34 C
Phnom Penh

គណបក្ស​ប្រជា​ជន​ពឹង​ផ្អែក​លើ​រចនា​សម្ពន្ធ​រឹង​មាំ​មុន​ការ​បោះឆ្នោត​

ដោយ ឌឹ ខេមបូឌា ដេលី

បទវិភាគ

ស្រុក​ពាមជរ ខេត្ត​ស្វាយរៀង​-​មេដឹក​នាំ​កំពូល​ៗ​​របស់​គណបក្ស​ប្រជា​ជន​មក​ពី​ខេត្ត​ព្រៃវែង​ បានប្រមូលផ្ដុំ​តាម​បណ្តោយ​ច្រាំង​ទន្លេ​មេគង្គ​ កាល​ពី​ព្រឹក​ថ្ងៃ​អង្គារ​ ខណៈ​ពេល​មេឃ​ចាប់​ផ្តើមភ្លៀងខ្លាំង​ស្រោច​ស្រប់​ទីនោះ​​ដែល​ព័ទ្ធ​ជុំ​វិញ​ដោយ​ចម្ការ​ពោត។

នៅ​ម៉ោង​៨និង​៤៥​នាទី​​ព្រឹក លោក ជាម យៀប សមាជិក​សភា​មក​ពី​គណបក្ស​ប្រជាជន​​កម្ពុជា និង​ក្រុម​ការ​ងារ​របស់​លោក​​បាន​បង្ហាញ​​​វត្ត​មាននៅ​លើ​ទូកលឿន​មួយ​គ្រឿង​ប្រវែង​១៥​ម៉ែត្រ​ហើយ​បាន​ចូល​ចត​ និង​បាន​ដើរ​ប្រវេ​ប្រវា​លើ​ផ្លូវ​ដី​ឥដ្ឋរអិល​ទៅ​កាន់វេទិកា​មួយ​ដែល​គេ​រៀប​ចំ​ឡើង​​នៅ​ចម្ងាយ​ប្រមាណ​​​ពីរបីរយម៉ែត្រ នៅ​ខាង​មុខ​សាលា​ស្រុក​ ក្នុង​ឃុំ​ស្វាយភ្លោះ​។

ពេល​កំពុង​ឈរ​លើ​វេទិកា លោក ជាម យៀប ដែល​ធ្លាប់​ធ្វើ​ជា​អភិបាល​ខេត្ត​ព្រៃវែង​​នៅ​សម័យ​សាធារណរដ្ឋ​ប្រជាមានិត​កម្ពុជា ​ពី​ឆ្នាំ​១៩៨១ដល់​ឆ្នាំ​​១៩៨៧ មក​នោះ​ បាន​រៀប​រាប់​ពី​​ការ​រីក​ចម្រើន​របស់​គណបក្ស​ប្រជា​ជន​កម្ពុជា​ ចាប់​តាំង​ពី​ការ​បោះ​ឆ្នោត​តាម​បែប​ប្រជាធិបតេយ្យ​ត្រូវ​បាន​រៀប​ចំឡើង​លើក​ដំបូង​ក្នុង​ឆ្នាំ​១៩៩៣​មក​។

លោក​បាន​មាន​ប្រសាសន៍​ថា “ ពេល​នេះ​ ​គណបក្ស​ប្រជាជន​កម្ពុជា​មាន​សមាជិក​ចំនួន​៤៧០.០០០​នាក់នៅ​ក្នុង​ខេត្ត​ព្រៃវែង​ និង​មាន​​សមាជិក​ចំនួន​៥,៧​លាន​នាក់​នៅ​ទូទាំង​ប្រទេស​”។

