មន្ត្រីបានឲ្យដឹងថា លោកនាយករដ្ឋមន្ត្រី ហ៊ុន សែន បានបរិច្ចាគប្រាក់ចំនួន៣០០.០០០ដុល្លារសម្រាប់ការសាងសង់ផ្សារមួយនៅក្រុងសៀមរាបឡើងថ្មី បន្ទាប់ពីអគ្គិភ័យបានឆាបឆេះតូបលក់ដូរអស់ចំនួន២០០តូប បណ្ដាលឲ្យខូចខាតគិតជាទឹកប្រាក់ជាង១លានដុល្លារ។
យោងតាមលោក ទិត្យ ណារ៉ុង អធិការនគរបាលក្រុងសៀមរាបបានឲ្យដឹងថា លោក សៀង ណាំ តំណាងរាស្ត្រមកពីគណបក្សប្រជាជនកម្ពុជាដែលកំពុងឈរឈ្មោះជាថ្មីនៅមណ្ឌលខេត្តសៀមរាប ក្នុងពេលបោះឆ្នោតជាតិនាថ្ងៃទី២៨ ខែកក្កដា និងលោក ឃីម ប៊ុនសុង អភិបាលខេត្តនេះ បានជួបជាមួយអាជីវករមកពីផ្សារដើមក្រឡាញ់នៅក្នុងសង្កាត់គោកចក កាលពីព្រឹកម្សិលមិញ។
លោកបានមានប្រសាសន៍ថា “ [មន្ត្រីទាំងពីររូបនេះ] បានជួបជាមួយអាជីវករ និងបានប្រកាសថា [លោកនាយករដ្ឋមន្ត្រី] សម្ដេច ហ៊ុន សែន នឹងបរិច្ចាគប្រាក់ចំនួន៣០០.០០០ដុល្លារសម្រាប់ការសាងសង់ផ្សារនេះឡើងវិញ។ សម្ដេចនាយករដ្ឋមន្ត្រីនឹងជួយសាងសង់ផ្សារនេះឡើងវិញ រហូតចប់រួចរាល់” ហើយការងារសាងសង់នឹងចាប់ផ្ដើមក្នុងពេលឆាប់ៗតាមដែលអាចធ្វើទៅបាន។
អ្នកស្រី ទាវ ចន្ថា អាយុ៣១ឆ្នាំ ជាអាជីវករលក់គ្រឿងក្រអូបម្នាក់ដែលបានបាត់បង់តូបចំនួនពីរក្នុងអគ្គិភ័យនេះដែលគិតជាទឹកប្រាក់ប្រមាណ២០.០០០ដុល្លារ បានស្វាគមន៍ការផ្ដល់ជំនួយនេះ ហើយនិយាយថា គាត់ពិតជាបោះឆ្នោតគាំទ្រលោកនាយករដ្ឋមន្ត្រី។
ស្ត្រីរូបនេះបានបន្ថែមថា “ ខ្ញុំនឹងបោះឆ្នោតជូនគាត់។ ទីណាមានសម្ដេច ទីនោះមានការអភិវឌ្ឍ។ គាត់គឺជាម្លប់សម្រាប់យើងទាំងអស់គ្នា”៕
ប្រែសម្រួលដោយ ហម សុផាណ្ណា