អ្នកភូមិចំនួនបីភូមិនៅក្នុងឃុំក្រឡា ខេត្តកំពង់ចាម កាន់តែមានកំហឹងខ្លាំងឡើងចំពោះបញ្ហាដែលបណ្តាលមកពីកន្លែងចាក់សំរាមនៅជិតទីកន្លែងពួកគាត់រស់នៅ ដោយនិយាយថា វាបង្កគ្រោះថ្នាក់ដល់សុខភាព ហើយបញ្ចេញ ក្លិនស្អុយ។
លោក ខាត់ ស៊ាង មេភូមិទួលពពេលបាននិយាយថា កំហឹងរបស់ប្រជាពលរដ្ឋអាចបណ្តាលឲ្យមានការតវ៉ានៅចុងសប្តាហ៍នេះ ប្រសិនបើគ្មានការចាត់វិធានការពីក្រុមហ៊ុន ស៊ិនទ្រី ជាក្រុមហ៊ុនគ្រប់គ្រងសំរាមដែលទទួលខុសត្រូវចំពោះកន្លែងចាក់សំរាមនេះ។
គាត់បាននិយាយថា “ ខ្ញុំបានប្រាប់ប្រជាពលរដ្ឋឲ្យទប់កំហឹង ហើយស្វែងរកដំណោះស្រាយតាមផ្លូវច្បាប់ ក៏ប៉ុន្តែ ខ្ញុំខ្លាចក្រែងតែពួកគាត់មិនអាចទប់កំហឹងនេះបានយូរទេ”។
លោក ជិន ញ៉ូន មេឃុំក្រឡាបានឲ្យដឹងថា គាត់ក៏បានទទួលពាក្យបណ្តឹងពីអ្នកភូមិដែរ។ គាត់បានមានប្រសាសន៍ថា “ ប្រជាពលរដ្ឋបានត្អូញត្អែរថា មានក្លិនស្អុយខ្លាំងណាស់ ហើយមានរុយច្រើន ដែលគាត់ត្រូវតែទទួលទានអាហារនៅក្នុងមុង។ ពួកគាត់ក៏ធ្លាក់ខ្លួនឈឺ ដោយជំងឺរាករូស និងផ្តាសាយផងដែរ”។
លោក ឡាយ វង មេភូមិត្រពាំងចារ បានឲ្យដឹងថា សំរាមនៅកន្លែងចាក់សំរាមនេះ បានប៉ើងចូលទៅក្នុងវាលស្រែ ហើយប៉ះពាល់ដល់ដំណាំរបស់គាត់។
អ្នកភូមិបានដាក់ញត្តិមួយដែលចុះហត្ថលេខាដោយប្រជាពលរដ្ឋជាង៣០០នាក់ នៅក្នុងភូមិទួលពពេល ភូមិត្រពាំងចារ និងភូមិត្រកួន ទៅឲ្យក្រុមហ៊ុនស៊ិនទ្រីជាងមួយខែមកហើយ ដោយទាមទារឲ្យលុបកន្លែងចាក់សំរាមនេះ ហើយពួកគាត់បានជួបជាមួយមន្ត្រីកាលពីសប្តាហ៍មុន។
ក្រុមហ៊ុន ស៊ិនទ្រី ដែលទទួលការយល់ព្រមឲ្យប្រមូលសំរាមរយៈពេល៤៩ឆ្នាំ នៅរាជធានីភ្នំពេញ ទទួលបានអាជ្ញាប័ណ្ណផ្តល់សេវាគ្រប់គ្រងសំរាមនៅខេត្តកំពង់ចាម កាលពី១៨ខែមុន ក្នុងការរៀបចំដេញថ្លៃមួយដែលមានក្រុមហ៊ុនដេញថ្លៃតែមួយគត់ នេះបើយោងតាមលោក លន់ លឹមថៃ អភិបាលរងខេត្ត។
លោក សេង ចំរើន អគ្គនាយករងក្រុមហ៊ុន ស៊ិនទ្រី បានសូមអភ័យទោសចំពោះបញ្ហាទាំងនេះកាលពីម្សិលមិញ ប៉ុន្តែ លោកបានមានប្រសាសន៍ថា បញ្ហាមួយចំនួនកើតចេញពីការបាក់បែកជញ្ជាំងហ៊ុមព័ទ្ធកន្លែងចាក់សំរាមនេះ ដោយសារតែខ្យល់ព្យុះកាលពីពេលថ្មីៗនេះ។
លោកមានប្រសាសន៍ថា “ ប្រសិនបើយើងអាចរកកន្លែងផ្សេងបានឆ្ងាយពីប្រជាពលរដ្ឋ យើងនឹងផ្លាស់ប្តូរទៅកាន់កន្លែងនោះហើយលុបកន្លែងចាក់សំរាមចាស់។ ក៏ប៉ុន្តែ វាគឺជាតំបនកន្លកកន្លៀត។ គ្មានកន្លែងចាក់សំរាមច្រើននោះទេ”៕
ប្រែសម្រួលដោយ ហួង កុកទៀន