អ្នកនាំពាក្យសាលាក្តីខ្មែរក្រហមបានមានប្រសាសន៍កាលពីម្សិលមិញថា បុគ្គលិកជាង១០ភាគរយនៅសាលាក្តីខ្មែរក្រហមមិនទាន់ទទួលបានកិច្ចសន្យាការងាររបស់ពួកគេជាថ្មីទេ កាលពីថ្ងៃច័ន្ទ ខណៈពេលសាលាក្តីនេះព្យាយាមកាត់បន្ថយការចំណាយ និងសន្សំថវិកាឲ្យបាន១លានដុល្លារដោយសារខ្វះមូលនិធិសម្រាប់ភាគីជាតិ។
លោក នេត ភក្ត្រា មានប្រសាសន៍ថា ការកាត់បន្ថយនេះប៉ះពាល់ដល់បុគ្គលិកចំនួន៣០នាក់ ក្នុងចំណោមបុគ្គលិកជាតិចំនួន២៦០នាក់ សម្រាប់ “ ដំណើរការធម្មតា” ហើយសាលាក្តីនេះ“ កំពុងពិនិត្យមើលតម្រូវ ការបុគ្គលិករបស់ខ្លួនជាទៀងទាត់” ដើម្បីធានាថា សាលាក្តីនេះនៅតែមាន ថវិកាចំណាយគ្រប់គ្រាន់។
លោក នេត ភក្ត្រា បានមានប្រសាសន៍បន្តថា “ ការរៀបចំបុគ្គលិកជាថ្មីនេះ បានប៉ះពាល់គ្រប់ផ្នែកទាំងអស់[នៃសាលាក្តីខ្មែរក្រហម] ដោយលោកបន្ថែមថា ការសម្រេចចិត្តដើម្បីកាត់បន្ថយបុគ្គលិកនេះ គឺជាផ្នែកមួយដើម្បីត្រួតពិនិត្យលើគម្រោងថវិកាឡើងវិញ និងដោយសារកង្វះមូលនិធិសម្រាប់បុគ្គលិកជាតិ។
លោក ភក្ត្រា ថ្លែងបន្តថា “ ដូច្នេះយើងត្រូវតែធ្វើកំណែទម្រង់ពីរចនាសម្ព័ន្ធដែលមានបុគ្គលិកច្រើនមករចនាសម្ព័ន្ធដែលមានបុគ្គលិកល្មមធ្វើការ និងចំណាយថវិកាតិច។ ចំនួនជនជាប់ចោទត្រូវបានកាត់បន្ថយ បន្ទាប់ពីការស្លាប់របស់ អៀង សារី ហើយ អៀង ធីរិទ្ធ ត្រូវបានតុលាការនេះប្រកាសថា មិនអាចនាំយកមកជំនុំជម្រះបាន ហើយសំណុំរឿង០០១ ក៏បានបញ្ចប់ផងដែរ។
លោកថ្លែងបន្តទៀតថា “ ផ្នែករដ្ឋបាលមានកាតព្វកិច្ចធានាឲ្យមានសេវាកម្មតិចសម្រាប់សាលាក្តីខ្មែរក្រហម។ ដោយមានការពិនិត្យមើលបុគ្គលិករបស់ខ្លួនឡើងវិញនោះ ភាគីជាតិ អាចសន្សំថវិកាបានចំនួន១លានដុល្លារ ពីគម្រោងថវិកាសម្រាប់ឆ្នាំ២០១៣របស់ខ្លួន”។
បុគ្គលិកភាគច្រើនដែលមិនត្រូវបានបន្តកិច្ចសន្យាគឺបុគ្គលិកដែលធ្វើការក្នុងផ្នែកសេវាកម្មទូទៅរបស់សាលាក្តីនេះ រួមមានអ្នកបើកបររថយន្ត និងអ្នកអនាម័យ។ បុគ្គលិកផ្នែកកិច្ចការសាធារណៈ និងបុគ្គលិកនៅអង្គភាពបកប្រែភាសា ក៏រងការប៉ះពាល់ផងដែរ។
ការសម្រេចចិត្តនេះ គឺជាព្រឹត្តិការណ៍ចុងក្រោយបំផុត ឆ្លុះបញ្ចាំងពីកង្វះថវិកាសម្រាប់ភាគីខ្មែរនៅសាលាក្តីកូនកាត់នេះ។ ក្រុមអ្នកសង្កេតការណ៍របស់សាលាក្តីខ្មែរក្រហមបានលើកឡើងថា ប្រទេសផ្សេងៗទៀតនៅស្ទាក់ស្ទើរមិនផ្តល់ថវិកាបន្ថែមទៀតមកឲ្យភាគីខ្មែរទេ ដោយសារតែមានការចោទប្រកាន់មួយចំនួនពាក់ព័ន្ធនឹងអំពើពុករលួយ និងការជ្រៀតជ្រែកផ្នែកនយោបាយមកលើដំណើរការនៃសាលាក្តីឧក្រិដ្ឋកម្មសង្គ្រាមនេះ។
បញ្ហាដែលកាន់តែធ្ងន់ធ្ងរសម្រាប់ភាគីជាតិទៅទៀតនោះ គឺមិនមានថវិកានៅសល់សម្រាប់បើកប្រាក់ខែឲ្យបុគ្គលិកដែលនៅធ្វើការក្នុងសាលាក្តីសម្រាប់ខែមិថុនា នេះឡើយ។
លោក ភក្ត្រា បានលើកឡើងតាមអីុម៉េលថា “ កង្វះថវិកានេះគឺចាប់ពីខែឧសភា រហូតដល់ចុងឆ្នាំ២០១៣ គឺមានចំនួន៣,៤លានដុល្លារ [គម្រោងថវិកាដែលបានអនុម័តសម្រាប់ឆ្នាំ២០១៣ គឺមានចំនួន៩,៤លានដុល្លារ] សម្រាប់ភាគីជាតិនៅសាលាក្តីខ្មែរក្រហម”។
បុគ្គលិកម្នាក់នៅសាលាក្តីខ្មែរក្រហមដែលមិនបញ្ចេញឈ្មោះដោយភ័យខ្លាចមានការធ្វើបាបបានមានប្រសាសន៍កាលពីម្សិលមិញថា បុគ្គលិកខ្លះក្នុងចំណោមបុគ្គលិកដែលត្រូវគេកាត់បន្ថយនោះមិនសប្បាយចិត្តក្នុងការចាកចេញពីសាលាក្តីខ្មែរក្រហមទេ ព្រោះពួកគេដឹងថា ពួកគេនៅតែអាចធ្វើការបានល្អនៅក្នុងសាលាក្តីនេះ”។
បុគ្គលិករូបនេះបន្តថា “ ខ្ញុំគិតថា បរិយាកាសនៅតុលាការនេះមិនល្អទេ។វាអាក្រក់ណាស់ ពីព្រោះនៅចុងខែនីមួយៗយើងតែងតែសួរគ្នាថា តើនៅពេលណា ទើបយើងបើកប្រាក់ខែ ហើយឥឡូវនេះ យើងបែរជាទទួលបានសេចក្តីជូនដំណឹងពីការិយាល័យរដ្ឋបាល ប្រាប់ពួកយើងថា បុគ្គលិកទាំងអស់មិនទទួលបានប្រាក់ខែសម្រាប់ខែមិថុនា នេះទៅវិញ ពីព្រោះតុលាការមិនមានថវិកាគ្រប់គ្រាន់សម្រាប់បើកប្រាក់ខែទេ។
កាលពីខែមីនា បុគ្គលិកមកពីអង្គភាពបកប្រែភាសាបានធ្វើកូដកម្មរយៈពេលមួយសប្តាហ៍ បន្ទាប់ពីពួកគេគំរាមធ្វើកូដកម្មរយៈពេលបីខែរួចមកនិងបន្ទាប់ពីពួកគេមិនទទួលបានប្រាក់ខែ សម្រាប់ខែធ្នូ មករា និងខែកុម្ភៈ ព្រមទាំងពួកគេបានធ្វើការដោយមិនមានកិច្ចសន្យាការងារចាប់តាំងពីដើមឆ្នាំនេះមក។
ប៉ុន្តែបុគ្គលិករូបនេះបាននិយាយកាលពីម្សិលមិញថា បរាជ័យនេះ មិនមែនដោយសារការធ្វើកូដកម្មទេ ហើយថា ជម្រើសគឺមានកំណត់ គឺអ្វីដែលបុគ្គលិកឥឡូវនេះអាចធ្វើបាននោះ គឺធានាថា ពួកគេអាចទទួលបានប្រាក់ខែ។ បុគ្គលិកនោះថ្លែងបន្តថា “ ខ្ញុំគិតថា បុគ្គលិកភាគច្រើនហាក់បីដូចជាខកចិត្តជាមួយនឹងគំនិតនេះ ប៉ុន្តែ ចំណុចដែលនាំឲ្យពួកគេធ្វើកូដកម្មនោះ គឺដើម្បីលើកឡើងពីកង្វល់របស់ពួកគេ ប៉ុន្តែបញ្ហាដដែលនេះបានកើតឡើងម្តងទៀត ហើយបានបញ្ជាក់ថា ការធ្វើកូដកម្មមិនអាចដោះស្រាយបញ្ហាបានឡើយ”។
វិបត្តិប្រាក់ខែត្រូវបានដោះស្រាយរួចហើយកាលពីចុងខែមីនា នៅពេលលោក ដាវីដ សេហ្វហ្វឺ (David Scheffer) អ្នកជំនាញពិសេសអង្គការសហប្រជាជាតិ ប្រចាំសាលាក្តីខ្មែក្រហម បានធានាចំពោះថវិកាសម្រាប់ភាគីជាតិ។
លោក ឡុង បញ្ញាវុធ ប្រធានកម្មវិធីសម្រាប់អង្គការគំនិតផ្តួចផ្តើមយុត្តិធម៌កម្ពុជា ជាអង្គការឃ្លាំមើលសាលាក្តីខ្មែរក្រហមនេះបានលើកឡើងថា លោកបានយល់អំពីតម្រូវការនៃការកាត់បន្ថយបុគ្គលិកមួយចំនួន បន្ទាប់ពីសំណុំរឿង០០១ត្រូវបានបញ្ចប់ ហើយ អៀង សារី បានស្លាប់ និង អៀង ធីរិទ្ធ ត្រូវបានតុលាការប្រកាសថា មិនអាចនាំមកធ្វើការជំនុំជម្រះបាននោះ។
លោកថ្លែងបន្តថា “ នេះគឺជាពេលត្រឹមត្រូវ ដើម្បីធ្វើកំណែទម្រង់បុគ្គលិកដែលមិនចាំបាច់។ ការិយាល័យខ្លះគឺមិនបានបំពេញការងារពេញលេញទេ ដូចជា សាលាដំបូង និងតុលាការកំពូលនៃសាលាក្តីខ្មែរក្រហម។ ប៉ុន្តែ បុគ្គលិកខ្លះជាបុគ្គលិកសំខាន់ សម្រាប់ដំណើរការសាលាក្តី គឺអាចបន្តការងារបានដូចជា សំណុំរឿង០០២ គឺចាំបាច់ត្រូវការបុគ្គលិកផ្នែកបកប្រែភាសា ដើម្បីបើកសវនាការ ដោយគ្មានការពន្យារពេល។ ម៉្យាងវិញទៀត លោក ឡុង បញ្ញាវុធ បានបន្តថាកង្វះថវិកានេះទំនងជាកើតឡើងបន្តទៀត ដោយសារពុំមានកម្មវិធីច្បាស់លាស់សម្រាប់បើកសវនាការសំណុំរឿង០០២ ដែលរួមមានការបើកសវនាការតូចៗ ដែលនឹងត្រូវបញ្ចប់នោះ៕
ប្រែសម្រួលដោយ ឃិន ណៃ