រូប​ថត​កាត់ត​​បង្ហាញពីការ​គាំទ្រ​​របស់​ អ៊ែនជីលីណា ចូលី និង ប៊្រែត ភីត ចំពោះ​គណ​បក្ស​សង្គ្រោះ​ជាតិ

ពេលក្រឡេក​​មើល​រូបថត​មួយ​ ​ដែល​ត្រូវ​បាន​ចែក​រំលែកតៗគ្នាជា​ច្រើន​រយដង​នៅ​​​តាម​​គេហ​ទំព័របណ្តាញ​ទំនាក់​​​ទំនង​​​សង្គម​​​​អ្នក​នឹង​ឃើញ​តារា​ភាព​យន្ត​ហូលី​វូដ អ៊ែន​​​ជែលី​​​ណា ចូលី (Angelina Jolie) និង​ស្វាមី ប៊្រែត ភីត (Brat Pitt) និង​តន្ត្រីករ​ វីក្លេហ្វ ជីន (Wyclef Jean) ​​​​ក្លាយ​ជា​អ្នក​គាំ​ទ្រថ្មី​បំផុត​របស់​គណ​បក្ស​សង្គ្រោះ​ជាតិ ដែល​ជា​គណ​បក្ស​ប្រឆាំង។

តន្ត្រីករ វីក្លេហ្វ ជីន និង​​​ តារាហូលីវូដ អ៊ែនជែលីណា ចូលី និ​​​ង ប្រែ៊ត ភីត ថត​​​រូប​​​​​​ជាមួយ​​​ក្មេងៗ​​​ក្នុង​​​ប្រទេស​​​ហៃទី កាល​​​ពីឆ្នាំ​​​២០១០។ រូបថត​​​​​​បង្ហាញពី​​​សញ្ញាម្រាម​​​ដៃ​​​ប្រាំពីរនេះ ត្រូវគេយល់​​​ថា ពួក​​​គេ​​​​​​គាំទ្រ​​​គណបក្ស​​​សង្គ្រោះជាតិ​​​។
តន្ត្រីករ វីក្លេហ្វ ជីន និង​​​ តារាហូលីវូដ អ៊ែនជែលីណា ចូលី និ​​​ង ប្រែ៊ត ភីត ថត​​​រូប​​​​​​ជាមួយ​​​ក្មេងៗ​​​ក្នុង​​​ប្រទេស​​​ហៃទី កាល​​​ពីឆ្នាំ​​​២០១០។ រូបថត​​​​​​បង្ហាញពី​​​សញ្ញាម្រាម​​​ដៃ​​​ប្រាំពីរនេះ ត្រូវគេយល់​​​ថា ពួក​​​គេ​​​​​​គាំទ្រ​​​គណបក្ស​​​សង្គ្រោះជាតិ​​​។

នៅ​ក្នុង​រូប​ថត​នោះបង្ហាញ​ពី​អ្នក​ស្រី អ៊ែន​​​ជែលីណា ចូលី ដែល​បាន​​​អះអាងថា​ ខ្លួន​មាន​ទំនាក់​​​​ទំនង​ជិតស្និទ្ធ​នឹង​ប្រទេស​កម្ពុជា ចាប់​តាំង​ពី​ខ្លួន​បាន​ស្មូម​ក្មេង​ប្រុស​កម្ពុជា​ម្នាក់​យក​ទៅ​ចិញ្ចឹម​កាល​ពី​ឆ្នាំ២០០២ លោក ប៊្រែត ភីត​​​ និង​លោក វីក្លេហ្វ ជីន លើក​​ម្រាម​ដៃ​ប្រាំពីរ​ ជា​​​សញ្ញា​ប្រើ​ដោយ​បណ្តា​អ្នក​គាំ​ទ្រ​គណ​បក្ស​សង្គ្រោះជាតិ​ ដែលតំណាង​ឲ្យ​លេខ​រៀង​ទី​​​៧​​​​របស់​គណ​បក្ស​នេះ​នៅ​ក្នុង​សន្លឹក​ឆ្នោត​សម្រាប់​ការ​​បោះ​ឆ្នោត​នា​ថ្ងៃ​ទី​២៨​ខែ​កក្កដា​​​។

រូបភាព​នេះ​ទទួល​បាន​ការ​ចូល​ចិត្ត​យ៉ាង​ខ្លាំង​នៅ​លើ​គេហ​ទំព័រ​បណ្តាញ​ទំនាក់​​​ទំនង​​​សង្គម​នានា​ដូចជា​ហ្វេសប៊ុកជា​ដើម ដែល​ទទួល​បាន​​ការ​ចូល​ចិត្ត​ជាង​​៥០០ និង​ត្រូវ​បាន​ចែក​រំលែកតៗ​​​គ្នា​ជិត​៣៥០ដង​គិត​មក​ទល់​នឹង​ល្ងាច​​​​ម្សិល​​​មិញ។

បណ្តា​អ្នក​នយោបាយគណ​បក្ស​សង្គ្រោះ​ជាតិ​​និង​អ្នក​គាំទ្ររបស់​ខ្លួន  ​តែង​តែធ្វើ​​សញ្ញា​​​ម្រាម​ដៃ​ប្រាំ​ពីរ​​អំឡុង​ពេល​ធ្វើ​យុទ្ធ​នាការ​ឃោសនា​បោះ​ឆ្នោត និង​ស្រែកថា “ ដូរមិនដូរ”។

តែ​ទោះ​ជា​យ៉ាង​ណា តាម​ពិត​រូប​ថត​នេះ​ថត​តាំង​ពី​បី​ឆ្នាំ​មុន​ម៉្លេះ​នៅ​ក្នុង​ប្រទេស​ហៃទី កន្លែង​ដែល​តារា​ទាំង​នេះ​​​​​ធ្វើ​ទស្សន​កិច្ច​បំពេញ​​​​កិច្ច​ការ​មនុស្ស​ធម៌​​ក្នុង​សកម្មភាព​ឧបត្ថម្ភ​គាំទ្រ​ដល់​ជន​រង​គ្រោះ​នៃ​ការ​រញ្ជួយ​ដី​ដ៏​កំណាច។​​​ប្តី​ប្រ​ពន្ធ​ជា​តារា​ហូលីវូដ​ទាំង​ពីរ​នេះ​បាន​ស្ថិត​ក្នុង​ដំណើរ​ទស្សន​កិច្ច​មួយ​ទៅ​កាន់​ “Yele Haiti” ជា​អង្គ​ការ​ក្រៅ​រដ្ឋាភិបាល​មួយគ្រប់​គ្រង​ដោយ​លោក វីក្លេហ្វ ជីន ដែល​ជា​សមាជិក​​​ក្រុម​តន្ត្រីហ៊ីបហប់ The Fugees និង​ជា​ជន​ជាតិ​ដើម​ហៃទី ដែល​បាន​ជ្រើស​រើស​លេខ៧​ជា​និមិត្ត​សញ្ញា​សម្រាប់​អង្គ​ការ​របស់​លោក។

កាល​ពី​ដើម​ឆ្នាំ​នេះ រូប​ថតកាត់​ត​មួយ​នៃ​លោក បារ៉ាក់ អូបាម៉ា ប្រធានាធិបតី​សហរដ្ឋ​អាមេេរិក កាន់​ស្លាក​សញ្ញាគណ​បក្ស​សង្គ្រោះ​ជាតិ​ ក៏​ត្រូវ​បាន​ផ្សព្វ​ផ្សាយតាម​អីុនធើ​ណិត​​យ៉ាង​ទូលំ​ទូលាយ​ដែរ។​ គណ​បក្ស​សង្គ្រោះជាតិបាន​លើក​ឡើង​ថា រូប​ថត​អ្នក​ស្រី អ៊ែនជែលីណា ចូលី ដែល​មាន​ស្លាកសញ្ញា​គណ​បក្ស​របស់​ខ្លួន​​នៅពី​ក្រោម​ មិន​មែន​ខ្លួន​ជា​អ្នក​​បង្កើត​ឡើង​និង​ចែក​ចាយ​នោះទេ។

តែទោះ​ជាយ៉ាងណា បណ្តា​អ្នក​បញ្ចេញ​មតិ​តាមហ្វេសប៊ុក ហាក់​ដូចជា​យល់​ថា​រូប​ថត​នោះ​ជារូប​ពិត និងជា​ការ​គាំ​ទ្ររបស់​​តារា​អាមេរិក ទាំង​នេះ​​ចំពោះ​គណ​បក្ស​ប្រឆាំង។ គេ​មិន​ដឹង​ថា តើ​អ្នកស្រី អ៊ែនជែលីណា ចូលី ដែល​មាន​សញ្ជាតិ​កម្ពុជា និង​ដែល​មាន​សិទ្ធិ​បោះ​ឆ្នោត​នោះ  មាន​ទំនាក់​ទំនង​ផ្នែក​នយោ​​​បាយ​ណា​មួយ​នៅ​ក្នុង​ប្រទេស​កម្ពុជា ឬយ៉ាង​ណា​នោះ​ទេ ទោះ​បីជា​លោក​នាយក​រដ្ឋ​មន្ត្រី ហ៊ុន សែន បាន​ផ្តល់​លិខិត​ឆ្លង​ដែន​ដល់​គាត់ដោយ​ផ្ទាល់ ដើម្បី​ទទួលស្គាល់​កិច្ច​ការ​មនុស្ស​ធម៌​របស់​គាត់​នៅ​ក្នុងប្រទេស​កម្ពុជា ក៏​ដោយ​៕

ប្រែសម្រួល​ដោយ តែម សុខុម​​​​​​

© 2013, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.