យោងតាមក្រុមហ៊ុនអាកាសយានដ្ឋានកម្ពុជា ជាក្រុមហ៊ុនដែលគ្រប់គ្រងអាកាសយានដ្ឋានទាំងបីក្រោមកិច្ចព្រមព្រៀងសម្បទានជាមួយរដ្ឋាភិបាលបានឲ្យដឹងថា អ្នកធ្វើដំណើរតាមអាកាសយានដ្ឋានទាំងបីនៅប្រទេសកម្ពុជាមានការកើនឡើងយ៉ាងលឿនក្នុងរយៈពេលប្រាំមួយខែដំបូងនៃឆ្នាំនេះទាំងនៅអាកាសយានដ្ឋានអន្តរជាតិភ្នំពេញ ខេត្តសៀមរាប និងខេត្តព្រះសីហនុ ។
លោក ខែក នរិនដា មន្ត្រីទំនាក់ទំនងនៅក្រុមហ៊ុនអាកាសយានដ្ឋានកម្ពុជាបានមានប្រសាសន៍ថា អាកាសយានដ្ឋានអន្តរជាតិខេត្តសៀមរាប ដែលបម្រើតែភ្ញៀវទេសចរណ៍ទៅកាន់ប្រាសាទអង្គរ មានភ្ញៀវទេសចរចំនួន១,២លាននាក់ចាប់ពីថ្ងៃទី១ខែមករា ដល់ថ្ងៃទី១ខែកក្កដា ឆ្នាំ២០១៣ គឺកើនឡើងចំនួន២៣ភាគរយបើធៀបនឹងរយៈពេលដូចគ្នាកាលពីឆ្នាំ២០១២។
លោកថ្លែងបន្តថា អាកាសយានដ្ឋានអន្តរជាតិភ្នំពេញមានកំណើនអ្នកធ្វើដំណើរ១៦ភាគរយក្នុងរយៈពេលដូចគ្នាគឺមានអ្នកធ្វើដំណើរចំនួន១,៤លាននាក់តាមអាកាសយានដ្ឋាននេះក្នុងរយៈពេលប្រាំមួយខែដំបូងក្នុងឆ្នាំនេះ។ យោងតាមតួលេខនោះបានឲ្យដឹងថា អាកាសយានដ្ឋានខេត្តព្រះសីហនុ ដែលមានទំហំតូចជាង ហើយបម្រើតែការហោះហើរក្នុងស្រុករបស់ក្រុមហ៊ុនអង្គរអ៊ែរកម្ពុជា(Cambodia Angkor Air) មានអ្នកធ្វើដំណើរចំនួន៨.០០០នាក់ក្នុងរយៈពេលប្រាំមួយខែដំបូងនៃឆ្នាំ២០១៣ គឺកើនឡើងចំនួន៣២ភាគរយបើធៀបទៅនឹងឆ្នាំមុន។
លោក ខែក នរិនដា មានប្រសាសន៍បន្តថាខណៈពេលមានកំណើនអ្នកធ្វើដំណើរនៅខេត្តសៀមរាប និងខេត្តព្រះសីហនុ បានឆ្លុះបញ្ចាំងពីកំណើនភ្ញៀវទេសចរនៅទូទាំងប្រទេស ហើយភ្ញៀវទេសចរមួយចំនួនទៀតបានធ្វើដំណើរមកកាន់រាជធានីភ្នំពេញ ភាគច្រើនគឺជាអ្នកជំនួញ។
លោកបានថ្លែងបន្តថា“ ខ្ញុំគិតថា [អ្នកធ្វើដំណើរមករាជធានីភ្នំពេញកើនឡើង] គឺដោយសារតែឱកាសធ្វើជំនួញនៅរាជធានី។ អ្នកធ្វើដំណើរមកកាន់រាជធានីភ្នំពេញកាន់តែច្រើនឡើងៗ ដើម្បីសម្លឹងរកឱកាសធ្វើជំនួញ”។
អ្នកវិនិយោគមានជំនឿលើវិស័យសេដ្ឋកិច្ចគឺផ្អែកលើកំណើនវិជ្ជមានក្នុងរយៈពេលប៉ុន្មានឆ្នាំថ្មីៗនេះ។ យោងតាមតួលេខរបស់រដ្ឋាភិបាលបានឲ្យដឹងថា កំណើនផលិតផលក្នុងស្រុកសរុបរបស់ប្រទេសកម្ពុជាបានកើនឡើងចំនួន៧,៣ភាគរយក្នុងឆ្នាំ២០១២ ហើយនៅក្នុងឆ្នាំ២០១៣នេះរំពឹងថា នឹងមានកំណើនដូចគ្នានេះដែរ។
កាលពីដើមឆ្នាំនេះ ក្រុមហ៊ុនរ៉ូយ៉ាល់គ្រុបរបស់លោក គិត ម៉េង ជាអ្នកជំនួញក្នុងស្រុកបានចុះកិច្ចព្រមព្រៀងជាមួយសាជីវកម្មសានមីហ្គែល (San Miguel Corporation) ដែលគ្រប់គ្រងភាគហ៊ុនរបស់ក្រុមហ៊ុនអាកាសចរណ៍ហ្វីលីពីន(Philippines Airlines) ដើម្បីបង្កើតក្រុមហ៊ុនរកស៊ីរួមគ្នាមួយមានឈ្មោះថាក្រុមហ៊ុនអាកាសចរណ៍កម្ពុជា(Cambodia Airlines)។
លោក ម៉ាក ហាណា មន្រ្តីហិរញ្ញវត្ថុប្រចាំក្រុមហ៊ុនរ៉ូយ៉ាល់គ្រុប បានមានប្រសាសន៍កាលពីម្សិលមិញថា មិនទាន់កំណត់ថ្ងៃសម្រាប់ដំណើរការក្រុមហ៊ុនអាកាសចរនៅឡើយទេ ប៉ុន្តែ ទោះជាយ៉ាងណាលោកសង្ឃឹមថា ការហោះហើរនឹងចាប់ផ្ដើមក្នុងរយៈពេលប៉ុន្មានខែខាងមុខនេះ។ លោកបន្តថា តួលេខអ្នកធ្វើដំណើរបានឆ្លុះបញ្ចាំងពីកំណើនចរាចរណ៏តាមផ្លូវអាកាសក្នុងប្រទេសកម្ពុជា ដែលក្រុមហ៊ុនអាកាសចរណ៍កម្ពុជា នឹងរំពឹងថា មានការរីកចម្រើនជាពុំខាន។ លោកថ្លែងបន្ថែមថា “ ដោយសារវិស័យទេសចរណ៍មានការកើនឡើងនៅក្នុងប្រទេសកម្ពុជានោះនឹងមានការហោះហើរមកកាន់ប្រទេសនេះកាន់តែច្រើន”៕
ប្រែសម្រួលដោយ ឃិន ណៃ