គណបក្សហ្វ៊ិនស៊ិនប៉ិច បានជួបបញ្ហាជាច្រើនក្នុងរយៈពេលពីរទសវត្សរ៍នេះ។ បង្កើតឡើងក្នុងឆ្នាំ១៩៨១ដោយព្រះបាទ នរោត្តម សីហនុ ដែលនិរទេសព្រះកាយនាពេលនោះគណបក្សរាជានិយមដឹកនាំដោយបុត្រារបស់ព្រះបាទ នរោត្តម សីហនុ គឺព្រះអង្គម្ចាស់ នរោត្តម រណឫទ្ធិ នេះ បានឈ្នះការបោះឆ្នោតតាមបែបប្រជាធិបតេយ្យលើកដំបូងក្នុងប្រទេសកម្ពុជានៅក្នុងឆ្នាំ១៩៩៣។
ប៉ុន្តែ ត្រូវបានបង្ខំឲ្យចែករំលែកអំណាចជាមួយគណបក្សប្រជាជនកម្ពុជា និងលោក ហ៊ុន សែន ដែលពេលនោះគឺជានាយករដ្ឋមន្ត្រីទី២រយៈពេលបួនឆ្នាំក្រោយមក កងទ័ពរបស់គណបក្សហ៊្វុនស៊ិនប៉ិច បានទទួលបរាជ័យក្នុងការប្រយុទ្ធគ្នាយ៉ាងខ្លាំងក្នុងរាជធានីភ្នំពេញជាមួយកងកម្លាំងដែលមានភក្តីភាពចំពោះលោក ហ៊ុន សែន ដោយការប្រយុទ្ធគ្នានេះបានឈានដល់ការបណ្តេញព្រះអង្គម្ចាស់ នរោត្តម រណឫទ្ធិ ចេញពីតំណែងជានាយករដ្ឋមន្ត្រីទី១។ គណបក្សប្រជាជនកម្ពុជា បានឈ្នះការបោះឆ្នោតយ៉ាងងាយស្រួលនៅក្នុងឆ្នាំ១៩៩៨ ដោយទទួលបាន៦៤អាសនៈ ខណៈគណបក្សហ្វ៊ិនស៊ិនប៉ិចទទួលបាន៤៣អាសនៈ។
នៅក្នុងការបោះឆ្នោតជាតិនីមួយៗចាប់តាំងពីពេលនោះមក គណបក្សហ្វ៊ិនស៊ីនប៉ិចបានបន្តបាត់បង់ប្រជាប្រិយភាពរបស់ខ្លួនក្នុងចំណោមប្រជាពលរដ្ឋកម្ពុជា។ គណបក្សនេះបានទទួលបរាជ័យធំបំផុតក្នុងការបោះឆ្នោតជាតិកាលពីប្រាំឆ្នាំមុន ពេលខ្លួនបាត់បង់អាសនៈចំនួន២៤ក្នុងចំណោម២៦អាសនៈធ្វើឲ្យខ្លួននៅសល់តំណាងរាស្ត្រត្រឹមតែពីររូបប៉ុណ្ណោះនៅរដ្ឋសភាដែលមាន១២៣អាសនៈ។
ប៉ុន្តែ គណបក្សហ្វ៊ិនស៊ិនប៉ិចនៅតែខិតខំពុះពារទាំងត្រដរ។
ជាការចាប់ផ្តើមយុទ្ធនាការឃោសនាបោះឆ្នោតនៅក្នុងរាជធានីភ្នំពេញកាលពីម្សិលមិញ អ្នកគាំទ្ររាប់ពាន់នាក់ ដែលពាក់អាវពណ៌លឿងនិងខៀវបាននាំគ្នាដង្ហែក្បួនពេញរាជធានី។
អ្នកគាំទ្រទាំងនេះរួមមានអ្នករាជានិយមវ័យកណ្តាលរាប់រយនាក់ ដែលមានការចូលរួមពីអ្នកបោះឆ្នោតវ័យក្មេងក្នុងចំនួនស្មើគ្នា។ពួកគេស្ទើរតែទាំងអស់បាននិយាយស្របគ្នាថា ខ្លួនគាំទ្រគណបក្សហ្វ៊ិនស៊ិនប៉ិច ដោយសារតែការស្រឡាញ់ចូលចិត្តព្រះបរមសព នរោត្តម សីហនុ និងការគោរពស្រឡាញ់របបរាជានិយម។
លោក ទូច គឹមហេង អភិបាលរងខណ្ឌឫស្សីកែវ ដែលអះអាងថា ខ្លួនជាសមាជិកស្មោះស្ម័គ្ររបស់គណបក្សនេះ ចាប់តាំងពីឆ្នាំ១៩៩៣មកនោះ បានមានប្រសាសន៍ថា “ ហ្វ៊ិនស៊ិនប៉ិច បាននាំអ្វីៗគ្រប់យ៉ាងចូលមកក្នុងប្រទេសនេះ ក្នុងនោះមានចាប់ពីភ្លេងជាតិ រហូតដល់ទង់ជាតិ។ ហ្វ៊ិនស៊ិនប៉ិច គ្មានថ្ងៃសាបសូន្យឡើយ”។
ទោះជាយ៉ាងណា គណបក្សនេះបានបន្តប្រឈមនឹងបញ្ហាជាច្រើនក្នុងរយៈពេលជាច្រើនឆ្នាំមកនេះ។ កាលពីឆ្នាំ២០០៦ ព្រះអង្គម្ចាស់ នរោត្តម រណឫទ្ធិ ត្រូវបានបណ្តេញចេញពីតំណែងជាប្រធានគណបក្សហ្វុនស៊ិនប៉ិច ហើយក្រោយមកបានចាប់ផ្តើមបង្កើតគណបក្សមួយដោយដាក់ឈ្មោះតាមព្រះនាមព្រះអង្គឯងផ្ទាល់ ដោយទទួលបាន២អាសនៈ នៅរដ្ឋសភាក្នុងការបោះឆ្នោតឆ្នាំ២០០៨។ អ្នករាជានិយមទាំងនេះត្រូវបានច្របាច់បញ្ចូលគ្នាជាថ្មីម្តងទៀតកាលពីដើមឆ្នាំនេះ ក្រោមស្លាកគណបក្សហ្វ៊ិនស៊ិនប៉ិច។
ដោយសារព្រះអង្គម្ចាស់ នរោត្តម រណឫទ្ធិ បានដកព្រះកាយចេញពីឆាកនយោបាយទៅហើយនោះ អ្នកអង្គម្ចាស់ក្សត្រិយ៍ នរោត្តម អរុណរស្មី បុត្រីព្រះជន្ម៥៧ព្រះវស្សារបស់ព្រះបរមសពសម្តេចឪ និងជាអតីតឯកអគ្គរាជទូតកម្ពុជាប្រចាំប្រទេសម៉ាឡេស៊ី គឺជាមុខមាត់ថ្មីរបស់គណបក្សនេះចាប់តាំងពីទ្រង់ត្រូវបានបោះឆ្នោតជ្រើសតាំងជាបេក្ខជននាយករដ្ឋមន្ត្រីរបស់គណបក្សហ្វ៊ិនស៊ិនប៉ិចអំឡុងសមាជបក្សក្នុងខែឧសភាមក។
អ្នកស្រី ហេង លី អាយុ៣២ឆ្នាំ ដែលបានចូលរួមក្នុងយុទ្ធនាការឃោសនា កាលពីម្សិលមិញនេះ បាននិយាយថា ការតែងតាំងអ្នកអង្គម្ចាស់ក្សត្រិយ៍ នរោត្តម អរុណរស្មី បានធ្វើឲ្យអ្នកស្រីមានការជឿជាក់លើគណបក្សនេះឡើងវិញ។ អ្នកស្រីនិយាយថា“ ខ្ញុំគិតថា អ្នកអង្គម្ចាស់ស្រឡាញ់ប្រជារាស្ត្រខ្លាំងដូចអតីតព្រះមហាក្សត្រ [សីហនុ] ដែរ។ យើងស្រឡាញ់អតីតព្រះមហាក្សត្រ”។ អ្នកស្រីបានបន្តថា ខ្លួនមានមោទនភាពណាស់ដែលបានឃើញស្ត្រីដឹកនាំគណបក្សនៅក្នុងបរិយាសនយោបាយមួយដែលគ្របដណ្តប់ដោយបុរសៗ។
ទោះជាយ៉ាងណា អំណាចភាគច្រើននៅក្នុងគណបក្សនេះនៅតែបន្តស្ថិតនៅក្រោមការគ្រប់គ្រងរបស់លោក ញឹក ប៊ុនឆៃ អគ្គលេខាធិការគណបក្ស ដែលបានដឹកនាំកងកម្លាំងរាជានិយមប្រយុទ្ធគ្នា ជាមួយកងទ័ពដែលមានភក្តីភាពចំពោះលោក ហ៊ុន សែន ក្នុងឆ្នាំ១៩៩៧។ បច្ចុប្បន្ននេះ លោក ញឹក ប៊ុនឆៃ គឺជាអ្នកគាំទ្រឥតងាករេម្នាក់របស់លោក ហ៊ុន សែន ដោយលោកមានឋានៈជាសមាជិកសភាផង និងជាឧបនាយករដ្ឋមន្ត្រីផង។
ធ្លាប់ជាគ្រោះគំរាមកំហែងចំពោះអំណាចរបស់លោក ហ៊ុន សែន និងគណបក្សប្រជាជនកម្ពុជា គណបក្សហ្វ៊ិនស៊ិនប៉ិច បានឆ្លងកាត់ការផ្លាស់ប្តូរច្រើនណាស់ក្នុងរយៈពេល១៦ឆ្នាំចុងក្រោយនេះ។ សម្រាប់ព្រះអង្គម្ចាស់ ស៊ីសុវត្ថិ សិរីរ័ត្ន សមាជិកស្ថាបនិករបស់គណបក្សហ្វ៊ិនស៊ីនប៉ិច និងជាអតីតឯកអគ្គរាជទូតកម្ពុជាប្រចាំអង្គការសហប្រជាជាតិ ក្នុងសម័យសង្គមរាស្ត្រនិយមរបស់ព្រះអង្គម្ចាស់ នរោត្តម សីហនុ អំឡុងទសវត្សរ៍១៩៥០ និងទសវត្សរ៍១៩៦០វិញ គណបក្សហ្វ៊ិនស៊ិនប៉ិច ពេលនេះបានក្លាយជា គណបក្សដែលបានបែកបាក់សាមគ្គីគ្នាទៅហើយ។
ក្នុងសម្លៀកបំពាក់ អាវយឺតព៌ណលឿងខ្ចី ដែលមានស្លាកសញ្ញាគណបក្សហ្វ៊ិនស៊ិនប៉ិចព្រះអង្គម្ចាស់ ស៊ីសុវត្ថិ សិរីរ័ត្ន បានមានបន្ទូលថា “ មានការបែកបាក់សាមគ្គីគ្នាក្នុងជួរគណបក្សរបស់យើង។ មានអ្នកដែលចង់រួមរស់ជាមួយគណបក្សប្រជាជនកម្ពុជា អ្នកដែលចង់ឯករាជ្យ និងអ្នកដែលចង់ចូលរួមជាមួយគណបក្សប្រឆាំង”។
លោក ញឹក ប៊ុនឆៃ អះអាងថា គណបក្សរាជានិយមធ្វើការជាមួយគណបក្សកាន់អំណាច ដើម្បីបង្រួបបង្រួមជាតិ ហើយសមនឹងទទួលបានការកោតសរសើរចំពោះការអភិវឌ្ឍដែលបានកើតមានក្នុងរយៈពេលមួយទសវត្សរ៍កន្លងមកនេះក្រោមការដឹកនាំរបស់រដ្ឋាភិបាលចម្រុះ។
លោកមានប្រសាសន៍ថា “ គោលនយោបាយរបស់គណបក្សហ្វ៊ិនស៊ិនប៉ិច គឺរួបរួមគ្នានៅជំុវិញរាជបល័្លង្ក។ សមិទ្ធផលនានាដែលសម្រេចបានដោយរដ្ឋាភិបាលត្រូវបានកសាងឡើងដោយគណបក្សហ្វ៊ិនស៊ិនប៉ិច និងគណបក្សប្រជាជនកម្ពុជា។ អ្វីដែលសំខាន់បំផុតនោះគឺថា គណបក្សហ្វ៊ិនស៊ិនប៉ិចបានធ្វើកិច្ចសហប្រតិបត្តិការជាមួយគណបក្សប្រជាជនកម្ពុជាដើម្បីរក្សាសន្តិភាព ព្រោះយើងអាចធ្វើការងាររបស់យើងបាន ក៏ដោយសារសន្តិភាពនេះដែរ។ គឺសន្តិភាពនិងស្ថិរភាពនេះហើយ ដែលបានទាក់ទាញភ្ញៀវទេសចររាប់លាននាក់ឲ្យចូលមកទស្សនា [កម្ពុជា] ខណៈវិនិយោគិននានាមកបង្កើតការងារសម្រាប់មនុស្សគ្រប់គ្នា”។
ប៉ុន្តែ ព្រះអង្គម្ចាស់ ស៊ីសុវត្តិ ធម្មិកោ ដែលបានចាកចេញពីគណបក្សហ្វ៊ិនស៊ិនប៉ិច ទៅចូលរួមជាមួយគណបក្សសង្គ្រោះជាតិកាលពីដើមឆ្នាំនេះ បានលើកឡើងថា ការចូលរួមរបស់គណបក្សហ្វ៊ិនស៊ិនប៉ិចក្នុងការប្រព្រឹត្តខុស និងការស្តាប់បង្គាប់គណបក្សកាន់អំណាច បានធ្វើឲ្យគណបក្សនេះបាត់បង់សំឡេងឯករាជ្យក្នុងឆាកនយោបាយកម្ពុជា។
ព្រះអង្គក៏បានមានបន្ទូលផងដែរថា ទំនាក់ទំនងដ៏ស្អិតរមួតរបស់គណបក្សនេះជាមួយគណបក្សប្រជាជនកម្ពុជា បានធ្វើឲ្យមានការភ្ញាក់រឭកក្នុងចំណោមអ្នកគាំទ្ររបស់ព្រះបរមសព នរោត្តម សីហនុ ដែលមិនខ្លាចញញើតនឹងការមានបន្ទូលប្រឆាំងនឹងសេចក្តីសម្រេចនានារបស់រដ្ឋាភិបាលលោក ហ៊ុន សែន ។
ព្រះអង្គម្ចាស់ ធម្មិកោ បានមានបន្ទូលថា គណបក្សហ្វ៊ិនស៊ិនប៉ិច មិនមែនបាត់បង់ការជឿទុកចិត្តពីប្រជាពលរដ្ឋដោយសារនរណាម្នាក់ឲ្យប្រាកដ មិនថាជា ព្រះអង្គម្ចាស់ នរោត្តម រណឫទ្ធិ លោក ញឹក ប៊ុនឆៃ ឬអ្នកអង្គម្ចាស់ អរុណរស្មី នោះទេ។ បក្សនេះបានបាត់បង់ការជឿទុកចិត្តពីប្រជារាស្ត្រ ដោយសារគណបក្សនេះខ្វះគោលនយោបាយ និងគោលជំហរ”។
ព្រះអង្គម្ចាស់មានបន្ទូលបន្តថា“ គណបក្សហ្វ៊ិនស៊ិនប៉ិច មិនដែលព្យាយាមបញ្ឈប់សកម្មភាពចាប់យកដី ។ល។និង ។ល។ ឡើយ។ គណបក្សហ្វ៊ិនស៊ិនប៉ិច មិនដែលព្យាយាមបញ្ឈប់សកម្មភាពបណ្តេញប្រជាពលរដ្ឋ ចេញពីផ្ទះសំបែងរបស់ខ្លួនទេ។ ខ្ញុំមិនដែលឃើញសមាជិកគណបក្សហ្វ៊ិនស៊ិនប៉ិចណាម្នាក់តវ៉ាចំពោះបញ្ហានៅបឹងកក់ និងបុរីកីឡា ក្នុងរាជធានីភ្នំពេញសោះឡើយ។ នេះហើយជាមូលហេតុដែលធ្វើឲ្យគណបក្សហ្វ៊ិនស៊ិនប៉ិច បាត់បង់សំឡេងឆ្នោតយ៉ាងច្រើន ក្នុងរយៈពេល២០ឆ្នាំចុងក្រោយនេះ។គណបក្សហ្វុ៊នស៊ិនបិុចគ្មានអនាគតទេប្រសិនបើនៅតែចងសម្ពន្ធភាពជាមួយគណបក្សប្រជាជនកម្ពុជានោះ”។
អ្នកអង្គម្ចាស់ក្សត្រិយ៍ អរុណរស្មី បានមានបន្ទូលថា មិនថា គណបក្សហ្វ៊ិនស៊ិនប៉ិច ប្រកាន់ជំហរបែបណាក្នុងពេលបច្ចុប្បន្នទេ អ្វីដែលសំខាន់នោះគឺថា ភាគច្រើននៃការអភិវឌ្ឍនិងស្ថិរភាពដែលគណបក្សប្រជាជនកម្ពុជាតែងលើកសរសើរជាញឹកញាប់នោះ គឺអាចសម្រេចបានដោយសារតែកិច្ចខិតខំប្រឹងប្រែងដឹកនាំដោយគណបក្សហ្វ៊ិនស៊ិនប៉ិចក្នុងទសវត្សរ៍ឆ្នាំ១៩៨០ និងដើមទសវត្សរ៍ឆ្នាំ១៩៩០ ដែលនៅទីបំផុតបានឈានដល់ការចុះកិច្ចព្រមព្រៀងទីក្រុងប៉ារីសក្នុងឆ្នាំ១៩៩១ ហើយបានជួយប្រទេសនេះក្នុងការបើកចំហទ្វារស្វាគមន៍សហគមន៍អន្តរជាតិ។
អ្នកអង្គម្ចាស់ក្សត្រិយ៍ អរុណរស្មី បានមានបន្ទូលថា “ នៅដើមទសវត្សរ៍ឆ្នាំ១៩៩០ គណបក្សហ្វ៊ិនស៊ិនប៉ិចបានឈានមុខគេ។ នៅពេលសម្តេចឪបង្កើតគណបក្សហ្វ៊ិនស៊ិនប៉ិចឡើង យើងបានផ្តួចផ្តើមឲ្យមានការចរចាស្វែងរកសន្តិភាព។ នៅពេលមានការបោះឆ្នោតលើកដំបូង យើងទទួលបានជ័យជម្នះដោយសារតែប្រជារាស្ត្រយល់ថា យើងជាអ្នកដឹកនាំដំណើរការផ្សះផ្សាជាតិក្នុងទសវត្សរ៍ឆ្នាំ១៩៨០”។
អ្នកអង្គម្ចាស់ក្សត្រិយ៍មានបន្ទូលថា “រាជាណាចក្រទី២ដែលប្រជាពលរដ្ឋជាច្រើនកំពុងរស់នៅដោយរីករាយនេះ បានចាប់បដិសន្ធិដោយសារការចូលរួមរបស់គណបក្សហ្វ៊ិនស៊ិនប៉ិច រួមជាមួយនឹងប្រជាជនកម្ពុជា”។ ទ្រង់មានបន្ទូលបន្តថា ទាល់តែមានតួនាទីធំដុំក្នុងជួររដ្ឋាភិបាល ទើបគណបក្សហ្វ៊ិនស៊ិនប៉ិច អាចមានឥទ្ធិពលលើការដឹកនាំប្រទេសបាន។
អ្នកអង្គម្ចាស់ក្សត្រីយ៍បន្ថែមថា “ គ្រាន់តែយើងមាន២អាសនៈ មិនមែនបានន័យថា យើងត្រូវបោះបង់ក្តីសង្ឃឹមចោលទេ។ ការអំពាវនាវរបស់ខ្ញុំទៅកាន់ប្រជាពលរដ្ឋគឺថា សូមផ្តល់ឱកាសឲ្យយើង ដើម្បីឲ្យយើងបានធ្វើកិច្ចការច្រើនទៀតសម្រាប់ប្រជាជន។ ខ្ញុំមិននិយាយរឿងឈ្នះទេ។ ការយកឈ្នះគឺជារឿងស្រមើស្រមៃ។ ពេលនេះយើងកំពុងតែចាប់ផ្តើមពីចំណុចសូន្យ”៕
ប្រែសម្រួលដោយ តែម សុខុម