ប្រជាពលរដ្ឋរាប់ពាន់នាក់ មានទាំងនិស្សិតកម្មករកម្មការិនីកាត់ដេរ ទាហាន និងមន្ត្រីរាជការ បាននាំគ្នាចូលទៅណែនណាន់តាន់តាប់ក្នុងបរិវេណពហុកីឡាដ្ឋានជាតិអូឡាំពិកកាលពីម្សិលមិញ ដើម្បីប្រារព្ធខួប៥ឆ្នាំនៃការចុះប្រាសាទព្រះវិហារក្នុងបញ្ជីបេតិកភណ្ឌពិភពលោករបស់អង្គការសហប្រជាជាតិ។
ដោយនៅតែប៉ុន្មានសប្ដាហ៍ទៀតដល់ថ្ងៃបោះឆ្នោតជាតិនាថ្ងៃទី២៨ខែកក្កដានោះ ព្រឹត្តិការណ៍កាលពីម្សិលមិញនេះបានក្លាយជាឆាកនយោបាយ ដោយមានមន្ត្រីរដ្ឋាភិបាលឥតអៀនខ្មាសមួយចំនួនបានឆ្លៀតឱកាសនេះទាញយកការគាំទ្របន្ថែមទៀតសម្រាប់លោកនាយករដ្ឋមន្ត្រី ហ៊ុន សែន។
ដោយត្រូវបានចុះក្នុងបញ្ជីបេតិកភណ្ឌពិភពលោកជាផ្លូវការកាលពីថ្ងៃទី៨ខែកក្កដា ឆ្នាំ២០០៨ ប្រាសាទសង់តាំងពីសតវត្សរ៍ទី១១នេះបានក្លាយជាចំណុចក្តៅនាំឲ្យមានភាពតានតឹងជាមួយប្រទេសថៃក្បែរខាង។ហើយទោះបីជារដ្ឋាភិបាលក្រុងបាងកក បានបោះបង់ការទាមទារយកប្រាសាទនេះជាផ្លូវការ នៅពេលតុលាការយុត្តិធម៌អន្ដរជាតិបានប្រគល់ប្រសាទព្រះវិហារឲ្យមកកម្ពុជាកាលពីឆ្នាំ១៩៦២ក្តី ក៏ការចុះប្រាសាទព្រះវិហារក្នុងបញ្ជីបេតិកភណ្ឌពិភពលោកកាលពីឆ្នាំ២០០៨ បានដុតកំហឹងអ្នកជាតិនិយមថៃឡើងវិញរហូតបង្កឲ្យមានការប៉ះទង្គិចគ្នាមួយប្រាវៗជាច្រើនលើកនៅតាមព្រំដែនបណ្តាលឲ្យមានអ្នកបាត់បង់ជីវិតចាប់តាំងពីពេលនោះមក។
បច្ចុប្បន្នថៃនិងកម្ពុជាកំពុងតតាំងគ្នាជាថ្មីទៀតនៅឯតុលាការយុត្តិធម៌អន្ដរជាតិ ពាក់ព័ន្ធនឹងដីទំហំ៤,៦គីឡូម៉ែត្រក្រឡានៅជាប់ប្រាសាទនេះ។ ពាក់ព័ន្ធនឹងបញ្ហានេះគេរំពឹងថា តុលាការនេះនឹងចេញសេចក្តីសម្រេចនៅចុងឆ្នាំនេះ។ មុនពេលបញ្ចប់ព្រឹត្តិការណ៍កាលពីម្សិលមិញ លោកឧបនាយករដ្ឋមន្ត្រី សុខ អាន បានធ្វើយុទ្ធនាការគាំទ្រលោកនាយករដ្ឋមន្ត្រីតាមរយៈការលើកសរសើរយ៉ាងពិសេស។
លោក សុខ អាន បានមានប្រសាសន៍ថា “ ជយោ! ព្រះរាជាណាចក្រកម្ពុជា! ព្រះរាជាណាចក្រអច្ឆរិយៈក្រោមការដឹកនាំរបស់សម្តេចតេជោ ហ៊ុន សែន”។
លោក ប៉ា សុជាតិវង្ស អភិបាលរាជធានីភ្នំពេញ ទើបឡើងកាន់តំណែងថ្មី ដែលបាននិពន្ធចម្រៀងមួយបទលើកសរសើរប្រាសាទព្រះវិហារក្នុងព្រឹត្តិការណ៍នេះ ក៏បានកោតសរសើរលោកនាយករដ្ឋមន្ត្រីដែរ។
លោក ប៉ា សុជាតិវង្ស បានមានប្រសាសន៍ថា “ ខ្ញុំនឹងបន្តគាំទ្រសម្តេចនាយករដ្ឋមន្ត្រី ហ៊ុន សែន ដឹកនាំប្រទេសកម្ពុជា ដើម្បីការអភិវឌ្ឍយ៉ាងឆាប់រហ័សក្នុងអាណត្តិនេះ និងអាណត្តិបន្ទាប់។ ខ្ញុំសូមអបអរសាទរ និងសម្តែងការដឹងគុណសម្តេច ហ៊ុន សែន ចំពោះការដឹកនាំជាតិប្រកបដោយគតិបណ្ឌិត និងចក្ខុវិស័យដ៏ភ្លឺថ្លា ក្នុងការការពារអធិបតេយ្យជាតិ”។
ក្នុងចំណោមមន្ត្រីដទៃទៀតដែលបានចូលរួមក្នុងព្រឹត្តិការណ៍កាលពីម្សិលមិញនេះដែរ រួមមានទាំងលោក ហ៊ុន ម៉ានី កូនប្រុសរបស់លោក ហ៊ុន សែន ដែលជាប្រធានចលនាយុវជនរបស់គណបក្សប្រជាជនកម្ពុជានិងជាបេក្ខជនតំណាងរាស្ត្រនៅមណ្ឌលខេត្តកំពង់ស្ពឺ នៅក្នុងការបោះឆ្នោតជាតិនាខែនេះផងដែរ៕
ប្រែសម្រួលដោយ ហម សុផាណ្ណា