28 C
Phnom Penh

សមាជិក​ក្រុ​ម​ប្រឆាំង​បីនាក់​ជាប់​​​ចោទ​ពីបទ​បំពាន​ច្បាប់​បោះឆ្នោត​

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ ​​​​​​សាលា​​​ដំបូង​​​ខេត្ត​​​​​​បន្ទាយ​​​មាន​​​ជ័យ​​​បាន​​​ចោទ​​​ប្រកាន់​​​បុរស​​​បី​​​​​​នាក់​​​ពី​​​បទ​​​រំលោភ​​​បំពាន​​​ច្បាប់​​​បោះឆ្នោត និង​​​ចូល​​​រួម​​​ក្នុង​​​ចលនា​​​​​​​​​ប្រឆាំង​​​រដ្ឋាភិបាល​​​ បន្ទាប់​​​ពីពួកគេ​​​ត្រូវ​​​បាន​​​ចាប់​​​ខ្លួន​​​ខណៈ​​​​​​កំពុង​​​តែ​​​ដឹក​​​អាវ​​​យឺត​​ដែល​​​មាន​​​បោះ​​​ពុម្ព​​​អក្សរ​​​ជំរុញ​​​ឲ្យ​​​ប្រជាជន​​​កម្ពុជា​​​​​​​​​ធ្វើ​​​ពហិការ​​​មិន​​​ចូល​​​រួម​​​​​​នៅ​​​ក្នុង​​​ការ​​​បោះ​​​ឆ្នោត​​​ជាតិ​​​នា​​​ថ្ងៃ​​​ទី​​​២៨ ខែកក្កដា​​​ខាង​​​មុខ​​​នេះ។

អាវ​​​យឺត​​​ទាំង​​​នោះ​​​ត្រូវ​​​បានបញ្ជា​​​ទិញ​​​ និង​​​ចំណាយ​​​​​​ប្រាក់​​​​​​ទិញ​​​ដោយ​​​​​​ចលនា​​​អំណាចពល​រដ្ឋ​ខ្មែរ​​​ មាន​​​មូល​​​ដ្ឋាន​​​នៅ​​​ឯ​​​សហ​​​​​​រដ្ឋអាមេរិក ដែល​​​លោក​​​នាយក​​​រដ្ឋមន្ត្រី​​​ហ៊ុន សែន ​​​តែង​​​បាន​​​ចោទ​​​ប្រកាន់​​​ថា​​​  មាន​​​គម្រោង​​​​​​​​​​​​ផ្ដួល​​​រំលំ​​​រដ្ឋាភិបាល​​​ និងដែលលោកហៅថា ជា​​​ក្រុម​​​ភេរវកម្ម​​​។
អង្គការ​​​សិទ្ធិ​​​មនុស្ស​​​ និង​​​អ្នក​​​សង្កេត​​​ការណ៍​​​បោះ​​​ឆ្នោត​​​​​​បាន​​​សម្ដែង​​​ក្ដី​​​បារម្ភ​​​ចំពោះ​​​ការ​​​ចាប់​​​ខ្លួននេះ​​​ ដោយ​​​លើក​​​ឡើង​​​ថា  ជន​​​ជាប់​​​ចោទ​​​នោះមិន​​​បាន​​​ធ្វើ​​​អ្វីខុស​​​ច្បាប់​​​ទេ​​​ និងថា​​​​​រឿង​​​អាវយឺត​​​នោះ​​​គឺ​​​ជា​​​បញ្ហា​​​ពាក់​​​ព័ន្ធ​​​នឹង​​​សេរី​​​​​​ភាព​​​ក្នុង​​​ការ​​​បញ្ចេញ​​​មតិ​​​។

លោក ហ៊ិន សុផល ប្រធាន​​​ពន្ធនាគារ​​​ខេត្ត​​​បន្ទាយ​​​មាន​​​ជ័យ​​​ បាន​​​​​​ឲ្យ​​​ដឹង​​​ថា បុរស​​​ទាំង​​​បី​​​នាក់​​​ គឺ​​​ឈ្មោះ អ៊ឹម ភារុណ អាយុ​​​២៦​​​ឆ្នាំ សួន សេរី  ប៊ុនឡុង អាយុ​​​២៨​​​ឆ្នាំ និង សេងសុខ ម៉េង អាយុ​​​ ៣០​​​ឆ្នាំ​​​ ត្រូវ​​​បាន​​​បញ្ជូន​​​ទៅ​​​ពន្ធនា​​​គារ​​​នេះកាលពីម្សិលមិញ ដើម្បីឃុំខ្លួន​​​រង​​់​​​ចាំ​​​ការ​​​កាត់​​​ក្ដី​​​ បន្ទាប់​​​ពីត្រូ​​វ​​​បានចោ​​​ទប្រកាន់​​​រួច​​​។ បុរស​​​ទាំង​​​បីនាក់​​​នេះសុទ្ធតែ​​​ត្រូវ​​​បាន​​​ចាប់ខ្លួន​​​កាលពី​​​ថ្ងៃ​​​ច័ន្ទ។

លោក ហ៊ិន សុផល បាន​​​មាន​​​ប្រសាសន៍​​​ថា “ ពួកគេ​​​​​​ទាំង​​​បីនាក់​​​ត្រូវ​​​បាន​​​បញ្ជូន​​​​​​មក​​​ទី​​​នេះ​​​នៅ​​​​​​ថ្ងៃ​​​នេះ ហើយពួកគេ​​​ត្រូវ​​​បាន​​​ចោទ​​​ប្រកាន់​​​ពីរករណី​​​”  ដោយ​​​លោក​​​បាន​​​ពន្យល់​​​ថា  ពួកគេ​​​ត្រូវ​​​បាន​​​ចោទ​​​ប្រកាន់​​​តាម​​​មាត្រា​​​​​​១២៤ នៃ​​​ច្បាប់​​​ស្ដីពី​​​​​​​​​ការ​​​បោះឆ្នោត​​​ជ្រើស​​​តាំង​​​តំណាង​​​រាស្ត្រដែល​​​មានចែង​​​ពីការ​​​ដាក់​​​ទោស​​​ជន​​​ទាំង​​​ឡាយ​​​ណាដែល​​​ “ ធ្វើ​​​ឲ្យ​​​រាំង​​​ស្ទះ​​​ដល់​​​ដំណើរ​​​ការ​​​បោះឆ្នោត​​​”  និង​​​ដែល​​​ចែង​​​ថា ជន​​​ល្មើស​​​នឹង​​​ត្រូវ​​​បាន​​​ដក​​​ហូត​​​យក​​​ប័ណ្ណ​​​ចុះ​​​ឈ្មោះបោះឆ្នោត​​​ទុក​​​ជា​​​ការ​​​ពិន័យ​​​។ ពួកគេ​​​ក៏ត្រូវ​​​បាន​​​ចោទ​​​ប្រកាន់តាម​​​មាត្រា​​​៤៥៣ នៃ​​​ក្រម​​​ព្រហ្មទណ្ឌ​​​ពាក់​​​ព័ន្ធ​​​នឹង​​​សមាជិក​​​ភាព​​​ក្នុង​​​ជួរ​​​ក្រុម​​​ប្រឆាំងរដ្ឋាភិបាល ​​​ដែលអាច​​​​​​មាន​​​ទោស​​​ជាប់​​​ពន្ធនាគារ​​​រយៈ​​​ពេល​​​១០​​​ឆ្នាំ​​​​​​​​​។