លោក ជាម យៀប ប្រធាន​គណៈកម្មការ​ហិរញ្ញវត្ថុ​ នៅ​រដ្ឋ​សភា​បាន​ថ្លែង​ទៅ​កាន់​អ្នក​ចូល​រួម​ទៀត​​ថា លោក​នាយក​រដ្ឋ​មន្ត្រី ហ៊ុន សែន បាន​សន្យា​ដោយ​​ផ្ទាល់​ថា លោក​នឹង​ផ្ដល់​​​ថវិកា​​​ចំនួន​១៥​ពាន់​លាន​រៀល​ ឬក៏​ប្រហែល​៣,៧៥​លាន​ដុល្លារ​ ដើម្បី​បញ្ចប់​​ការ​ស្ថាបនា​ផ្លូវ​ដ៏​សំខាន់​នៅ​ក្នុងស្រុក​នេះ​ ដែល​មិនមាន​ក្រាល​កៅស៊ូ​ និង​លំបាក​ធ្វើ​ដំណើរ​ឆ្លង​កាត់​ជា​ខ្លាំង​​អំឡុង​រដូវ​វស្សា ។

លោក​ក៏​បាន​សន្យា​ដែរ​ថា ​ការ​ស្ថាប​នា​ផ្លូវ​ដែល​តភ្ជាប់​ពី​ស្រុក​ពាម​ជរ​ ទៅ​ព្រំដែន​ប្រទេស​វៀតណាម​ នឹង​ត្រូវ​ចប់​រួច​រាល់​ត្រឹម​ដំណាច់​ឆ្នាំ​២០១៤។ ការ​សន្យា​ស្ថាបនា​ផ្លូវ​ និង​​ការ​អភិវឌ្ឍ​​ប្រព័ន្ធ​ធារាសាស្ត្រ ដែល​​សុទ្ធ​តែ​ចាំ​បាច់​ខ្លាំង​​​សម្រាប់​សេដ្ឋកិច្ច​ដែល​ពឹង​ផ្នែក​លើ​វិស័យ​កសិកម្ម​នៅ​ក្នុង​​ខេត្ត​ព្រៃ​វែង​ គឺ​​​ជា​ចំណុច​ស្នូល​នៃ​គោល​នយោបាយ​របស់​គណ​បក្ស​ប្រជាជន​កម្ពុជា​ សម្រាប់​ការ​បោះឆ្នោត​ជាតិ​ដែល​នឹង​មក​ដល់​ក្នុង​ពេល​ឆាប់​​​ៗនេះ។

ប៉ុន្តែ​ នៅ​ពេល​សាកសួរ​បន្ទាប់​ពី​សុន្ទរកថា​​របស់​លោក​ថា តើ​ហេតុអ្វី​បាន​ជា​គណបក្ស​ប្រជាជន​កម្ពុជា​​នៅ​តែ​មាន​​ប្រជា​ប្រិយភាព​ខ្លាំង​​នៅ​ក្នុង​ខេត្ត​ព្រៃវែង​នោះ លោក ជាម យៀប បាន​មាន​ប្រសាសន៍​ថា រច​នា​សម្ព័ន្ធ​បក្ស​បាន​ធ្វើ​ឲ្យ​គណបក្ស​ប្រជាជន​កម្ពុជា​នៅ​តែ​មាន​​ប្រជា​ប្រជា​ប្រិយភាពខ្លាំងនៅពេល​បោះ​ឆ្នោត​ គឺមិន​មែន​ដោយ​សារការ​សន្យា​ធ្វើ​ឲ្យរចនា​​សម្ព័ន្ធ​ប្រសើរ​ឡើង​នោះ​ឡើយ​។

លោក​បាន​ថ្លែង​ថា “ ខ្ញុំ​គិត​ថា ប្រជា​ពល​រដ្ឋ​​ភាគច្រើនស្រឡាញ់​ចូល​ចិត្ត​គណបក្ស​ប្រជា​ជន​កម្ពុជា​ ពីព្រោះ​យើង​មាន​រចនាសម្ព័ន្ធ​​ថ្នាក់​ភូមិ ឃុំ ស្រុក និង​ខេត្ត​”។ លោក​បាន​បន្ថែម​ថា គណបក្ស​ប្រជា​ជន​កម្ពុជា​មាន​ក្រុម​ការងារ​របស់​ខ្លួន ​ដែល​​មាន​សមាជិក​បក្ស​បី​រូប​របស់​បក្ស​​​ ​មាន​តួនាទី​ផ្សព្វ​ផ្សាយ​​គោល​នយោបាយ​បក្ស​ទៅ​កាន់​អ្នក​ជិត​ខាង​របស់​ខ្លួន នៅ​ក្នុង​ភូមិ​សរុប​ទាំង​អស់​ចំនួន​១.១៦៧​ភូមិ​ក្នុង​ខេត្ត​ព្រៃវែង​។

រចនាសម្ព័ន្ធ​បក្ស​របស់​គណបក្ស​ប្រជាជន​កម្ពុជា​ ដែល​ស៊ី​គ្នា​ទៅ​នឹង​រចនាសម្ព័ន្ធ​របស់​​រដ្ឋាភិបាល​ ​បង្កើត​​បាន​ស្ថាន​ភាពមួយដែល​ធ្វើ​​ឲ្យ​អ្នក​បោះ​​ឆ្នោត​​​ពឹង​ផ្អែកខ្លាំង​​លើ​រចនា​សម្ព័ន្ធ​​បក្ស​ដើម្បី​ទទួល​បានប្រ​យោជន៍​ពីរដ្ឋាភិបាល ហើយ​​យោង​តាម​អ្នក​បោះ​ឆ្នោត និង​អ្នក​ឃ្លាំ​មើល​ការ​បោះ​ឆ្នោតបាន​ឲ្យ​ដឹងថា​ មាន​​ការ​ដាក់​​សម្ពាធ​ខ្លាំង​ឲ្យ​ប្រ​ជា​ពល​រដ្ឋ​​គាំ​ទ្រ​គណ​បក្ស​កាន់​អំណាច​​​។

លោក គ្រី សាន អាយុ​៦៤​ឆ្នាំ បាន​ធ្វើ​ជា​មេ​ឃុំ​នៅ​ក្នុងឃុំ​ស្វាយភ្លោះ​ អស់​រយៈ​ពេល​ប្រមាណ​៣០​​ឆ្នាំ​មក​ហើយ​។ លោក គ្រី សាន មាន​សិទ្ធិ​តែង​តាំង​មេភូមិ ដូច​​​​​​មេឃុំ​-ចៅ​សង្កាត់​​​​ចំនួន​១.៦៣៣រូប​ផ្សេង​ទៀត​​នៅ​ក្នុង​ប្រទេស​​​​កម្ពុជា​ ដែល​​៩៧​ភាគរយជា​មន្ត្រី​របស់​គណ​​​បក្ស​កាន់​អំណាច​ អ៊ីចឹងដែរ។

លោក គ្រី សាន​ ក៏​ស្ថិត​នៅ​ក្នុង​ចំណោម​ក្រុមការងារ​ថ្នាក់​ឃុំ​របស់​គណបក្ស​ប្រជាជន​កម្ពុជាដែរ​។ លោក​បាន​ពន្យល់​ថា គោល​ដៅ​របស់​ក្រុមការ​ងារ​ថ្នាក់​ភូមិ​ និង​ថ្នាក់​ឃុំ​ គឺ​ត្រូវ​ផ្សព្វ​ផ្សាយ​ព័ត៌មាន​អំពី​បក្ស​ និង​ដោះស្រាយ​រាល់​បញ្ហា​ដែល​អ្នក​បោះ​ឆ្នោត​​របស់​ខ្លួន​កំពុង​ប្រឈម​។

លោក​បាន​មាន​ប្រសាសន៍​ថា “ យើង​ផ្សព្វ​​​​ផ្សាយ​សារ​របស់​យើង​ ហេតុ​​​​ដូច្នេះ​ហើយ​ អ្នក​ភូមិ​នឹង​យល់​ដឹង​ពី​គោល​នយោបាយ​របស់​​​​គណបក្ស​ប្រជា​ជន​កម្ពុជា​ ហើយ​ពួក​គាត់​ក៏​ចូល​រួម​ជាមួយ​យើង​ដែរ​”។ លោក​បាន​បន្ថែម​ថា គណបក្ស​ប្រជា​ជន​កម្ពុជា​តែង​តែចេញ​មុខ​ដោះ​ស្រាយ​នៅ​ពេល​​​​មណ្ឌល​បោះ​ឆ្នោត​របស់​លោក​ជួប​បញ្ហា​។

លោក​បាន​មាន​ប្រសាសន៍​បន្ត​ថា “ ​នៅ​ពេល​អ្នក​ភូមិ​ជួប​គ្រោះ​មហន្តរាយ​ដូច​ជា​ទឹក​ជំនន់ និង​ព្យុះ​ជា​ដើម ពេល​នោះ​គឺ​មាន​តែ​គណបក្ស​ប្រជាជន​កម្ពុជា​ទេ ដែល​តែង​​តែ​ទៅ​ជួយ​ប្រជា​ពល​រដ្ឋ​បាន​ទាន់​ពេល​​វេលា”។

លោក គល់​ បញ្ញា នាយក​ប្រតិបត្តិ​គណៈ​​​កម្មាធិការ​ដើម្បី​ការ​បោះ​ឆ្នោត​​​​ដោយ​សេរី​ និង​យុត្តិធម៌​នៅ​កម្ពុជា​​​ ហៅ​កាត់​ថា ខុម​​​ហ្វ្រែល​ បាន​​លើក​ឡើង​​ថា មុខងារ​​ពីររបស់​អាជ្ញាធរ​មូលដ្ឋាន​នេះ​ ដែល​ធ្វើ​ជា​មេ​ដឹក​នាំ​បក្ស​តាម​មូលដ្ឋាន​ផង​ បាន​ជួយ​ឲ្យ​គណបក្ស​ប្រជា​ជន​​កម្ពុជា​ទទួល​បាន​ការ​គាំ​ទ្រ​ពី​សាធារណជន​ ដោយ​ធ្វើ​ឲ្យ​គេ​គិត​ថា គណបក្ស​ប្រជាជន​កម្ពុជា​​ជា​អ្នក​ផ្ដល់​សេវា​​ចាំ​បាច់នានា មិន​មែន​​​រដ្ឋាភិបាលឡើយ។

លោក​បាន​បន្ថែម​ថា “ ពួក​គេ​​ [គណ បក្ស​ប្រជាជន​កម្ពុជា​] បាន​ព្យាយាម​ច្របាច់​បញ្ចូល​គ្នា​រវាង​មន្ត្រី [រដ្ឋាភិបាល​] និង​រចនា​សម្ព័ន្ធ​ស៊ី​​​សង្វាក់ជាមួយ​គណបក្ស​ប្រជាជន​កម្ពុជា​។ ពួក​គេ​ព្យាយាម​កាត់​បន្ថយ​រចនាសម្ព័ន្ធ​របស់​អាជ្ញាធរ​ដែល​មាន​ស្រាប់​នៅ​គ្រប់​លំដាប់​ថ្នាក់​ ឲ្យ​ក្លាយជា​​ក្រុម​ការ​ងារ​របស់​គណបក្ស​ប្រជាជន​កម្ពុជា​”។

លោក​បាន​ថ្លែង​ថា “ វា​ធ្វើ​ឲ្យ​ប្រជា​ពល​រដ្ឋ​​​​យល់​ច្រឡំជា​ខ្លាំង​​។ពួក​គាត់មិន​ដឹង​ថា អ្វី​ចេញ​​​​ពី​គណបក្ស​ប្រជាជន​កម្ពុជា ឬក៏​រដ្ឋាភិបាល​​ឡើយ​​។ វា​បង្ក​​បញ្ហា​ជា​ច្រើន​នៅ​ថ្នាក់​មូល​​​ដ្ឋាន​ ជា​ពិសេស​សម្រាប់​អ្នក​​​មិន​គាំ​ទ្រ​​គណបក្ស​ប្រជាជន​កម្ពុជា​”។ លោក​បាន​បន្ថែម​ថា មេ​​ភូមិ​ និង​មេឃុំ​មាន​សិទ្ធិ​អំណាច​សម្រេចអ្វី​ៗ​ទាំង​អស់​ចាប់​​ពី​កិច្ច​សន្យា​រដ្ឋបាល​​ដូច​ជា​ការ​លក់​ដូរ​ដីធ្លី​ជា​ដើម រហូត​ដល់ការ​ចុះ​លិខិត​អាពាហ៍​​​​ពិពាហ៍​ និង​​បញ្ជី​ឈ្មោះ​អ្នក​បោះ​ឆ្នោត​។

