសម្ភារទាំងនេះ ហើយក៏ត្រូវចាប់ខ្លួនផងដែរកាលពីព្រឹកថ្ងៃច័ន្ទ មុនពេលឆ្លងដែន។
កាលពីម្សិលមិញគេនៅមិនច្បាស់ថា នរណាផលិតអាវយឺតនេះ ហេតុអ្វីអាវយឺតទាំងនេះត្រូវបានដឹកជញ្ជូនទៅកាន់ប្រទេសថៃ ឬជាការរំលោភច្បាប់ឬអត់នោះទេ។
អ្នកស្រី ច័ន្ទផា ក៏បានមានប្រសាសន៍ដែរថា អ្នកស្រីមិនដឹងថាអ្នកណាជួលប្តីរបស់អ្នកស្រីឲ្យចែកសម្ភារទាំងនេះទេ។អាវយឺតនេះរួមមានសរសេរពាក្យថា “ ពលរដ្ឋខ្មែររួបរួមគ្នាប្រឆាំងនឹងការបោះឆ្នោត និង សូមកុំទៅបោះឆ្នោត”។
អ្នកស្រីបានលើកឡើងអំពីការចាប់ខ្លួននេះថា “ វាមិនយុត្តិធម៌ទេ ពីព្រោះយើងមិនមែនជាសមាជិករបស់គណបក្សនយោបាយណាមួយទេ។ប្តីរបស់ខ្ញុំគ្រាន់តែជាឈ្មួញកណ្តាលធម្មតាប៉ុណ្ណោះ ដែលបានជួលកម្មករម្នាក់ឲ្យដឹកសម្ភារនេះឆ្លងដែនចូលប្រទេសថៃសម្រាប់កម្មករខ្មែរនៅទីនោះ”។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតបានមានប្រសាសន៍ថា លោកបានដឹងអំពីការចាប់ខ្លួននេះ ហើយថា មន្ត្រីបោះឆ្នោតខេត្តកំពុងតែស៊ើបអង្កេតរឿងនេះ។ លោក នីថា មានប្រសាសន៍ដោយមិនបានធ្វើការសន្និដ្ឋានថា ច្បាប់ស្តីពីការបោះឆ្នោតជ្រើសតាំងតំណាងរាស្ត្រ បានចែងពីការដាក់ទោសចំពោះជនណាដែលមានពិរុទ្ធភាពពីបទរារាំងការបោះឆ្នោត ដែលលោកបានបញ្ជាក់ថា ដូចករណីដឹកអាវយឺត វិទ្យុ និងនាឡិកាដៃនេះជាដើម។
លោកមានប្រសាសន៍ថា “ បើទោះជាគាត់ត្រូវបានជួលឲ្យធ្វើដូច្នេះ វានៅតែខុស ព្រោះច្បាប់បោះឆ្នោតចែងថា ទាំងមេគំនិត និងជនល្មើសពិតប្រាកដ ត្រូវមានទោស”។ ជាពិសេសច្បាប់អនុញ្ញាតឲ្យគណៈកម្មាធិការជាតិរៀបចំការបោះឆ្នោតចាត់វិធានការធ្ងន់ធ្ងរចំពោៈអ្នកដែល “ រារាំងដំណើរការបោះឆ្នោត” ឬ “ រំខានការបោះឆ្នោត”។
លោក គល់ បញ្ញា ប្រធានគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា មានប្រសាសន៍ថា លោកមិនជឿថា គ្រាន់តែចែកចាយអាវយឺត ជំរុញប្រជាពលរដ្ឋមិនឲ្យទៅបោះឆ្នោតនោះ គឺជាការរារាំងការបោះឆ្នោតទេ។
លោកមានប្រសាសន៍ថា “ តាមទស្សនរបស់ខ្ញុំ វាមិនត្រឹមត្រូវទេ ប្រជាពលរដ្ឋអាចបញ្ចេញទស្សនបាន។ គំនិតមិនទៅបោះឆ្នោត មិនល្អទេ ប៉ុន្តែប្រសិនបើអ្នកគ្រាន់តែសម្តែងទស្សនណាមួយ ចំពោះខ្ញុំ មិនមែនជា [ការបំពាន] ច្បាប់បោះឆ្នោតទេ”។ លោក គល់ បញ្ញា បានកត់សម្គាល់ថា ច្បាប់បោះឆ្នោតក្នុងប្រទេសថៃ បើកចំហចំពោះក្រុមដែលតែងតែអំពាវនាវកុំឲ្យអ្នកបោះឆ្នោតទៅបោះឆ្នោត។
លោកបានបន្ថែមថា ប៉ុន្តែសេរីភាពបែបនេះ តម្រូវឲ្យមានការពិនិត្យតាមដានចំពោះជនទាំងឡាយណាដែលអាចព្យាយាមបង្ខំអ្នកផ្សេងទៀតកុំឲ្យទៅបោះឆ្នោត។ លោកថ្លែងថា“ យើងគួរតែធ្វើឲ្យប្រាកដថា រឿងនេះមិនពាក់ព័ន្ធនឹងអ្នកមានអំណាច”៕
ប្រែសម្រួលដោយ ចេវ ប៊ុននី