មន្ត្រីបានឲ្យដឹងកាលពីម្សិលមិញថា សមាគមអ្នកប្រជាធិបតេយ្យ ជាអង្គការក្រៅរដ្ឋាភិបាលមួយបង្កើតឡើងដោយ លោក ម៉ម សូណង់ដូ ម្ចាស់ស្ថានីយវិទ្យុសម្បុកឃ្មុំ ដែលជាវិទ្យុឯករាជ្យ បានប្រកាសជាផ្លូវការគាំទ្រគណបក្សសង្គ្រោះជាតិដែលជាគណបក្សប្រឆាំងខណៈពេលគណបក្សនេះកំពុងតែព្យាយាមយកឈ្នះគណបក្សកាន់អំណាចនៅក្នុងការបោះឆ្នោតជាតិ ដែលនឹងមកដល់ក្នុងពេលដ៏ខ្លីខាងមុខនេះ។
លោក ម៉ម សូណង់ដូ ប្រកាសអំពីសេចក្តីសម្រេចគាំទ្របក្សសង្គ្រោះជាតិជាផ្លូវការនេះ កាលពីព្រឹកថ្ងៃសៅរ៍ ខណៈពេលដែលសមាគមអ្នកប្រជាធិបតេយ្យ ដែលអប់រំសហគមន៍នៅជនបទដាច់ស្រយាលអំពីសិទ្ធិមនុស្ស និងសិទ្ធិការបោះឆ្នោត ប្រារព្ធខួបលើកទី៣នៃការបង្កើតសមាគមនេះនៅស្ថានីយវិទ្យុសម្បុកឃ្មុំនៅក្នុងសង្កាត់បឹងទំពុនខណ្ឌមានជ័យ រាជធានីភ្នំពេញ។
លោកបានមានប្រសាសន៍នៅឯសនិ្នសីទកាសែតមួយបន្ទាប់ពីពិធីជួបជុំនោះថា “ ខ្ញុំបានជួបជាមួយសមាជិកទាំងអស់របស់យើងដែលបានមកចូលរួម ហើយពិភាក្សាគ្នាថា តើយើងគួរគាំទ្រគណបក្សណាមួយឬយ៉ាងណា ហើយពួកគេទាំងអស់បានបង្ហាញបំណងរបស់ខ្លួន បោះឆ្នោតគាំទ្របក្សសង្គ្រោះជាតិ”។
សមាគមអ្នកប្រជាធិបតេយ្យ និងស្ថាបនិករបស់សមាគមនេះត្រូវបានរដ្ឋាភិបាលចោទប្រកាន់កាលពីឆ្នាំមុនពីបទបង្កើតចលនាអបគមន៍នៅក្នុងខេត្តក្រចេះ ជាការចោទប្រកាន់មួយដែលធ្វើឲ្យលោក ម៉ម សូណង់ដូ ជាប់ពន្ធនាគារព្រៃស។ ប៉ុន្តែ ថ្វីបើធ្លាប់តែរិះគន់គណបក្សកាន់អំណាចដោយបើកចំហក្តី ក៏នេះជាលើកទី១ ហើយដែលសមាគមនេះ ឬលោក ម៉ម សូណង់ដូ បានប្រកាសជាសាធារណៈអំពីការស្មោះស្ម័គ្រចំពោះគណបក្សនយោបាយ។
ជាការពិតណាស់ កន្លងមកលោក ម៉ម សូណង់ដូ ធ្លាប់បានរិះគន់គណបក្ស សម រង្សុី ដែលជាគណបក្សប្រឆាំង និងគណបក្សសិទ្ធិមនុស្ស ដែលបានបញ្ចូលគ្នា កាលពីឆ្នាំមុនបង្កើតបានជាគណបក្សសង្គ្រោះជាតិ។ ហើយកាលពីខែឧសភាកន្លងផុតទៅថ្មីៗនេះ លោកបានរិះគន់គណបក្សថ្មីនេះថាគ្មានសមត្ថភាពផ្តល់សំឡេងប្រឆាំងប្រកបដោយប្រសិទ្ធភាពស្របតាមលទ្ធិប្រជាធិបតេយ្យឡើយ។
លោក ម៉ម សូណង់ដូ បានមានប្រសាសន៍ថា “ ខ្ញុំគាំទ្រគណបក្សសង្គ្រោះជាតិស្របតាមសេចក្តីសម្រេចរួមរបស់សមាជិកខ្ញុំ ដែលព្រមព្រៀងគ្នាបោះឆ្នោតគាំទ្រគណបក្សនេះ”។ លោកបានអះអាងថា លោកមិនបានចូលរួមពាក់ព័ន្ធក្នុងយុទ្ធនាការឃោសនារបស់គណបក្សនយោបាយគណបក្សទេ។
លោកបានមានប្រសាសន៍បន្តថា “ គ្រាន់តែខ្ញុំគាំទ្រគណបក្សមួយមិនគាំទ្រគណបក្សមួយទៀត មិនមានន័យថា ខ្ញុំបានចូលរួមក្នុងឆាកនយោបាយទេ។ ខ្ញុំនឹងនៅតែជាម្ចាស់ឯករាជ្យនៃស្ថានីយវិទ្យុនិងសមាគមអ្នកប្រជាធិបតេយ្យរបស់ខ្ញុំ មិនថាគណបក្សណាឈ្នះឆ្នោតនោះទេ”។
លោក ម៉ម សូណង់ដូ បានបកស្រាយអំពីសេចក្តីសម្រេចរបស់លោក និងសមាគមលោកថា ជាភារកិច្ចអ្នកស្នេហាជាតិ ហើយលោកបានជំរុញឲ្យប្រជាពលរដ្ឋកម្ពុជា ចូលរួមបោះឆ្នោតជាមួយលោកដើម្បីគ្រប់គ្រងអំណាចរបស់គណបក្សប្រជាជនកម្ពុជា ប្រសិនបើមិនអាចបញ្ចប់ការកាន់អំណាចរបស់គណបក្សនេះបានទេនោះ។
លោកមានប្រសាសន៍ថា“ ខ្ញុំសូមអំពាវនាវដល់ប្រជាពលរដ្ឋទាំងអស់ឲ្យគាំទ្រ [គណបក្សសង្គ្រោះជាតិ] ដើម្បីយើងអាចកាត់បន្ថយអំណាចរបស់គណបក្សកាន់អំណាច បញ្ឈប់ការរំលោភបំពានសិទ្ធិមនុស្ស និងបញ្ចប់ការបណ្តេញចេញដោយសារការផ្តល់ដីសម្បទានយ៉ាងច្រើនឲ្យទៅក្រុមហ៊ុនវៀតណាម”។
កាលពីម្សិលមិញ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានច្រានចោលព័ត៌មាននេះ ហើយមានប្រសាសន៍ថា ទោះបីលោក ម៉ម សូណង់ដូ ប្រហែលជាទើបតែបានប្រកាសដូច្នេះក្តី ក៏គាត់បានក្លាយជាសមាជិកគណបក្សប្រឆាំងជាយូរមកហើយដែរ។
លោកបានថ្លែងថា “ ការប្រកាសពីការគាំទ្ររបស់គាត់ចំពោះ [គណបក្សសង្គ្រោះជាតិ] គ្មានអ្វីចម្លែកទេ ខ្ញុំយល់ថា វាជាការសារភាពច្រើនជាងបន្ទាប់ពីគាត់បានលាក់មុខមាត់ពិតរបស់គាត់ជាយូរមកហើយនោះ”។ លោកបានបន្ថែមថា លោក ម៉ម សូណង់ដូ បានប្រឆាំងនឹងរដ្ឋាភិបាលយូរមកហើយ និងបានប្រើប្រាស់អង្គការក្រៅរដ្ឋាភិបាលព្រមទាំងស្ថានីយ៍វិទ្យុរបស់លោកដើម្បីបោកបញ្ឆោតប្រជាពលរដ្ឋឲ្យគាំទ្រគណបក្សប្រឆាំង៕
ប្រែសម្រួលដោយ ហម សុផាណ្ណា