ស្របពេលដែលឱកាសនយោបាយរបស់លោក សម រង្ស៊ី ប្រធានគណបក្សសង្គ្រោះជាតិប្រសើរឡើង បន្ទាប់ពីទទួលបានការព្រះរាជទានលើកលែងទោសនោះ ឱកាសនយោបាយរបស់លោក កឹម សុខា អនុប្រធានរបស់លោកចេះតែបន្តជួបនឹងបញ្ហានៅមុនការបោះឆ្នោតជាតិនាថ្ងៃទី២៨ ខែកក្កដា។
ដោយប្រឈមនឹងពាក្យបណ្តឹងនិងការគំរាមប្តឹងជាច្រើន លោក កឹម សុខា បានទទួលដីកាជាលើកទី៣ពីសាលាដំបូងរាជធានីភ្នំពេញ ឲ្យចូលខ្លួនឆ្លើយបំភ្លឺនៅសប្តាហ៍នេះ ហើយលើកនេះគឺដីកាកោះហៅឲ្យចូលខ្លួនដោះស្រាយពាក់ព័ន្ធនឹងការមិនផ្តល់ប្រាក់ឲ្យស្រីកំណាន់ម្នាក់។
លោក កឹម សុខា ដែលបានបដិសេធថា គ្មានទំនាក់ទំនងណាមួយជាមួយស្ត្រីឈ្មោះ កែវ សុផាណ្ណារី អាយុ៤១ឆ្នាំ មិនអាចទាក់ទងសំុការបំភ្លឺបាន ទេ។ លោក ចាន់ ចិន មេធាវីរបស់លោកបានមានប្រសាសន៍ថា លោកទទួលបានដីកាកោះហៅលោក កឹម សុខា ឲ្យចូលខ្លួនឆ្លើយបំភ្លឺក្នុងតុលាការនៅថ្ងៃសុក្រ ជាថ្ងៃតែមួយដែលគណបក្សសង្គ្រោះជាតិគ្រោងនឹងប្រមូលផ្តុំអ្នកគាំទ្រយ៉ាងច្រើនក្នុងរាជធានីភ្នំពេញ ដើម្បីស្វាគមន៍ការវិលត្រឡប់របស់លោក សម រង្ស៊ី ពីការរស់នៅដោយនិរទេសខ្លួនអស់រយៈពេលជិតបួនឆ្នាំ។
ហើយដូចដីកាកោះហៅមុនៗទាំងអស់ដែរ លោក ចាន់ ចិន ថ្លែងថា កូនក្តីរបស់លោកមិនអាចចូលរួមសវនាការឆ្លើយបំភ្លឺនៅថ្ងៃសុក្រនេះបានទេ។ លោកបន្ថែមថា “ ពេលនេះលោករវល់ធ្វើយុទ្ធនាការឃោសនាបោះឆ្នោត ហើយលោកត្រូវទៅទទួលស្វាគមន៍ឯកឧត្ដម សម រង្ស៊ី ទៀតផង។ ខ្ញុំនឹងដាក់សំណើសុំពន្យារពេល [ថ្ងៃនេះ] ឬថ្ងៃស្អែក”។ លោកមានប្រសាសន៍ថា លោក កឹម សុខា ត្រៀមខ្លួនរួចជាស្រេច និងមានឆន្ទៈក្នុងការចូលខ្លួនទៅតុលាការ នៅពេលការបោះឆ្នោតនៅថ្ងៃទី២៨ ខែកក្កដាចប់ភ្លាម។ លោកថ្លែងថា “ កូនក្ដីរបស់ខ្ញុំមិនព្យាយាមគេចវេះពីតុលាការទេ។ គាត់រវល់ណាស់។ បន្ទាប់ពីការបោះឆ្នោត គាត់នឹងចូលខ្លួនទៅតុលាការ នៅពេលតុលាការកោះហៅគាត់”។
គណបក្សសង្គ្រោះជាតិបានចោទប្រកាន់រដ្ឋាភិបាលថាជាអ្នកជំរុញឲ្យមានការដាក់ពាក្យបណ្តឹងជាច្រើនប្ដឹងលោក កឹម សុខា និងជាអ្នកកំណត់ពេលវេលាសម្រាប់សវនាការ ដើម្បីរារាំងដល់យុទ្ធនាការឃោសនាបោះឆ្នោតរបស់លោក។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានថ្លែងអំពីដីកាចុងក្រោយនេះថា “ វាមានគោលបំណងរំខានដល់ការឃោសនា”។
