កាលពីម្សិលមិញ កងរាជអាវុធហត្ថបានឲ្យដឹងថា ខ្លួនកំពុងបន្តឃុំខ្លួនមន្ត្រីកងរាជអាវុធហត្ថពីរនាក់ដែលជាប់ពាក់ព័ន្ធក្នុងហេតុការណ៍កាលពីថ្ងៃសុក្រ ពេលមានការបាញ់ឡើងលើ ខណៈមានការប្រវាយប្រតប់គ្នា អំឡុងពេលហែក្បួនឃោសនាបោះឆ្នោតរបស់គណបក្សប្រឆាំងក្នុងរាជធានីភ្នំពេញនៅឡើយទេ។
យោងតាមសេចក្តីរាយការណ៍ព័ត៌មានអំពីហេតុការណ៍កាលពីយប់ថ្ងៃសុក្រនេះបានឲ្យដឹងថា មុនពេលកើតហេតុ ក្បួនដង្ហែរបស់គណបក្សសង្គ្រោះជាតិកំពុងធ្វើដំណើរតាមដងផ្លូវនានាក្នុងសង្កាត់ផ្សារដើមថ្កូវ ខណ្ឌចំការមន ស្រាប់តែពេលនោះ ក្រុមអ្នកគាំទ្រទាំងនេះបានប៉ះទង្គិចជាមួយក្រុមអ្នកគាំទ្រគណបក្សប្រជាជនកម្ពុជា ដែលកំពុងស៊ីផឹកក្នុងពិធីជប់លៀងនៅវីឡាដ៏ធំមួយ។
លោក យ៉ា គឹមអ៊ី មេបញ្ជាការកងរាជអាវុធហត្ថរាជធានី បានឲ្យដឹងថា មនុស្សពីរនាក់ដែលត្រូវបានឃុំខ្លួនពីដំបូងជុំវិញការពាក់ព័ន្ធក្នុងការផ្ទុះអាវុធនេះ ត្រូវបានដោះលែងវិញហើយ ប៉ុន្តែពីរនាក់ទៀត ដែលជាមន្ត្រីកងរាជអាវុធហត្ថដែរនោះ កំពុងស្ថិតនៅក្រោមការឃុំខ្លួននៅឡើយទេ។
លោក គឹមអ៊ី មានប្រសាសន៍ថា “កាលពីព្រឹក [ម្សិលមិញ] យើងបានបញ្ជូនមនុស្សពីរនាក់ទៅតុលាការដើម្បីធ្វើការសាកសួរ គឺឈ្មោះ អ៊ឹង ចាន់ថន ជាមន្ត្រីកងរាជអាវុធហត្ថខេត្តកណ្តាល ដែលបានបាញ់ឡើងលើ និងឈ្មោះ ឃី គឹមលន់ ជាម្ចាស់វីឡា [និងជាមន្ត្រីកងរាជអាវុធហត្ថលើផ្ទៃប្រទេស]”។ លោកបានបដិសេធមិនប្រាប់ឈ្មោះមនុស្សទាំងពីរនាក់ដែលត្រូវបានដោះលែងនោះទេ។
លោកបានបន្ថែមថា “ ព្រះរាជអាជ្ញាបានបញ្ជាឲ្យដោះលែងមនុស្សទាំងពីរនាក់នេះ ព្រោះពួកគេមិនជាប់ពាក់ព័ន្ធក្នុងការប្រើ អំពើហិង្សានោះទេ ពួកគេគ្រាន់តែជាអ្នក ចូលរួមក្នុងពិធីខួបកំណើតប៉ុណ្ណោះ”។
លោក ពូ ដាវី មេបញ្ជាការរងកងរាជអាវុធហត្ថរាជធានីភ្នំពេញ បានឲ្យដឹងថា លោក ចាន់ថន និងលោក គឹមលន់ ដែលមានឋានន្តរស័ក្តិជាវរសេនីយ៍ឯក និងជាអនុប្រធានការិយាល័យភ័ស្តុភារនៅបញ្ជាការដ្ឋានកងរាជអាវុធហត្ថលើផ្ទៃប្រទេស ស្ថិតនៅក្រោមការឃុំខ្លួននៅបញ្ជាការដ្ឋានកងរាជអាវុធហត្ថលើផ្ទៃប្រទេសនៅឡើយទេកាលពីយប់មិញនេះ។
លោកបានបន្តថា ពួកគេមិនទាន់ត្រូវបានចោទប្រកាន់នៅឡើយទេ ប៉ុន្តែថា តុលាការរាជធានីភ្នំពេញ បាននិងកំពុងតែសាកសួរពួកគេពាក់ព័ន្ធនឹងការបាញ់បោះខុសច្បាប់។
លោក ថង ឆន ចៅសង្កាត់ផ្សារដើមថ្កូវ បានឲ្យដឹងថា ហេតុការណ៍នេះបានចាប់ផ្តើមនៅពេលក្រុមអ្នកគាំទ្រគណបក្សសង្គ្រោះជាតិ ប្រទះឃើញស្លាកសញ្ញាគណបក្សប្រជាជនកម្ពុជានៅលើរបងផ្ទះវីឡាមួយ ខណៈពួកគេកំពុងហែក្បួនកាត់ទីនោះ។ ក្រុមអ្នកគាំទ្របាននាំគ្នាស្រែកថា លេខ៧ ដែលជាលេខរៀងរបស់គណបក្សសង្គ្រោះជាតិនៅលើសន្លឹកឆ្នោតក្នុងការបោះឆ្នោតឆ្នាំនេះ នៅមុខវីឡាដែលកំពុងប្រារព្ធពិធីជប់លៀងនោះ។
លោក ឆន បានបន្តថា បុរសៗនៅក្នុងបរិវេណភូមិគ្រិះនោះបានតបវិញដោយស្រែកថា លេខ៤ ដែលជាលេខរៀងរបស់គណបក្សប្រជាជនកម្ពុជា បណ្តាលឲ្យក្រុមអ្នកគាំទ្រគណបក្សសង្គ្រោះជាតិចោលដុំថ្ម ធ្វើឲ្យបែកកញ្ចក់រថយន្តមួយគ្រឿងនៅក្នុងភូមិគ្រឹះនោះ។
លោក លី រី បេក្ខជនតំណាងរាស្ត្ររបស់គណបក្សសង្គ្រោះជាតិប្រចាំមណ្ឌលរាជធានីភ្នំពេញ បានបដិសេធថា ការចោលដុំថ្មមិនមែនផ្តើមឡើងដោយក្រុមអ្នកគាំទ្ររបស់គណបក្សសង្គ្រោះជាតិទេ ហើយថា វត្ថុសម្រាប់ធ្វើសកម្មភាព ក្នុងនោះមានទាំងចានបាយផងនោះ ត្រូវបានចោលទៅលើក្រុមអ្នកហែក្បួន ពីខាងក្នុងបរិវេណភូមិគ្រិះនោះ។
លោក រី បានបន្តថា លោកបានទៅដល់កន្លែងកើតហេតុ បន្ទាប់ពីបានឮថា អ្នកគាំទ្រគណបក្សសង្គ្រោះជាតិចំនួនបីនាក់ត្រូវបានចាប់ទាញចូលក្នុងភូមិគ្រឹះនោះ ហើយត្រូវបានបង្ខាំងទុក។
លោកបានបញ្ជាក់ថា រំពេចនោះ យុវជនបួននាក់ជិះម៉ូតូម៉ាកហុងដាស្គូបភី មួយគ្រឿង បានបើកចេញពីភូមិគ្រឹះនោះ រួចបានវាយប្រហារលើក្រុមមនុស្សដែលភាគច្រើនជាអ្នកគាំទ្រគណបក្សសង្គ្រោះជាតិ។
លោក រី មានប្រសាសន៍ថា “ ពួកគេមិនព្រមឲ្យយើងចូលក្នុងភូមិគ្រិះនោះទេ ហើយបានចេញមកបាញ់ឡើងលើដើម្បីគំរាមយើង”។ លោកបន្ថែមថា ពេលមន្ត្រីនគរបាលមកដល់កន្លែងកើតហេតុនៅពេលបន្ទាប់មក ពួកគេមិនឃើញមានការឃុំខ្លួនអ្នកគាំទ្រទាំងនោះនៅក្នុងភូមិគ្រឹះនោះទេ។
យុវជននៅក្នុងបរិវេណភូមិគ្រិះដ៏ស្កឹមស្កៃដែលមានរបងយ៉ាងធំនិងមានបំពាក់កាមេរ៉ាសុវត្ថិភាពនៅពីលើនេះ បានបដិសេធមិននិយាយជាមួយអ្នកយកព័ត៌មានឡើយកាលពីម្សិលមិញ។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប. បានឲ្យដឹងថា ក្រុមមន្ត្រី គ.ជ.ប.នៅក្នុងរាជធានីភ្នំពេញបានពិនិត្យមើលរូបភាពវីដេអូដែលថតបានដោយកាមេរ៉ាសុវត្ថិភាពនោះហើយ ប៉ុន្តែមិនព្រមលាតត្រដាងប្រាប់ថា តើរូបភាពវីដេអូនោះបង្ហាញឲ្យឃើញសកម្មភាពអ្វីខ្លះទេ។
លោក នីថា បានមានប្រសាសន៍ថា “ ខ្ញុំមិនអាចនិយាយបានទេ។វាជាបញ្ហាបុគ្គលរវាងគ្រួសារមួយ និងក្រុមអ្នកធ្វើយុទ្ធនាការឃោសនាបោះឆ្នោត”។ លោកបន្តថា “ យើងស្គាល់អត្តសញ្ញាណអ្នកចោលដុំថ្ម និងបាញ់បោះហើយ ព្រោះសកម្មភាពរបស់ពួកគេត្រូវបានថតជាប់នៅក្នុងកាមេរ៉ានោះ”៕
(រាយការណ៍បន្ថែមដោយ Simon Lewis)
ប្រែសម្រួលដោយ ចេវ ប៊ុននី