31 C
Phnom Penh

សាលា​​​​​​ដំបូង​​​រាជធានី​​​ចេញ​ដីកា​​​កោះ​ហៅ​លោក​​​ កឹម សុខា​​​​​​ ជា​លើក​ទី​៣​​ឲ្យ​បង្ហាញខ្លួន​នៅ​តុលាការ​

ដោយ ឌឹ ខេមបូឌា ដេលី

បទវិភាគ

សាលា​​​ដំបូង​​​រាជធានី​​​ភ្នំពេញ​​​បាន​​​ចេញ​ដីកា​​​កោះ​​ហៅ​​​លោក​​​ កឹម សុខា មេដឹកនាំ​​​គណ​បក្ស​​​​ប្រឆាំង​​​ជាលើកទី៣ កាល​​​ពីម្សិល​​​មិញ​​​ជុំវិញ​ការ​​​ចោទ​​​ប្រកាន់​​​​ចំពោះ​ពាក្យ​សម្តី​ដែល​​​​លោក​​​​បាន​​​អះអាងថា វៀតណាម​​​បានប្រឌិត​​​​ការ​សម្លាប់​​ប្រជាពលរដ្ឋ​​​រាប់​​​ពាន់នាក់​​​ដោយ​​​របប​​​ខ្មែរ​​​ក្រហម​​​នៅ​​​គុក​​​ទួលស្លែង​​​។

លោក កឹម សុខា​​​ ប្រធានស្តីទី​​​​គណបក្ស​​​​សង្គ្រោះជាតិ​​​ ជា​​​គូប្រជែង​​​ដ៏​​​សំខាន់​​​របស់​​​លោក នាយករដ្ឋមន្ត្រី ហ៊ុន សែន​​​ នៅក្នុង​​​ការ​​​បោះឆ្នោតជាតិ​​​នៅថ្ងៃទី​​​២៨ខែកក្កដា​​​ខាង​មុខ​នេះ មិនអាច​​​ទាក់ទង​​​សុំ​ការ​អត្ថាធិប្បាយ​​​បានទេ​​​។ ប៉ុន្តែ​​​អ្នក​​​នាំ​​​ពាក្យ​​​របស់​​​គណបក្ស​​​សង្គ្រោះជាតិ​​​បាន​​​មាន​​​ប្រសាសន៍ថា លោក​​​កឹម សុខា​​​ មិនបាន​​​ទទួល​​​ដីកាកោះ​​​ទាំងនេះ​​​ទេ​​​និង​​​មិនបាន​​​​​​ទៅ​​​តុលាការ​​​ឆ្លើយបំភ្លឺ​ចំពោះ​​​ការ​​​ចោទ​​​ប្រកាន់​​​​​ទាំង​​​​នេះ​​ទេកាល​​​ពីថ្ងៃសុក្រ​​​។

លោក យែម បុញ្ញារិទ្ធ បានមាន​​​ប្រសាសន៍​ថា “ មន្ត្រីរបស់​​​យើង​​​បាន​​​ទទួល ​​​[ដីកាកោះ​]​ពីព្រោះលោកប្រធាន​ កឹម សុខា​​​ ស្ថិត​​​នៅ​ក្នុង​​​​តំបន់​​​ជនបទ​​​”។ លោក យែម ​បុញ្ញារិទ្ធ បាន​​​មាន​​​ប្រសាសន៍​​ថា “ លោកប្រធាន​ កឹម សុខា មិនបាន​​​បង្ហាញ​ខ្លួន​នៅ​តុលាការ​ដើម្បី​​​ឆ្លើយ​​​បំភ្លឺ​​​ការ​​​ចោទ​​​ប្រកាន់​​​ទាំង​​​​នេះ​​​ទេ​​​ ពីព្រោះលោកជាប់រវល់​​​នៅ​ក្នុង​​​​យុទ្ធនាការ​​​ឃោសនា​​​បោះឆ្នោត​​​។ ​តុលា​ការ​កោះហៅ​​​ដើម្បី​​​រំខាន​​​ដល់ការ​​​ធ្វើ​យុទ្ធ​នា​ការ​​ឃោស​​​នា​​​​បោះឆ្នោតរបស់យើង​​​។ មាន​បណ្តឹង​​​​ជាច្រើន​​​ដែលតុលាការ​​​មិនបាន​​​ចាត់​​​ការ​​​។ ហេតុអ្វី​​​តុលាការ​​​ប្រញាប់​​​ចាត់​​​ការ​​​សំណុំ​រឿង​​​របស់លោក កឹម សុខា?​​”។

អ្នករស់រានមានជីវិតបួន​នាក់​​​ពីគុក​​​ទួល​​​ស្លែង​​​​​​​​​​​ បានដាក់ពាក្យបណ្តឹងមួយ​​​ប្តឹង​​​លោក​​​កឹម សុខា ពីបទ​​​បរិហារកេរ្តិ៍​​​កាល​​​ពីខែមុន​​​ជុំវិញ​​​​ពាក្យ​សម្តី​​ដែល​គេ​ចោទ​ថា​ លោក​​ជា​អ្នក​និយាយ​​​​​​​​។

លោក កឹម ​សុខា បាន​​​ច្រាន​​​ចោល​​ការ​អះអាង​ទាំងនេះ​​​ដោយ​​​ចោទ​​​ប្រកាន់​​​គណ​បក្ស​​​​ប្រជាជនកម្ពុជារបស់​​​លោក ហ៊ុន​ សែន ថា​ បាន​កាត់​​ត​ខ្សែ​អាត់​សំឡេង​របស់លោក​​​។ ​គណបក្ស​​​ប្រឆាំង​​​ក៏បាន​​​ចោទប្រកាន់​​​គណ​បក្ស​​​​ប្រជាជន​​​កម្ពុជាផងដែរ​​​​ថា​បាន​ជំរុញ​ឲ្យ​ដើម​បណ្តឹង​ទាំង​នេះ​​ប្តឹង​ទៅ​តុលាការ​។

សមាជិក​​​​នៅ​​​ទីស្នាក់ការកណ្តាល​​​របស់​​​គណបក្ស​​​សង្គ្រោះ​​​ជាតិ​​​បាន​​​បដិសេធ​​​កាល​​​ពីខែមុន​​​មិន​​​ទទួលដីកា​​​កោះលើកទី១​​​របស់​តុលាការនេះទេ ពីព្រោះលោក កឹម សុខា​​​ស្ថិតនៅបរទេស​​​នៅពេល​​​នោះ​​​។

លោក ជូង ជូងី​​​ មេធាវី​​​របស់លោក​ កឹម ​សុខា​​​ ​ដែលបាន​​​ស្នើសុំ​​​ពន្យារពេល​​​​​សាក​​​សួរ​កូនក្តី​​​របស់​​​លោក​​​ ដែលត្រូវបាន​​​កោះ​​​ជា​លើកទី២កាលពីថ្ងៃទី​​​២៧ ខែ​មិថុនា​​​នោះ​​​​​​​​​បាន​​​យល់​​​ស្របថា តុលាការ​​​ហាក់ដូច​​​ជា​ប្រញាប​់​​​​ប្រញាល់​​​ចាត់​ការ​​​​សំណុំ​​​រឿង​​​​​កូន​​​ក្តី​​​របស់​​​លោក។

លោកបាន​​​មាន​​​ប្រសាសន៍ថា “ តុលា​​​ការ​​​ទើប​​​​តែ​​ចេញ​​​​ដីកាកោះ​​​នេះ​​​នៅថ្ងៃនេះ​​​ និង​បាន​​​សុំឲ្យលោក កឹម សុខា ទៅ​​​តុលា​​​ការ​​​នៅ​ថ្ងៃទី៥ខែកក្កដា​​​។​​​វា​​​មាន​​​រយៈ​​​ពេល​​​ខ្លី​ណាស់​”​​។ លោក ជូង ជូងី បាន​​​មាន​​​ប្រសាស​​​ន៍​​​ថា “ តាមធម្មតា​​​ គួរតែមានរយៈពេល​​​ពីរសប្តាហ៍​​​សម្រាប់​ទៅតុលាការ​​”។

លោកមាន​​​ប្រសាសន៍​​​បន្ថែមថា “ ខ្ញុំមិន​​​ដឹងច្បាស់ទេ​​​ថា តើ​​​លោក​​​​​​ កឹម សុខា​​​ នឹងទៅ​​​តុលាការ​​​ឬក៏មិនទៅនោះទេ​​​​ ពី​​​ព្រោះ​​​លោក ​ជាប់​​​​​​រវល់​​​ក្នុង​​​យុទ្ធនាការ​​​ឃោសនា​​​បោះ​​​ឆ្នោត​​​​។​​​ខ្ញុំនឹងពិភាក្សា​​​​​​បញ្ហានេះ​​​ជាមួយនឹង​​​គាត់​”។

លោក មាស ច័ន្ទពិសិដ្ឋ ព្រះរាជអាជ្ញា​​​រង​​​អម​​​សាលាដំបូងរាជធានី​​​ ដែល​​​ចេញ​​​ដីកា​កោះនេះ​​​​កំពុង​កាន់សំណុំ​រឿងនេះ​​ និង​​បាន​សាកសួរ​​​ដើមបណ្តឹង​​​ចំនួនបួននាក់​​នៅ​​​ក្នុង​​​​សំណុំ​រឿង​នេះ​​​កាលពីសប្តាហ៍មុន​​​៕​​​​​​​​

ប្រែសម្រួលដោយ ស៊ុំ សុខភុំ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស