អ្នកបើកបរយានយន្ត នឹងបើកបរដោយភាពងាយស្រួលនៅប៉ុន្មានសប្ដាហ៍ទៀតព្រោះនគរបាលចរាចរក្នុងរាជធានីភ្នំពេញ ត្រូវបានចេញបទបញ្ជាឲ្យផ្ដោតលើការសម្រួលនៅក្នុងការធ្វើដំណើរនៃយានយន្តនានាមុនថ្ងៃបោះឆ្នោត នាថ្ងៃទី២៨ ខែកក្កដា ជាជាងផាកពិន័យអ្នកធ្វើដំណើរណាដែលរំលោភច្បាប់ចរាចរណ៍។
នៅទូទាំងរាជធានីកាលពីម្សិលមិញ នគរបាលចរាចរបានចាប់ផ្ដើមតួនាទីថ្មីរបស់ខ្លួនក្នុងការកាត់បន្ថយការកកស្ទះចរាចរណ៍ឲ្យមានកម្រិតតិចតួច ដោយមិនផាកពិន័យទាំងផ្លូវការ និងមិនផ្លូវការ។
មន្ត្រីនគរបាលចរាចរម្នាក់ឈរជើងក្បែរស្ថានទូតបារាំង ដែលបានបដិសេធមិនប្រាប់ឈ្មោះដោយសារតែខ្លាចមានលទ្ធផលមិនល្អចំពោះការនិយាយជាមួយអ្នកយកព័ត៌មានបាននិយាយថា“ មន្ត្រីថ្នាក់លើបានប្រាប់យើងមិនឲ្យផាកពិន័យនរណាម្នាក់ឡើយ រហូតដល់ការបោះឆ្នោតត្រូវបានបញ្ចប់”។
មន្ត្រីរូបនេះបានលើកឡើងថា “ គេបានដកហូតសៀវភៅផាកពិន័យពីនគរបាលចរាចរទាំងអស់ ដែលឈរជើងនៅក្នុងរាជធានីភ្នំពេញ ដើម្បីរារាំងពួកគេមិនឲ្យប្រើប័ណ្ណផាកពិន័យ”។ មន្ត្រីរូបនេះបានលើកឡើងបន្តថា “ ប្រជាពលរដ្ឋដែលបើកបរដោយគ្មានមួកសុវត្ថិភាព បើកបរដោយគ្មានពាក់ខ្សែក្រវាត់ការពារ ឬក៏បើកបរបញ្ច្រាសទិសក្តីសុទ្ធតែមិនត្រូវបានបញ្ឈប់ឡើយ។ លោកនិយាយថា “ វាមិនល្អទាល់តែសោះ”។ លោកបានបន្ថែមដោយសំដៅទៅលើរដ្ឋាភិបាលថា ពួកគេចង់បានសន្លឹកឆ្នោត។
នៅចំណុចប្រសព្វដ៏មមាញឹកមួយក្បែរផ្សារថ្មី គេបានឃើញមន្ត្រីម្នាក់កំពុងបង្ហាញទិសដល់អ្នកបើកបរយានយន្ត ប៉ុន្តែ បានធ្វើព្រងើយកន្តើយអ្នកបើកបរដែលបើកបរបញ្ច្រាសទិស និងមិនពាក់មួកសុវត្ថិភាព។
លោក ហេង ចាន់ធារី ប្រធាននគរបាលចរាចររាជធានីភ្នំពេញ បានបញ្ជាក់ថា មន្ត្រីរបស់លោកសព្វថ្ងៃមិនបានផាកពិន័យអ្នកបើកបរបំពានច្បាប់នៅតាមផ្លូវឡើយ។ លោកបានលើកឡើងថា ការសម្រេចចិត្តនេះគឺដោយសារតែផ្តល់អាទិភាពដល់ការធ្វើយុទ្ធនាការឃោសនាបោះឆ្នោត។
នៅពេលសួរថា តើរដ្ឋាភិបាលបានណែនាំមន្ត្រីចរាចរដែលល្បីខាងទារប្រាក់សំណូកមិនឲ្យផាកពិន័យអ្នកធ្វើដំណើរ ជាមធ្យោបាយដើម្បីទិញទឹកចិត្តអ្នកបោះឆ្នោតក្នុងរាជធានីឬយ៉ាងណានោះ លោក ចាន់ធារី បានលើកឡើងថា គ្មានករណីបែបនោះទេ។
លោកបានលើកឡើងសំដៅទៅលើគណបក្សសង្គ្រោះជាតិថា “ យើងធ្វើការសម្រាប់គណបក្សទាំងអស់។ យើងមិនគិតថា គណបក្សប្រជាជនកម្ពុជា ឬក៏គណបក្សសង្គ្រោះជាតិឡើយ។
ទោះជាយ៉ាងណា លោក ចាន់ធារី បានបន្ថែមថា ជំនួសឲ្យការផាកពិន័យនៅតាមផ្លូវ អ្នកបើកបរយានយន្តបំពានច្បាប់ត្រូវបានបញ្ជូនឲ្យទៅបង់ប្រាក់ពិន័យនៅការិយាល័យនគរបាលវិញ។ ប៉ុន្តែ លោកបានបដិសេធមិនធ្វើអត្ថាធិប្បាយថា តើនគរបាលអាចចេញប័ណ្ណផាកពិន័យទៅឲ្យអ្នកល្មើសច្បាប់ចរាចរណ៍ដោយគ្មានសៀវភៅផាកពិន័យតាមរបៀបណានោះទេ។
មន្ត្រីនៅតាមប៉ុស្តិ៍នគរបាលចរាចរណ៍ចំនួនប្រាំពីរផ្សេងទៀត ដែលនៅទូទាំងរាជធានីបានលើកឡើងកាលពីម្សិលមិញថា ពួកគេត្រូវបានប្រាប់ឲ្យចៀសវាងការផាកពិន័យអ្នកបើកបរ។
មន្ត្រីម្នាក់ដែលឈរជើងក្បែរវិមានឯករាជ្យដែលបានបដិសេធមិនបញ្ចេញឈ្មោះដែរនោះ បានលើកឡើងដែរថា នគរបាលចរាចរនឹងចាប់ផ្តើមផាកពិន័យអ្នកធ្វើដំណើរឡើងវិញ បន្ទាប់ពីការបោះឆ្នោត។ លោកបាននិយាយថា “ គេបានប្រាប់យើងមិនឲ្យផាកពិន័យឡើយអំឡុងយុទ្ធនាការឃោសនាបោះឆ្នោតដែលមានរយៈពេលមួយខែនេះ។ វាគឺជាពេលបោះឆ្នោត ហេតុដូច្នេះហើយ យើងនឹងផ្ដោតច្រើនទៅលើការធ្វើដំណើរវិញ”។
មន្ត្រីម្នាក់ទៀតដែលឈរជើងនៅកាច់ជ្រុងផ្លូវលេខ១៥៤ និងមហាវិថីព្រះនរោត្តមបាននិយាយថា លោកក៏ត្រូវបានគេប្រាប់មិនឲ្យចេញប័ណ្ណផាកពិន័យទៅឲ្យអ្នកធ្វើដំណើរដែរ នៅមុនថ្ងៃបោះឆ្នោត ដែលនឹងប្រព្រឹត្តទៅនៅថ្ងៃទី២៨ ខែកក្កដា។
លោកបានលើកឡើងថា “ យើងទទួលខុសត្រូវតែយុទ្ធនាការបោះឆ្នោត ប៉ុណ្ណោះ ដើម្បីធានាឲ្យបានថា ចររាចរណ៍ដំណើរការបានល្អ”។ នៅពេលត្រូវបានសួរថា តើនរណាជាអ្នកចេញសារាចរមិនឲ្យនគរបាលចរាចរផាកពិន័យអ្នកល្មើសច្បាប់ចរាចរណ៍នោះ លោកឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យនគរបាលជាតិបានលើកឡើងថា លោកមិនបានដឹងពីបទបញ្ជាបែបនេះទេ។
លោកឧត្តមសេនីយ៍ឯក គៀត ច័ន្ទថារិទ្ធ បានថ្លែងថា “ ជាទូទៅយើងមិនបានបង្កើតច្បាប់ដូចនេះទេ ពីព្រោះវាផ្ទុយនឹងច្បាប់”។ លោកបានថ្លែងថា “ ក្នុងនាមជាមន្ត្រីអនុវត្តច្បាប់ វាគឺជាតួនាទីរបស់យើងក្នុងការអនុវត្តច្បាប់”។ លោកបានបន្តថា លោកគិតថា គ្មាននរណាម្នាក់ចេញបទបញ្ជាបែបនេះឡើយ។
លោក អ៊ា ចរិយា អ្នកគ្រប់គ្រងសុវត្ថិភាពផ្លូវគោករបស់អង្គការជនពិការអន្តរជាតិលើកឡើងថា គោលនយោបាយបែបនេះលើកទឹកចិត្តអ្នកបើកបរកាន់តែធ្វេសប្រហែស។ លោកបានលើកឡើងថា “ ខ្ញុំបានឃើញយុវជនជិះតែដៃមួយ ហើយដៃម្ខាងទៀតកាន់ទង់ជាតិ។ បែបនេះអាចបង្កឲ្យមានគ្រោះថ្នាក់។ យើងសុំស្នើឲ្យរដ្ឋាភិបាលបន្តអនុវត្តច្បាប់ចរាចរណ៍បន្តទៀត”៕
(រាយការណ៍បន្ថែមដោយ Luke Radcliff)
ប្រែសម្រួលដោយ ស៊ា ស៊ុយឈាង