មន្ត្រីនគរបាលប្រឆាំងការជួញដូរមនុស្សម្នាក់បានឲ្យដឹងកាលពីម្សិលមិញថា គេរាយការណ៍មកថា តុលាការថៃបានយល់ព្រមធ្វើបត្យាប័ន ជនជាប់ចោទឈ្មាះ ដេវីដ ចនហេ្លតឆឺ ( David JohnFletcher) អាយុ៦៧ឆ្នាំ មកកាន់ប្រទេសកម្ពុជាវិញ ដែលនៅទីនេះ គាត់ត្រូវបានសាលាដំបូងរាជធានីភ្នំពេញកាត់ទោសកំបាំងមុខពីបទចាប់រំលោភក្មេងស្រីអាយុ១៦ឆ្នាំម្នាក់ និងត្រូវបានផ្ដន្ទាទោសឲ្យជាប់ពន្ធនាគាររយៈពេល១០ឆ្នាំ។
ជនជាប់ចោទឈ្មោះ ដេវីដ ចនហេ្លតឆឺ ជាជនជាតិអង់គ្លេសបានរត់គេចខ្លួនពីប្រទេសកម្ពុជាទៅប្រទេសថៃក្នុងឆ្នាំ២០១០ដោយមានការចោទប្រកាន់ជាច្រើនក្នុងសារព័ត៌មានចក្រភពអង់គ្លេសដែលថា គាត់បានរៀបចំជំនួយសប្បុរសធម៌សម្រាប់កុមារ ដើម្បីល្បួងជនរងគ្រោះមិនទាន់គ្រប់អាយុដើម្បីរួមភេទ។គាត់ត្រូវបានចាប់ខ្លួននៅចុងឆ្នាំដដែលនោះ ហើយសាលាដំបូងថៃបានអនុម័តឲ្យធ្វើបត្យាប័នជននេះមកប្រទេសកម្ពុជាវិញ ប៉ុន្តែជនជាប់ចោទរូបនេះបានដាក់ពាក្យបណ្ដឹងឧទ្ធរណ៍។
កាលពីម្សិលមិញប្រព័ន្ធផ្សព្វផ្សាយមួយបានរាយការណ៍ថា តុលាការថៃបានច្រានចោលបណ្ដឹងឧទ្ធរណ៍របស់គាត់ ប៉ុន្តែ មន្ត្រីកម្ពុជានិងថៃមិនបានដឹងច្បាស់អំពីបញ្ហានេះទេ។
លោក កែវ សុធា នាយការិយាល័យនគរបាលប្រឆាំងការជួញដូរមនុស្សបានមានប្រសាសន៍ថា “ ខ្ញុំគ្រាន់តែឮថា តុលាការថៃបានចេញបញ្ជាឲ្យធ្វើបត្យាប័នជននេះឲ្យមកទទួលទោសនៅកម្ពុជាវិញ”។ លោកបានមានប្រសាសន៍បន្ថែមទៀតថា គាត់មិនទាន់ទទួលបានសេចក្ដីប្រកាសជាផ្លូវការនៅឡើយទេ។
លោក កុយ គួង អ្នកនាំពាក្យក្រសួងការបរទេសកម្ពុជាក៏បានមានប្រសាសន៍ផងដែរថា លោកពុំបានទទួលព័ត៌មានអំពីការធ្វើបត្យាប័ននេះទេ។ ចំណែកលោក វ៉ារ៉ាប៉ូល ចិនសាវ៉ាឌីចៃ (Varapol Chen savasdijai) អ្នកនាំពាក្យក្រសួងការបរទេសថៃបានមានប្រសាសន៍អំពីបញ្ហានោះកាលពីល្ងាចម្សិលមិញថា “ ក្រសួងមិនទាន់ទទួលសេចក្ដីជូនដំណឹងជាផ្លូវការអំពីសេចក្ដីសម្រេចរបស់តុលាការនៅឡើយទេ ដូច្នេះយើងពុំមានតួនាទីក្នុងការបញ្ជាក់ថា តើសំណើរបស់គាត់ត្រូវបានយល់ស្របឫអត់នោះឡើយ”៕
ប្រែសម្រួលដោយ ហម សុផាណ្ណា