លោក ឃួន ប៊ុនហួន ស្នងការរង​​​នគរ​​​បាល​​​ខេត្ត​​​បន្ទាយ​​​មាន​​​ជ័យ ក៏បាន​​​បញ្ជាក់​​​ថា​​​ ពិត​​​ជា​​​មាន​​​បទ​​​ចោទ​​​ប្រកាន់​​​នេះដែរ ហើយបានឲ្យ​​​ដឹង​​​ថា ​​​បុរស​​​ទាំង​​​បីនាក់​​​នេះ​​​បាន​​​សារភាព​​​ថា បាន​​​ជួប​​​សមាជិក​​​ចលនាអំណាច​​​ពលរដ្ឋ​​​ខ្មែរ​​​នៅ​​​ក្នុង​​​ប្រទេស​​​ថៃ ដែល​​​ជា​​​កន្លែង​​​អាវ​​​យឺត​​​ចំនួន​​​១០៩ រួ​​មជា​​​មួយ​​​នឹង​​​នាឡិកា និង​​​វិទ្យុ​​​មួយចំនួន​​​​​​ ត្រូវ​​​បា​​​ន​​​ដឹក​​​ជញ្ជូន​​​មុន​​​ពេល​​​ត្រូវ​​​បានរឹប​​​អូស​​​យក​​​កាលពីថ្ងៃ​​​ច័ន្ទ។

លោក​​​បាន​​​មាន​​​ប្រសាសន៍​​​ថា “ ពួកគេ​​​ទាំង​​​​​​​បីនាក់​​​ត្រូវ​​​បាន​​​បញ្ជូន​​​ទៅ​​​កាន់​​​មន្ទីរ​​​ឃុំ​​​ឃាំង​​​នៅ​​​ថ្ងៃ​​​នេះ បន្ទាប់ពី​​​ត្រូវ​​​បា​​ន​​​ចោទ​​​ប្រកាន់​​​​​​ពី​​​បទ​​​​​ចូល​​​រួម​​​ជាមួយ​​​ចលនា​​​ប្រឆាំង​​​រដ្ឋាភិបាល​​​ និង​​​ធ្វើ​​​ឲ្យ​​​រាំង​​​ស្ទះ​​​ដល់​​​ដំណើរ​​​ការ​​​បោះឆ្នោត”​​​។

កាលពីថ្ងៃ​​​ច័ន្ទ នគរ​​​បាល​​​ក្រុង​​​សៀមរាប ​​​ក៏បាន​​​ឃុំ​​​ខ្លួន​​​បុគ្គលិក​​​ពីរនាក់​​​នៅក្នុង​​​ហាង​​​មួយ​​​ដែល​​​ជា​​​កន្លែង​​​គេ​​​ចោទ​​​ថា បាន​​​បោះពុម្ព​​​អាវ​​​យឺត​​​នោះ ប៉ុន្តែ​​​ស្ថាន​​​ភាព​​​របស់​​​ពួកគេ​​​គឺ​​​មិន​​​ច្បាស់​​​ទេ គិត​​​ត្រឹម​​​ថ្ងៃ​​​ម្សិលមិញ។ អាវ​​​យឺត​​​នេះ​​​មាន​​​រូប​​​សញ្ញា​​​ចលនា​​​​​​អំណាចពលរដ្ឋ​​​ខ្មែរ​​​​​​ និង​​​មាន​​​ខ្លឹម​​​សារ​​​ថា “ ប្រជា​​​ជន​​​កម្ពុជា​​​របស់​​​យើង​​​រួប​​​រួ​​​មគ្នា​​​ និង​​​ប្រើ​​​អំណាច​​​ប្រជា​​​ជន​​​ដើម្បី​​​ប្រឆាំង​​​នឹង​​​ការ​​​បោះឆ្នោត​​​​​​ ដែល​​​គ្មាន​​​លក្ខណៈ​​​សេរី និង​​​យុត្តិធម៌”។