លោក គ្រី សាន​ បាន​លើក​ឡើង​ថា ទាំង​លោក និង​មេភូមិ​របស់​លោក​មិន​មែន​ជួយ​តែ​​​អ្នក​គាំ​ទ្រ​គណបក្ស​ប្រជាជន​កម្ពុជា​ហើយ​មិន​ជួយ​សមាជិក​គណបក្ស​ប្រឆាំង​នោះ​ទេ ប៉ុន្តែ​យោង​តាម​អ្នក​ភូមិ​មួយ​ចំនួន​ក្នុង​តំបន់​នោះ​បាន​ឲ្យ​ដឹងថា តួនាទី​របស់​មន្ត្រី​មូលដ្ឋាន​ក្នុង​នាម​ជា​សកម្មជន​បក្ស​ បាន​ធ្វើ​ឲ្យ​មាន​បញ្ហា​ចំពោះ​អ្នក​ណា​ដែល​គាំ​ទ្រ​គណបក្ស​ប្រឆាំង​ដោយ​បើក​ចំហ​។

បើ​ប្រៀបធៀប​ស្លាក​សញ្ញា​ និង​​ខិត្តប័ណ្ណ​​ផ្សព្វ​ផ្សាយ​របស់​គណបក្ស​ប្រជា​ជន​កម្ពុជា​ ដែល​បាន​បិទ​ស្ទើរ​តែ​គ្រប់​ផ្ទះ​តាម​បណ្ដោយ​ផ្លូវ​លំ​​តភ្ជាប់​ភូមិ​មួយ​ចំនួន​ក្នុង​ឃុំ​ស្វាយ​ភ្លោះ​វិញ​ គេ​ឃើញ​ថា សូម្បី​តែ​ស្លាក​សញ្ញា​ធម្មតា​របស់​គណបក្ស​សង្គ្រោះ​ជាតិ គឺ​ពុំ​សូវ​មាន​ឡើយ​។ ប៉ុន្តែ​នៅ​ខាង​មុខ​ផ្ទះ​របស់​លោក អាត ខ្នា វិញ​ មាន​ស្លាក​សញ្ញា​រូប​ព្រះ​អាទិត្យ​រះ​របស់​គណ​​​បក្ស​សង្គ្រោះ​ជាតិ ​ទ្រ​ដោយ​​បង្គោល​ឫស្សី​​កម្ពស់​បី​ម៉ែត្រ​។

លោក អាត ខ្នា អាយុ​៤៥​ឆ្នាំ​ ជា​កសិករ​បាន​លើក​ឡើង​ថា នៅ​ពេល​គណបក្ស​ប្រជា​ជន​កម្ពុជា​បាន​ចុះ​មក​ជួយ​ប្រជា​ពល​រដ្ឋ​នៅ​ក្នុង​ភូមិ​របស់​លោក អំឡុង​ពេល​មាន​ព្យុះ និង​ទឹក​ជំនន់​ ផ្ទះ​ឈើ​ដ៏​កំសត់របស់​លោក​តែង​តែ​ត្រូវ​គេ​រំលង​​ ដោយសារ​តែ​ទំនាក់​ទំនង​ដោយ​​​​បើក​ចំហ​របស់​លោក ជាមួយ​គណបក្ស​ប្រឆាំង​។

លោក​បាន​និយាយ​ថា “ សម្រាប់​ពួក​យើង​ដែល​គាំ​ទ្រ​គណបក្ស​ប្រឆាំង​យ៉ាង​ខ្លាំង​ ពួក​យើង​​​មិន​ដែល​ទទួល​បាន​​ជំនួយ​ពី​អាជ្ញាធរ​មូលដ្ឋាន​ឡើយ​ នៅ​ពេល​យើង​ជួប​ប្រទះ​គ្រោះ​មហន្តរាយ​ ទោះ​បី​ជា​ពួក​យើង​ក្រ​ដល់​ថ្នាក់​នេះ​ក៏ដោយ​”។ លោក​បាន​បន្ថែម​ថា អង្គការ​ដូច​ជា កាកបាទ​​ក្រហម​កម្ពុជា​​​ ជា​ដើម “ បាន​ផ្ដល់អំណោយ​​ដល់ប្រជា​ពល​រដ្ឋ​ណា​ដែល​គាំ​ទ្រ [គណបក្ស​ប្រជាជន​កម្ពុជា] ប៉ុណ្ណោះ​”។

អ្នក​ស្រី​ ចេង គួង អាយុ​៣៧​ឆ្នាំ​ ដែល​ជា​សមាជិក​មួយ​រូប​នៅ​ក្នុង​ក្រុម​ការ​ងារ​របស់​គណបក្ស​ប្រជា​ជន​កម្ពុជា​ នៅ​ក្នុង​ភូមិ​បឹង​ឯក​ កន្លែង​ដែល​លោក អាត ខ្នា រស់​នៅ​ បានបដិ​​​​​​​​​សេធ​ថា មិន​មាន​ការ​​ផ្ដល់​​អំណោយ​​​ណា​មួយ​​​​សម្រាប់​តែ​អ្នក​គាំ​ទ្រ​គណបក្ស​ប្រជាជន​កម្ពុជា​​​ទេ​ ប៉ុន្តែ​អ្នក​ស្រី​បាន​លើក​​ឡើង​ថា អ្ន​ក​ស្រី​​​ចូល​រួម​​យ៉ាង​​សកម្ម​​ជាមួយ​គណបក្ស​កាន់​អំណាច “​ពីព្រោះ [គណបក្ស​ប្រជា​ជន​កម្ពុជា] ​ស្ថាបនា​ផ្លូវ​ សាងសង់​សាលា​រៀន​ និង​មន្ទីរ​ពេទ្យ​សម្រាប់​យើង​​”។

នៅ​លើ​​ដើម​ឈើ​ជុំ​វិញ​ផ្ទះ​របស់​លោក ឈឹម លាប និង​នៅ​លើ​សរស​ផ្ទះ​របស់​លោក ​មាន​បិទ​សុទ្ធ​តែ​ស្លាក​សញ្ញា​របស់​គណបក្ស​ប្រជា​ជន​កម្ពុជា​​ ប៉ុន្តែ​កសិករ​អាយុ​៣៩ឆ្នាំ​​រូប​នេះ​ ​បាន​និយាយ​ថា គាត់​មិន​បាន​បិទ​ស្លាក​សញ្ញា​ទាំង​នេះ​ទេ។

គាត់​បាន​និយាយ​ថា“ ខ្ញុំ​មិន​ច្បាស់​ថា អ្នក​ភូមិ​ទាំង​អស់ពិត​ជា​គាំ​ទ្រ​គណបក្ស​ប្រជាជន​កម្ពុជា​នោះ​ឡើយ​​ ប៉ុន្តែ​យើង​បាន​អនុញ្ញាត​ឲ្យ​អាជ្ញាធរ​មូលដ្ឋាន​បិទ​ស្លាក​សញ្ញា​ទាំង​នេះ​ ពី​ព្រោះ​​យើង​មិន​ចង់​មាន​ជម្លោះ​ជាមួយ​ពួក​​​គេ”។ គាត់​បាន​បន្ថែម​ថា គាត់​​ព្រួយ​បារម្ភ​ថា ខ្លួន​​​អាច​នឹង​បាត់​បង់​ភាព​ស្និទ្ធ​ស្នាល​ជាមួយ​អាជ្ញា​​​ធរ​មូលដ្ឋាន​ ប្រសិន​បើ​គាត់​មិន​បង្ហាញ​ថា គាត​​​់​គាំទ្រ​គណបក្ស​ប្រជាជន​កម្ពុជា​ទេ​​​នោះ​។ គាត់​បាន​និយាយ​បន្ត​ទៀត​ថា “ ​យើង​នៅ​ស្ងាត់​ស្ងៀម​ ប៉ុន្តែ​នៅ​ពេល​ថ្ងៃ​បោះ​ឆ្នោត​មក​ដល់​ យើង​អាច​បោះ​ឆ្នោត​ឲ្យ​នរណា​ក៏​បាន​តាម​ចិត្ត​ចង់​”៕

ប្រែ​សម្រួល​ដោយ ស៊ា ស៊ុយឈាង

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស