29 C
Phnom Penh

មេដឹក​នាំគណ​បក្ស​សង្គ្រោះ​ជាតិ​ធ្វើ​យុទ្ធ​នា​ការឃោសនាបោះ​ឆ្នោត​​នៅ​ជិត​ព្រំ​ដែន​វៀត​ណាម

ដោយ ឌឹ ខេមបូឌា ដេលី

បទវិភាគ

ខេត្ត​កណ្ដាល៖ លោក​ កឹម សុខា មេ​ដឹក​នាំ​គណបក្ស​ប្រឆាំង​បាន​ធ្វើ​ឲ្យ​រំជើប​រំជួល​ក្នុង​ចំណោម​អ្នកគាំ​ទ្រ​គណបក្ស​សង្គ្រោះ​ជាតិ​ប្រហែល​១.០០០​នាក់​ តាម​រយៈ​សុន្ទរ​កថា​នៅ​ខាង​មុខ​វត្ត​ ព្រែក​តូច​ នៅ​ក្នុង​ស្រុក​ស្អាង ខេត្ត​កណ្ដាល​  កាល​ពី​ព្រឹក​ម្សិល​មិញ​។​

លោក​​​ កឹម សុខា​​​​​​​​​ ប្រធានគណបក្សសង្គ្រោះ​ជាតិ​​​ធ្វើយុទ្ធនា​​​ការឃោសនា​​​បោះ​​​ឆ្នោត​​​នៅ​​​ខេត្តកណ្តាល​​​កាល​​​ពី​​​ម្សិល​​​មិញ។​​ (Siv Channa)
លោក​​​ កឹម សុខា​​​​​​​​​ ប្រធានគណបក្សសង្គ្រោះ​ជាតិ​​​ធ្វើយុទ្ធនា​​​ការឃោសនា​​​បោះ​​​ឆ្នោត​​​នៅ​​​ខេត្តកណ្តាល​​​កាល​​​ពី​​​ម្សិល​​​មិញ។​​ (Siv Channa)

​បន្ដ​មក​ទៀត បន្ទាប់​​ពី​បាន​ដឹក​នាំ​ក្បួន​​អ្នក​គាំ​ទ្រ​គណបក្ស​សង្គ្រោះ​ជាតិ​​តាម​ផ្លូវ​ជាតិ​លេខ​២១ ឆ្លង​កាត់​ដី​កសិកម្ម​ដ៏​ខៀវ​ស្រ​ងាត់ អម​​ទន្លេ​បាសាក់​នោះ លោក កឹម​ សុខា បាន​​និយាយ​​ស្ទើរ​តែ​ដដែលៗ​ទៅ​កាន់​អ្នក​ភូមិ​រាប់​រយ​នាក់​នៅ​វត្ត​មួយ​ នៅ​ក្នុង​ឃុំ​កំពង់​កុង​ ស្រុក​កោះ​ធំ ដែល​នៅ​ចម្ងាយ​ប្រហែល​១០​គីឡូ​ម៉ែត្រ​ពី​ព្រំ​ដែន​វៀត​ណាម​។

​លោក កឹម សុខា បាន​ថ្លែង​ថា “ គណ​ បក្ស​សង្គ្រោះ​ជាតិ​ធានា​ថា យើង​នឹង​ការ​ពារ​ទឹក​ដី​កម្ពុជា​ ព្រោះ​ កឹម សុខា និង​ សម រង្ស៊ី មិន​ជំពាក់​​បំណុលវៀតណាម ថៃ ឬ​ បរទេ​ស​ណា​ទេ”។​​​​​​ ​ការ​អះអាង​ពី​ទំនាក់​ទំនង​ស្អិត​ល្មួត​​រវាង​រដ្ឋា​ភិបាល​របស់​លោកនាយក​រដ្ឋមន្ត្រី​ ហ៊ុន សែន និង​រដ្ឋាភិបាល​ទីក្រុង​ហាណូយ​ បាន​ក្លាយ​ជា​ការ​ឈឺចាប់​​របស់​​គណបក្ស​ប្រឆាំង​ដែល​បាន​អះ​អាង​ថា គោល​នយោបាយ​គាំទ្រ​វៀតណាម​​របស់​រដ្ឋាភិបាល​​បាន​នាំ​ឲ្យ​មាន​ការ​​អនុវត្ត​​ច្បាប់​អន្តោប្រវេសន៍​ធូររលុង​ លក្ខខណ្ឌ​អនុគ្រោះ​​ដល់​វិនិយោគិន​វៀតណាម​ និង​​ការ​បាត់​បង់​ដី​ខ្មែរ​ទៀត​ផង​។

ទោះជា​យ៉ាង​ណា ​លោក កឹម សុខា បាន​និយាយ​ចំ​ឈ្មោះ​ប្រទេស​ជិត​ខាង​តែ​ពីរ​ដង​គត់​នៅ​ក្នុង​សម្តី​របស់​គាត់​កាលពី​ម្សិលមិញ។ លោក កឹម សុខា ​​ថ្លែង​អំឡុង​​ពេល​សម្រាក​ពី​​យុទ្ធនាការ​ថា “ មុន​យុទ្ធនាការ​ឃោស​នា​បោះ​ឆ្នោត​ឆ្នាំនេះ​យើង​បាន​ណែនាំ​សកម្ម​ជន​របស់​យើង​មិន​ឲ្យ​និយាយ​ច្រើន​អំពី​បញ្ហា​ [វៀតណាម​]​នោះ​ទេ​ ព្រោះ​ប្រជា​ពល​រដ្ឋ​​​ អាច​ចាត់​ទុក​ថា យើង​ជា​អ្នក​ជាតិ​សាសន៍​និយម”។

លោក​បាន​មាន​ប្រសាសន៍​ថា “ គណបក្ស​ប្រជាជន​កម្ពុជា​ចោទ​យើង​អំពី​បញ្ហា​នោះ​។​យើង​ដឹង​ថា ពួកគេ​តាម​ដាន​យើង និង​ថត​សំឡេង​របស់​យើង ​រួច​ហើយ​យក​ខ្សែអាត់​សំឡេង​នោះ​ទៅ​​ឲ្យ​អគ្គរដ្ឋទូត​នៅ​តាម​​ស្ថាន​​ទូត​នានា​ និង​និយាយ​ថា យើង​គឺ​ជា​អ្នក​ជាតិ​សាសន៍​និយម​”។

ផ្ទុយ​ទៅ​វិញ លោក ទិត្យ សុធា អ្នក​នាំ​ពាក្យ​​អង្គភាព​ព័ត៌មាន​ និង​ប្រតិបត្តិកម្ម​រហ័ស​របស់​ទីស្ដី​ការ​គណៈរដ្ឋមន្ត្រី​បាន​មាន​ប្រសាសន៍​កាល​ពីខែមុន​ថា លោក ហ៊ុន សែន បាន​​ណែនាំ​មន្ត្រី​នៅ​ការិយាល័យ​របស់​លោក​ឲ្យ​ចម្លង​​សុន្ទរកថារបស់​គណបក្ស​ប្រឆាំង​ជា​អក្សរ​ដើម្បី​បង្ហាញ​សហគមន៍​អន្តរជាតិ​​អំពី​​កល​ល្បិច​ដែល​គណបក្ស​សង្គ្រោះ​ជាតិ​បាន​ប្រើ​ប្រាស់​ដើម្បី​ទាក់​ទាញ​សំឡេង​គាំទ្រ​។

លោក​ កឹម សុខា បាន​មាន​ប្រសាសន៍​កាល​ពី​ម្សិល​មិញ​ថា សារៈ​សំខាន់​បំផុត​ពីរ​ ដែល​លោក​ចែក​ចាយ​ដល់​ប្រជាពលរដ្ឋ​គឺ​ថា គណ​បក្ស​​សង្គ្រោះ​ជាតិ​​អាច​រក្សា​ស្ថិរភាព​បាន ​ប្រសិន​បើ​គណបក្ស​​នេះ​ជាប់​ឆ្នោត​ក្នុង​រដ្ឋាភិបាល​ ហើយ​មាន​មធ្យោបាយ​​ខាង​ហិរញ្ញវត្ថុ​ ដើម្បី​​ធ្វើតាម​ការ​សន្យា​ពេល​យុទ្ធនាការ​របស់​ខ្លួន​។

កាលពី​ម្សិលមិញ ទោះ​បី​ជា​លោក កឹម សុខា មាន​ការ​ប្រុង​ប្រយ័ត្ន​មិន​ហៅ​វៀតណាម​​ចំ​ឈ្មោះ​ដដែលៗ​ក៏​ដោយ​ ក៏​​ពាក្យ​សម្តី​​របស់​​លោក​បាន​សំដៅ​ទៅ​លើ​ថ្នាក់​ដឹក​នាំ​ប្រទេស​មួយ​ចំនួន​តូច ដែល​បាន​ផ្ដួល​រំលំ​​​របប​ខ្មែរ​ក្រហម​ និង​បាន​លើក​បន្តុប​រដ្ឋាភិបាល​កុ​ម្មុយ​នីស្ត​ដែរ​។ លោក កឹម សុខា  មាន​ប្រសាសន៍​អំឡុង​ពេល​​សុន្ទរកថា​ទាំង​ពីរ​លើក​របស់​​លោក​កាល​ពី​ម្សិលមិញ​ថា “ ប្រសិន​បើ​យើង​នៅ​តែ​ទុក​មេ​ដឹក​នាំ​ម្នាក់​ដែល​គ្រប់​គ្រង​ដោយ​បរទេស​ដដែល​នោះ​ ប្រទេស​របស់​យើង​នឹង​នៅ​​តែ​ស្ថិត​ក្រោម​ការ​គ្រប់​គ្រង​របស់​បរទេស​ ហើយ​ប្រសិន​បើ​យើង​ចង់​ឲ្យ​ប្រទេស​យើង​រស់ និង​មិន​គ្រប់​គ្រង​ដោយ​បរទេស​នោះ​ បង​ប្អូន​ត្រូវ​តែ​បោះ​ឆ្នោត​ឲ្យ​គណបក្ស​​សង្គ្រោះ​ជាតិ​”៕

ប្រែ​សម្រួលដោយ ហម សុផាណ្ណា​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស