34 C
Phnom Penh

សមា​​​ជិក​​​សភា​​​អាមេរិក​​​ នឹង​បើក​​​​កិច្ច​​​ប្រជុំ​​​ស្តាប់​​​ការ​​​រាយការណ៍​​​ស្តីពី​​​កម្ពុជា

ដោយ ឌឹ ខេមបូឌា ដេលី

បទវិភាគ

ដោយ​​​នៅ​​​សល់​​​តែ​​​ប៉ុន្មាន​​​សប្តាហ៍​​​ទៀត​​​ប៉ុណ្ណោះ​​​ ប្រទេស​​​កម្ពុជា​​​នឹង​​​រៀប​​​ចំ​​​ការ​​​បោះ​​​ឆ្នោត​​​ជ្រើស​​​តាំង​តំណាងរាស្ត្រ​នោះ​​​ សមា​​​ជិក​​​សភា​​​អាមេរិក​​​គ្រោង​​​ជួប​​​ប្រជុំ​នៅ​​​ក្នុង​​​  ទី​​​ក្រុង​​​វ៉ាស៊ីនតោន​​​នៅ​​​ថ្ងៃ​​​នេះ ដើម្បី​​​ស្តាប់​​​​វិបត្តិ​​​នយោ​​​បាយ​​​និង​​​សង្គម​​​ ដែល​​​ប្រទេស​​​កម្ពុជា​​​កំពុង​​​ជួប​​​ប្រទះ​​​ ចំពេល​មាន​​​ការ​​​រិះ​​​គន់​​​យ៉ាង​​​ច្រើន​​​ពី​​​អន្តរ​​​ជាតិ​​​ចំពោះ​ការ​​​គ្រប់​​​​​​គ្រង​​​អំណាច​ជាច្រើន​​​​​​​ទសវត្សរ៍​​​របស់​​​លោក​​​នាយក​​​រដ្ឋ​​​មន្ត្រី ហ៊ុន សែន។

ការ​​​បើក​​​កិច្ច​​​ប្រ​ជុំនេះកើត​​​មាន​​​ឡើង​​​បន្ទាប់​​​​​ពី​​​​​​ស្ថាប័ន​​​ជំនាញ​​​សិក្សា​​​ស្រាវ​​​ជ្រាវ​​​របស់​​​សភា​​​អាមេរិក​​​ (U.S. Congressional Research Service) បាន​ចេញ​របាយ​ការណ៍​ថ្មី​មួយ​ដែល​​​ធ្វើ​​​ឲ្យ​​​មាន​​​មន្ទិល​​​​​​ធំៗ​មួយ​ចំនួន​​​ថា​​​ តើ​​​ការ​​​បោះ​​​ឆ្នោត​​​នា​​​ថ្ងៃ​​​ទី​​​២៨ ខែ​​​កក្កដា​​​ ខាង​​​មុខ​​​នេះ នឹង​​​មាន​​​តម្លា​​​ភាព​​​កម្រិត​​​ណា​​​ និង​​សេច​ក្តី​សម្រេច​មួយ​​​​របស់​​​ព្រឹទ្ធ​​​សភា​​​អា​​​មេរិក​​​ដែល​​​អំពាវ​​​នាវ​ឲ្យ​​​កាត់​​​បន្ថយ​​​ជំនួយ​​​ប្រចាំ​​​ឆ្នាំ​​​របស់​​​សហ​​​រដ្ឋ​​​អាមេរិក​​​ ជួយ​ដល់​​​ប្រទេស​​​កម្ពុជា​​​ឲ្យ​​​មក​​​នៅ​​​ត្រឹម​​​៧៦​​​លាន​​​ដុល្លារ​​​ ប្រសិន​​​បើ​​​​​​មន្ទិល​​​ទាំង​​​នោះ​​​ជា​​​ការ​​​ពិត​​​មែន​។

​​​កិច្ច​​​ប្រជុំដែល​​​មាន​​​ប្រធាន​​​បទ​​​មិន​​​ល្អ​​​“ ​​​វិបត្តិ​​​​សង្គម និង​​​នយោបាយ​​​របស់​​​ប្រទេស​​​កម្ពុជា​​​” នេះ​នឹង​​​រៀប​ចំ​ឡើង​ដោយ​​​អនុ​គណៈ​​​ក​​​ម្មា​​​​ធិការ​​​របស់​​​សភា​​​អាមេរិក​​​ទទួល​​​បន្ទុក​​​តំបន់​​​អាស៊ី និង​​​ប៉ាស៊ីហ្វិក​​​។ វិទ្យា​​​ស្ថាន​​​​​​​​​​​​ជាតិ​​​ដើម្បី​​​លទ្ធិ​​​ប្រជា​​​ធិបតេយ្យ អង្គការ​​​ឃ្លាំ​​​មើល​​​សិទ្ធិ​​​មនុស្ស​​​ អង្គការ​​​សិទ្ធិ​​​មនុស្ស​​​ក្នុង​​​ស្រុក​​​លីកាដូ ​និង​​​ក្រុម​​​ហ៊ុន​​​វិនិ​​​យោគ​​​​​​ក្នុង​​​​​​រាជ​​​ធានី​​​ភ្នំ​​​ពេញ​​​មួយ​​​​​​ឈ្មោះ​​​ថា អេស អា ភី អីុន​ធើ​ណេ​​​សិន​​​ណល​​​គ្រុប​​​ (SRP International Group) សុទ្ធ​​​តែ​​​គ្រោង​​​ឲ្យ​​​ផ្តល់​​​សក្ខី​កម្ម​​​​អំពី​​​បញ្ហា​​​ទាំង​​​នេះ។

អង្គការ​​​សិទ្ធិមនុស្ស​​​ស្ថិត​ក្នុង​​​ចំណោម​​​អ្នក​​​រិះ​​​គន់​​​ខ្លាំង​បំផុត​ចំពោះ​លោក​​​ ហ៊ុន សែន ​ដោយ​​​​ចោទ​​​ប្រកាន់​​​រដ្ឋា​​​ភិបាល​របស់​លោក​គ្រប់យ៉ាង​ចាប់ពី​ការ​​​ធ្វើ​​​ឃាត​​​អ្នក​ប្រ​ឆាំង​នឹង​ខ្លួន​និង​​​ការគ្រប់​គ្រង​ក្រុម​​​ឧក្រិដ្ឋ​ជន​ រហូត​​​ដល់​​​ការ​​គាប​​​សង្កត់​​​នៅ​​​ក្នុង​​​ការ​​​បោះ​​​ឆ្នោត​​​អាណត្តិមុនៗ​​​ និង​​​ការ​​​មិន​គោរព​​​​ច្បាប់​​​។

លោក ហ្វីល រ៉ូបឺតសុន (Phil Robertson) អនុ​​​​ប្រធាន​​​អង្គការ​​​ឃ្លាំ​មើល​សិទ្ធិ​មនុស្ស​ប្រចាំ​​​​តំបន់​​​អាស៊ី​​​ ​​​មាន​​​ប្រសាសន៍​​​ថា ​អង្គការ​ឃ្លាំ​​មើល​សិទ្ធិ​មនុស្សនឹង​​​ប្រាប់​​​អនុគណៈ​​​កម្មា​​​ធិការ​​​សភា​​​​នេះ​​​ថា ការ​​​បោះ​​​ឆ្នោត​​​ដែល​​​នឹង​​​ចូល​​​មក​​​​ដល់​​​នា​​​ពេល​​​ខាង​​​មុខ​​​នេះ នឹង​​​មិន​​​មាន​​​ភាព​​​ប្រសើរ​​​​ជាង​​​ការ​​​បោះ​​​ឆ្នោត​​​មុនៗ​​​ប៉ុន្មាន​​​ឡើយ​។

លោក​​​បាន​​​មាន​​​ប្រសាសន៍​​​ថា “ ការ​​​វាយ​​​តម្លៃ​​​ចុង​​​ក្រោយ​​​របស់​​​យើង​​​ និង​​​ការ​​​វាយ​​​តម្លៃ​​​របស់​​​អ្នក​​​ឃ្លាំ​​​មើល​​​ឯក​​​រាជ្យ​​​ដទៃ​​​ទៀត​​​គឺថា បញ្ហា​​​ដូច​​​គ្នា​​​នេះ​​​ ដែល​​​ពាក់​​​ព័ន្ធ​​​​​​នឹង​​​​គណៈ​​​កម្មាធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​ តុលា​ការ​​​ ប្រព័ន្ធ​​​ផ្សព្វ​​​ផ្សាយ និង​​​ការ​​​ប្រើ​​​ប្រាស់​​​ធន​​​ធាន​​​របស់​​​រដ្ឋ​​​មាន​​​ពាស​​​ពេញ​​​នៅ​ក្នុងដំណើរ​​​ការ​​​រៀប​​​ចំ​​​ការ​​​បោះ​​​ឆ្នោត​​​។ ក៏​​​ប៉ុន្តែ ព័ត៌មាន​​​ល្អ​​​តែ​​​មួយ​​​គត់​​​ដែល​ត្រូវ​រាយ​​ការណ៍​​​គឺ​​​ថា ​គណ​​​បក្ស​​​ប្រជា​​​ជន​​​កម្ពុជា​​​ជាប់​​​ពាក់​​​ព័ន្ធ​​​នឹង​​​អំពើ​​​ហិង្សា​​​តិច​​​ជាង​​​មុន​​​”។

អង្គការ​​​សិទ្ធិមនុស្ស​​​លីកាដូ ក៏​​​​​​មមាញឹក​​​ដែរ​ក្នុង​​​​ការលាត​ត្រដាង​ជា​ប្រ​ចាំ​នូវ​ការ​​​រំលោភ​​​សិទ្ធិ​​​មនុស្ស​​​ជា​​​ច្រើន​​​ពី​​​សំណាក់​​​រដ្ឋា​​​ភិបាល​​​ ដែល​​​មាន​​​ចាប់​​​ពី​​​ការ​​​ដាក់​​​អ្នក​​​ទោស​​​ណែន​ណាន់​​តាន់​តាប់នៅ​ក្នុង​​​បន្ទប់​​​ពន្ធនាគារ​​នានា​រហូត​​​ដល់​​​ការ​​​បាញ់​​​ប្រហារ​​​ និង​​​ការ​​​ចាប់​​​ខ្លួន​​​សកម្ម​​​ជន​​​ ហើយ​​​អង្គការ​​​នេះ​​​បាន​​​លើក​​​ឡើង​​​ថា ការ​​​រំលោភ​​​បំពាន​​​ទាំង​​​នេះ បាន​​​កើន​​​ឡើង​​​​​​ក្នុង​​​រយៈ​​​ពេល​​​ប៉ុន្មាន​​​ឆ្នាំ​​​ថ្មីៗ​​​នេះ។

លោកស្រី ណាលី ពីឡូក ប្រធាន​​​អង្គការ​​​លីកាដូមាន​​​ប្រសាសន៍​​​ថា ការ​​​អញ្ជើញ​​​របស់​​​អនុគណៈ​​​កម្មា​​​ធិការ​​​សភា​​​​​​អាមេរិក​​​ឲ្យ​​​ចូល​​​រួម​​​កិច្ច​​​ប្រជំុ​​​ថ្ងៃ​​​នេះ គឺ​​​លើក​​​ឡើង​​​អំពី​​​ការ​​​ផ្តោ​​ត​​​ការ​​​យក​​​ចិត្ត​​​ទុក​​​ដាក់​​​លើ​​​ការ​​​បោះ​​​ឆ្នោត​​​ដែល​​​​​នឹង​​​ឈាន​​​មក​​​ដល់​​​នា​​​ពេល​​​ខាង​​​មុខ​​​នេះ​​​ហើយ​​​​​ថា លោក​​​ស្រី​​​រំពឹង​​​ថា នឹង​​​មាន​​​ដំណោះ​​​ស្រាយ​​​មួយ​​​ផ្សេង​​​ទៀត​​​នៅ​​​មុន​​​ថ្ងៃ​​​បោះ​​​ឆ្នោត​​​។

លោកស្រី​​​បាន​​​បន្ថែម​​​ទៀត​​​ថា អង្គការ​​​លីកាដូ នឹង​​​ផ្តោត​​​ការ​​​យក​​​ចិត្ត​​​ទុក​​​ដាក់​​​លើ​​​ការ​​​ផ្តល់​​​ភ័ស្តុតាង​​​របស់​​​ខ្លួន​​​អំពី​​​បញ្ហា​​​ទាក់​​​ទង​​​នឹង​​​ការ​​​បោះ​​​ឆ្នោត​​​ អំពើ​​​ពុករលួយ​​​ និង​​​ការ​​​រឹប​​​អូស​​​​​​យក​​​ដី​​​ធ្លី​​​ជាដើម​​​ ដោយ​​​លោក​​​ស្រី​​​ពន្យល់​​​ថា ​​​អង្គការ​​​លីកាដូ​​​មិន​​​មាន​​​គម្រោង​​​ស្នើ​​​សុំ​​​ឲ្យ​​​មាន​​​ការ​​​កាត់​​​ជំនួយ​​​អាមេរិក​​​មក​​​ដល់​​​កម្ពុជា​​​ទាំង​​​ស្រុង​​​​​នោះ​ទេ​​​ ក៏ប៉ុន្តែ អង្គការ​​​នេះ​​​ មាន​​​គម្រោង​​​ស្នើ​​​សុំ​​​ឲ្យ​​​កាត់​​​តែ​​​មួយ​​​ចំនួន​​​ប៉ុណ្ណោះ។ លោក​​​ស្រី​​​បាន​​​ឲ្យ​ដឹង​ថា “ យើង​​​នឹង​​​ស្នើ​សុំ​​​ឲ្យ​រដ្ឋា​​​ភិបាល​​​អាមេរិក​​​​​ត្រួត​​​ពិនិត្យ​​​កិច្ច​​​សហ​​​ប្រតិបត្តិការទ្វេ​​​ភាគី​​​របស់​​​ខ្លួន​​​ជាមួយ​​​រដ្ឋា​​​ភិបាល​​​​​កម្ពុជា​​​ឡើង​​​វិញ ជា​​​ពិសេសពិនិត្យ​មើល​​​​​​​​​​​​យោ​​​ធា​​​ ដែល​​​ពាក់​​​ព័ន្ធ​​​នឹង​​​​​​ការ​​​រឹប​​​អូស​​​យក​​​ដី​​​ធ្លី​​”។

យោង​​​តាម​​​ស្ថាន​​​ទូត​​​អាមេរិក​​​ បាន​ឲ្យ​ដឹង​ថា ការ​​​ប្រើ​​​ប្រាស់​​​ទាហាន​​​ដើម្បី​​​ការ​​​ពារ​​​ដី​សម្បទាន​​​របស់​​​ក្រុម​​​ហ៊ុន​​​ឯក​​​ជន​​​ ដែល​​​ត្រូវ​​​បាន​​​ចោទ​​​ប្រកាន់​​​ថា បាន​​​ប្លន់​​​​​​ដី​​​ធ្លី​​​ពី​​​ប្រជា​​​កសិករ​​​កម្ពុជា​​​ និង​​​កាប់​​​បំផ្លាញ​​​ព្រៃ​​​សហគមន៍​​​របស់​​​ពួកគាត់​​​​​​​​​​​​​​​ នោះ​ត្រូវ​​​បាន​​​ចង​​​ក្រង​​​ជា​​​ឯកសារ​​​​យ៉ាង​​​មាន​​​សណ្តាប់​​​ធ្នាប់។

កាល​​​ពី​​​ម្សិល​​​មិញ ក្រុម​​​ការងារនៃ​​វិទ្យាស្ថា​ន​​​​ជាតិ​​​ដើម្បី​​​លទ្ធិ​​​ប្រជា​​​ធិប​​​តេយ្យប្រ​ចាំ​ប្រទេស​​កម្ពុជា បាន​​​បដិសេធ​​​មិន​​​និយាយអំពី​​​ផែន​ការ​​​​របស់​​​ខ្លួន​​​ សម្រាប់​​​ការ​​​ជួប​​​ប្រជុំ​​​នេះ​​​ទេ​​​។ ក៏​​​ប៉ុន្តែ កាល​​​ពី​​​ខែ​​​មីនា បន្ទាប់​​​ពី​​​ការធ្វើ​​​សវន​កម្ម​​​​ដ៏​​​ល្អិត​​​ល្អន់​​​មួយ​​​លើ​​​បញ្ជី​​​ឈ្មោះ​​​ចុង​​​ក្រោយ​​​របស់​​​អ្នក​​​បោះ​​​ឆ្នោត​​​ ក្រុម​នេះបាន​​​លើក​​​ឡើង​​​​ថា ការ​​​ចុះ​​​ឈ្មោះ​​​របស់​អ្នក​​​បោះ​​​ឆ្នោត​​​​​មាន​ស្ថាន​ភាព​កាន់​តែ​អាក្រក់​ជាង​​ការ​ចុះ​​​​ឈ្មោះ​​​បោះ​​​ឆ្នោត​​​ ដែល​​​រដ្ឋា​​​ភិបាល​​​បាន​​​រៀប​​​ចំ​​​សម្រាប់​​​ការ​​​បោះ​​​ឆ្នោត​​​កាល​​​ពី​​​ឆ្នាំ​​​២០០៨​​​ទៅ​​​ទៀត​​​។

