តំណាងក្រុមហ៊ុនរោងចក្រស្បែកជើងជប៉ុនយីហោ អាស៊ីក (ASICS) បានឲ្យដឹងថា សមាជិកគណៈគ្រប់គ្រងក្រុមហ៊ុននេះបានធ្វើដំណើរមកដល់រាជធានីភ្នំពេញ កាលពីថ្ងៃសុក្រ ហើយបានយល់ព្រមផ្តល់សំណងដល់គ្រួសារជនរងគ្រោះដែលបានស្លាប់ក្នុងហេតុការណ៍ដួលរលំអគាររោងចក្រមួយកន្លែងកាលពីខែឧសភា។
លោក រ៉ុន ភីធ័រសេន (Ron Pietersen) នាយកគ្រប់គ្រងក្រុមហ៊ុន អាស៊ីក ថ្លែងថា ក្រុមហ៊ុនមានការសោកស្តាយជាខ្លាំង ចំពោះការបាត់បង់អាយុជីវិតរបស់ជនរងគ្រោះ។ លោកបានមានប្រសាសន៍ថា “ វាគ្រាន់តែជាប្រាក់កាសប៉ុណ្ណោះ។ វាមិនអាចជំនួសអ្វីដែលគ្រួសារជនរងគ្រោះបានបាត់បង់ឡើយ ក៏ប៉ុន្តែ យើងគិតថា ចំនួនទឹកប្រាក់នេះគឺសមល្មមអាចទទួលយកបាន ហើយវាគួរតែអាចជួយឲ្យពួកគាត់ចាប់ផ្តើមជីវភាពថ្មីបាន”។
ជាយ៉ាងណា លោកបានបដិសេធមិនបញ្ជាក់អំពីចំនួនជាក់លាក់ទេ “ ដើម្បីសុវត្ថិភាពគ្រួសារជនរងគ្រោះ” ហើយលោកបានឲ្យដឹងថា គ្រួសារទាំងនោះនឹងទទួលបានចំនួនទឹកប្រាក់សរុបតែម្តង។
គួររំឭកថា កម្មករពីរនាក់ ម្នាក់ឈ្មោះ ស៊ឹម ស្រីតូច អាយុ២២ឆ្នាំ និងម្នាក់ទៀតឈ្មោះ រឹម សារឿន អាយុ២២ឆ្នាំដូចគ្នា បានបាត់បង់ជីវិតកាលពីថ្ងៃទី១៦ខែឧសភា នៅពេលប្លង់សេនៃអគាររោងចក្រតៃវ៉ាន់ឈ្មោះ វីងស្តា ស៊ូ ខូ អិលធីឌី (Wing Star Shoes Co., Ltd.) ក្នុងខេត្តកំពង់ស្ពឺ បានបាក់រលំហើយសង្កត់លើកម្មករ ដែលមកដល់កន្លែងធ្វើការនៅពេលព្រឹក។
អាជ្ញាធរបានឲ្យដឹងថា ធ្នឹមដែកទ្រពិដានបេតុងបានបាក់ព្រោះតែមិនអាចទ្រទម្ងន់ឡាំងដាក់ស្បែកជើង ដោយសារអគារនេះត្រូវបានសាងសង់ខុសបច្ចេកទេស និងមិនមានលិខិតអនុញ្ញាតត្រឹមត្រូវ។ អាជ្ញាធរបានសន្យានៅថ្ងៃកើតហេតុថានឹងចាប់ខ្លួនអ្នកទទួលខុសត្រូវចំពោះហេតុការណ៍នេះមកផ្តន្ទាទោសចំពោះមុខច្បាប់ ប៉ុន្តែរហូតមកទល់នឹងពេលនេះគឺនៅមិនទាន់មានការចាត់វិធានការណាមួយចំពោះមន្ត្រីរោងចក្រ ឬក្រុមហ៊ុនសំណង់ដែលបានសាងសង់រោងចក្រនេះទេ។
លោក ភីធ័រសេន លើកឡើងថាក្រុមហ៊ុន អាស៊ីក បានស្នើឲ្យរោងចក្រចំនួនប្រាំបួនក្នុងចំណោមរោងចក្រផ្គត់ផ្គង់របស់ខ្លួននៅប្រទេសកម្ពុជា ឆ្លងកាត់ការត្រួតពិនិត្យពីក្រុមហ៊ុនដែលជាភាគីទី៣ក៏ពិតមែន ប៉ុន្តែ រដ្ឋាភិបាលក៏គួរតែធានាឲ្យបានថា មានការអនុវត្តត្រឹមត្រូវតាមច្បាប់និងបទដ្ឋានក្នុងវិស័យសំណង់ដែរ ហើយថា បេឡាជាតិរបបសន្តិសុខសង្គម ដែលជាមូលនិធិបង្កើតឡើងបំណង ផ្តល់សំណាញ់់សុវត្ថិភាពដល់កម្មកររងរបួសឬបាត់បង់ជីវិតក្នុងពេលកំពុងធ្វើការនោះ ត្រូវផ្តល់សំណងសមរម្យដល់គ្រួសារជនរងគ្រោះ។
លោក ភីធ័រសេន បានមានប្រសាសន៍ថា “ រដ្ឋាភិបាលគ្មានហេតុផលអ្វីត្រូវទុកឲ្យយើងរា៉ប់រងសព្វបែបយា៉ងទេ ជាពិសេសគឺបញ្ហាពាក់ព័ន្ធនឹងសំណង់។ ខ្ញុំគិតថា រដ្ឋាភិបាលគួរតែមានចំណែកទទួលខុសត្រូវ ហើយរឿងថែទាំគ្រួសារជនរងគ្រោះក៏ដូចគ្នាដែរ រដ្ឋាភិបាលមានចំណែកទទួលខុសត្រូវ។ [បេឡាជាតិរបបសន្តិសុខសង្គម] គួរតែទទួលខុសត្រូវ ហើយប្រសិនបើពួកគេមានកាតព្វកិច្ចជួយគ្រួសារជនរងគពួកគេគួរតែបំពេញកាតព្វកិច្ចនេះឲ្យបាន”។
ដោយបានបដិសេធមិនប្រាប់ឈ្មោះក្រុមហ៊ុនសំណង់ដែលទទួលខុសត្រូវចំពោះការសាងសង់រោងចក្រនេះ លោក ភីធ័រសេន បានលើកឡើងថា រដ្ឋាភិបាលក៏ត្រូវទទួលខុសត្រូវដែរ។ លោកបានមានប្រសាសន៍ថា “ នេះគឺជាបញ្ហារបស់អាជ្ញាធរ”។ លោកបានមានប្រសាសន៍ឲ្យដឹងបន្ថែមទៀតថា “ ប្រសិនបើមានក្រុមហ៊ុនសំណង់ណាមិនអនុវត្តតាមបទដ្ឋាន អាជ្ញាធរត្រូវដោះស្រាយ នេះគឺជាការរំពឹងរបស់ខ្ញុំ”។
លោក ឃន វ៉េត ដែលត្រូវជាឪពុករបស់ជនរងគ្រោះឈ្មោះ ស៊ឹម ស្រីតូច បានបញ្ជាក់ថា ពិតជាមានការផ្តល់សំណងពីក្រុមហ៊ុន អាស៊ីក មែន។ ប៉ុន្តែលោកបានបដិសេធមិនបញ្ជាក់ពីចំនួនទឹកប្រាក់ជាក់លាក់ ដែលស្ថិតក្នុងសំណងនេះទេ។ លោកបាននិយាយថា “ ខ្ញុំនៅតែនឹកកូនស្រីរបស់ខ្ញុំ ហើយខ្ញុំមានទុក្ខក្រៀមក្រំខ្លាំងណាស់ចំពោះការស្លាប់របស់នាង”។ លោក ឃន វ៉េត បានបញ្ជាក់ឲ្យដឹងបន្តទៀតថា “ សំណង [ពីក្រុមហ៊ុនអាស៊ីក] មានចំនួនសមរម្យហើយ ក៏ប៉ុន្តែ វាមិនអាចធៀបនឹងជីវិតរបស់កូនស្រីខ្ញុំបានទេ”។
អ្នកស្រី នួន ឆវី ដែលត្រូវជាភរិយារបស់ជនរងគ្រោះឈ្មោះ រឹម សារឿន និងជាម្តាយមានកូនអាយុពីរខែម្នាក់ក្នុងបន្ទុក បានឲ្យដឹងថា បន្ថែមលើប្រាក់សំណងរបស់ក្រុមហ៊ុន អាស៊ីក បេឡាជាតិរបបសន្តិសុខសង្គម បានសន្យាថា រៀងរាល់បីខែម្តង ស្ថាប័ននេះនឹងផ្តល់ប្រាក់៧០ភាគរយនៃប្រាក់ខែប្រហែល១៤០ដុល្លាររបស់់ស្វាមីអ្នកស្រីដែលបានបាត់បង់ជីវិតទៅហើយនោះ៕
ប្រែសម្រួលដោយ កង សុធា