ចៅក្រមស៊ើបសួរ ពេជ្រ ម៉ារ៉េន នៅសាលាដំបូងរាជធានីភ្នំពេញ ដែលទទួលបន្ទុកកាន់សំណុំរឿងនេះបានអះអាងថា លោកជាអ្នកចេញដីកានេះ ប៉ុន្តែបានបដិសេធមិនធ្វើអត្ថាធិប្បាយបន្ថែមទៀតទេ។
អ្នកស្រី កែវ សុផាណ្ណារី បានដាក់ពាក្យប្ដឹងលោក កឹម សុខា កាលពីខែកុម្ភៈ ទាមទារប្រាក់សំណង១០.០០០ដុល្លារ ដោយចោទប្រកាន់ថា លោក កឹម សុខា នៅពេលថ្មីៗនេះបានឈប់ឧបត្ថម្ភគាត់ និងកូនចិញ្ចឹមពីរនាក់ បន្ទាប់ពីទំនាក់ទំនងរបស់ពួកគាត់បានបញ្ចប់កាលពីប្រហែលប្រាំឆ្នាំមុន។
កាលពីម្សិលមិញ អ្នកស្រី កែវ សុផាណ្ណារី ដែលបង្ហាញមុខក្នុងប្រព័ន្ធផ្សព្វផ្សាយ បានជំរុញឲ្យលោក កឹម សុខា ចូលខ្លួនដោះស្រាយរឿងក្ដីនេះឲ្យបានឆាប់តាមដែលអាចធ្វើទៅបាន។ អ្នកស្រីបន្តថា “ ខ្ញុំចង់ឲ្យចប់ឆាប់ៗ ព្រោះខ្ញុំចង់បានសំណងមកចិញ្ចឹមគ្រួសារខ្ញុំ”។ នេះគ្រាន់តែជាបណ្ដឹងមួយប៉ុណ្ណោះក្នុងចំណោមបណ្ដឹងបីប្ដឹងលោក កឹម សុខា ។
អ្នកនៅរស់ពីមន្ទីរឃុំឃាំងទួលស្លែងរបស់ខ្មែរក្រហម បានប្ដឹងលោក កឹម សុខា កាលពីខែមិថុនា ពីបទបរិហារកេរ្តិ៍ ជុំវិញខ្សែអាត់សំឡេងដែលក្នុងនោះលោកបានអះអាងថា វៀតណាមបានប្រឌិតឧក្រិដ្ឋកម្មនៅមន្ទីរឃុំឃាំងនេះ កន្លែងដែលប្រជាពលរដ្ឋកម្ពុជាជាច្រើនពាន់នាក់ ត្រូវបានឃុំឃាំង និងធ្វើទារុណកម្ម មុនពេលត្រូវគេយកទៅប្រហារជីវិត។
សាលាដំបូងរាជធានីភ្នំពេញបានកោះហៅលោក កឹម សុខា ទៅឆ្លើយបំភ្លឺពីរលើករួចមកហើយនៅក្នុងរឿងក្ដីនេះ។ សាលាដំបូងខេត្តព្រៃវែង ក៏កំពុងស៊ើបអង្កេតលោក កឹម សុខា ផងដែរទាក់ទិននឹងអង្គរក្សម្នាក់របស់លោកបានប្រើអំពើហិង្សាលើអ្នកស្រី សំ ផល្លា ដែលត្រូវជាម្ដាយរបស់អ្នកស្រី កែវ សុផាណ្ណារី នៅឯយុទ្ធនាការឃោនាបោះឆ្នោតមួយ កាលពីខែមុន។
គណបក្សសង្គ្រោះជាតិច្រានចោលការចោទប្រកាន់ទាំងពីរនោះ។ លោក សម រង្ស៊ី ប្រធានគណបក្សសង្គ្រោះជាតិ ត្រូវតុលាការផ្ដន្ទាទោសពីបទបំផ្លាញទ្រព្យសម្បត្តិសាធារណៈ ផ្សព្វផ្សាយព័ត៌មានមិនពិត និងញុះញង់ ដែលត្រូវបានលុបចោលទាំងអស់ដោយការព្រះរាជទានលើកលែងទោសកាលពីថ្ងៃសុក្រ ដោយត្រួសត្រាយផ្លូវសម្រាប់ការវិលត្រឡប់របស់លោកមកកាន់ប្រទេសកម្ពុជាវិញនៅថ្ងៃសុក្រ នេះ។
លោក សម រង្ស៊ី មេដឹកនាំគណបក្សប្រឆាំង បានរស់នៅដោយនិរទេសខ្លួនឯងអស់រយៈពេលជិត៤ឆ្នាំ ដើម្បីគេចពីទោសជាប់ពន្ធនាគារ១១ឆ្នាំ តាមការចោទប្រកាន់ ដែលជាទូទៅគេជឿថា ជារឿងនយោបាយ៕
ប្រែសម្រួលដោយ តែម សុខុម