28 C
Phnom Penh

អគ្គិភ័យ​ឆាប​ឆេះ​ផ្សារ​​​មួយ​កន្លែង​នៅ​ក្នុង​ក្រុង​​សៀម​រាប​បណ្តាល​ឲ្យ​ខូចខាត​ជាង​មួយលាន​ដុល្លារ

ដោយ ឌឹ ខេមបូឌា ដេលី

បទវិភាគ

យោង​តាមក្រុម​អាជីវ​ករ​​និង​មន្ត្រី​នគរ​បាល​​បាន​ឲ្យ​ដឹង​ថា អគ្គិភ័យ​​បង្ក​ឡើង​ដោយការ​ឆ្លង​ចរន្ត​អគ្គិស​នី​ បាន​ឆាប​ឆេះ​ផ្សារ​ដើម​ក្រឡាញ់​ក្នុងក្រុង​សៀមរាប​កាលពី​ពេល​ទៀប​ភ្លឺ​ឈាន​ចូល​ព្រឹកថ្ងៃសុក្រ ដោយ​បំផ្លាញ​តូបអស់​ចំនួន​២០០តូប​ និង​បង្ក​​ការ​ខាត​បង់គិត​ជា​ទឹក​​ប្រាក់​ជាង​មួយលាន​ដុល្លារ​។

លោក ទិត្យ ណារ៉ុង អធិការ​ក្រុង​សៀម​រាប បាន​មាន​ប្រសាសន៍ថា ផ្សារ​ដែល​មានផ្ទៃ​ទំហំ​​​៨.០០០​ម៉ែត្រ​ក្រឡា​នៅ​ក្នុងសង្កាត់​គោក​ចក​ ក្រុង​សៀម​រាបនេះ​ មាន​តូប​សរុប​ចំនួន​៤០០​តូប និង​ធ្វើ​ប្រតិ​បត្តិការ​ដោយ​ម្ចាស់​ឯក​ជន​ម្នាក់​ដែល​ជួល​ដី​ផ្សារ​នេះ​ពី​រដ្ឋាភិបាល​។

លោក​បាន​មាន​ប្រសាសន៍ថា “ អគ្គិភ័យ​នេះ​បង្ក​ឡើង​ដោយ​ការ​ឆ្លង​ចរន្ត​អគ្គិសនី​នៅ​ម៉ោងប្រហែល​​១និង​៤០នាទី រំលង​អធ្រាត្រ។ក្រុមពន្លត់​អគ្គិភ័យ និង​រថយន្ត​ពន្លត់​អគ្គិភ័យ​ចំនួន​១០គ្រឿង បាន​ព្យាយាម​ពន្លត់​អគ្គិភ័យនេះ​រហូត​ដល់​ម៉ោង​៥ទៀប​ភ្លឺ​ទើប​អណ្តាត​ភ្លើង​រលត់ ប៉ុន្តែ ពួកគេ​អាច​សង្គ្រោះ​បាន​ចំនួន​២០០តូប​ប៉ុណ្ណោះ”។ លោក​បាន​បន្ថែម​ថា ពុំ​មានអ្នក​របួស​ទេ​នៅ​ក្នុង​ហេតុ​ការណ៍​អគ្គិភ័យ​នេះ។

កាលពីម្សិល​មិញ អាជីវករ​ចំនួន​១៥៧​នាក់​​ជា​ម្ចាស់​តូប​ចំនួន​២០០តូប​ដែល​រង​ការ​ខូចខាត​ដោយសារ​​អគ្គិភ័យ​នោះ បាន​នាំ​គ្នា​ដាក់​របាយ​ការណ៍ទៅ​លោក សូ ប្លាតុង អភិ​បាល​​រង​ក្រុង​សៀមរាប​ ដើម្បី​ស្វែង​រក​ជំនួយ​ក្នុង​ការ​​ទាមទារ​​ប្រាក់​សំណង​ពី​ម្ចាស់​ផ្សារនេះ សម្រាប់​ការ​ខូច​ខាត​ទំនិញ​របស់​ខ្លួន​ ដែល​លោក ទិត្យ ណារ៉ុង​ បាន​ប៉ាន់​ប្រមាណ​ថា មាន​តម្លៃ​ប្រហែល​១,១លាន​ដូល្លារ។

លោក សូ ប្លាតុង​ បាន​មាន​ប្រសាសន៍​កាល​ពីម្សិល​មិញថា ក្រុម​ពន្លត់​អគ្គិភ័យ​បាន​ព្យាយាម​អស់​ពី​សមត្ថភាព​ ដើម្បី​សង្គ្រោះ​តូប​ទាំង​អស់​នោះ​ ប៉ុន្តែ​ការ​ខំ​ប្រឹង​ប្រែង​របស់​ពួកគេ​ត្រូវ​បាន​រារាំង​ដោយ​សារ​តែ​ផ្លូវ​នៅ​ផ្សារនេះ​តូច​ចង្អៀត​ និង​មាន​ខ្សែ​ភ្លើង​ខ្វែង​ខ្វាត់​ច្រើន​ពេក​។

លោក​ សូ ប្លាតុង បាន​មាន​ប្រសាសន៍​បន្ថែមទៀតថា “ ការ​សន្និដ្ឋាន​ដំបូង​របស់​យើង​គឺ​ថា អគ្គិភ័យដែលឆាប​​​ឆេះ​​​ផ្សារ​នេះ​បង្ក​ឡើង​ដោយ​ការ​ឆ្លង​ចរន្ត​អគ្គិសនី ប៉ុន្តែ នគរបាល​កំពុង​បន្ត​ស៊ើប​អង្កេត​រក​មូល​ហេតុ​បង្ក​ឲ្យ​មាន​អគ្គិ​ភ័យ​នេះ​”។ នេះ​​មិន​មែន​ជាលើក​ទី១​ទេ​ ដែល​ផ្សារ​នៅ​ក្នុង​ក្រុង​ទេស​ចរណ៍​មួយ​​នេះ ត្រូវ​បាន​អគ្គិភ័យ​ឆាប​ឆេះ​ដោយ​សារ​តែ​​វិធាន​ការ​សុវត្ថិភាព​ធូររលុង​​។

គួរ​រំឭក​ថា កាលពី​ខែ​ធ្នូ មនុស្ស​ប្រាំបីនាក់​ក្នុង​នោះ​មាន​កុមារ​បួន​នាក់​ ​បាន​ស្លាប់​​​នៅ​ពេល​អគ្គិភ័យ​មួយបង្ក​ឡើង​ដោយ​ការ​ឆ្លង​ចរន្ត​អគ្គិសនីដែរ ​បាន​ឆាប​ឆេះ​ផ្សារ​រាត្រី​ដ៏​ពេញ​និយម​ក្នុង​ក្រុង​សៀមរាប។

ចំណែក​ឯ​នៅ​ក្នុង​រាជធានី​ភ្នំពេញវិញ នៅ​ខែ​កក្កដាឆ្នាំមុន អគ្គិភ័យ​ស្រដៀង​គ្នា​នេះ​បាន​ឆាប​ឆេះ​ផ្សារ​ទួល​សង្កែ​ បាន​បំផ្លាញ​ផ្ទះ​អស់ចំនួន​៥៧ខ្នង​ និង​តូប​របស់​អាជីវ​ករ​អស់​ជា​ច្រើន​តូប៕

ប្រែសម្រួលដោយ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស