រយៈពេលជិតពីរសប្ដាហ៍ បន្ទាប់ពីលោក ឈូក បណ្ឌិត ត្រូវបានតុលាការផ្ដន្ទាទោសកំបាំងមុខឲ្យជាប់ពន្ធនាគាររយៈពេល១៨ខែពីបទបាញ់បោះ និងបង្កឲ្យមានរបួសដល់កម្មការិនីបីនាក់អំឡុងការតវ៉ាមួយ នគរបាលបានឲ្យដឹងថា ខ្លួននៅតែមិនទាន់ដឹងអំពីកន្លែងលាក់ខ្លួនរបស់អតីតអភិបាលក្រុងបាវិតនេះនៅឡើយទេ។
បច្ចុប្បន្ននេះ មានព័ត៌មានផ្សព្វផ្សាយតាមគេហទំព័រក្នុងស្រុកមួយដោយសង្ឃឹមថា ការស្វែងរកចាប់ខ្លួនជនជាប់ចោទរូបនេះបានក្នុងពេលឆាប់ៗនេះតាមរយៈការផ្ដល់ប្រាក់រង្វាន់សម្រាប់ព័ត៌មានណាមួយ ដែលនាំទៅរកការចាប់ខ្លួន។
ដោយបានផ្សព្វផ្សាយអស់រយៈពេលបួនខែមកហើយ គេហទំព័រព័ត៌មានដើមត្នោតកាលពីថ្ងៃអង្គារ បានផ្សព្វផ្សាយឲ្យដឹងថា ខ្លួននឹងផ្តល់ប្រាក់រង្វាន់ចំនួន៧លានរៀល ដល់ប្រជាពលរដ្ឋណា ដែលអាចផ្តល់តម្រុយដែលអាចចាប់ខ្លួនជនល្មើសនេះបាន។
លោក ហុក រ៉េន នាយកគ្រប់គ្រងគេហទំព័រនេះមានប្រសាសន៍ថា “ គោលបំណងក្នុងការផ្តល់រង្វាន់នេះសម្រាប់ការចាប់ខ្លួន ឈូក បណ្ឌិត គឺដើម្បីពង្រឹងប្រព័ន្ធតុលាការនៅប្រទេសកម្ពុជា និងដើម្បីផ្សព្វផ្សាយដីកាចាប់ខ្លួនជននេះ ឲ្យដឹងជាសាធារណៈ”។
លោក ហុក រ៉េន បានមានប្រសាសន៍ថា “ ករណីនេះកំពុងធ្វើឲ្យប៉ះពាល់ដល់វិស័យកាត់ដេរ ខណៈដែលជនល្មើសមិនទាន់ចាប់ខ្លួនបាននោះ”។ លោកបានមានប្រសាសន៍បន្ថែមថា ប្រាក់រង្វាន់នេះបានមកពីការឧបត្ថម្ភពីអ្នកគាំទ្រគេហទំព័រព័ត៌មានដើមត្នោត ភាគច្រើនជានិស្សិត និងមន្ត្រីរាជការ ដែលមានជំនឿយ៉ាងមុតមាំថា គ្រួសារជនរងគ្រោះទាំងនេះត្រូវបានគេបដិសេធមិនផ្តល់យុត្តិធម៌ឲ្យនោះទេ ល្គឹកណា ឈូក បណ្ឌិត នៅតែមានសេរីភាពនោះ។
អង្គការសិទ្ធិមនុស្សលីកាដូ ស្វាគមន៍ចំពោះការផ្តល់ប្រាក់រង្វាន់នេះថា ជាមធ្យោបាយមួយសម្រាប់ប្រជាពលរដ្ឋជួយនគរបាលក្នុងកិច្ចប្រឹងប្រែងរបស់ពួកគេ ដែលមិនទទួលបានលទ្ធផលអ្វីទាល់តែសោះ ក្នុងការស្វែងរក និងការចាប់ខ្លួនអតីតអភិបាលក្រុងបាវិតរូបនេះ។
លោក អំ សំអាត អ្នកគ្រប់គ្រងបច្ចេកទេសប្រចាំអង្គការសិទ្ធិមនុស្សលីកាដូបានមានប្រសាសន៍ថា “ នេះជាការចូលរួមដើម្បីជួយពង្រឹងច្បាប់តាមរយៈការបង្ហាញជូនប្រជាពលរដ្ឋថា ប្រជាពលរដ្ឋអាចអនុវត្តសិទ្ធិរបស់ខ្លួន តាមរយៈការផ្តល់ព័ត៌មានជូនមន្ត្រីនគរបាល”។
លោក អំ សំអាត បានមានប្រសាសន៍ថា “ វាជាកាតព្វកិច្ចរបស់នគរបាលក្នុងការចាប់ខ្លួនជនល្មើសរូបនេះ ប៉ុន្តែ យើងនៅតែមានការព្រួយបារម្ភ ពីព្រោះនៅពេលប្រជាពលរដ្ឋរាយការណ៍ទៅនគរបាល នគរបាលត្រូវតែការពារប្រជាពលរដ្ឋ និងធានាសុវត្ថិភាពរបស់ពួកគាត់”។
លោក កឹង ខន ស្នងការនគរបាលខេត្តស្វាយរៀង បានមានប្រសាសន៍ថា មន្ត្រីរបស់លោកមិនទាន់មានតម្រុយណាមួយពីកន្លែងលាក់ខ្លួនរបស់ ឈូក បណ្ឌិត ទេ។ លោកមានប្រសាសន៍ថា “ យើងមិនដឹងថា គាត់នៅទីណានោះទេ”។ លោកបានបដិសេធមិនធ្វើអត្ថាធិប្បាយបន្ថែមទៀតទេ។
លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃបានបដិសេធមិនធ្វើអត្ថាធិប្បាយពាក់ព័ន្ធនឹងករណីនេះឡើយ៕
ប្រែសម្រួលដោយ ស៊ុំ សុខភុំ