វិទ្យា​​​ស្ថាន​​​ជាតិ​​​ដើម្បី​​​លទ្ធិ​​​ប្រជា​​​ធិប​​​តេយ្យ​បាន​​​ឲ្យ​​​ដឹង​​​ថា ក្នុង​​​ចំណោម​​​ឈ្មោះ​អ្នក​​​បោះ​​​ឆ្នោត​​​ប្រាំបួន​​​នាក់ មាន​​​​​​ម្នាក់​​​ត្រូវ​​​បាន​​​លុប​​​ចេញ​​​ពី​​​បញ្ជី​​​ចុង​​​ក្រោយ​​​ ហើយ​​​ក្នុង​​​ចំណោម​​​ឈ្មោះអ្នក​បោះ​ឆ្នោត​១០​​​នាក់​​​នៅ​​​លើ​​​បញ្ជី​​​នេះ មាន​ឈ្មោះ​មួយ​ទំនង​​​ជា​​​មិន​​​មាន​​​ទេ​​​។ ​គណៈ​​​កម្មា​​​ធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​ដែល​​​​​​ជា​​​អ្នក​​​ចុះ​​​បញ្ជី​​​នេះបាន​​​ច្រាន​​​ចោល​​​ការ​​​ធ្វើ​​​សវនកម្ម​​​នេះ​​​ ហើយ​​​បាន​​​លើក​​​ឡើង​​​ថា ​វិទ្យា​​​ស្ថាន​​​ជាតិ​​​ដើម្បី​​​លទ្ធិ​​​ប្រជា​​​ធិបតេយ្យ​​​ប្រើ​​​ប្រាស់​​​វិធី​​​សាស្ត្រ​​​មិន​​​ត្រឹម​​​ត្រូវ​​​។

អនុ​គណៈ​​​កម្មាធិការ​​​សភា​​​អាមេរិក​​​ ក៏​​​​​​គ្រោង​នឹង​​​​​​​ស្តាប់​​​លោក​​​ ដានីញែល ​មីសែល​ (Daniel Mitchell) នាយក​​​គ្រប់​​​គ្រង​​​ក្រុម​​​ហ៊ុន SRP International Group ដែល​​​ជា​​​ក្រុម​​​ហ៊ុន​​​វិនិយោគ​​​ និង​​​ប្រឹក្សា​​​យោបល់​​​ក្នុង​​​ស្រុក​​​ផង​​​ដែរ។ ​លោក ​មីសែល ក៏​​​ធ្លាប់​​​គ្រប់​​​គ្រង​​​ក្រុមហ៊ុន​​​ ហ្គ្រែន​ឌីស​ធីមប័រ (Grandis Timber) ដែល​​​ជា​​​ក្រុម​​​ហ៊ុន​​​រក​​​ស៊ី​​​ឈើ​​​ក្នុង​​​ប្រទេស​​​កម្ពុជា​​​ និង​​​បម្រើ​​​ការ​​​ឲ្យ​​​ក្រុម​​​ប្រឹក្សា​​​ធុរកិច្ច​​​អាមេរិក-កម្ពុជា​​​ផង​​​ដែរ។​​​​​​

កាល​​​ពី​​​ពេល​​​កន្លង​​​ទៅ​​​សហ​​​រដ្ឋ​​​អាមេរិក​​​ធ្លាប់​​​កាត់​​​ជំនួយ​​​ម​​​ិន​​​មែន​​​មនុស្ស​​​ធម៌​​​មក​​​ឲ្យ​​​ប្រទេស​​​កម្ពុជា​​​ម្តង​​​រួច​​​មក​​​ហើយ​​​។ អាមេរិក​​​ធ្វើ​​​ដូច្នេះ​​​ បន្ទាប់​​​ពី​​​លោក ហ៊ុន សែន ផ្តួល​​​រំលំ​​​សហ​​​នាយក​​​រដ្ឋ​​​មន្ត្រី​​​របស់​​​លោក នៅ​​​ពេល​​​កង​​​កម្លាំ​​ង​​​យោធា​​​ដែល​​​ស្មោះ​​​ស្ម័គ្រចំពោះ​​​ភាគី​​​ម្ខាងៗ​​​បើក​​​ការ​​​ប្រយុទ្ធ​​​គ្នា​​​តាម​​​ដង​​​ផ្លូវ​​​នៅ​​​ក្នុង​​​រាជ​​​ធានី​​​ភ្នំពេញ​​​ កាល​​​ពី​​​ឆ្នាំ​​​១៩៩៧​ ប៉ុន្តែ ​បាន​​​ចាប់​​​ផ្តើម​​​ផ្តល់​​​ជំនួយ​​​ឡើង​​​វិញ​​​នៅ​​​រយៈ​ពេល​ពីរ​បី​ឆ្នាំ​​​ក្រោយពី​នោះ​​​។

ទោះ​​​បី​​​ជា​​​ទំនាក់​​​ទំនង​​​មាន​​​ភាព​​​ប្រសើរ​​​ឡើង​​​វិញ​​​ក៏​​​ដោយ ក៏​​​ទំនាក់​​​ទំនង​​​ការទូត​​​​​មាន​​​ភាព​​​រកាំ​​​រកូស​​​កាន់​​​តែ​​​ខ្លាំង​​​ឡើង​​​សារ​​​ឡើង​​​វិញនៅ​​​មុន​​​ការ​​​បោះ​​​ឆ្នោត​​​នេះ។ គ្រាន់តែក្នុង​រយៈ​ពេល​​ពីរបី​​​​​ខែ​​​កន្លង​ទៅ ក្រសួង​​​ការ​​​បរទេស​​​អាមេរិកបាន​​​ស្តី​​​បន្ទោស​​​រដ្ឋា​​​ភិបាល​​​កម្ពុជា​​​ ចំពោះ​​​អវត្តមាន​​​របស់​​​លោក សម រង្ស៊ី មេ​​​ដឹក​​​នាំ​​​បក្ស​​​ប្រឆាំង​​​របស់​​​​ប្រទេស​​​កម្ពុជា​​​ ដែល​​​បច្ចុប្បន្ន​​​កំពុង​​​​​​រស់​​​នៅ​​​និរទេស​​​ខ្លួន​​​នៅ​​​បរទេស​​​ ដើម្បី​​​គេច​​​ពី​​​ការ​​​កាត់​​​ទោស​​​ដែល​​​​​​គេ​​​ចាត់​​​ទុក​​​ជា​ទូទៅថា ជា​​​រឿង​​​នយោ​​​បាយ​​​ ព្រម​​​ទាំង​​​ការ​​​បណ្តេញ​​​សមា​​​ជិក​​​សភា​​​មក​​​ពី​​​គណ​​​បក្ស​​​ប្រឆាំង​​​ចេញ​​​ពី​​​សភា​​​ផងដែរ។ ក្រសួង​​​ការ​​​បរទេស​​​អាមេរិក​​​ក៏​​​បាន​​​ថ្កោល​​​ទោស​​​ផង​​​ដែរ​​​ចំពោះ​​​ការ​​​ចេញ​​​បម្រាម ​ដែល​​​បាន​​​ដក​​​ចេញ​​​ទៅ​​​វិញ​​​លើ​​​ការ​​​ផ្សព្វ​​​ផ្សាយ​​​​​​​​​កម្ម​​​វិធី​​​វិទ្យុ​​​បរទេស​​​រយៈ​​​ពេល​​​ពេញ​​​មួយ​​​ខែ​​​រហូត​ដល់​ក្រោយ​ថ្ងៃ​​​បោះ​​​ឆ្នោត។

នៅ​​​ក្នុងសេច​ក្តី​សម្រេច​​របស់​ខ្លួន​កាល​​​ពី​​​ថ្ងៃ​​​ទី​​​៧ ខែមិថុនា លោក​​​ លីនស៊ី ហ្គ្រាហាំ ​(Lindsey Graham) និ​​ងលោក ម៉ាកូ រ៉ូប៊ីអូ ​(Marco Rubio) សមាជិក​​​ព្រឹទ្ធសភា​​​អាមេរិក​​​ បាន​​​ស្នើសុំឲ្យ​​​ផ្តាច់​ជំនួយ​​​ផ្ទាល់​​​ទាំង​​​អស់​​​ដល់​​​​កម្ពុជា​​​ ព្រម​​​ទាំង​​​សុំ​ឲ្យ​​​កាត់​​​បន្ថយ​​​ជំនួយ​​​អភិ​វឌ្ឍន៍​​​ផ្សេងៗ​​​ទៀតផង​​​​ដែរ ប្រសិ​​ន​​​បើ​​​ក្រសួង​​​​ការ​​​បរទេស​​​អាមេរិក​​​រក​​​ឃើញ​​​ថា ការ​​​បោះ​​​ឆ្នោត​​​នាពេល​​​ខាង​​​មុខ​​​នេះ “ គ្មាន​​​​​​ការ​​​ប្រកួត​​​ប្រជែង​​​​ដោយ​​​យុត្តិធម៌” ទេនោះ។

លោក ផៃ ស៊ីផាន អ្នក​​​នាំ​​​ពាក្យ​​​ទី​​​ស្តី​​​ការ​​​គណៈ​​​​រដ្ឋ​​​មន្ត្រី​​​បាន​​​មាន​​​ប្រសាសន៍​​​ថា ​ប្រទេស​​​​​កម្ពុជា​​​នៅ​​​តែ​​​រក្សា​​​ទំនាក់​​​ទំនង​​​ល្អ​​​ជាមួយ​​​ក្រសួង​​​​ការ​​​បរទេស​​​អាមេរិក​​​ ហើយ​​​ជឿ​​ថា សេច​ក្តី​សម្រេច​របស់​​​ព្រឹទ្ធ​​​សភា​​​អាមេរិក​​​ និង​​​ការ​​​បើក​​​កិច្ច​​​ប្រជុំ​​​នៅ​​​ថ្ងៃ​​​នេះ​​ គឺបណ្តាល​មក​ពី​ការ​​​​ស្តាប់​​​សមាជិក​​​សភា​​​ដែល​​​ទទួល​​​បាន​​​ព័ត៌​​​មាន​​​មិន​​​ត្រឹម​​​ត្រូវ​​​។

លោក​​​បាន​​​ថ្លែង​​​ថា “ ខ្ញុំគិត​​​ថា ពួក​​​គេ​​​មិន​​​ដឹង​​​ច្បាស់​​​នូវ​​​អ្វី​​​ដែល​​​កំពុង​​​តែ​​​កើត​​​មាន​​​ឡើង​​​នៅ​​​ក្នុង​​​ប្រទេស​​​កម្ពុជា​​​នោះ​​​ទេ​​​។ ប្រសិន​​​បើ​​​អ្នក​​​ប្រៀប​​​ធៀប​​​ទៅ​​​នឹង​​​ប្រទេស​​​ជិត​​​ខាង​​​របស់​​​យើង​​​វិញ​​​នោះ​​​ ខ្ញុំ​​​គិត​​​ថា ប្រទេស​​​កម្ពុជា​​​ស្ថិត​​​នៅ​​​ក្នុង​​​ចំណាត់​​​ថ្នាក់​​​យ៉ាង​​​ល្អ​​​មួយ​​​ បើ​​​និយាយ​​​ពីសិទ្ធិ​​​មនុស្ស​​​ និង​​​ការ​រីក​ចម្រើន​របស់​ប្រជា​ពល​រដ្ឋ​កម្ពុជា”។

លោក​​​បាន​​​បន្ត​​​ទៀត​​​ថា “ ​​​ប្រជា​​​ពល​​​រដ្ឋ​​​កម្ពុជា​​​បាន​​​ជ្រើស​​​រើស​​​មេ​​​ដឹក​​​នាំ​​​របស់​​​ខ្លួន​​​ និង​​​គណ​​​បក្ស​​​នយោ​​​បាយ​​​របស់​​​ខ្លួន​​​ដោយ​​​ផ្ទាល់​។ ​ការ​​​បោះ​​​ឆ្នោត​​​នេះ​​​ គឺ​​​ដើម្បី​​​ឲ្យ​​​មាន​​​ភាព​​​ប្រសើរ​​​ជាង​​​មុន​​​ ហើយ​​​ជា​​​ជម្រើស​​​របស់​​​ប្រជា​​​ពលរដ្ឋ​​​កម្ពុជា​​​ មិន​​​មែន​​​ជន​​​បរទេស​​​ និង​​​គណ​​​បក្ស​​​នយោ​​​បាយ​​​របស់​​​ពួក​​​គេ​​​នោះ​​​ទេ”​៕​

ប្រែ​​​សម្រួល​​​ដោយ ហួង កុកទៀន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស