ដោយការធ្វើយុទ្ធនាការឃោសនាបោះឆ្នោតជាផ្លូវការមិនទាន់បានមួយសប្តាហ៍ផងនោះ អ្នកគាំទ្រគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានបង្កើតកន្លែងឃោសនារបស់ខ្លួនជាច្រើនកន្លែងក្នុងរាជធានីភ្នំពេញ ហើយជាពិសេសនៅសួនច្បារមុខវត្តបទុម។
ចាប់តាំងពីយុទ្ធនាការឃោសនារកសំឡេងឆ្នោតបានចាប់ផ្តើមកាលពីថ្ងៃព្រហស្បតិ៍មក អ្នកគាំទ្រគណបក្សប្រជាជនកម្ពុជាដែលជាយុវជនបានបោះទីតាំងដ៏រឹងមាំនៅមុខវត្តបទុម ដែលជាទីសាធារណៈដ៏សំខាន់ធំមួយក្នុងចំណោមទីសាធារណៈសំខាន់ៗនៅកណ្តាលរាជធានីភ្នំពេញ ដែលស្ថិតនៅចំណុចប្រសព្វរវាងមហាវិថីសុរាម្រិត និងមហាវិថីសុធារសដ៏សំខាន់ក្នុងរាជធានីភ្នំពេញ។
លោក ឃួង ស្រេង អភិបាលរងរាជធានីភ្នំពេញ មានប្រសាសន៍ថា អាជ្ញាធររាជធានីភ្នំពេញបានអនុញ្ញាតផ្តល់សួនមុខវត្តបទុមជូនគណបក្សប្រជាជនកម្ពុជា ជាគណបក្សកាន់អំណាច ដោយសារគណបក្សនេះបានមកទាក់ទងអាជ្ញាធរសុំប្រើប្រាស់តំបន់នេះសម្រាប់ការឃោសនារកសំឡេងឆ្នោតរបស់ខ្លួនមុនគណបក្សប្រឆាំង។
លោកថ្លែងបន្តថា “ យើងបានផ្តល់សួនមុខវត្តបទុមជូនគណបក្សប្រជាជនកម្ពុជា ពីព្រោះគណបក្សនេះបានមកស្នើសុំការអនុញ្ញាតបានមុន”។លោកបានបន្ថែមថា សាលារាជធានីភ្នំពេញ និងគណៈកម្មាធិការរៀបចំការបោះឆ្នោតរាជធានីភ្នំពេញបានប្រាប់គណបក្សប្រឆាំងគឺគណបក្សសង្គ្រោះជាតិឲ្យធ្វើការឃោសានារកសំឡេងឆ្នោតរបស់ខ្លួននៅសួនសេរីភាពជាទីកន្លែងទំនេរស្ថិតនៅចន្លោះផ្លូវលេខ១០៦ និងផ្លូវលេខ១០៨ ដែលពុំសូវមានចរាចរណ៍ច្រើន។
ចាប់តាំងពីមានវត្តមានរបស់ខ្លួននៅសួនមុខវត្តបទុមមក យុវជនគណបក្សប្រជាជនកម្ពុជាបានបង្កសំឡេងអ៊ូអរ និងមានការគំរាមកំហែងខ្លះៗ ដោយបង្ហាញនូវការពេញចិត្តរបស់ពួកគេចំពោះលោក ហ៊ុន សែន ព្រមទាំងបានបង្ហាញការមិនចូលចិត្តចំពោះគណបក្សប្រឆាំងក្នុងការបោះឆ្នោតជាតិខាងមុខនេះ។
យូរៗម្តងកាលពីថ្ងៃច័ន្ទ អ្នកគាំទ្រគណបក្សប្រជាជនកម្ពុជាបានឈរកាន់ដៃគ្នានៅភាគខាងលិចនៃមហាវិថីព្រះសុរាម្រិត ដើម្បីរារាំងអ្នកគាំទ្រគណបក្សសង្គ្រោះជាតិ ដែលជិះម៉ូតូ និងរ៉ឺម៉កម៉ូតូកុំឲ្យពួកគេឆ្លងកាត់បាន។ ក្រុមយុវជនគណបក្សប្រជាជនកម្ពុជាបានបន្តបិទផ្លូវ ដោយបង្ខំឲ្យអ្នកធ្វើដំណើរនានាជ្រើសរើសផ្លូវផ្សេង ក្នុងរាជធានីភ្នំពេញ ហើយកាលពីល្ងាចថ្ងៃច័ន្ទ ពួកគេបានស្រែកពាក្យស្លោកគាំទ្រគណបក្សប្រជាជនកម្ពុជា ដោយមានបទចម្រៀង និងសារពីមេដឹកនាំគណបក្សប្រជាជនចាក់ឮសំឡេងខ្លាំងៗចេញពីរថយន្ត ដែលចតនៅលើសួននោះ។
កាលពីម្សិលមិញ ផ្លូវនៅពីមុខតំបន់យុទ្ធនាការឃោសនារបស់គណបក្សប្រជាជនកម្ពុជានៅសួនមុខវត្តបទុម ត្រូវបានបិទដោយនគរបាលតាមបញ្ជារបស់សាលារាជធានី ដែលបាននិយាយថា ការបិទផ្លូវនេះជាការចាំបាច់ ដើម្បីធានាសុវត្ថិភាពសាធារណៈ ដោយសារមានក្រុមអ្នកតវ៉ាមកពីសហគមន៍បឹងកក់បានព្យាយាមធ្វើបាតុកម្មនៅមុខភូមិគ្រឹះរបស់លោក ហ៊ុន សែន។
លោក ស្រេង បានមានប្រសាសន៍បន្តថា “ យើងបានបិទផ្លូវនេះ ពីព្រោះយើងបារម្ភអំពីបញ្ហាសន្តិសុខ ដោយសារតែអ្នកភូមិបឹងកក់ធ្វើការតវ៉ា” ដោយលោកបន្ថែមថា ផ្លូវនោះអាចនឹងបើកវិញនៅថ្ងៃនេះ។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតបានមានប្រសាសន៍ថា ការបិទផ្លូវដោយអ្នកគាំទ្រគណបក្សប្រជាជនកម្ពុជាគឺជាការខុសច្បាប់ ផ្ទុយពីមន្ត្រីក្រសួងមហាផ្ទៃ ដែលបាននិយាយថា សកម្មភាពបែបនោះអាចធ្វើបាន ប្រសិនបើមានការអនុញ្ញាតត្រឹមត្រូវ។ លោកបានមានប្រសាសន៍ថា “ គណបក្សនយោបាយនានាអាចបិទផ្លូវ ដើម្បីធ្វើយុទ្ធនាការឃោសនាបោះឆ្នោតបាន ប្រសិនបើពួកគេទទួលបានការអនុញ្ញាតពីអាជ្ញាធរពាក់ព័ន្ធ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ មានប្រសាសន៍ថា គណបក្សប្រជាជនកំពុងតែទទួលបានការជួយសម្របសម្រួលដើម្បីចូលទៅកាន់សួនមុខវត្តបទុម។ លោកបានមានប្រសាសន៍ថា “ អភិបាលរាជធានីគឺជាសមាជិកគណបក្សប្រជាជន។ ពួកគេគួរតែលៃទុករយៈពេល១៥ថ្ងៃឲ្យគណបក្សប្រជាជន និង១៥ថ្ងៃទៀតឲ្យគណបក្សសង្គ្រោះជាតិ [នៅសួនមុខវត្តបទុម] ប៉ុន្តែពួកគេមិនធ្វើដូចច្នេះទេ។ ពួកគេ [សាលារាជធានី] ដឹងកន្លែងល្អជាងគេសម្រាប់ការឃោសនាបោះឆ្នោត ហើយពួកគេគឺជាអ្នកសម្រេចផ្ដល់កន្លែង ព្រោះមានទំនាស់ផលប្រយោជន៍”។
យោងតាមលោក យឹម សុវណ្ណ ឲ្យដឹងថា គណៈកម្មាធិការរៀបចំការបោះឆ្នោតរាជធានីភ្នំពេញ កាលពីម្សិលមិញក៏បានជម្រាបគណបក្សសង្គ្រោះជាតិថា ខ្លួនត្រូវតែដោះស្លាកឃោសនារាប់រយដែលបិទនៅតាមបង្គោលភ្លើង និងបង្គោលខ្សែទូរស័ព្ទនៅទូទាំងរាជធានីភ្នំពេញចេញវិញ ដោយលើកឡើងថា ច្បាប់បោះឆ្នោតមិនអនុញ្ញាតឲ្យគណបក្សនយោបាយប្រើប្រាស់ទ្រព្យសម្បត្តិរដ្ឋក្នុងយុទ្ធនាការឃោសនារកសំឡេងឆ្នោតរបស់ខ្លួនឡើយ។
លោក យឹម សុវណ្ណ មានប្រសាសន៍បន្ដថា “ ឥឡូវនេះពួកគេ [គណៈកម្មាធិការរៀបចំការបោះឆ្នោតខេត្ត] បានបញ្ជាឲ្យយើងដោះស្លាកសញ្ញាឃោសនាដែលបានបិទនៅតាមបង្គោលភ្លើង។ ប៉ុន្តែក្រុមការងាររបស់យើងនៅរាជធានីភ្នំពេញមិនទាន់យល់ព្រមដោះស្លាកសញ្ញាទាំងនោះចេញទេ ដោយកត់សម្គាល់ថា គណបក្សប្រជាជនកម្ពុជាក៏មានដាក់ស្លាកសញ្ញារបស់ខ្លួន និងប័ណ្ណឃោសនាជាច្រើននៅលើបង្គោលភ្លើងតាមផ្លូវនានាក្នុងរាជាធានីភ្នំពេញដែរ”។ លោកថ្លែងបន្តទៀតថា “ គណបក្សប្រជាជនកម្ពុជាអាចធ្វើអ្វីបានតាមតែពួកគេចង់។
ពួកគេបិទប័ណ្ណឃោសនាស្លាកសញ្ញាគណបក្ស និងខិត្តប័ណ្ណរបស់ពួកគេនៅគ្រប់ទីកន្លែងទាំងអស់។ នៅពេលគណបក្សរបស់ខ្ញុំបិទប័ណ្ណឃោសនាលើបង្គោលភ្លើងតែពីរបីប៉ុណ្ណោះ ពួកគេបានបញ្ជាឲ្យយើងដោះចេញ”។
លោក ឡុង ឆេនកៃ ប្រធានគណៈកម្មាធិការរៀបចំការបោះឆ្នោតរាជធានី បដិសេធមិនធ្វើអត្ថាធិប្បាយអំពីការសម្រេចក្នុងរឿងនេះ និងការចោទប្រកាន់គណៈកម្មាធិការរបស់លោកថា មានការលម្អៀងផ្នែកនយោបាយនោះទេ។ លោកថ្លែងថា “ យើងបានប្រាប់គណបក្សទាំងអស់រួចហើយអំពីការសម្រេចរបស់យើង និងស្នើឲ្យពួកគេផ្ដល់ព័ត៌មានបន្ថែមទៀត”។
លោក យឹម សុវណ្ណ បានមានប្រសាសន៍ថា គណៈកម្មាធិការរៀបចំការបោះឆ្នោតនេះបានប្រាប់គណបក្សរបស់លោកថា ស្លាកសញ្ញារបស់ខ្លួនត្រូវតែដោះចេញ “ ដើម្បីធ្វើឲ្យទីក្រុងមានសោភ័ណភាព” ហើយថា សាលារាជធានីត្រូវប្រើបង្គោលភ្លើង ដើម្បីប្រារព្ធពិធីប្រចាំឆ្នាំលើកទី៥របស់ខ្លួន ដើម្បីអបអរសាទរការដាក់ប្រាសាទព្រះវិហារចូលជាសម្បត្តិបេតិកភណ្ឌពិភពលោក នៅថ្ងៃទី៧ ខែកក្កដា។ យុវជនគាំទ្រគណបក្សសង្គ្រោះជាតិរាប់រយនាក់បានប្រមូលផ្ដុំគ្នានៅមុខរដ្ឋសភាកាលពីម្សិលមិញ មុនពេលពួកគេបើកបរនៅទូទាំងរាជធានីដើម្បីបង្ហាញការគាំទ្ររបស់ខ្លួនចំពោះគណបក្សប្រឆាំង។
លោក ឃុត សំអុល អាយុ៣៣ឆ្នាំ ជាសមាជិកគណបក្សសង្គ្រោះជាតិម្នាក់ដែលបានជួូយរៀបចំការហែក្បួនកាលពីម្សិលមិញបានមានប្រសាសន៍ថា គណបក្សប្រឆាំងឥឡូវនេះកំពុងរៀបចំការហែក្បួនចល័ត ដើម្បីចៀសវាងការរំខាន និងការរឹតបន្តឹងរបស់សាលារាជធានីភ្នំពេញមកលើយុទ្ធនាការឃោសនារបស់ខ្លួន។
លោកបានបន្ថែមថា“ គណបក្សប្រជាជនកម្ពុជា ជាគណបក្សកំពុងកាន់អំណាច ដូច្នេះពួកគេអាចប្រើប្រាស់ទីកន្លែងសាធារណៈណាក៏បាន ឲ្យតែពួកគេចង់។ ឥឡូវនេះយើងមានគម្រោងហែក្បួនដើម្បីជួបគ្នានៅកន្លែងផ្សេងៗគ្នាជារៀងរាល់ថ្ងៃ ដូច្នេះពួកគេមិនអាចរំខានយើងបានទេ”៕
ប្រែសម្រួលដោយ ឃិន ណៃ