34 C
Phnom Penh

ចោទប្រកាន់​ជន​ជាតិ​វៀត​ណាម​ពីរ​នាក់​ពី​បទ​បំភិត​បំភ័យ​ពាក់​ព័ន្ធ​រឿង​នយោ​​​បាយ​ក្នុង​ខេត្ត​បន្ទាយមានជ័យ​

ដោយ ឌឹ ខេមបូឌា ដេលី

បទវិភាគ

មន្ត្រី​គណបក្ស​សង្គ្រោះ​ជាតិ​​បាន​និយាយ​ថា ជនជាតិ​វៀត​ណាម​ពីរ​នាក់​ត្រូវ​បាន​ចាប់​ខ្លួន​ ហើយ​បញ្ជូន​ទៅ​សា​លា​ដំបូង​ខេត្ត​បន្ទាយ​មាន​ជ័យ​កាលពី​ម្សិលមិញ ​បន្ទាប់​ពី​បុរស​ទាំង ពីរ​នាក់​នេះ​ត្រូវ​បាន​ចោទប្រកាន់​ពី​បទ​ចូល​ក្នុង​ផ្ទះ​របស់​បេក្ខជន​តំណាង​រាស្ត្រ​គណ​បក្ស​សង្គ្រោះ​ជាតិ​ដោយ​ខុស​ច្បាប់ ជា​ទង្វើ​ដែល​តំណាងរាស្ត្រ​គណបក្ស​សង្គ្រោះ​ជាតិ​មួយ​រូប​ហៅថា ជា​ការ​បំភិត​បំភ័យ​ពាក់​ព័ន្ធ​រឿង​នយោបាយ។

លោក បាន​ ធឿន នាយ​នគរបាល​អន្តោ​ប្រវេសន៍​ខេត្ត​បន្ទាយ​មាន​ជ័យ​បាន​មាន​ប្រសាសន៍​ថា នគរ​បាល​បាន​ចាប់​ខ្លួន​ រុំ លី​ អាយុ៥៥ឆ្នាំ ជា​ជន​ជាតិ​វៀត​​ណាម​សញ្ជាតិ​ខ្មែរ​ និង​ជន​ជាតិ​វៀត​ណាម​ម្នាក់ទៀត​អាយុ​​​៤៤ឆ្នាំ​កាលពី​ថ្ងៃ​ពុធ​នៅ​ក្នុង​ក្រុង​សេរី​សោភ័ណ បន្ទាប់ពី​បេក្ខជន​តំណាង​​រាស្ត្រ​គណ​​​បក្ស​សង្គ្រោះ​ជាតិ​ម្នាក់​បាន​ដាក់​ពាក្យ​បណ្តឹង​។

លោក​បាន​មាន​ប្រសាសន៍​ថា អំឡុង​ការ​សាកសួរ​ ពួកគេ​ទាំងពីរ​នាក់​បាន​អះអាង​ថា ពួកគេ​បាន​ធ្វើដំណើរ​ទៅ​ខេត្ត​បន្ទាយ​មាន​ជ័យ​ពីរ​បី​ដង​​ហើយ​​ដើម្បី​រក​កន្លែង​បើក​គ្លីនិក ហើយ​បាន​បញ្ជាក់​ថា ពួកគេ​ត្រូវ​បាន​អនុញ្ញាត​​​​ឲ្យ​ចូល​ទៅក្នុង​ផ្ទះ​នោះ។

ប៉ុន្តែ​ លោក ឡុង រី បេក្ខជន​តំណាង​រាស្ត្រ​គណបក្ស​សង្គ្រោះ​ជាតិ​បាន​មាន​ប្រសាសន៍​ថា ការ​បំពាន​នេះ​គឺ​ជា​សកម្ម​ភាព​បំភិត​​​បំភ័យ។ លោក​​​​មាន​ប្រសាសន៍​ថា យើង​បាន​លើក​​​ឡើង​ច្រើន​លើក​ច្រើន​សា​មក​ហើយ​ពី​ជន​អន្តោ​ប្រវេសន៍​ខុស​ច្បាប់​ហូរ​ចូល​មក​ក្នុង​ប្រទេស​កម្ពុជា​ ដែល​មូល​ហេតុ​នេះ​ជា​ការ​គំរាម​កំហែង​ នៅ​ពេល​ដែល​ជន​ជាតិ​វៀត​​ណាម​ទាំង​ពីរ​នាក់​នេះ​បាន​ចូល​ក្នុង​ផ្ទះ​របស់​តំណាង​រាស្ត្រ​យើង។ លោក​បាន​មាន​ប្រសាសន៍​បន្ថែម​ទៀត​ថា ផ្ទះ​នេះ​បាន​​ស្លាក​សញ្ញា​ច្បាស់​លាស់​នៅ​ខាង​ក្រៅ​ថា ជា​ផ្ទះ​របស់​តំណាង​រាស្ត្រ​គណ​បក្ស​សង្គ្រោះ​ជាតិ ហើយ​ថា ជន​សង្ស័យ​ទាំង​​​ពីរ​នាក់​នេះ​បាន​មានះចូល​តែ​ម្តង។

លោក​បាន​មាន​ប្រសាសន៍​ថា សន្តិ​សុខ​យាម​ផ្ទះ​នោះ​បាន​ព្យាយាម​រារាំង​បុរស​ទាំង​ពីរ​នាក់​នេះ​មិន​ឲ្យ​ចូល​ទៅ​ក្នុង​ផ្ទះ​ដែរ ប៉ុន្តែ​ជន​សង្ស័យ​​​​នេះ​មិន​ព្រម​ឈប់​ឡើយ ហើយ​បាន​ចូល​ក្នុង​ផ្ទះ​នោះ​ដើម្បី​ពិនិត្យមើល​​បន្ទប់​មួយ​ចំនួន។ និយាយ​តាម​ទូរ​ស័ព្ទ​កាលពី​ម្សិល​មិញ អ្នកស្រី ឡាយ សាវ៉ន ដែល​ជា​ម្ចាស់ផ្ទះ បាន​មាន​ប្រសាសន៍​ថា ថ្មីៗ​នេះ​អ្នកស្រី​បាន​ជួល​ផ្ទះ​របស់​គាត់​ទៅ​ឲ្យ​បេក្ខជន​តំណាង​រាស្ត្រ​គណបក្ស​សង្គ្រោះ​ជាតិ​ ហើយ​ថា ជនជាតិ​វៀត​ណាម​ទាំង​ពី​រ​នាក់​នេះ​បាន​មក​ទាក់​ទង​គាត់​​ដាច់​ដោយ​ឡែក​ពី​គ្នា​ដើម្បី ជួល​ផ្ទះ​សំណាក់​ដែល​អ្នកស្រី​បាន​កាន់​កាប់​នេះ។

​​អ្នកស្រី​បាន​និយាយ​ថា បុរស​ទាំងពីរ​នាក់​នេះ​មិនបាន​យល់​ព្រមនឹង​តម្លៃ​ជួលគឺ​៥.០០០​ដុល្លារ​ក្នុង​មួយ​ខែ​ដើម្បី​ជួល​អគារ​ដែល​មាន​៣០​បន្ទប់នេះ​ធ្វើ​ជា​គ្លី​និក​ឡើយ។ អ្នកស្រីបាន​និយាយ​ថា “ បុរស​ម្នាក់​ដែល​និយាយ​ខ្មែរ​យ៉ាង​ច្បាស់​បាន​សុំ​មើល​ផ្ទះ​របស់​ខ្ញុំ​មួយ​ទៀត​ ប៉ុន្តែ​ខ្ញុំ​មិន​ព្រម​ឲ្យ​ពួកគេ​ចូល​ទៅ​ក្នុង​ទេ ពីព្រោះ​ខ្ញុំ​បាន​ជួល​ផ្ទះ​នេះ​ទៅ​ឲ្យ​មន្ត្រី​ជាន់ខ្ពស់​ [គណបក្ស​សង្គ្រោះ​ជាតិ​]​រួច​​​ហើយ”។

លោក ស៊ុម ចាន់គា អ្នក​សម្រប​សម្រួល​ប្រចាំ​ខេត្ត​នៅ​អង្គការ​សិទ្ធិមនុស្ស​អាដ​​​ហុក​បាន​មាន​ប្រសាសន៍​ថា ការ​មានះ​ចូល​ក្នុង​ផ្ទះ​​​អ្នក​ដទៃ​​មាន​ទោស​ជាប់​ពន្ធនាគារ​រហូត​ដល់​មួយ​ឆ្នាំ តាមច្បាប់​កម្ពុជា។ លោក​បាន​មាន​ប្រសាសន៍​ថា “យើង​កំពុង​​​​ធ្វើការ​ស៊ើប​អង្កេត​រក​ឲ្យ​ឃើញ​ថា តើ​បុរស​ជន​ជាតិ​វៀត​ណាម​ទាំងពីរ​នាក់​នេះ…ពិតជា​មាន​ចេតនា​អាក្រក់ ឬ​មានះ​ចូ​ល​ទៅ​ក្នុង​ផ្ទះ​នេះ​ក្នុង​គោលបំណង​គំរាមកំហែង​ឬ​យ៉ាង​ណា”៕

 ប្រែ​សម្រួល​ដោយ សោម សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស