ក្រុមមន្ត្រីបាននិយាយកាលពីម្សិលមិញថា សិស្សវិទ្យាល័យ និងអនុវិទ្យាល័យប្រហែលជាមិនទាន់មានសិទ្ធិបោះឆ្នោតទេ ប៉ុន្តែពួកគេមានហេតុផលសមស្របអាចចូលរួមអបអរសាទរការបោះឆ្នោតជ្រើសតាំងតំណាងរាស្ត្រថ្ងៃទី២៨ ខែកក្កដា នៅពេលដ៏ខ្លីខាងមុខនេះ បន្ទាប់ពីរដ្ឋាភិបាលបានប្រកាសថា ការប្រឡងចុងឆ្នាំ ត្រូវបានលើកពេល។
យោងតាមលោក អ៊ឹង ង៉ោរ៉ុក អគ្គនាយកនៃអគ្គនាយកដ្ឋានចំណេះទូទៅ របស់ក្រសួងអប់រំ យុវជន និងកីឡា ឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ នឹងប្រព្រឹត្តទៅនៅថ្ងៃទី៥ ខែកក្កដា ប៉ុន្តែត្រូវបានលើកពេលរហូតដល់ថ្ងៃទី៥ ខែសីហា ចំណែកការប្រឡងសញ្ញាបត្រមធ្យមសិក្សាបឋមភូមិ លើកពេលពីថ្ងៃទី១៦ ខែកក្កដា ទៅថ្ងៃទី១៦ ខែកញ្ញាវិញ ។
លោក ង៉ោរ៉ុក មានប្រសាសន៍ថា “ កាលពីដើមឆ្នាំនេះ យើងបានស្នើសុំសម្តេច ហ៊ុន សែន ពន្យារពេលប្រឡង ហើយសម្តេចក៏បានយល់ព្រមតាមសំណើរបស់យើង”។ លោកបានបន្ថែមថា នេះជាលើកទី១ហើយ ដែលទាំងវិទ្យាល័យនិងអនុវិទ្យាល័យលើកពេលប្រឡង។ លោក ង៉ោរ៉ុក បដិសេធថា កាលបរិច្ឆេទនៃការប្រឡងមិនត្រូវបានគ្រោងឡើងវិញដោយសារតែការបោះឆ្នោតជាតិទេ។
លោកបានថ្លែងបន្តថា“ ការបោះឆ្នោតមិនមែនជាហេតុផលចម្បងសម្រាប់ការពន្យារពេលប្រឡងទេ។ ក្រសួងអប់រំចង់ឲ្យសិស្សបញ្ចប់កម្មវិធីសិក្សារបស់ខ្លួនឲ្យបានត្រឹមត្រូវ ដើម្បីទទួលបានលទ្ធផលល្អប្រសើរក្នុងការប្រឡង”។
ទោះជាយ៉ាងណា លោក ជា ជាតិ ប្រធានមន្ទីរអប់រំរាជធានីភ្នំពេញ បានមានប្រសាសន៍ថា មន្ត្រីអប់រំទទួលបានលិខិតមួយច្បាប់ពីរដ្ឋាភិបាល ដោយលើកឡើងថា ការបោះឆ្នោតជាហេតុផលតែមួយគត់សម្រាប់ការលើកពេលប្រឡងនេះ។
លោក ឈឿយ ចាន់ណា ប្រធានមន្ទីរអប់រំខេត្តបន្ទាយមានជ័យ បានទទួលលិខិតដូចគ្នានេះដែរ ហើយលោកបានមានប្រសាសន៍ថា វាអាចទាក់ទងនឹងភាពជាក់ស្តែងដែលអំឡុងពេលបោះឆ្នោត គ្រូបង្រៀនជាច្រើនចាប់ផ្តើមធ្វើការងារទី២ពាក់ព័ន្ធនឹង
ការបោះឆ្នោត។
លោកបានមានប្រសាសន៍ថា “ គ្រូភាគច្រើនរបស់យើង បានដាក់ពាក្យសុំធ្វើការជាមួយគណៈកម្មាធិការរៀបចំការបោះឆ្នោតខេត្ត ដើម្បីបំពេញការងារនៅតាមមណ្ឌលបោះឆ្នោត”។ បណ្តាអ្នករិះគន់បានអះអាងជាយូរមកហើយថា ដោយសារតែរដ្ឋាភិបាលឲ្យប្រាក់ខែគ្រូបង្រៀនតិចពេក ទើបនាំឲ្យគ្រូបង្រៀនស្វែងរកការងារបន្ថែមដើម្បីរស់។
លោករ៉ុងឈន់ប្រធានសមាគមគ្រូបង្រៀនឯករាជ្យ បានមានប្រសាសន៍ថា លោកមិនជឿថា ការលើកពេលប្រឡងនេះ នឹងធ្វើឲ្យប៉ះពាល់ដល់ការរៀនសូត្ររបស់សិស្សនោះទេ ប៉ុន្តែលោកបានចោទសួរអំពីក្រមសីលធម៌នៃការជួលគ្រូបង្រៀនស៊ីប្រាក់ខែរដ្ឋាភិបាលឲ្យបំពេញការងារក្នុងដំណើរការបោះឆ្នោត។លោក រ៉ុង ឈន់ បានមានប្រសាសន៍បន្តថា “ រដ្ឋាភិបាលកំពុងប្រើប្រាស់គ្រូបង្រៀន អំឡុងពេលយុទ្ធនាការឃោសនាបោះឆ្នោត ដើម្បីផលប្រយោជន៍របស់គណបក្សកាន់អំណាច”៕
ប្រែសម្រួលដោយ ចេវ ប៊ុននី