អតីតអ្នកភូមិបឹងកក់ប្រហែល៣០នាក់បានប្រគល់ញត្តិមួយជូនការិយាល័យធនាគារពិភពលោក និងស្ថានទូតមួយចំនួននៅរាជធានីភ្នំពេញកាលពីព្រឹកថ្ងៃសុក្រ ដោយស្នើសុំឲ្យឈប់ផ្តល់មូលនិធិទាំងអស់ដល់ក្រុមអ្នកតវ៉ាប្រឆាំងនឹងការបណ្ដេញចេញពីសហគមន៍បឹងកក់ជាយូរមកហើយនោះ។
ក្រុមអ្នកប្រឆាំងនឹងការតវ៉ារបស់អ្នកភូមិបឹងកក់នេះបានចោទប្រកាន់អ្នកស្រី ទេព វន្នី ជាស្ត្រីអ្នកនាំពាក្យដ៏ល្បីឈ្មោះរបស់សកម្មជនប្រឆាំងនឹងការបណ្ដេញចេញពីសហគមន៍បឹងកក់ ពីបទញុះញង់ និងបានចោទប្រកាន់អង្គការក្រៅរដ្ឋាភិបាលមួយចំនួនដែលបានគាំទ្រការងាររបស់អ្នកស្រី។
នៅក្នុងញត្តិរបស់់ពួកគាត់ អ្នកប្រឆាំងនឹងអ្នកតវ៉ាទាំងនេះបាននិយាយថា “ អ្នកស្រី ទេព វន្នី បានញុះញង់ប្រជាពលរដ្ឋទាំងក្មេងនិងចាស់ឲ្យធ្វើការតវ៉ាដើម្បីបានផលប្រយោជន៍ផ្ទាល់ខ្លួនរបស់អ្នកស្រីតាមរយៈការតវ៉ាជាសាធារណៈ”។អ្នកប្រឆាំងនឹងអ្នកតវ៉ាទាំងនេះបាននិយាយបន្ថែមថា “ អង្គការក្រៅរដ្ឋាភិបាលមួយចំនួនបានជួយអ្នកស្រី ក្នុងការរៀបចំផែនការធ្វើឲ្យខូចសណ្តាប់ធ្នាប់សាធារណៈ”។
ញត្តិរបស់អ្នកប្រឆាំងនឹងអ្នកតវ៉ាទាំងនេះ ដែលមានហត្ថលេខារបស់ប្រជាពលរដ្ឋ៦៧នាក់ ក៏បានលើកឡើងផងដែរថា សហគមន៍បឹងកក់នេះមិនបានទទួលរងផលប៉ះពាល់ពីដីសម្បទាននោះទេនិងបានចោទប្រកាន់អ្នកស្រី ទេព វន្នី ពីបទបំផ្លើសការពិត។
នៅមុខការិយាល័យបេសកកម្មរបស់សហភាពអឺរុបនៅតាមមហាវិថីព្រះនរោត្ដម អ្នកស្រី វង្ស សុខហេង អាយុ៤៩ឆ្នាំ ជាតំណាងម្នាក់ក្នុងចំណោមតំណាងរបស់អ្នកប្រឆាំងនឹងអ្នកតវ៉ាទាំងនេះបាននិយាយថា អង្គការក្រៅរដ្ឋាភិបាលកំពុងផ្ដល់កម្លាំងពីក្រោយការតវ៉ាប្រឆាំងនឹងការបណ្ដេញចេញពីសហគមន៍បឹងកក់។
អ្នកស្រី វង្ស សុខហេង បាននិយាយថា “ អង្គការក្រៅរដ្ឋាភិបាលដូចជាអង្គការសិទិ្ធលំនៅដ្ឋាន សមាគមធាងត្នោត និងអង្គការស្ពានសន្តិភាព បានជួយប្រជាពលរដ្ឋទាំងនេះ និងបានញុះញង់ពួកគេឲ្យធ្វើការតវ៉ា”។
លោក សៀ ភារម្យ នាយកអង្គការសិទ្ធិលំនៅដ្ឋានបានបញ្ជាក់ថា អង្គការរបស់លោក បានផ្ដល់ការពិគ្រោះយោបល់និងជំនួយផ្លូវច្បាប់ដល់សកម្មជនប្រឆាំងនឹងការបណ្ដេញចេញពីសហគមន៍បឹងកក់។
លោក អៀង វុឌ្ឍី នាយកប្រតិបត្តិរបស់អង្គការសមធម៌កម្ពុជា ដែលជាអង្គការក្នុងស្រុកឧបត្ថម្ភដោយអង្គការស្ពានសន្តិភាព បានមានប្រសាសន៍ថា វាជាការទទួលខុសត្រូវរបស់សង្គមសុីវិលក្នុងការធ្វើការងារសម្រាប់សិទ្ិ្ធមនុស្ស និងលទ្ធិប្រជាធិបតេយ្យនៅកម្ពុជា។
លោកបានមានប្រសាសន៍ថា “ យើងបានជួយការពារសិទិ្ធមនុស្ស និងបានផ្ដល់ការអប់រំផ្នែកច្បាប់ [ដល់អ្នកតវ៉ាប្រឆាំងនឹងការបណ្ដេញចេញពីសហគមន៍បឹងកក់]”។ លោកមានប្រសាសន៍បន្ថែមថា “ អង្គការសមធម៌កម្ពុជា មិនធ្វើការដើម្បីបម្រើឲ្យផលប្រយោជន៍បុគ្គលនោះទេ៕
ប្រែសម្រួលដោយ ស៊ុំ សុខភុំ