ក្រសួងការបរទេស និងសហប្រតិបត្តិការអន្តរជាតិ បានប្រកាសកាលពីថ្ងៃសុក្រសប្ដាហ៍មុនថា នៅថ្ងៃពុធខាងមុខនេះ ប្រទេសកូរ៉េខាងត្បូងនឹងចុះហត្ថលេខាលើកិច្ចព្រមព្រៀងរយៈពេលបួនឆ្នាំ ដើម្បីផ្ដល់ប្រាក់កម្ចីបន្ថែមចំនួន២០០លានដុល្លារដល់សមភាគីកម្ពុជា ក្នុងគោលបំណងកែលម្អផ្លូវផ្នល់ និងសាងសង់ទំនប់វារីអគ្គិសនីថ្មីមួយនៅខេត្តបាត់ដំបងនៃប្រទេសកម្ពុជា។
សេចក្ដីប្រកាសនេះបានបង្ហាញថា លោកនាយករដ្ឋមន្ត្រី ហ៊ុន សែន និងលោក ហោ ណាំហុង ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នឹងចូលរួមក្នុងពិធីចុះហត្ថលេខាលើកិច្ចព្រមព្រៀងជាមួយលោក គឹម ហានស៊ូ (Kim Han-soo) ឯកអគ្គរដ្ឋទូតកូរ៉េខាងត្បូង។
សេចក្ដីប្រកាសដដែលបានលើកឡើងបន្ថែមទៀតថា ប្រាក់កម្ចីទាំងនេះនឹងត្រូវបានប្រើប្រាស់សម្រាប់អនុវត្តគម្រោងស្ដារផ្លូវជាតិលេខ២ លេខ២២ និងលេខ៤៨ ព្រមទាំងផ្លូវជនបទជាច្រើនទៀតនៅទូទាំងប្រទេសកម្ពុជា និងគម្រោងសាងសង់ទំនប់វារីអគ្គិសនីពហុបំណង ដោនទ្រី (Dauntri Mul-tipurpose Dam) “ ដែលស្ថិតនៅចន្លោះរវាងខេត្តបាត់ដំបង និងខេត្តពោធិសាត់”។
លោក លី យុនសឺក (Lee Yoon-seok) លេខាទី១នៃស្ថានទូតកូរ៉េខាងត្បូង បានមានប្រសាសន៍ថា ប្រាក់កម្ចីទាំងនេះនឹងបានមកពីធនាគារអាហរ័ណ-នីហរ័ណកូរ៉េ (Export-Import Bank of Korea) ហើយកិច្ចព្រមព្រៀងនេះនឹងត្រូវបានប្រើប្រាស់ជំនួសកិច្ចព្រមព្រៀងផ្ដល់ប្រាក់កម្ចីរយៈពេលបួនឆ្នាំដែលអស់សុពលភាពកាលពីឆ្នាំមុន។ លោកបានលើកឡើងនៅក្នុងអ៊ីម៉េលថា “ យោងតាមកិច្ចព្រមព្រៀងនេះ រដ្ឋាភិបាលកូរ៉េ នឹងផ្ដល់ប្រាក់២០០លានដុល្លារ (សម្រេចរួចហើយ) ប៉ុន្តែវានឹងអាស្រ័យទៅលើការចរចាជាមួយរដ្ឋាភិបាលកម្ពុជា។
លោក លី មិនអាចផ្ដល់ព័ត៌មានលម្អិតភ្លាមៗទាក់ទងនឹងគម្រោងទំនប់វារីអគ្គិសនីដោនទ្រីនេះបានទេ ហើយមន្ត្រីក្រសួងឧស្សាហកម្ម រ៉ែ និងថាមពល ក៏បានឲ្យដឹងផងដែរថា ខ្លួនមិនបានដឹងអំពីគម្រោងនេះទេ ហើយក៏បានបដិសេធមិនធ្វើអត្ថាធិប្បាយ។
យោងតាមរបាយការណ៍ឆ្នាំ២០០៩របស់អង្គការមិនមែនរដ្ឋាភិបាល ដែលបានដកស្រង់ទិន្នន័យរដ្ឋាភិបាល បានបង្ហាញថា ក្រុមហ៊ុនកូរ៉េជាច្រើនកំពុងសិក្សាលទ្ធភាពសាងសង់ទំនប់វារីអគ្គិសនីចំនួនពីរនៅខេត្តបាត់ដំបង ដែលមានកម្លាំងរួមគ្នា៦០មេហ្កាវ៉ាត់។
ការចុះកិច្ចព្រមព្រៀងក្នុងសប្ដាហ៍នេះ នឹងដំណើរការទៅមុខ ទោះបីជាមានសំណើពីតំណាងរាស្ត្រមកពីគណបក្សប្រឆាំងកាលពីខែមុន ឲ្យម្ចាស់ជំនួយបរទេសនៅក្នុងប្រទេសកម្ពុជា បញ្ឈប់ការចុះហត្ថលេខាលើកិច្ចព្រមព្រៀងនានាជាមួយរដ្ឋាភិបាលបច្ចុប្បន្នក៏ដោយ។
តំណាងរាស្ត្រទាំងនេះបានលើកឡើងថា រដ្ឋាភិបាលបច្ចុប្បន្នមិនមានភាពស្របច្បាប់ទេ ចាប់តាំងពីបានបណ្ដេញខ្លួនកាលពីពេលថ្មីៗនេះ ពីរដ្ឋសភា ដោយសារតែរឿងបច្ចេកទេសភាព និងបានជំរុញឲ្យម្ចាស់ជំនួយរង់ចាំយ៉ាងតិចរហូតដល់មានរដ្ឋសភាស្របច្បាប់ថ្មីជាផ្លូវការក្រោយថ្ងៃបោះឆ្នោតជាតិទី២៨ ខែកក្កដា។
លោក លី មានប្រសាសន៍ថា លោកមិនបានដឹងទេថា តើប្រទេសកូរ៉េខាងត្បូងបានទទួលសំណើរបស់គណបក្សប្រឆាំងដែរឬយ៉ាងណាទេ ហើយបានបដិសេធមិនធ្វើអត្ថាធិប្បាយបន្ថែមទៀតទេ។ លោកបានមានប្រសាសន៍ដូច្នេះថា “ អ្វីដែលខ្ញុំអាចនិយាយបានគឺថា កិច្ចព្រមព្រៀងនេះមិនត្រូវបានផ្ដួចផ្ដើមដោយគំនិតផលប្រយោជន៍នយោបាយទេ។ ដូចដែលអ្នកអាចឃើញហើយ… យើងគួរតែបានចុះហត្ថលេខាលើកិច្ចព្រមព្រៀងនេះជាយូរមកហើយ។ ការរៀបចំកិច្ចព្រមព្រៀងនេះបានប្រើពេលវេលាយ៉ាងយូរ”៕
(រាយការណ៍បន្ថែមដោយ អូន ភាព)
ប្រែសម្រួលដោយ កង សុធា