លោក ទី សុវិនថាល់ ព្រះរាជអាជ្ញា​អម​​​សាលា​​​ដំបូង​​​ខេត្ត​​​សៀមរាប បាន​​​ឲ្យដឹង​​​ថា សំណុំរឿង​​ព្រហ្មទណ្ឌ​​​នេះ​​​ត្រូវ​​​បានបញ្ជូន​​​ទៅ​​​ខេត្ត​​​បន្ទាយ​​​មាន​​​ជ័យហើយ ហើយ​​​លោក​​​​​​បាន​​​​​​បដិសេធ​​​មិន​​​និយាយ​​​ថា តើ​​​​​​​​​បុគ្គលិក​​​ទាំង​​​ពីរ​​​នាក់​​​​​​នៅ​​​ហាង​​​​​​​​​បោះ​​​ពុម្ព​​​នោះ​​​កំពុង​​​ត្រូវ​​​បាន​​​ឃុំ​​​ខ្លួន​​​នៅឡើយ ឬយ៉ាងណាទេ។

នៅឯខេត្ត​​​បាត់ដំបង​​​ឯណោះវិញ លោក អឿន ទិត  អធិការ​​​នគរបាល​​​ស្រុក​​​បវេល បាន​​​បញ្ជាក់​​​ថា មន្ត្រី​​​​​​នៅ​​​ក្រោម​​​ឱវាទ​​​របស់លោក​​​បាន​​​សាក​​​សួរ​​​អ្នកស្រី​​​ ខេន សុង​​​ ​​​ដែល​​​ត្រូ​​វ​​​ជា​​​ម្ដាយ​​​អាយុ​​​៧១​ឆ្នាំរបស់​​​លោក​​​ សួន សេរី រដ្ឋា ​​​ប្រធាន​​​ចលនា​​​អំណាច​​​ពល​រដ្ឋខ្មែរ​​​​​​ ដែល​​​​មាន​​​មូលដ្ឋាន​​​នៅ​​​ក្នុង​​​រដ្ឋធានីវ៉ាស៊ីនតោន ​។         លោក​​​បាន​​​មាន​​​ប្រសាសន៍​​​ថា “ យើង​​​មិន​​​​​​បាន​​​​ចាប់​​​ខ្លួន​​​ឬឃុំខ្លួន​​​គាត់​​​ទេ​​​​​​​​ យើង​​​គ្រាន់​​​តែ​​​សុំ​​​ឲ្យគាត់​​​ប្រគល់​​​ឲ្យ​​​នគរបាល​​​នូវ​​​សាដក​​​ដែល​​​គេ​​​រាយការណ៍​​​​​​ថា​​​ ត្រូវ​​​បាន​​​យក​​​មក​​​ទុក​​​នៅ​​​​​​ផ្ទះ​​​របស់​​​គាត់​​​ប៉ុណ្ណោះ​​​”។

លោក ទិត បាន​​​ឲ្យដឹង​​​ថា បុរស​​​ដែល​​​ត្រូវ​​​បាន​​​ចាប់​​​ខ្លួន​​​ទាំង​​​បីនាក់​​​នោះ​​​ ​​​ប្រាប់​​​នគរ​​​បាល​​​ថា សាដកមួយ​​​ចំនួន​​​នៅ​​​ក្នុង​​​ចំណោម​​​សាដក​​​ទាំងនោះ​​​​​​ត្រូវ​​​បាន​​​បញ្ជូន​​​ទៅផ្ទះ​​​របស់អ្នកស្រី​​​ សុង ។ ប៉ុន្តែ​​ លោកបាន​​​ឲ្យ​​​ដឹង​​​ថា អ្នកស្រី​​​ សុង បាន​​​ប្រាប់​​​នគរបាល​​​ថា ​សាដកមួយ​​​ចំនួន​​​មាន​​​អ្នក​​​មក​​​យក​​​​​​រួច​​​ទៅហើយ​​​ ហើយ​​​ថា អ្នកស្រី​​​មិន​​​ដឹង​​​ថា មាន​​​អ្វីនៅ​​​ក្នុង​​​នោះទេ។

នៅពេល​​​ទាក់​​​ទង​​​​​​បាន​​​​​​តាម​​​ទូរស័ព្ទ​​​ កូន​​​ស្រី​​​របស់​​​អ្នកស្រី សុង ឈ្មោះ សួន សុវណ្ណរី  បាន​​​ឲ្យ​​​ដឹង​​​ថា រូបគេ​​​​​កំពុង​​​លាក់​​​ខ្លួន​​​​​​ បន្ទាប់​​​ពីបាន​​​រត់គេច​​​ពីនគរបាល​​​ ពេល​​​ពួកគេ​​​មក​​​ផ្ទះរបស់​​​ខ្លួនដើម្បី​​​នាំពួកខ្លួន​​​​​​ទៅ​​​សាក​​​សួរ​​​។ អ្នកស្រី​​​បាន​​​បដិសេធថា អ្នកស្រី​​​​​​ពុំ​​​មាន​​​​​​​​​ទំនាក់​​​ទំនង​​​អ្វី​​​ជាមួយ​​​​​​​​​​​​ចលនា​​​របស់​​​បង​​​ប្រុស​​​ខ្លួនឡើយ​​​។
អ្នកស្រី​​​បាននិយាយ​​​ថា “ ម្ដាយ​​​របស់​​​ខ្ញុំ​​​ និង​​​រូប​​​ខ្ញុំ​​​គ្មានការ​​​ពាក់​​​ព័ន្ធ​​​ជាមួយ​​​ចលនា​​​ប្រឆាំង​​​រដ្ឋាភិបាល​​​អ្វីទេ។ យើង​​​មិនដែល​​​ដឹង​​​ ប៉ះ​​​ពាល់​​​ ឬឃើញ​​​អាវ​​​ប្រឆាំង​​​ការ​​​បោះឆ្នោត​​​អ្វី​​​ឡើយ​ ហើយ​​​ក៏មិន​​​ដែល​​​បាន​​​ឃើញ​​​សម្ភារ​​​របស់​​​ចលនាអំណាច​​​ប្រជា​​​ពល​រដ្ឋ​​​​​​ខ្មែរ​​​ដែរ​​​”។

អ្នកស្រី​​​បាន​​​ប្រាប់​​​អត្តសញ្ញាណរបស់លោក​​​ សេរី  ប៊ុនឡុង ដែល​​​ស្ថិត​​​នៅក្នុង​​​ចំណោម​​​ជន​​​ជាប់​​​ចោទ​​​ទាំង​​​បី​​​​​​នាក់​​​ថា ​​ជា​​​បង​​​ប្អូន​​​ជីដូនមួយ​​​របស់​​​ខ្លួន​​​​​​។
តាមរយៈ​​​អុីម៉េលមួយច្បាប់ លោក សួន សេរី រដ្ឋា  ប្រធាន​​​ចលនា​​​អំណាចពល​រដ្ឋ​​​​ខ្មែរ​​​ ​​បាន​​​អំពាវ​​​នាវ​​​ឲ្យ​​​ស្ថានទូត​​​បរទេស​​​ក្នុង​​​ប្រទេស​​​កម្ពុជា​​​ ជួយ​​​​​​​​​​​​​​​ក្រុម​​​គ្រួសារ​​​​​​​​​​​​​​​ខ្លួន​​​ ហើយ​​​បាន​​​ធ្វើ​ការ​​​​ថ្កោល​​​ទោស​​​ការ​​​ចាប់ខ្លួន “ សកម្ម​​​ជន​​​ចលនា​​​​​​អំណាច​​​​​​ពល​រដ្ឋខ្មែរ​​​” ទាំងបីនាក់​​​ថា ​​​ជាការ​​​​រំលោភ​​​​​បំពាន​​​សិទ្ធិ​​​នយោបាយ​​​របស់​​​​​​ពួកគេ​​​។

អ៊ីម៉េលនេះ​​​មាន​​​ខ្លឹម​​​សារ​​​ថា “ អាវ​​​យឺត​​​របស់​​​ចលនាអំណាច​​​ប្រជា​​​ជន​​​ខ្មែរ និង​​​សារ​​​ដែល​​​ត្រូវ​​​បាន​​​បោះពុម្ព​​​នៅ​​​ពី​​​​​​ក្រោយ​​​អាវ​​​នោះ​​​​​​ មិន​​​មែន​​​ជាការ​​​រំលោភ​​​បំពាន​​​ច្បាប់​​​នៅ​​​ក្នុង​​​ប្រទេស​​​កម្ពុជា​​​ទេ ព្រោះ​​​ថាវាមិនមែន​​​ជា​​​បទ​​​ឧក្រិដ្ឋ​​​ឡើយ ប៉ុន្តែ​​​តាម​​​ពិត​​​ជា [​​​ការ​​​លើក​​​កម្ពស់​​​] ការ​​​យល់​​​ដឹង​​​ពីនយោបាយ។ កម្ពុជា​​​គ្មាន​​​ច្បាប់​​​ផ្ដន្ទាទោស​​​ក្រុម​​​នយោបាយ​​​ណា​​​មួយ​​​​​​ដែល​​​ប្រឆាំង​​​នឹងការ​​​បោះឆ្នោត​​​ទេ”។

លោក សួន សេរី រដ្ឋា បាន​​​ឲ្យ​​​ដឹង​​​ថា ចលនា​​​អំណាច​​​ប្រជា​​​ជនខ្មែរ​​​បាន​​​បញ្ជាទិញ​​​អាវយឺត​​​នេះរាប់​​​ពាន់អាវ​​​​​​សម្រាប់​​​ចែក​​​ចាយនៅ​​​ទូទាំង​​​ប្រទេស​​​ និង​​​សម្រាប់​​​ផ្ដល់់ជូន​​​ក្រុមអ្នកគាំទ្រ​​​របស់​​​ខ្លួន​​​​​​នៅ​​​ប្រទេស​​​ថៃ​​​ ​​​ម៉ាឡេសុី​​​ ​​​និង​​​ប្រទេស​​​​​​កូរ៉េខាង​​​ត្បូង និង​​​​​​ ដែលសុទ្ធ​​​តែ​​​ស្ថិត​​​នៅក្នុង​​​ចំណោម​​​គោល​​​ដៅពេញនិយម​​​បំផុត​​​របស់​​​ពល​​​ករ​​​ចំណាក​​​ស្រុក​​​កម្ពុជា​​​។

លោក​​​​​​ហៅ​​​ក្រុម​​​របស់​​​ខ្លួន​​​ថាជា “ ចលនា​​​នយោបាយ​​​ស៊ីវិល” ហើយបាន​​​ច្រាន​​​ចោល​​​ការ​​​អះអាង​​​របស់លោក ហុ៊ន សែន ​​​ដែល​​​ថា​​​ពួកគេ​​​មាន​​​​​​​​​គោល​​​បំណង​​​ហិង្សា​​​។ លោក​​​បាន​​​ចោទ​​​សួរ​​​ថា “ ប្រសិន​​​បើ​​​ចលនា​​​​​​​អំណា​​ច​​​ពល​រដ្ឋ​​​ខ្មែរ​​​​​​ពិត​​​​​​ជា​​​ក្រុម​​​ភេរវករ​​​មែន​​​ ហេតុ​​​អ្វី​​​បានជា​​​ចលនា​​​របស់យើង​​​មាន​​​មូល​​​ដ្ឋាន​​​​​​​​​លើ​​​ទឹកដីសហរដ្ឋអាមេរិក ដើម្បី​​​បំពេញ​​​​​​បេសកកម្ម​​​ និង​​​ធ្វើ​​​សកម្មភាព​​​បាន​​​​​​?”

លោកស្រី ណាលី ពីឡូក អនុប្រធាន​​​អង្គការ​​​សិទ្ធិមនុស្ស​​​លីកាដូ បាន​​​ឲ្យ​​​ដឹង​​​ថា រហូត​​​មកទល់​​​នឹង​​​ពេល​​​នេះ​​​ ពុំ​​​មាន​​​ភ័ស្តុតាង​​​ ដើម្បីបញ្ជាក់​​​ថា ក្រុម​​​នេះ​​​បាន​​​​​​ធ្វើ​​​អ្វីខុស​​​ទេ។ លោកស្រី​​​បាន​​​មាន​​​ប្រសាសន៍​​​ថា “ រហូត​​​មកទល់​​​នឹង​​​ពេល​​​នេះ ពុំ​​​មាន​​​ភ័ស្តុតាង​​​បញ្ជាក់​​​ថា ក្រុម​​​នេះ​​​បាន​​​ធ្វើ​​​សកម្មភាព​​​ពាក់​​​ព័ន្ធនឹង​​​​​​បទ​​​​​​​​​​​​​ល្មើស​​​ព្រហ្មទណ្ឌ​​​ឡើយ​​​។ ការចាប់​​​ខ្លួន​​​បុគ្គល​​​ទាំង​​​នេះគឺ​​​ជា​​​ឧទាហរណ៍​​​មួយ​​​ទៀត​​​នៃការ​​​រឹត​​​បន្តឹង​​​សិទ្ធិសេរីភាពក្នុង​​​ការ​​​បញ្ចេញមតិ។ ការ​​​បដិសេធ​​​មិនចូល​​​រួម​​​ក្នុង​​​ការ​​​បោះឆ្នោត​​​ គឺ​​​​​​មិន​​​មែន​​​ជា​​​ការ​​​ប្រព្រឹត្ត​​​ផ្ទុយពី​​​ច្បាប់​​​បោះឆ្នោត​​​ជាតិ​​​ ឬ​​​ច្បាប់​​​បោះឆ្នោត​​​អន្តរជាតិ​​​ភាគ​​​ច្រើន​​​​​​ទេ​​​។​​​​​​ ​​ក្នុង​​​ប្រទេស​​​មួយ​​​ចំនួន​​​ ប្រជា​​​ជន​​​ត្រូវ​​បាន​​​តម្រូវ​​​ឲ្យ​​​ទៅ​​​បោះ​​​ឆ្នោត​​​ជាកំហិត​​​ លុះត្រាតែ​​​​​​ពួកគេ​​​មាន​​​ហេតុផល​​​ជាក់​​​លាក់​​​ ក៏​​​ប៉ុន្តែ​​​ នៅ​​​ប្រទេស​​​កម្ពុជា​​​ គឺ​​​គ្មានការ​​​តម្រូវ​​​បែបនេះទេ”។

ក្រុម​​​សង្កេតការណ៍​​បោះឆ្នោត​​​​ឯករាជ្យ​​​នាំមុខនៅ​​​កម្ពុជាចំនួន​​​​​​ពីរ​​​​​​ក៏បាន​​​លើក​​​ឡើង​​​ផង​​​ដែរ​​​ថា ​​​ អាវ​​​យឺត​​​ទាំង​​​នោះ​​​គឺ​​​មិន​​​មែន​​​ជា​​​ការ​​​រំលោភ​​​បំពាន​​​ច្បាប់​​​បោះឆ្នោត​​​ ដែល​​​អនុញ្ញាត​​​ឲ្យ​​​អាជ្ញាធរ​​​ដាក់​​​ទោស​​​​​​ជន​​​ណាដែល​​​ “ ធ្វើ​​​ឲ្យ​​​រាំង​​​ស្ទះដល់​​​ដំណើរ​​​ការ​​​បោះឆ្នោត​” ​​ ឬ “ រំខាន​​​ដល់​​​​​​ការ​​​បោះឆ្នោត​​​”  ឡើយ​​​។

លោក ហង្ស ពុទ្ធា នាយក​​​ប្រតិបត្តិ​​​គណៈ​​​កម្មាធិការ​​​អព្យាក្រឹត និង​​​មិន​​​លម្អៀង​​​សម្រាប់​​​ការ​​​បោះឆ្នោត​​​ដោយសេរីនៅកម្ពុជា ហៅ​​​កាត់​​​ថា និកហ្វិច បានមាន​​​ប្រសាសន៍​​​ថា “ នេះ​​​ជា​​​សិទ្ធិរបស់​​​ប្រជា​​​ជន​​​​​​ ពួកគេ​​​អាច​​​បោះឆ្នោត​​​​​​ឬ​​​មិន​​​បោះ [តាម​​​ចិត្ត​​​ពួកគេ​​​​​] ។ គាត់​​​ [សួន សេរី រដ្ឋា ] គ្រាន់តែ​​​បញ្ចេញទស្សនរបស់​​​ខ្លួន​​​ប៉ុណ្ណោះ​​​​​​​​​​​​​​​ ដូច្នេះវាមិនមែន​​​ជា​​​ការ​​​រំលោភ​​​ច្បាប់​​​ទេ។

លោក សុក សំអឿន ប្រធាន​​​ក្រុម​​​អ្នក​​​ច្បាប់​​​ការ​​​ពារសិទ្ធិកម្ពុជា ជា​​​អង្គការ​​​ក្រៅ​​​រដ្ឋា​​​ភិបាល​​​​​​ខាង​​​ផ្ដល់​​​ជំនួយផ្នែ​​ក​​​ច្បាប់​​​​​​ ​​​លើក​​​ឡើង​​​ថា ពុំមាន​​​ភ័ស្តុតាង​ច្បាស់លាស់​​​បញ្ជាក់​​​ថា ចល​​​នា​​​អំណាច​​​​ពល​រដ្ឋ​​​ខ្មែរ​​​ជាក្រុម​​​ភេរវករ​​​ឡើយ​​​ ។ប៉ុន្តែ​​​ លោក សុក សំអឿន ​​​មិន​​​ប្រាកដ​​​អំពី​​​ភាព​​​ស្រប​​​ច្បាប់​​​នៃ​​​អាវយឺត​​​ប្រឆាំង​​​​​​នឹង​​​ការ​​​បោះ​​​ឆ្នោត​​​​​​ទាំង​​​នោះទេ​​​។
លោក​​​បាន​​​មាន​​​ប្រសាសន៍​​​ថា “ សកម្មភាព​​​របស់​​​ពួកគេ​​​មិន​​​មែន​​​គ្រាន់​​​តែ​​​ជា​​​ការ​​​បញ្ចេញ​​​មតិ​​​ឡើយ​​​ ពួកគេ​​​ផ្សព្វផ្សាយ​​​ជា​​​សាធា​​​រណៈ​។ អាវយឺត​​​នោះ​​​បំបាក់​​​ទឹក​​​ចិត្ត​​​ប្រជា​​​ជន​​​មិន​​​ឲ្យ​​​ទៅបោះឆ្នោត​​​ ដូច្នេះ​​​ខ្ញុំគិត​​​ថា វា​​​រំខាន​​​ដល់​​​ការ​​​បោះឆ្នោត​​​ហើយ”។ ប៉ុន្តែ​​​លោក សំអឿន បានបន្ថែម​​​ថា ពាក្យ​​​ថា “ រំខាន”  ឬ “ ធ្វើ​​​ឲ្យ​​​រំាងស្ទះ” នេះ​​​មាន​​​ន័យ​​​​​​ទូលំទូលាយ​​​ណាស់​​​។ លោក​​​បាន​​​មាន​​​ប្រសាសន៍​​​ថា “ ប្រហែល​​​ជា​​​មក​​​ពី​​​ច្បាប់​​​នេះ​​​​​​មិនទាន់​​​​​​ច្បាស់​​​លាស់​​​ល្មម​​​ [នឹង​​​បញ្ចៀ​​​ស​​​ការបក​​​ស្រាយ​​​ខុស​​​] ហើយ​​​​​​”៕

ប្រែសម្រួល​​​ដោយ ភួន ច័ន្ទសេរីវុធ​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស