អ្នកភូមិ និងមន្ត្រីបានឲ្យដឹងថា កាលពីម្សិលមិញ អាជ្ញាធរមូលដ្ឋានបានចាប់ផ្ដើមបូមទឹកលិចចេញពីបឹងមួយ ដែលមានទឹកល្ហល្ហាច ធ្វើឲ្យលិចផ្ទះជាច្រើនខ្នងនៅភូមិខ្វាក្នុងខណ្ឌដង្កោ និងបានបង្ខំអ្នកស្រុកជាច្រើនគ្រួសារឲ្យស្វែងរកកន្លែងស្នាក់នៅជាបណ្ដោះអាសន្ននៅលើដីទួលកាលពីខែមុន ។
កាលពីថ្ងៃច័ន្ទ ប្រជាពលរដ្ឋជាង១២០គ្រួសារបានផ្ញើលិខិតមួយទៅលោក នុត ពុធដារ៉ា អភិបាលខណ្ឌដង្កោដោយស្នើសុំម៉ាស៊ីនបូមទឹកមួយជាបន្ទាន់មុនពេលទឹកឡើងបំផ្លាញផ្ទះជាច្រើនខ្នងថែមទៀតនៅក្នុងតំបន់នេះ។
អ្នកស្រី ជា ថាវី អាយុ៣១ឆ្នាំ ជាតំណាងអ្នកភូមិបាននិយាយថា“ អ្នកភូមិមានចិត្តរីករាយយ៉ាងខ្លាំង ពេលអាជ្ញាធរមកជួយពួកយើង” ។អ្នកស្រី បាននិយាយបន្ថែមថា មន្ត្រីប្រហែល១០រូប ដែលរួមមានលោក នុត ពុធ ដារ៉ា និង លោកស្រី សៀង សារឿន ចៅសង្កាត់រង បានយកម៉ាស៊ីនបូមទឹកនេះមកជួយអ្នកស្រុកដើម្បីបូមទឹកចេញ ។
នៅក្នុងលិខិតស្នើសុំជំនួយរបស់ពួកគាត់ អ្នកភូមិបានពន្យល់អំពីការបង្ហូរទឹកចេញពីភូមិចំនួនប្រាំ ដែលនៅជុំវិញបឹងនេះ រួមទាំងទឹកដែលហូរចេញពីរោងចក្រផលិតកែវ និងសាកលវិទ្យាល័យភូមិន្ទកសិកម្ម ដែលនៅក្បែរនោះ ចូលក្នុងបឹងនេះជាច្រើនឆ្នាំមកហើយនោះ ។
កាលពីថ្ងៃពុធ អ្នកភូមិបានឲ្យដឹងថា ម្ចាស់បឹងនេះ បានបូមខ្សាច់ចេញពីបឹងនេះ យកទៅលក់ ហើយអ្នកភូមិមានជំនឿថា ម្ចាស់បឹងនេះមានបំណងធ្វើឲ្យផ្ទះរបស់ពួកគាត់លិចទឹក តាមរយៈការបូមទឹកបញ្ចូលទៅក្នុងបឹងនេះ គឺជាផ្នែកមួយ នៃការប៉ុនប៉ងបង្ខំពួកគាត់ឲ្យលក់ដីទៅឲ្យគាត់។
លោក យឹម សារ៉ាន អធិការនគរបាលខណ្ឌមានប្រសាសន៍ថា លោកមិនបានគិតថា ម្ចាស់បឹងនេះមានចេតនាបង្កឲ្យមានការលិចនេះទេ ។
លោកស្រី សៀង សារឿន បានមានប្រសាសន៍ថា “ កិច្ចការសំខាន់នេះគឺថា អាជ្ញាធរនិងអ្នកភូមិ កំពុងធ្វើការងារយ៉ាងខ្លាំងក្លា ដើម្បីបូមទឹកចេញពីភូមិនេះ”។
អ្នកស្រី ជា ថាវី បាននិយាយថា អ្នកភូមិ នឹងសម្ដែងការដឹងគុណរបស់ពួកគាត់ចំពោះអាជ្ញាធរខណ្ឌ ដែលជាមន្ត្រីរបស់គណបក្សប្រជាជនកម្ពុជាចំពោះការដោះស្រាយបញ្ហាទឹកលិចនេះ។ អ្នកស្រី ជា ថាវី បាននិយាយថា “ មន្ត្រីគណបក្សប្រជាជនកម្ពុជាមកជួយយើងឲ្យរួចផុតពីការលិចនេះ ដូច្នេះ យើងនឹងតបស្នងវិញដោយបោះឆ្នោតឲ្យគណបក្សប្រជាជនកម្ពុជា[នៅក្នុងការបោះឆ្នោតនាពេលខាងមុខនេះ]”៕
ប្រែសម្រួលដោយ ស៊ុំ សុខភុំ